“I Mou Marie na Au i te Akarongo”

AKAKITEIA E TE AU TAEAKE O BRUNELLA INCONDITI

“E RA marie tikai e te maromaroa te Maanakai. Ko au anake ua to roto i te pia, i te manako anga ma te puapinga kore ra. Mei te mea e te aaere atura na roto i tetai ngai aaere anga. Te aere meitaki ua ra te au mea ravarai, e ma te viviki, kua rutu mai tetai tangata i te ngutupa ki toku nga mata, e kare e ngai no te oro atu, noatu mei teaa taku tauta pakari anga.”

Kua teiaa tikai te poitirere anga maromaroa maata ki te ngakau o Brunella Inconditi e 15 ona mataiti. Te topa marie ua atura te ra puapinga rava atu i tona oraanga ou. I te akamata anga o te reira mataiti kua riro tona aroa tutupu ra no Iehova e te Puka Tapu ei akakeu iaia i te akatapu i tona oraanga kiaia. Ia Tiurai 1990 ka papetitoia tikai aia i te Uruoaanga Tapere “Reo Ma” a te Au Kite o Iehova i Montreal, i Kanata. Inara, te vaitata ra a Brunella i te aro atu i tetai timata anga i tona akarongo te ka ope no te toenga o tona oraanga.

E rua ra i mua ake ka tapapa atu ei aia i te akatutu i tona akatapu anga na roto i te papetito anga vai, kua kite mai a Brunella e e maki rukimia tona. Kua inangaro te au taote o te are maki tamariki i te reira ngai i te akamata viviki i te rapakau anga, i reira kua noo tamou a Brunella ki roto i te are maki.

Kua Akakeu Tana Uaorai Au Tuatua i te Au Taote

Kua kite meitaki a Brunella e e tapu te toto ki te Atua ko Iehova. (Levitiku 17:11) Kua akakite tona nga metua, ko Edmondo raua ko Nicoletta, e kia kore tetai pamu anga toto e raveia i roto i te rapakau anga o ta raua tamaine. “Kua inangaro a Brunella i te au taote kia akarongo i te reira mei iaia katoa, noatu e e meangiti ua aia,” i maaraʼi tona papa. “Kua akakite ngaueue kore aia kia ratou e kare aia e inangaro i te rapakau anga te ka aati i te akaueanga a te Puka Tapu e e ‘akaatea mai mei te toto.’”​—Angaanga 15:20.

Ia Tiurai 10, 1990, e toru nga taote e tetai vaine angaanga na te au tangata tei aravei i to Brunella nga metua e te nga orometua tavini e rua o te putuputuanga o te Au Kite o Iehova i te reira ngai. Kua akapapu mai te au akarakara anga e e maki rukimia lymphoblastic pakari to Brunella. Kua akataka te au taote i ta ratou parani no te tamaki atu i te maki. Kua akatutu meitaki ratou e e ngata tikai te reira i te rapakau. “Kua riro to Brunella tu akono tau e te manako tauta i te akarongo ki te Atua ei akakeu i te au taote e te vaine angaanga na te au tangata. Kua umere ratou i te aroa o tona nga metua e te turu anga a te au oa o te putuputuanga Kerititiano. Kua ariki katoa ratou i te tu o ta tatou marama anga e te akangateitei anga i to ratou turanga,” i maaraʼi tetai o te au tangata pakari o te putuputuanga.

Kua manako atu te au taote i te kopae i te au pamu anga toto. Ka na roto atu a Brunella i te chemotherapy pakari, inara ka meangiti mai tona takino anga mei tei matauia. Ka akameangiti mai teia i te takino anga i tona au teera toto tei akatupuia e te rapakau anga. “Kua akamanako rai te au taote i to Brunella anoano i te pae kopapa, te pae manako ngakau, e te pae vaerua,” i akatakaʼi a Nicoletta. “I to matou pati anga kia ratou kia akara atu i tetai specialist kite i te rave anga toto kore no te rukimia tamariki, kua akatika ratou.” Kua akatupu a Brunella e te aronga angaanga o te are maki i tetai tapeka anga inangaro e te maana.

Au Akakoro Anga Pae Vaerua

Noatu e kua akatupu te rapakau anga mua i etai au tupu anga meitaki, te akamata ua maira to Brunella au manamanata. I te tae anga kia Noema 1990 kua maru mai tona maki, no reira ma te taroaroa kore kua papetitoia aia. I te maaraanga i te au marama tokoiti ua i mua ake, kua akakite a Brunella e: “Kare roa i te mea ngoie ua. Ka anoano koe i te maroiroi maata, e ka anoano koe i te manako papu. . . . Kua timataia toku akarongo, inara kua vai ngaueue kore ua au, e te parani nei rai au kia rauka tetai ngai angaanga ei painia tamou [orometua tamou].”

