Te Au Mapu—Ko Taai Apiianga ta Kotou ka Akarongo Atu?
“E akaruke ei tetai papaki i tei akarongoia nei, i te akono anga atu i . . . te tuatua o te au demoni ra.”—1 TIMOTEO 4:1.
1. (a) Eaa te iki anga tei te au mapu ra? (e) Akapeea ta Iehova apii anga?
TE UIANGA te tuatuaia nei i konei ki te au mapu koia oki, Ko taai apiianga ta kotou ka akarongo atu? Te akataka maira teia e tei ia kotou te aronga ou na te tika no te iki anga. Ko te iki anga tei rotopu i te akarongoanga ki te apiianga tu-Atua e te aruanga i te au apiianga a te au temoni ra. Te apii ra a Iehova na tana Tuatua, koia te Puka Tapu, pera katoa na te angaanga orometua a te aronga tana e taangaanga ra ei au komono nona ki runga i te enua nei. (Isaia 54:13; Angaanga 8:26-39; Mataio 24:45-47) Inara te poitirere ra ainei koe e te apii katoa ra oki te au temoni?
2. Eaa ra i puapinga maataʼi kia matakite i te au apiianga a te au temoni e maata oki i teia tuatau nei?
2 Kua tata te apotetoro ko Paulo e: “E kia tae ki te au tuatau a muri atu e akaruke ei tetai papaki i tei akarongoia nei, i te akono anga atu i te au vaerua pikikaa, e te tuatua o te au demoni ra.” (1 Timoteo 4:1) I te mea te noo nei tatou i te au “tuatau openga” te maata nei ta Satani e tana au temoni angaanga, te kite nei ainei koe eaa matou i ui ei i te uianga e, Ko taai apiianga ta kotou ka akarongo atu? (2 Timoteo 3:1-5; Apokalupo 12:7-12) No te mea e kikite tikai to Satani ratou ko tana au temoni, e akavare tikai ta ratou au ravenga no te angaanga, e mea puapinga maata e kia akamanako marie koe ki teia uianga nei.—2 Korinetia 11:14, 15.
Te Au Temoni e ta Ratou Au Apiianga
3. Koai ma te au temoni, eaa ta ratou akakoro anga, e akapeea ratou i te kimi anga kia akatupu i te reira?
3 I te tuatau i mua ana e au angera na Iehova te au temoni ra, inara kua akameameaau ratou i Tei Anga maira ia ratou e no reira kua riro ratou ei aronga tauturu ia Satani. (Mataio 12:24) Ko ta ratou akakoro anga e akaviivii i te au tangata e te akaariu ke ia ratou mei te tavinianga i te Atua. E oti ei teia, kua taangaanga te au temoni na te au puapii tangata ua nei e akakeu i tetai tu oraanga noinoi e te tu tau kore te akaapaia ra e Iehova. (Akaaite ia 2 Petero 2:1, 12-15.) Na te akara akaouanga e i akapeea i mua ana te riro anga te au angera tiratiratu ra ei au temoni ka tauturu ia ia koe i te akataka anga i ta ratou au apiianga e te tu o te oraanga te akakeuia ra e teia au apiianga.
4. (a) Eaa te au angera akarongo kore i aere mai ei ki te enua nei i te tuatau ia Noa ra? (e) Eaa tei tupu ki te au angera rave kino ra e ki ta ratou anaunga i te tuatau o te Vaipuke ra?
4 I te tuatau ia Noa ra, kua inangaro tetai papaki o te au angera i te au tamaine purotu a te tangata ra e kua akaruke te reira au mea ora vaerua ra i to ratou au ngai i te rangi kia aere mai ki te enua nei. Kua anauia mai i to ratou pirianga ainga ma te au vaine ra te au anaunga tei tapaia ra e Toa Uritumu. I te mea kare i te mea tau kia noo te au mea ora vaerua kia piri atu no te ainga ma te au tangata, kua aiteite atu tei raveia ra e taua au angera akarongo kore ra ma te au vaine ra mei te tarevake o te au ravenga totoma tei raveia e te au tane e te au tamaroa o Sodoma ra. (Genese 6:1-4; 19:4-11; Iuda 6, 7) Noatu rai e kua mate atu te au tokorua o taua au angera ra i te vaipuke kapiti katoa ma ta ratou au tamariki tuputupua, kua kiriti taua au angera kikino ra i to ratou au kopapa kiko e kua oki atu ki te rangi te ngai i riro ra ratou ei au oa temoni no Satani te Tiaporo ra.—2 Petero 2:4.
