Au Uianga a te Aronga Tatau

Kua rekareka tatou i te apiianga i te au totou a Daniela mei tei akakiteia i roto i “Te Punanga Tiaki.” Eaa ra te au ra no te toru e te apa tuatau o Apokalupo 11:3 i tuke ei mei te puka “Revelation Climax”?

Ae, kua oronga atu Te Punanga Tiaki o Noema 1, 1993, i tetai akatikatika anga meangiti no runga i te akatano anga i te ra o te tupuanga i teia tuatau o Apokalupo 11:3. Eaa ra?

Ka akara ana tatou na mua ia Apokalupo 11:2, te taiku ra i te openga e e “a ngauru e rua ara i te marama.” I roto i te Apokalupo 11 irava 3: “E naku e poroki i nga kite tokorua naku ra, kia totou raua ma te kakau paoa, e kia okotai ake tausani, kia rua anere, e kia ono oki ngauru, i te rā.” Aea te reira e tupu ei?

Kua kite takere ana te Au Kite o Iehova e ko te tupuanga o teia totou kua akatupuia e te au Kerititiano akatainuia ki te vaerua i muri ake i te openga o “to te etene tuatau” (te Tuatau Kenitara) i te 1914. (Luka 21:24; 2 Korinetia 1:21, 22) Te tuatuaanga no runga i teia, te karanga ra te Revelation​—Its Grand Climax At Hand!a (1988) i te kapi 164 e: “Te vaira tetai tuatau akairoia o te toru e te apa mataiti i te aiteite anga te au kite anga ngata o te iti tangata o te Atua ki te au tupu anga tei totouia i konei​—te akamata anga ki te tupuanga o te tamaki mua o teianei ao i te tuanga openga o te 1914 e te tupu anga atu ki te tuanga mua o te 1918.”

Ka akara ana e ko te ra tei orongaia ko “te akamata anga o te tamaki mua o teianei ao i te tuanga openga o te 1914 [e tae ua atu] ki te tuanga mua o te 1918.” Te aiteite ra teia ki te ra tei oronga putuputuia, mei to roto rai i te “Then Is Finished the Mystery of God,” au kapi 261-4, (1969).b

Inara, kua akara tikai Te Punanga Tiaki i te au totou i roto ia Daniela, e puka te taiku ra e rua taime no tetai tuatau tei aite ra ki tei taikuia i muri mai i roto ia Apokalupo​—e 3 1/2 mataiti, me kore e 42 marama. Ei akataka tikai, te karanga ra a Daniela 7:25 e ka tamanamanataia te aronga tapu o te Atua “e okotai akera tuatau, e nga tuatau oki, e te vaenga o tetai tuatau,” me kore e 3 1/2 tuatau. I muri mai, kua akakite a Daniela 12:7 e e “okotai rai tuatau, e nga tuatau oki, e te vaenga o tetai tuatau,” me kore e 3 1/2 tuatau, te ka taea te take e “kia ope rava te akapueurikiriki ke anga o te aronga tapu ra.”

No reira e au totou ta tatou te akakite ra i tetai tuatau aiteite i roto ia Daniela 7:25, Daniela 12:7, e Apokalupo 11:2, 3, e pera katoa i roto ia Apokalupo 13:5. Kua akaari atu ta matou au puka e kua tupu pouroa teia i roto i te tuatau 1914-18. Inara i roto i te akono takake anga i teia au totou takitai ra, e manga tuke tetai i roto i te au ra no te akamataanga e te openga.

Inara, kua ui Te Punanga Tiaki o Noema 1, 1993, e: “Akapeea te akatupu anga i teia au totou aiteite katoa ra?” Ae, ko te au totou o te 3 1/2 tuatau tei taikuia ia Daniela 7:25, Daniela 12:7, e Apokalupo 11:3 kua kiteaia ei “au totou aiteite.” No reira, ka aiteite te reira i to ratou akamataanga e to ratou openga.

No runga i te openga, kua akaari atu te makatini e akapeea te tamanamanata anga o te aronga akatainuia o te Atua (Daniela 7:25) i te tae anga ki tona take ia Tiunu 1918 no J. F. Rutherford e tetai atu au akatere o te Totaiete Punanga Tiaki Puka Tapu e te Pepa Akonoanga i te “akautunga angaia no te akaapa anga pikikaa no tetai tuatau roa i roto i te are auri.” Kua riro tikai te reira tupu anga “kia ope rava te akapueurikiriki ke anga o te aronga tapu ra,” mei tei akakiteia ia Daniela 12:7.

Te tareanga ki muri mei ia Tiunu 1918 ka tae atu tatou kia Titema 1914 no te akamataanga o te 3 1/2 tuatau. I te reira marama openga o te 1914, kua apii te aronga akatainuia o te Atua i te enua nei te irava upoko no tera mai mataiti: “‘Ka tika aina ia korua kia inu i taku kapu?’​—Mataio 20:20-23.” Kua akamatakite te atikara tei akakite ra i te reira e: “Koai te ka kite atu e penei te vaira etai timata anga takake, te kapu o te mamae me kore taakama anga, no te au pipi tiratiratu a te Punua Mamoe i te 1915!” Mei ta Daniela 7:25 i akakite no teia tuatau o te 3 1/2 tuatau, ‘kua tupu te tamanamanata anga e kua tupu ua atu i te patoi i te aronga tapu no Tei Teitei ra.’ Kua oripu ua te pa enua i roto i te Tamaki I o Teianei Ao, te ngoie anga ia ratou no te rave i te tamanamanata anga tika kore. Teia te taopenga anga: Pouroa teia au totou aiteite e toru​—Daniela 7:25, 12:7, e Apokalupo 11:3​—kua akatupuia i roto i te 3 1/2 mataiti, me kore 42 marama, mei ia Titema 1914 kia Tiunu 1918.

Te akataka maira teia i te akatikatika anga meangiti no te akatanoanga i te ra o te tupuanga o Apokalupo 11:3. E akatikatika anga teia te tau ra tatou kia akamanako ia tatou e apii ra e e taangaanga ra i te puka Revelation Climax i te tuatau ki mua.

[Au Tataanga Rikiriki i Raro]