I te akamata anga o te 1991, kua mamae a Brunella i tetai maki anga akaou. Mei mate rai aia i te na roto anga atu i te chemotherapy, inara ki to te katoatoa poitirere e te rekareka, kua meitaki mai aia. I te tae anga kia Aukute kua meitaki mai aia no te akapou i te marama i roto i te angaanga tutu aere ki te katoatoa ei painia tauturu. I reira kua kino akaou mai tona maki, e i te tae anga kia Noema 1991 kua ki takiri tona kopapa i te kaneta i te au ngai e manganui. Kua akamata tetai atu pupu taote i tetai atu are maki i te rapakau iaia ki te radiation therapy.

Noatu i raro ake i teia au turanga ngata ra, kua vai maroiroi rai a Brunella e kua akanoo i te au akakoro anga nana uaorai. I te kite mua anga i te maki rukimia, kua akakiteia kiaia e penei e e ono rai ona marama ka ora. I teianei, kua vaitata i te okotai mataiti e te apa i muri mai, te rave nei rai a Brunella i te au parani no te tuatau ki mua. “Kare aia i kaimoumou taime ana i te angaanga ua atu ki tana au akakoro anga,” i tuatuaʼi tetai tangata pakari o te putuputuanga. “Kua riro to Brunella akarongo o te Parataito taputouia a te Atua ei akamatutu iaia i roto i tona manamanata. Kua tupu mai aia ma te pakari ra ei Kerititiano noatu e te ou ua ra. Kua riro tona tu akono tau e te tu ei akauru i te putuputuanga e kua re atura i te au ngakau o te aronga tei kite ra iaia, kapiti mai te aronga angaanga are maki.” Kua maara i tona mama e: “Kare rava aia i kopekope ana. Me ui tetai tangata e te peea ra aia, ka pau aia e, ‘Meitaki’ me kore, ‘Kare i kino roa, e peea koe?’”

Tetai Tuatau Tinamou ki Mua

Kua parani a Brunella i te aere ki te Uruoaanga Tapere “Au Turama i te Marama” a te Au Kite o Iehova i roto ia Tiurai 1992. Inara, i te tae anga ki te taime o te uruoaanga, kua tukunaia a Brunella ki roto i te are maki, e te topa marie ua atura tona oraanga. Noatu rai, kua aere aia ki te uruoaanga i roto i tetai nooanga oparapara, te inangaro anga i te kite i te nuku Doing What Is Right in Jehovah’s Eyes.

Kua oki mai aia ki te kainga ki tona pamiri no te nga mea ra openga o tona oraanga. “E tae ua atu ki te openga, e maata atu tona manako i tetai pae e iaia uaorai,” i karangaʼi a Nicoletta. “Ka akamaroiroi aia ia ratou kia apii i te Puka Tapu, te akakite anga kia ratou, ‘Ka taokotai tatou i roto i te Parataito.’”

Kua mate a Brunella i roto ia Tiurai 27, 1992, ma te ngaueue kore i tona manakonakoanga o te tuakaouanga ki te ora i roto i te Parataito i te enua nei. Koi akamata ua akera aia i te aruaru i tana au akakoro anga, inara kua parani aia i te tamou ua atu i tona kaveinga akatapuia i muri ake i tona tuakaouanga. I nga mea ra ua i mua ake ka mate ei aia, kua tata a Brunella i te reta te ka aru mai, tei tatauia i ko i tona rave anga akamaara anga.

“Ki te Au Taeake:

“Meitaki tikai no te aere mai anga. Te riro nei to kotou tae anga mai ei mea maata ki toku pamiri.

“Ki te au tangata tei piri vaitata mai kiaku​—e maata ta tatou i na roto atu ana. Kua rauka ana ia tatou te au tuatau kino, inara kua vai rai etai au taime kangakanga. E tamaki anga pakari tikai e te roa, inara kare au e manako ana e kua autu kore au. Mei tei karangaia i roto i te au Tuatua Tapu, ‘i kukumi ana au i te kukumianga meitaki, kua oti toku oro anga, i mou marie na au i te akarongo.’​—2 Timoteo 4:7.

“E maata katoa taku i apii mai, e kua tupu maata rai au, e kua kite toku au oa e te aronga tei takapini ra iaku i te taui anga. Ka inangaro au i te akameitaki i te aronga katoatoa tei oronga mai kiaku i ta ratou turu anga.

“Ko kotou na tei irinaki ra ki roto i te akatereanga ou e ki roto ia Iehova kua kite e te vaira tetai tuakaouanga, mei ta Ioane 5:28, 29 i karanga ra. No reira e akono ma te maroiroi i roto i te tuatua mou, e ka rauka ia tatou i te kite akaou i tetai e tetai.

“Ka inangaro au i te akameitaki i te au tangata tei kite i taku i na roto atu ana. Te oronga atu nei au kia kotou takitai i tetai takave anga roa e tetai ongi anga. Te aroa nei au ia kotou katoatoa.”

Kare a Brunella i tuku ana i tona tu ou me kore tona maki ei taroaroa i tona akatapu anga ki te Atua. Te akamaroiroi ra tona akaraanga o te tu akarongo e te tu tauta i te aronga ou e te ruaine anake kia kopae i tetai ua atu mea te ka tapupu ia ratou mei te oroanga i te taemoemo no te ora.​—Ebera 12:1.