5. Eaa to te au temoni tu ei mea ora ra, e akapeea ratou i te tauta anga kia taruri ke i te au ture a te Atua ra?
5 I te manako anga i teia tuatua enua akakiteanga i to ratou tu mei te akamata anga mai, te kite ra ainei koe eaa te tu mea ora tikai o te au temoni ra? E aronga akatarevake ratou i te akakoro anga no te ainga kare e akara mataia e te tangata, e aronga akatere i teianei ao o te rave anga ainga tau kore. Noatu rai e kua araiia ratou kia kore e akariro ei kopapa tangata to ratou, te rauka ra te mareka anga mei te akatarevake anga i te rave ainga o te aronga te ka rauka ia ratou te taviivii i runga i te enua nei. (Ephesia 6:11, 12) Te tauta ra te au temoni kia taruri ke i te au ture a Iehova no runga i te tu ma e te tu akono te maanianga ia ratou ma te akara anga arairai ua te tu. Te akakitekite ra teia au angera kikino e ko te ainga tau kore e mea noa ua, e tu oraanga mareka ia.
Akakeuanga i te Au Apiianga a te Au Temoni
6. Eaa ra tatou ka kore ei e tau kia poitirere e ka akakeu te au temoni ra i ta ratou au apiianga na roto i tetai tu kikite ra?
6 Kare i te mea poitirere ia tatou e kia akakeu te au temoni i ta ratou au apiianga na roto i te tu kikite, i te mea ko te reira te ravenga ta to ratou arataki, koia a Satani te Tiaporo ra, i akono i te akavareanga ia Eva. E tamanako ana e kua tuatua atu aia kia Eva e mei te mea rai te anoano ra aia i te tauturu atu. “Koia ïa, kua tuatua mai te Atua e, Auraka korua e kai i to te au rakau katoa o te kainga nei?” ta Satani i ui atu. Ei reira kua tamata kikite ra aia i te akaapa i ta te Atua ra apiianga na te tuatuaanga kia Eva e ka puapingaia aia i te kaianga mei to te rakau i tureia ra. “I te rā e kai ei korua i to reira,” kua taputou atura te Tiaporo, “ka puera ïa to korua mata, e ka riro korua mei te Atua ra te tu, i te kite i te meitaki e te kino.” (Genese 3:1-5) E no reira kua timataia a Eva, ae kua akavareia, kia kore e akarongo i te Atua ra.—2 Korinetia 11:3; 1 Timoteo 2:13, 14.
7. Eaa te tupu anga no te au apiianga kikite a te au temoni ra, e eaa te akamatakiteanga ta te reira e oronga maira?
7 I teia au tuatau katoa nei, e manganui te aronga tei akavareia ra. No te kikite tikai te akakeu anga a te au temoni i te ainga tau kore ra e kua riro ia kia arikiia e te aronga e manganui ko ratou tei akaapa ra i te reira i mua ana. Ei akatauanga, i te pau anga tetai vaine tata nutipepa rongonui i te Unaite Teite ra i tetai pepa no runga i te tumu o te pirianga ainga no te aronga kare ra i akaipoipoia, kua tata aia: “Kare roa au i manako e ka akaariu ke uaorai au i toku manako no runga i teia tumu, inara i teianei te irinaki nei au e ko te au tokorua te manako papu ra kia akaipoipoia ka tau kia aere kapiti no etai openga epetoma toko iti ua kia timata ua me te tau ra raua ei tokorua akaipoipoia.” I muri akera kua tuatua aia: “Kare e rauka iaku te irinaki e naku i tata te reira!” Noatu koia uaorai kare i irinaki e kua akatika aia i te poneia, inara kua pera aia! Te taka meitaki ra, ka tau tatou kia matakite e kia kore te au apiianga a te au temoni e akakino i to tatou manako no te au ravenga ta te Atua e akaapa ra.—Roma 1:26, 27; Ephesia 5:5, 10-12.
8. (a) Eaa te aite anga o te taiku anga i te tuatua “ao” i roto i te Puka Tapu? (e) Koai te tutara nei i teianei ao, e akapeea te manako tau na te au pipi a Iesu no teianei ao?
