Tauta Anga Tikai i te Tavini ia Iehova!

“KARE koe e aere e tutu aere!” “Auraka e tuku i toou au tangata kia atoro mai!” E manganui te au vaine Kerititiano te rongo ra i teia e te au tuatua mei teia mei ta ratou au tane patoi ra. Inara me te tavini ra teia au tane i roto i te vaeau, ka aro atu ta ratou au vaine i te au akaaoanga takake ki to ratou akarongo. (Isaia 2:4; Ioane 17:16) Akapeea, i reira, teia au vaine Kerititiano mei teia i te vai tamou anga ma te ketaketa e te maroiroi i te pae vaerua i roto i te tavini anga Patireia?

Na te tu tiratiratu ki te Atua ko Iehova tei kapiti tikai ra te tauta uaorai e tauturu ia ratou kia aruaru. “I toku manako na toku uaorai tu anoano tikai,” i akamaramaʼi a Yvonne, e vaine na tetai vaeau. “Kua kite takere au e te vaira te au mataara e raukaʼi i te autu atu i te patoi anga a taku tane.” E tikai, te vaira ia.

Ko tetai atu vaine Kerititiano, tei akaipoipo ki tetai opita vaeau, kua akakite e akapeea tona turanga tauta tikai i te akariro anga i te oraanga o tana tane kia ngoie mai. “Kua kite aia i taku papaanga no te ra e pera katoa tana, e e ariki ana te aronga vaeau i te reira,” i akamaramaʼi aia. Noatu ra, kare tona tavini anga tamou ia Iehova i te aerenga ngoie ua.

Autuanga i te Tu Maromaroa

E aro putuputu ana te au vaine a te au vaeau i te akaaoanga o te nekeanga i roto i nga mea ra ua i te mea e kia aru ratou i ta ratou au tane ki tetai ngai ke tei mamao mai mei te kainga. I reira, te akanoo angaia i roto i te au ngai matau koreia, e ngoie ua i te manako e tei te ngai mamao ratou. Inara kare teia e anoanoia kia pera. Ko te aronga tei tavini ra ia Iehova e puapinga ia. Eaa te reira? I tau ki te apotetoro Kerititiano ko Petero, koia oki ko “te kapiti anga katoa o te au taeake.” I roto i te mirioni ua atu i teianei, te rave ra te Au Kite o Iehova i roto i te 231 au enua ei pamiri Kerititiano maatamaata, e “akataeake anga.” Ka kite koe ia ratou i te au ngai ravarai.​—1 Petero 2:17, NW tuatua i raro ake.

Ko Susan, tei akaruke viviki ra i tona ngai kainga, e tae maira no te noo ki ko i te ngai akato anga pairere o te vaeau te ngai i tukunaiaʼi tana tane ki reira. Tei ou ra i roto i te akarongo e i raro ake i te taomi anga a tana tane irinaki kore kia akamutu i te pirianga ki roto i te angaanga orometua Kerititiano, kua karanga aia e: “Kua aere viviki au ki te au uipaanga o te reira ngai, e i reira kua rauka iaku i te noo e te tuatua ki tetai atu au tuaine. Ka rauka tikai iaku i te tuatua e na teia kapiti anga i akakeu iaku kia aere tamou ua atu.”

I etai au taime ka akatupu te maromaroa i te taitaia. Noatu i reira ra, ka oronga mai te tuatua meitaki i tetai taki anga akaoraora. Kua tuatua a Glenys, ko tetai tuaine Engarani tei aru i tana tane i tona tukuna angaia ki tetai ngai ke e: “I toku taitaia tikai angaia, ma te tapapa koreia, kua tata mai tetai vaine taku i kite no tetai mataiti roa iaku i roto i te vaeau uaorai e kua akakite mai e koi papetito uaia ake ra aia ei tetai o te Au Kite o Iehova. Kua riro te reira ei akamaroiroi iaku i te tuatau tau.”

