Te Apii ra Ainei Koe Mei ko Mai i to Tatou Pu Ikuiku Maata Rava Atu?

“KUA apii au i te ture no te rima mataiti i tetai o te au ngai apii teitei meitaki rava i Paniora,” ta Julio i akataka mai. “Inara ko taku i kite i toku akamata anga i te apiianga i te Puka Tapu e mamao roa atu tona meitaki anga. Kua apiiia mai au e te apii teitei e akapeea kia apii; kua apiiia maira au e te Puka Tapu e akapeea te akono kia ora.”

Na roto i te Puka Tapu e kite ei tatou i to te Atua ra au manako, i tana au kaveinga, e tana au ikuikuanga. Te akataka maira te au Tuatua Tapu ia Iehova e ko te “Pu Ikuiku Maata Rava Atu,” no te mea koia te puapii meitaki rava i te ao katoa e pini ua ake. (Isaia 30:20, NW) Kua tapa tikaia mai Aia i te irava Epera e “au ikuiku”​—e tini ei akatakaanga i te tu teitei rava. Ka tau teia ei akamaara mai kia tatou e ko tei apiiia mai e Iehova e mamao roa atu tona teitei i to te apiianga i raro ake i tetai ua atu puapii.

Te Pakari Tau Meitaki Mei ko Mai ia Iehova Ra

Eaa ra i puapinga maataʼi te apiianga tu-Atua ra? Ko te mea mua, no tona ki i te apinganui aite koreia. Te oronga maira ta Iehova apiianga i te “pakari meitaki” kia tatou. Pera katoa oki, ko te pakari a te Atua ka “oronga mai i te ora” no te aronga te ka akono i te reira.​—Maseli 3:21, 22; Koheleta 7:12.

Kua kite tei atu ra i te Salamo 119 e na te pakari o Iehova i paruru iaia i tona oraanga katoa ra. Ei akatauanga, kua imene aia: “Meitaki maata to te ture a to vaa ra iaku, i te auro e te ario e kia tausani ua atu. Auraka au i pingapingareka i taau ra ture, kua mate ïa au i toku tumatetenga anga ra. E kite maata toku ia koe i te au akauenga naau ra, i to toku au enemi ra; e tika oki i te vai marie anga i vaitata iaku. E kite maata toku i to taku au orometua katoa ra: no te mea te akaeatu nei au i taau au tuatua akakite.”​—Salamo 119:72, 92, 98, 99.

Kare ko te tata taramo anake ua tei o ki te tu e penei ‘kua mate i tona tumatetenga anga,’ naringa kare te ture a Iehova ra. Ko Rosa, ko tetai vaine ou no Paniora, te irinaki nei aia e kua ora aia no tona akono anga i te au kaveinga tu Atua ra. “I te tae anga e 26 oku mataiti, kua tamata ke ana au e rua taime kia tamate iaku uaorai,” ko tana ia i maara.

Kua o atu a Rosa ki roto i te ravenga akaturi, te kai tau kore i te kava e te apinga akakona oki. “I tetai ra, iaku i roto i te oonu anga o te tu manakonako kore,” tana i akakite mai, “kua tuatua mai kiaku tetai nga tokorua akaipoipo e Kite e ka akapeea e raukaʼi i te Puka Tapu i te tauturu mai ia tatou i te akakore i to tatou au manamanata. Kua akamata au i te apii i te Tuatua a te Atua, e kua kite au i te rekareka o te reira. I roto i te marama okotai kua rauka mai iaku te maroiroi kia tamata i tetai oraanga ma e te ou takiri. I teianei i te mea e akakoro anga toku no te oraanga, kare oku anoano akaou i te pange anga a te kava me kare te au apinga akakona. E i te mea e maata toku anoano kia riro ei oa no Iehova, kua akapapu au i toku manako kia akono i tana au turanga. Naringa kare te pakari tau meitaki no te Tuatua a te Atua, kua papu iaku e i teianei kua oti ke ana iaku i te akaope i toku oraanga.”