8 Ka tau kia kore tatou e akangaropoina e ko Satani “te ariki o teianei ao.” Ko te tika ra, kua tuatua te apotetoro ko Ioane e “te vai ua nei rai to te ao ravarai i raro ake i taua vaerua kino ra.” (Ioane 12:31; 1 Ioane 5:19) E tika, e kua taiku a Iesu i te tuatua “ao” i etai taime i te tuatua anga no te au tangata ravarai. (Mataio 26:13; Ioane 3:16; 12:46) Inara, e putuputu atu tona taiku anga i te tuatua “ao” no te totaiete tangata katoatoa te vaira i vao ake i te putuputuanga Kerititiano mou ra. Ei akaraanga, kua tuatua a Iesu e ko tana au pipi ka tau e “kare ratou i to teianei ao” (te totaiete tangata tuatua tika kore ra) e no te mea kare ratou i to teianei ao, no reira i riri mai ei teianei ao ia ratou. (Ioane 15:19; 17:14-16) Kua akamatakite katoa mai te Puka Tapu e ka tau tatou kia kopae ke i te riroanga ei oa no teianei ao te tutaraia nei e Satani.—Iakobo 4:4.
9, 10. (a) Eaa te au apinga o teianei ao te akakeu ra i te au anoano ainga tau kore? (e) Akapeea e raukai i te akataka e koai te turu ra i ta te tamataora anga o teianei ao e apii maira?
9 Kua raurau maira te apotetoro ko Ioane: “Auraka e anoano i teianei ao, e te au mea ravarai o teianei ao.” Kua karanga katoa aia: “Ko te au mea ravarai oki o teianei ao, ko te anoano tika kore o te kopapa nei, e te anoano tika kore o te mate nei, e te akatietie o te ora anga nei, kare ïa i to ko mai i te Metua ra.” (1 Ioane 2:15, 16) E tamanako ana i teia. Eaa te apinga i roto i teianei ao i teia tuatau te akakeu ra i te anoano tarevake, no te anoano i te ainga tau kore i te ture? (1 Tesalonia 4:3-5) Akapeea te maata anga o te akatangi anga imene o teianei ao? Kua tuatua tetai opita akava no California e: “Ko te akatumu anga, te apii maira te akatangi anga imene e te meitaki ua ra eiaa koe e akarongo ei ki toou nga metua, e ka tau ua koe kia akono i toou oraanga na te mataara taau e anoano ra.” Te kite ra ainei koe i te tumu o te apiianga te orongaia maira e taua akatangi anga imene ra?
10 E akamanako ana e kua tuatua atu a Satani kia Eva mei te tu rai e: ‘Te ngere ra koe i tetai apinga puapinga. E akono koe i te oraanga kia tau ki taau mataara i anoano. E iki koe na toou uaorai manako i te meitaki e te kino. Eiaa ua koe e akarongo atu ki te Atua.’ (Genese 3:1-5) Kare ainei e ko te reira te tu o te tuatua te kitea ra i te maata anga o te akatangi anga imene o teianei ao? Inara kare na te akatangi anga imene anake ua ta te au temoni apii anga. Te akono katoa ra ratou i te au porokarama okooko i te tivi, te au teata, e te au vitio no te apii. Naea ra? Te akakitekite maira te au apinga komunikeiti anga o teianei ao i te tamataora anga te akariro ra i te au apiianga tu akono a te Atua kia akara anga e e arairai ua ia. Te akakitekite ngateitei ra ratou i te poneia na te akaketaketaanga i te reira e te akari mai anga i te reira ei mea tau kia anoanoia.
11. I te tuatuaanga no te tu akono tau, eaa ta te tivi e putuputu ra i te apii mai?
11 Kua akakite mai te makatini U.S.News & World Report e: “I te 1991, kua akariia mai i nga ngai akatotoa anga nuti e toru [o U.T.] e tere atu i te 10,000 au akariari anga pirianga ainga i te tuatau take; no te akari anga okotai katoa i te pirianga ainga i rotopu i nga tokorua akaipoipoia, kua akariia mai i aua ngai akatotoa anga e 14 au akari anga ainga no te aronga kare ra i rotopu i nga tokorua akaipoipoia.” Na te akarianga e tere atu i te 9,000 au rave anga i te ainga tau kore i te ture i te tuatau take i te mataiti okotai ra, eaa taau ka tuatua e te apiiia ra i te tivi? Ko Barry S. Sapolsky, tei rave kapiti ra i te tata anga i te ripoti “Pirianga Ainga i te Tuatau Take o te Tivi: 1979 te Tuke Anga ki to te 1989,” te tuatua ra e: “Me ka akarakara tetai mapu ou i te tivi no etai mataiti i te au tangata te rave ra i te pirianga tau kore ma te tokorua o tetai atu tangata ke ra me kare e pirianga penei i te pae o te ainga tane e te vaine, ka apii rai ia ratou teia au tauatini ua atu akatutu anga i te au mataiti e manganui e ko te pirianga ainga e mea akamareka anga—e kare e kino e tupu mai.” Kare ra e ekoko anga no teia: Te apii maira te tamataora anga o teianei ao i te aronga ou e kare e ture, te ariki uaia ra te poneia, e kare e kino e tupu mai no te nooanga i roto i tetai mataara te akaapaia ra e te Atua.—1 Korinetia 6:18; Ephesia 5:3-5.