Ko Jane, tei teretere ra ma tana tane ki Kenia, kua kite mai aia e kua riro te au uipaanga Kerititiano ei paruru anga, noatu e kua raveia i roto i te au reo kare aia i marama. “Kua kite au e ko teia te ngai ta Iehova i inangaro iaku kia noo,” i akamaramaʼi aia. “Tei rotopu au i toku au taeake, e kua riro ratou ei akaoraora anga iaku. Kua ariki ratou iaku, e kua manako au e e pamiri matou.”

Ko Jane tetai o te manganui i roto i teia au turanga tei kite ra i tona kopu tangata pae vaerua tei kare aia i kite i mua ana!​—Mareko 10:29, 30.

Ngaueue Kore i Roto i te Patoi Anga

“Auraka e manako e, i aere mai ei au e apai mai i te au i te enua nei,” i akamatakite ei a Iesu. “Kare au i aere mai e apai mai i te au, e [“koke,” NW] ra.” (Mataio 10:34) Eaa te aiteanga o tana e tuatua ra? Noatu i roto i tetai pamiri, te ngai te tapapaia ra te tu au, penei “ka titiri vivikiia te koke,” i tuatuaʼi a A. T. Robertson i roto i te Word Pictures in the New Testament. Kua akakite a Iesu e: “E kitea oki to te tangata nei enemi i roto i tona uaorai ngutuare.” (Mataio 10:36) Mei teaa atura te tika i teia au tuatua me riri tetai tokorua akaipoipo i te tuatua mou!

I te akamata anga a Diane i te apii i te Puka Tapu ma te Au Kite o Iehova, kua mareka kore tikai tana tane, e opita i te ngai akato anga pairere o te vaeau. Eaa tei tupu ki to raua turanga akaipoipo? “Kua riro te reira mei tetai poroka vai toka rai i rotopu ia maua,” i akamaramaʼi a Diane. “I noo akaipoipo ana maua ma te mataora. Kare i roa ana te noo ua ra maua i roto i taua ngutuare rai.” Akapeea, i reira aia, i te autu anga atu? “Na te irinaki anga papu uaorai e te tu tauta tikai i puapingaʼi, pera katoa te tauturu mei ko mai ia Iehova e tona vaerua.” Kua akamanako meitaki a Diane i te akaraanga Puka Tapu o te peroveta ko Daniela.

I te tapeka angaia i Babulonia e tei orongaia ra te kai tau kore ki tetai tavini o te Atua, “te manako ra te ngakau o Daniela e, auraka aia uaorai e viivii i taua tuanga kai a te ariki ra.” Ae, kua rave a Daniela i tetai tukuanga tuatua meitaki. I tona ngakau kua akapapu aia e auraka rava e taviivii iaia uaorai na te kaianga i te reira kai. Mei teaa atura te tu maroiroi tana i akari “i akatu ei aia ki tei maata i taua aronga taoonga ra e, auraka aia e akaviivii iaia uaorai”! Tei tupu? Kua akameitaki a Iehova i tona turanga tauta tikai.​—Daniela 1:8, 9, 17.

Pera katoa i teia tuatau penei ka maro mai tetai tane patoi kia akamutu tana vaine i te aere ki te au uipaanga putuputuanga. Akapeea aia me ariu atu? Kua kite a Jane iaia uaorai i roto i teia turanga. Kua akamarama aia e: “Kare rava au e oki ki muri i raro ake i te taomi anga. Kua kite au e kare e tuku ua atu. Kua anoanoia au kia akari e mei teaa te puapinga o teia au uipaanga kiaku.” Kua akameitaki a Iehova i tona manako iaia e aere tamou ra.

“Kua tauta taku tane i te tapu iaku mei te aereanga ki te au uipaanga, inara kare te reira i roa ana,” i akakite ei a Glenys. “Kua aere rai au. Me oki mai au ki te kainga, i etai au taime ka ta aia iaku, e i tetai atu taime ka araveiia mai au ma te tu muteki.” Inara, kua autu aia, na te pure putuputu anga. Pera katoa, kua pure putuputu e rua nga aronga pakari o te putuputuanga ma ia ra, tei akamaroiroi maata iaia kia tamou ua rai i te aere.​—Iakobo 5:13-15; 1 Petero 2:23.

