E Kekeia Tikai Ainei te Reira?

E TUATI maata a Abiodun i roto i tetai otera maata i Naiteria. Iaia e roka ra i te ngai kaikai anga i tetai aiai, kua kitea e ia tetai kiri moni tei aite ra ki te $1,827, U.T. Ma te kore e tavarevare kua akaoki aia i te moni, tei tikinaia maira e te ona, e manuiri i ko i te otera. Kua tutaki te ngai manitia o te otera ia Abiodun ma tetai ngai angaanga taoonga teitei e kua oronga i te re akameitaki anga kiaia ei to ratou “tangata angaanga meitaki rava atu o te mataiti.” Kua tutaki katoa te ona nana te moni iaia.

Kua akakite a Quality, e makatini nuti o te reira ngai, i te tua, te kapikianga ia Abiodun e “Samaria Meitaki.” I te ui angaia e Quality e me kua timataia rai aia kia apai i te moni nana uaorai, kua karanga a Abiodun e: ‘Ko au tetai o te Au Kite o Iehova. No reira me kite au i tetai mea kare e naku, ka akaoki au i te reira ki te ona nana te reira.’

E manganui i roto i te ngai tangata tei poitirere i te tu tiratiratu o Abiodun. Kua rekareka to Abiodun au taeake Kite no tei tupu, inara kare ratou i poitirere. I te au ngai ravarai o te enua nei kua kiteaia te Au Kite o Iehova no ta ratou au kaveinga teitei. I rotopu ia ratou kare te tu tiratiratu i te mea tuke ua; e ture te reira, e tuanga puapinga no te Akonoanga Kerititiano tika.

Inara, i tetai au taime, penei ka riro te au turanga ei mea ngata i te akara i te tuke i rotopu i tei tiratiratu ra e tei kare. Ka tamanako ana i teia turanga. Ko Festus, tei akono i te au moni tauturu e te akapapaanga moni i roto i tetai putuputuanga o te Au Kite o Iehova i Aperika Opunga, kua anoano tikai aia i te moni.a Kua anoano tana vaine i tetai vai pakari tikai e kua karanga tona au taote e kare te reira e rauka i te taroaroaia. Kua umuumu te are maki e kia tutakiia tetai apa o te moni i mua ake.

Kare a Festus moni. I tona aere anga ki te maata anga o te au tangata no tetai rounu, kua patoiia mai aia. I reira kua manako aia i te moni tana e akono ra e kua manako e, ‘E tau ainei iaku kia tuku i taku vaine kia tumatetengaia e te mate i te mea e ka rauka iaku i te rave i etai mea no te paruru i te reira? Ka kore i reira e “rave ma te akaoki akaou” i te moni a te putuputuanga? Ka rauka iaku i te akaoki i te reira me tutaki mai etai au tangata i ta ratou kaiou ki aku.’

Kua taangaanga a Festus i te moni kare e nana no te tutaki i te are maki. Kua tano ainei tona manakoanga? Kua tano ainei tana i rave i te manako anga i te turanga tumatetenga tana i aro atu?

Naai te Reira Moni?

Na te akara matatioanga i teia au uianga, ka uriuri poto ua ana tatou i tetai au manako meangiti no runga i te tumu e te akakoroanga o te moni mei ta Festus i apai ra. Kua na roto mai te au moni i te au tauturu oronga uaia tei raveia e te au mema o te putuputuanga tei inangaro i te akamaata atu i ta Iehova akamori anga ma. (2 Korinetia 9:7) Kare te reira e taangaangaia ana no te tutaki i te au moni koi, mei te mea e kare okotai e tutakiia ana no ta ratou e rave ra i roto i te putuputuanga. Ma te tuke ra, te taangaanga tikaiia ra te moni tauturu kia rauka mai e no te akono i tetai ngai uipaanga, i te maata anga o te taime tetai Are Uipaanga Patireia. Te oronga maira teia i tetai ngai tau e te meitaki no te au tangata​—te mapu e te ruaine, te apinganui e te putaua—​e raukaʼi i te aravei no te apiianga Puka Tapu.