12. Eaa te tamataora anga o teianei ao i akatu mai ei i tetai akakino anga te maata anga oki ki te au mapu Kerititiano ra?
12 Kua akapapaia te akatangi anga imene, te au teata, te au vitio, e te tivi o teianei ao kia inangaroia e te aronga ou. Te akatotoa ra ratou i te au apiianga a te au temoni! Inara ka riro ainei teia ei mea poitirereanga? E tamanako ana i te reira. Me e tuanga te au akonoanga pikikaa e te au poritiki no te ao o Satani—e te taka meitaki ra oki e e pera ratou—ka riro ainei ei mea kia irinakiia e ko te tamataora anga te akakeuia ra e teianei ao te atea ke ra i te mana o te au temoni? Ka tau ra kotou te aronga ou tikai kia matakite auraka “e tuku kia taomiia kotou e teianei ao te akapini nei ia kotou ki roto i tona uaorai akatutu anga.”—Roma 12:2, The New Testament in Modern English, na J. B. Phillips.
E Akara Matatio ia Koe Uaorai
13. Eaa te akara anga matatio naau uaorai te ka tau kia raveia?
13 Ko te tika e ko taai au apiianga taau e akarongo ra te akatakaia ra kare na taau tuatua anake mari katoa ra na taau au angaanga. (Roma 6:16) E no reira e ui kia koe uaorai, ‘Te akakinoia ra ainei toku tu manako ma toku tu oraanga e te au apinga taku e apii ra na roto i te au apinga akatotoa anga manako o teianei ao? Te akatomo maira ainei te au apiianga a te au temoni ki roto i toku nei oraanga?’ Ei tauturu ia koe i te pauanga i taua au uianga ra, eaa koe ka kore ei e akaaite atu i te tuatau e te tauta anga taau e akapou ra ki te apiianga i te Puka Tapu, te aere anga ki te au uipaanga Kerititiano, e te tuatuaanga kia etai ke ra no runga i te Patireia o te Atua ma tei akapouia i te akarakaraanga tivi, te akarongorongo anga akatangi anga imene, te rave tarekareka anga taau e reka ra, me kare te raveanga i etai atu au angaanga aiteite ra? I te mea e maata—e tikai, ko toou oraanga—tei roto i te turanga kino, e akono marie i te akara matatio anga tiratiratu ia koe uaorai.—2 Korinetia 13:5.
14. Eaa te ka akatupu kia kino to tatou ora anga i te pae vaerua, e eaa te tika tau kia manako tamouia e tatou nei?
14 Te kite meitaki ra koe e te akatupu ra te kai taau e kai ana i te tu o toou ora anga i te pae kopapa. Mei te reira katoa, te akatupu ra taau e angai ana i toou manako e te ngakau i te tu o toou ora anga i te pae vaerua. (1 Petero 2:1, 2) Penei ka akavare ua koe ia koe uaorai no runga i toou au inangaro tikai, kare ra e rauka ia koe i te akavare i to tatou Akava, ia Iesu Karaiti. (Ioane 5:30) E no reira e ui kia koe uaorai, ‘Me tei runga a Iesu i te enua nei, ka akama ainei au kia aere mai aia ki roto i toku pia e kia akarongorongo i taku akatangi anga imene me kare kia akarakara i taku e akara ana i runga i te tivi?’ Ko te tika tau ra kia manakoia e te akara maira Iesu e te kite ra i ta tatou au angaanga.—Apokalupo 3:15.