I tetai au taime ka taomi to te tane au pu iaia kia akamaroiroi kore i tana vaine mei te tutu aere anga i te tuatua meitaki. Kua kite mai a Diane e ka anoanoia kia akataka meitaki aia ki tana tane i tana au mea mua. “Kua papa au,” i nana ei, “no te rave atu i te ka tupu mai mei taku tutu aere ua atu anga.” Mei to te au apotetoro rai teia turanga! (Angaanga 4:29, 31) Noatu rai, kua matakite aia i tana tutu aere anga. Kua akakite aia e: “I rave ana au i te au akaputuputu anga no te inu kaope e te oronga i tetai puka Tuatua Mou ki te katoatoa tei tae mai.”​—Mataio 10:16; 24:14.

Kauraro Anga ma te Kore e Tuku Ua Atu

Noatu te taitaiaia ra e te tu apiapi o te akaipoipo anga, te akara ra te au vaine Kerititiano ki te tuatau ki mua e te irinaki ki rungao ia Iehova. Te tauturu ra teia ia ratou kia tamou i tetai manako tau. Te oronga ra ratou i te turuturu anga ki ta ratou au tane i te ngai ka rauka ma te kore e tuku ua atu i to ratou akarongo. Na te rave anga i te reira, te aru ra ratou i ta Petero ako anga akauruia: “Ko kotou oki, e te vaine tini e, e kauraro marie i ta kotou au tane ra.” (1 Petero 3:1) I roto i The Amplified New Testament, te tatau ra teia ikuiku anga apotetoro e: “E tuku ia kotou uaorai ki raro ake ei ngai rua e te irinaki ki rungao ia ratou, e e akatano atu ia kotou uaorai kia ratou.” Ka akara ana e akapeea a Jane i te aru anga i teia ako anga. “Kua akakite mai taku tane kiaku e ko taku i inangaro ra i te rave auraka te reira e tamanata i tana ngai angaanga,” i akamaramaʼi aia. “No reira kua tauta au i te kimi i te au mataara e raukaʼi iaku i te tauturu iaia.”

No reira kua akatika etai au vaine Kerititiano i te aere ki te au angaanga tamataora te ngai i patiia mai ei ta ratou au tane. Inara kua manako papu rai ratou e auraka e tuku ua atu i to ratou akarongo. Kua rave a Jane i te tuatau no te tuatua ki tana tane no runga i teia. Kua akamarama meitaki aia e te anoano ra aia i te aere inara kare aia e inangaro i tona aere anga ki reira ei taakama iaia. “Kua kite takere au e i tetai au taime ka tapapaia te katoatoa tei tae ra kia tu ki runga no te taki karati. Kua apii au e kia aere anake ua te ngateitei kia Iehova, e na te taki karati anga e maata atu ia i te akari ua anga i te ngateitei. Kua kite taku tane e mei teaa atura te manata o te turanga, no reira kua tuatua ngoie ua aia e: ‘Auraka e aere mai!’ Kua akarongo au.”

I tetai tua, ko Glenys kua aru aia i tana tane ki teia tamataora anga, inara kua akara aia i te au opita i mua i te kaingakai. I tona kite anga ia ratou e akapapa ra no te taki karati, kua akaruke meitaki atura aia no te aere ki ko i te are meangiti! Ae, kua akatano atu teia au vaine ia ratou uaorai inara kare rava i tuku ua atu ana.

‘Kia Rauka Mai ma te Kore e Tuatua’

“Me akamako mai au i toku tu kite ei vaine, ka kite taku tane e te taui ra te tuatua mou iaku,” i manako ei a Yvonne. No reira kua tatau aia e kua tatau akaou i te pene i roto i te puka Oraanga Ngutuare Tangata te ingoa “Te Vaine Tei Akaperepere Maataia.”a “Kua akara meitaki tikai au i te papaanga i raro ake i te tumu manako ‘Te Aronga Aue, e te Aronga Tuatua Raurau’! Inara kua kite mai au e ko te maata atu o taku tauta anga i te tuatua ki taku tane, ko te kino atura o te au mea.” Inara, i te openga kua autu atura aia i te tauturu i tana tane kia tavini ia Iehova. Akapeea? Na te taangaanga anga i te kaveinga tei akanooia ia 1 Petero 3:1, e penei te au tane ‘kia rauka mai ma te kore e tuatua.’