Naai ra te reira moni? .Na te putuputuanga te reira ei pupu. Kare okotai mema tataki tai e manako e akapeea te moni i te akapou angaia. Koi akatere ei te pupu aronga pakari i te tutaki anga o tetai au akapou anga putuputuanga tei matauia, me raveia tetai tutaki anga tuke, ka oronga te pupu aronga pakari i te mea ki te katoa anga o te putuputuanga no ta ratou akatika anga.

Raveanga ma te Akaoki Akaou e me e Kekeia?

No te mea no tana parani i te tupau viviki i te moni, kua manako a Festus i tana angaanga ei raveanga ma te akaoki akaou. Inara, te taangaanga ra te Webster’s New Dictionary of Synonyms i tetai atu au tuatua no runga i “te raveanga e te akaateaanga i te apinga a tetai atu i te maata anga o te taime na te keia anga me kore ma te kore tona kite anga e ma te kore ua rai tana akatika anga.” Te nga tuatua e “kekeia” e te “keia.” Ma te kore te tika anga me kore mana anga, kua apai a Festus i te moni a te putuputuanga. No reira, ae, kua apa aia i te kekeia. E keia aia.

E tikai, te vaira te au tu akaapa anga i roto i te akakeu anga no te kekeia. Te kite nei tatou e mei te akaraanga o Iuda Ikariota, tei irinakiia no te tiaki i te moni tei akonoia e Iesu e te au apotetoro akarongo ra. Te karanga ra te Puka Tapu e: “E keia [a Iuda], e nana i mou i te pute, e nana rai i apai i nga mea i tukuia ki roto ra.” (Ioane 12:6) Tei akakeuia e tetai ngakau kino e te noinoi tikai, kua kino ua atu rai a Iuda. I te openga kua topa takiri aia ki roto i te pikikaaanga i te Tamaiti a te Atua​—no te 30 moni ario.​—Mataio 26:14-16.

Inara, kua akakeuia a Festus no tona manata i tana vaine maki. Ko te aiteanga ainei e kare aia i apa? Kare. Ka tamanako ana i ta te Puka Tapu i karanga no runga i te kekeia anga i roto i tetai turanga tumatetenga mei teia: “Kare e akarukeia te keia, kia keia ei akapangia i tona kaki kia mate i te pongi ra; Kia kitea ra, e tataki itu ïa tana kia akaoki mai; e ope rava tei tona ra are i te apai mai.” (Maseli 6:30, 31) I tetai tu ra, me mou, ka aro atu te keia i te utunga katoa o te ture. I tau ki te Ture a Mose, e tau te keia kia tutaki i tana rave anga kino. No reira i te mea e ka akamaroiroi me kore te rave i te kotoe anga no te kekeia, te akamatakite ra te Puka Tapu e noatu i roto i te au turanga tumatetenga, ka tupu atu te kekeia i roto i te ngere anga i te pae puapinga, te akama, e tei maata rava atu, te ngere i ta te Atua mareka anga.

Ei Au Kite na Iehova, pouroa te au Kerititiano mou katoatoa, ko taua aronga tikai tei orongaia te au apainga i roto i te putuputuanga, e tau ratou ei aronga akaraanga meitaki, “e kare e tapepeanga.” (1 Timoteo 3:10) Kare i rauka mai ana ia Festus te moni tana e tapapa ra, e no reira kare i rauka iaia i te tupau i te moni tana i apai ra. Kua kiteaia mai i reira tana i rave. Eaa tei tupu kiaia? Naringa e e keia tataraara kore aia, kua akaateaia rai aia mei te putuputuanga Kerititiano ma. (1 Petero 4:15) Inara kua taitaia tikai aia e kua tataraara. No reira, i raukaʼi iaia i te noo ki roto i te putuputuanga, inara kua ngere aia i tana au akameitaki anga o te tavini anga.