E Kopae Keia te Au Apiianga a te Temoni
15. Eaa ra te au Kerititiano i tau ei kia maro ketaketa atu i te patoi i te au apiianga a te au temoni ra?
15 E maata rava te taomi anga ta te au temoni e tuku mai nei ki rungao i te aronga ou kia akarongo atu i ta ratou au apiianga. I te akara anga te oronga mai nei teia au vaerua kikino i tetai oraanga viviki ua te meitaki anga—tetai no te tarekareka e te mareka anga. Ei akamareka anga i te Atua ra, kua kopae ke a Mose i taito ra i ‘te navenave poto ua o te apa’ ei tetai mema maata no te ngutuare o Pharao. (Ebera 11:24-27) Kare i te mea ngoie ua kia kopae ke i te apinga orongaia mai e te au temoni ra, e no reira ka tau koe kia maro pakari i te rave i te tika. E tika rava oki teia no te mea kua akatuangaia tatou i te ara e e putuputu to tatou ngakau i te inangaro kia rave i te kino. (Genese 8:21; Roma 5:12) No te inangaro kia rave i te tarevake, noatu rai ko te apotetoro ko Paulo kua moto aia iaia uaorai e kare i tuku i te au anoano o tona kopapa kia tutara iaia.—1 Korinetia 9:27; Roma 7:21-23.
16. Akapeea e raukai i te aronga mapu i te patoi atu i te au taomianga kia rave i te tu akono tau kore ra?
16 Noatu rai me ka timataia koe kia “aru i te urupu tangata i te kino,” ka rauka i te Atua i te tauturu ia koe kia patoi i te taomi anga mei ko mai i toou au oa ra kia aru atu i to ratou mataara tarevake ra. (Exodo 23:2; 1 Korinetia 10:13) Inara ka tau koe kia akarongo i ta te Atua ra au arataki anga, ma te akaputuanga i tana au tuatua ki roto i to ngakau. (Salamo 119:9, 11) Ka tau katoa koe kia kite e me akataka ke te aronga ou ia ratou uaorai, ka rauka te akatupu anga i te anoano ainga e ka taki atu ki te aatianga i te au ture a te Atua. “Me te vaira au ko maua anake ko taku inangaro tamaroa, te anoano ra toku kopapa kia rave i tetai apinga e ko toku roro te tuatua maira kiaku kia rave i tetai atu apinga ke,” ko tei akakiteia mai e tetai tamaine mapu. E no reira kia kite koe i toou au kotinga e kia manako oki e e pikikaa toou ngakau. (Ieremia 17:9) Auraka e akataka ke ia koe uaorai. (Maseli 18:1) E akanoo i te au kotinga no te au akakitekite anga inangaro. E ko tetai apinga maata oki, kia piri vaitata anake ma te aronga te inangaro ra ia Iehova e te akangateitei oonu ra i tana au ture.—Salamo 119:63; Maseli 13:20; 1 Korinetia 15:33.
17. Eaa te ka tauturu i te au mapu Kerititiano kia rauka te maroiroi kia patoi atu i te au apiianga temoni ra?
17 Ka tauturu ia koe i tetai apiianga matariki i te au puka Kerititiano tei akapapaia ra ei akamaroiroi ia koe i te pae vaerua. Ei akatauanga, e akara i te puka Questions Young People Ask—Answers That Work e te pene “Te Mārōanga no te Rave i te Tika” i roto i te puka Ka Rauka ia Koe te Ora Mutukore i Paradaiso i te Enua Nei. E tuku i te apii anga Tuatua Tapu tei orongaia maira kia tomo oonu atu ki roto i to manako e to ngakau, e ka akamaroiroi mai te reira ia koe. Ko tetai tumu kare e tau kia ngaropoinaia e koe koia oki i roto i teianei ao akatereia nei e te au temoni kare i te mea ngoie ua te raveanga i te mea tika ra. No reira kia pakari te maro anga. (Luka 13:24) E akamatutu i toou maroiroi i te pae vaerua. Auraka e aru i te aronga paruparu, te aronga mataku te aru ra i te urupu tangata.
Kia Puapingaia i te Apiianga Tu-Atua
18. Eaa etai puapinga no te akarongoanga i te apiianga tu-Atua ra?
18 Kia maara katoa ra, e kare koe e ngere i tetai ua atu apinga meitaki na te akarongoanga i ta Iehova ra apiianga. Te aroa mou maira aia ia koe, e no reira aia i rave ei i te “akakite ia koe i te mea e puapingaʼi koe na.” (Isaia 48:17) E no reira e akarongo i ta Iehova apiianga, e ka kopae ke i te mamae ngakau no tetai akava ngakau akakinoia ra, te ngere i te akangateitei ia koe uaorai, te nui anoano koreia, te au maki opi no te ainga, me kare te tumatetenga mei te reira te tu. Ka rekareka a Iehova me ka oronga tona au tavini i tetai pauanga ki te akaaoanga a Satani e kare e tangata e vai tiratiratu ki te Atua i raro ake i te timataanga. (Iobu 1:6-12) Me ka akariro koe i te ngakau o Iehova kia mataora na te vai tiratiratu anga kiaia, ka ora koe i tana akautunga i to teianei ao, mari ra pouroa te aronga te ka aviri i tana au ture ka mate ia ratou.—Maseli 27:11; 1 Korinetia 6:9, 10; 1 Ioane 2:17.