Ko te mataara ta te au vaine Kerititiano e akono ra i to ratou au pamiri e maata ta te reira ka rave no te akakite i te akonoanga Kerititiano ki tetai pae atu. “Kua tauta au i te maani i te tuatua mou kia manea tikai,” i akakite ei a Diane. “Me aere au ki te au uipaanga, ka manako maromaroa ua rai taku tane, no reira kua akatupu au i te manako o te ikuiku anga i te tamariki kia mako meitaki tikai me oki mai matou ki te kainga. Kua tauta katoa au i te akarongo meitaki kiaia me oki mai matou.” Ma te marie kua taui mai te tu o taku tane iaia e ariu maira ki te tu meitaki o te pamiri.

Ka rauka katoa i te au taeake tavini o Iehova i te tauturu mai. Kua akakite a Jane e kua rekareka tana tane i te tokorua o te au mitinari Kite tana i aravei i Kenia. “Kua akaoaoa ratou ma ia ra e kua tuatua no runga i te tue poro, e e tu akamanuiri to ratou. I tetai au taime, kua patiia maua ki te au kainga mitinari tukeke no te kaikai.” I akamaramaʼi taku tane i muri mai e: “Kua akamata au i te kite i to Jane akarongo mei tetai akara anga tuke takiri. E au taeake kite tikai tona tei rauka ra i te tuatua no runga i te au tumu manako tukeke.” Ma te aiteite ra, kua taui te tane a Diane i tona manako no te tuatua mou. I te kino anga te motoka tana e akaoro ra, kua aere mai tetai Kite mapu i te tauturu. “Kua riro tikai te reira ei mea umere ki aku,” i nana ei.

E tikai, kare ko te katoa anga o te au tokorua akaipoipo te ka reia mai ki te tuatua mou. Eaa i reira? Te oronga maira a Iehova i te tauturu e raukaʼi i te aronga akarongo i te tamou marie. (1 Korinetia 10:13) Ka tamanako ana i ta Glenys akamaroiroi anga no te aronga i roto i te au turanga tei aite ra ki tona: “Auraka, e auraka rava e ekoko e ko Iehova Tei akamata ra i te akaipoipo anga e te inangaro ra aia i te au tokorua kia noo kapiti. No reira noatu eaa ta te tane ka rave me kore te patoi anga te ka tupu kia koe, kare rava a Iehova e tuku ia koe kia topa.” Noatu e kare tana tane i akamori ake ia Iehova, kua rangi marie mai ra tona tu kiaia e te tuatua mou.

‘Ruru ma te Aue, Kokoti ma te Rekareka’

E tikai, te tauta tikai ra teia au vaine Kerititiano i te tavini ia Iehova. Me tei roto koe i te au turanga mei teia, e akariro i teia ei manako rai noou. E akamaara i te ako anga: “Ko to te Atua ra ko Iehova taau e mataku, e koia taau e akamori, e koia taau e topiri atu.”​—Deuteronomi 10:20.

“Ko tei aere oki ma te aue ra, i te apai aere anga i te ua e ruru aere ra, ka oki akaou maira ïa ma te rekareka, i te apai katoa anga mai i tana ra au ruru,” i akakite ei te tata taramo. (Salamo 126:6) “Ka pou rai te au roi mata ia koe e tauta ra i te akari i te tuatua mou ki toou patana, noatu na te tu muteki me kore te tuatua vaa ua,” i akatika ei tetai Kite. “Inara i te openga ka aue rekareka koe no te mea noatu e kare aia e ariki mai i te tuatua mou, te akameitaki ra a Iehova ia koe no taau tauta anga.”

Ko te katoatoa te tavini akarongo ra ia Iehova noatu te tu patoi i te kainga te tau ra kia akameitaki tikaiia. Te tau ra kia turuia ratou e kia aroaia. Kia tamou ua rai ratou i te turanga tuku kore ua atu, te tauta anga tikai i te tavini ia Iehova!

[Au Tataanga Rikiriki i Raro]

[Tutu i te kapi 28]

Ka riro te apii ma te pure ei akamaroiroi i te tu tauta ei Kerititiano