Irinakianga i te Atua

Kua akamatakite te apotetoro Paulo e na te kekeiaanga a tetai tangata tei karanga ra e te tavini ra aia ia Iehova e apai mai i te akakino anga ki te ingoa o te Atua e te iti tangata Nona te ingoa. Kua tata a Paulo e: “Ko koe oki ko tei apii atu i tetai ke ra, kare koe e apii ia koe uaorai? ko koe oki tei ako ua e, auraka e keia, te keia na oki koe? Kua akakinoia oki te ingoa o te Atua . . . ia kotou.”​—Roma 2:21, 24.

Ko Agur, e tangata pakari o te au tuatau taito ra, kua rave rai aia i teia manako. I roto i tana pure kua pati aia kia kore ‘aea aia e putaua, e kia keia iora, e ko te akaiki puapinga kore ua i te ingoa o tona Atua.’ (Maseli 30:9) Ka akara ana e kua akatika te tangata pakari e ka riro te putaua ei apai mai i te au turanga te ka timata i tetai tangata tika kia keia. Ae, ka riro te au taime ngata ra ei timata i te akarongo o tetai Kerititiano i roto i to Iehova tu kite i te akono i te au anoano o tona iti tangata.

Inara, ko to Iehova Au Kite tiratiratu, kapiti mai te aronga putaua ra, e akarongo to ratou no te Atua “koia tei tutaki mai i te aronga i kimi tikai iaia.” (Ebera 11:6) Kua kite ratou e te tutaki ra Iehova i tona aronga akarongo na te tauturu anga ia ratou kia akono i to ratou au anoano ra. Kua akataka meitaki a Iesu i te reira i roto i tana Tuatua i te Maunga, te na ko anga e: “Auraka kotou e apiapi ua, ka na ko ei ra, Eaa ua ta matou kia kai? e, Eaa oki ta matou kia inu? e Eaa to matou kakau kia kakau? . . . kua kite oki to kotou Metua i te ao ra e, kia rauka taua au mea katoa ra ia kotou e tikaʼi. E na mua ra kotou i te kimi i te basileia o te Atua, e te tuatua-tika nana ra; e kapiti katoaia mai taua au mea katoa ra ia kotou.”​—Mataio 6:31-33.

Akapeea te Atua i te oronga anga mai na te aronga tei anoano ra i roto i te putuputuanga Kerititiano? Na roto i te au mataara e manganui. Ko tetai mataara na roto i te au taeake irinaki ra. Te akaari ra te iti tangata o te Atua i te aroa tetai e tetai ma te ngakau tae ra. Te rave tikai ra ratou i te raurau anga Puka Tapu: “Te tangata ra tei iaia te apinga o teianei ao, e kite atura aia i tona taeake i te ngere anga, e karapii atura tona ngakau iaia, teiea te anoano i te Atua i te noo anga i roto iaia? E aku au tamariki ra, auraka to tatou i te aroa vaa ua, e te aroa arero; ei aroa rave ra, ei mea mou.”​—1 Ioane 3:17, 18.

I teianei ao katoa, i roto i te tere atu i te 73,000 au putuputuanga, e tere atu i te a e te apa mirioni Au Kite o Iehova te tauta aruaru ra i te tavini i te Atua i tau ki tana au kaveinga tika ra. Te kite ra ratou e kare rava te Atua e akaruke i tona aronga tiratiratu. Ko te aronga tei tavini ra ia Iehova no te mataiti roa te taaki nei ratou i to ratou au reo i te akatika ki ta te Ariki ko Davida, i tona tata anga e: “I vai ou ana au, e teianei kua ruaine; kare ra au i kite i te tangata tuatua-tika i te akaruke angaia, e tona uanga i te pati aere anga i te kai.”​—Salamo 37:25.

Mei teaa atura i te meitaki atu i te tuku i te akarongo ki roto i te Atua tei akauru ra i taua au tuatua, i te mea e ka tuku i tetai uaorai kia timataia i te keia e penei te ngere anga i te mareka anga a te Atua e tuatau ua atu!​—1 Korinetia 6:9, 10.

[Au Tataanga Rikiriki i Raro]