19. Eaa te meitaki no te kapitianga ma te aronga te ariki ra i te au puapinga o te apiianga na Iehova ra?
19 Me e kapiti anga oa vaitata toou ma kia ratou te aronga te ariki ra i ta Iehova au apinga i rave no ratou, ka rauka ia koe te kite mei tei tupu ana kia ratou. Kua akataka mai tetai vaine tei rave ra i te kai apinga akakona i mua ana e, i rave katoa i te au ravenga tau kore ra: “Naringa kare au i akarongo kia Iehova, kua mate ke ana au. Ko te tangata taku i manako kia akaipoipo au kua mate i te AIDS. Pouroa toku au oa piri vaitata no teianei ao i mua ana kua mate katoa i te AIDS me kore te aere atura ki te matenga. E putuputu toku kite anga ia ratou i runga i te au arataa, e te akameitaki nei au ia Iehova i te au ra ravarai no tana au ture te akatere nei i tona au tangata e ka akatinamou ia i to tatou tu tapu me ka akono tatou ia ratou. Kare au i mataora ana mei teia i mua ana, te rekareka, e te tinamou toku oraanga mei iaku i teianei.” E tika tikai, ka puapingaia tatou i te akarongoanga i ta Iehova ra apiianga!
E Rave i te Iki Anga Tika
20, 21. (a) Eaa nga iki anga e rua te vai maira na te au mapu kia rave? (e) Eaa te puapinga mutu kore te ka tupu mai no te akarongoanga i te apiianga tu-Atua ra?
20 Te raurau atu nei matou ia kotou te aronga ou: E rave i te iki anga tika na te tavinianga ia Iehova. Ei reira kia ngaueue kore ma te pirianga ki taua iki anga ra. (Iosua 24:15) Ko te tika ra, ka rauka anake ia koe i te rave okotai ua o nga iki anga e rua ra. Kua karanga a Iesu e te atea e te pararauare nei te ara—ko te mea ngoie ua ia o te raveanga i taau uaorai ka marekaʼi. Te taki atura te reira mataara ki tetai openga takiri, ki te akapou anga. Ko tetai mataara e o iti ia. E mataara ngata ia no te aere i roto i teianei ao tau kore te oraanga, tei akatereia e te temoni ra. Inara ka taki atu te reira mataara i te openga i te aronga tei na runga i reira te aereanga ki roto i te ao ou umere o te Atua ra. (Mataio 7:13, 14) Ko teaa te mataara taau ka aere? Ko taai te apiianga taau ka akarongo?
21 Kua akaruke mai a Iehova naau e rave te iki anga. Kare aia e opara ia koe kia tavini atu iaia. “Kua tuku au i te ora e te mate . . . ki mua ia koe,” ko ta te peroveta a te Atua ko Mose i tuatua ra, i te raurauanga: “Ka rave i te ora.” Ka raveia teia iki anga, na te “inangaro oki koe i to Atua ra ia Iehova, e kia akarongo koe i tona reo, e kia piri atu koe kiaia.” (Deuteronomi 29:2; 30:19, 20) E iki pakari koe kia akarongo i te apiianga tu-Atua e kia rekareka i te oraanga mutu kore ki roto i to te Atua ra ao ou kaka.
Akapeea Koe me Pau?
◻ Koai ma te au temoni ra, e eaa ta ratou e apii ana?
◻ Akapeea ta te au temoni akakeu anga i ta ratou au apiianga i teia tuatau nei?
◻ Akapeea e raukai te patoi atu i te au apiianga a te au temoni ra?
◻ Eaa te au puapinga no te akarongoanga i te au apiianga a Iehova ra?
[Tutu i te kapi 16]
I mua ake i te Vaipuke, kua akapuapinga atu te au angera akarongo kore e ta ratou uanga i te ta e te rave kino
[Tutu i te kapi 18]
Ka akama ainei koe me ka akarongorongo mai a Iesu i taau akatangi anga imene akaperepere ra?