E tika tikaʼi, e akaoraanga ta te pakari no ko mai ia Iehova ra. No reira, ka puapingaia tatou kare mei te au apinga oko maata anake ua o te apiianga tu-Atua mari katoa ra mei ko mai i te au apinga ta Iehova e taangaanga ra ei ikuiku i tona au tavini. I te mea kua akaue mai te Tamaiti a te Atua ra, koia a Iesu Karaiti, ia tatou kia riro ei au puapii e ei akariro i te au tangata ei pipi, ka tau tatou kia apii i te au ravenga meitaki roa no te orongaanga i te ikuiku anga.​—Mataio 28:19, 20.

Ta Iehova Taangaanga i te Au Akatutu Anga

Te karanga ra te Evangeria a Mareko e “kare rava e tuatua parabole kore kia tuatua [a Iesu] kia ratou.” (Mareko 4:34) Kare i te mea poitirere ua teia tu apii anga na Iesu. Kua aru ua aia i tetai o te au mataara ta te au tuatua totou a Iehova i oronga atura ki te iti tangata o Iseraela. Te vaira i roto i teia au tuatua etai au akatutu anga taka meitaki ra.​—Isaia 5:1-7; Ieremia 18:1-11; Ezekiela 15:2-7; Hosea 11:1-4.

E akara, ei akatauanga, i akapeea ta Iehova taangaanga anga i tetai akatutu anga ririnui ei apii mai ia tatou e e puapinga kore te au itoro. Te akakiteia maira ia Isaia 44:14-17 e: “Kua tipu iora i te arezi nana uaorai . . . Kua tanu oki aia i te arana, e . . . kia riro oki ei vaie na te tangata: kua rave oki i te reira ei murumuru iaia uaorai; kua taʼu iora i te umu, kua tunu i te areto: kua anga iora oki aia i te atua, kua akamori atura; kua anga iora i te idolo kotikotiia ra, e kua tupou ki raro i te reira. Kua taʼu oki aia i tetai pae ki te ai; na runga i tetai pae kua kai aia i te puaka; kua tunu iora oki aia i te kai tunu, e pangia akera tona kaki. . . . Ko te toenga ra, kua anga iora ïa ei atua, ei idolo kotikotiia nona: tupou iora aia ki raro i te reira, kua akamori atura; e kua pure atura i te reira, e kua na ko atura, Kia ora au ia koe; ko koe oki toku atua.” Ko te au akatutu anga mei teia e au apinga mana ririnui ia i te tauturuanga i te aronga ngakau tiratiratu kia kopae ke i te akamori itoro e te au apiianga pikikaa.

Au Uianga Kimikimianga Oonu

Te vai katoa ra i te Puka Tapu etai au akaraanga e i akapeea ta Iehova ra akatikatika anga i te manakoanga o tetai papaki o tona au tavini na te au uianga akakeu manako. Ko te pateriareka ko Iobu tetai o teia aronga. Kua tauturu marie atu a Iehova iaia kia tamanako i tona uaorai tu meangiti ua i te pae atu i te Atua ra. Kua raveia teia na tetai au papaanga uianga, tei kore ua ra a Iobu i tau kia pau no tei kore i rauka iaia.

“Iea koe iaku i akatumu i te enua nei?” ta Iehova ra i ui atu kia Iobu. “E naai i topiri i te moana ki te au pa? . . . E mou ainei ia koe te akapumaana o Matariki, e matara ainei te au tapeka o Oriona? . . . Kua aite ainei toou rima ki to te Atua?” Kua kapiti katoa teia ui anga taakaakaanga i te uianga puapinga maata rava ra: “E akaapa mai ainei koe [e Iehova] iaku kia akatikaia koe?”​—Iobu 38:4, 8, 31; 40:8, 9.

Na teia au uianga kimikimianga i akariro kia kite a Iobu e kua tuatua aia ma te kite kore. E no reira, kua unui aia ki muri e kua tataraara. (Iobu 42:6) Kia aite ki teia tu nei, ka tauturu katoa te au uianga iki meitakiia kia akatikatika i te au manakoanga tarevake i te tuanga a ta tatou tamariki me kare te aronga apiipii Puka Tapu.

Patuanga Irinaki Anga

Ka peea me ka anoanoia tatou kia tauturu atu i tetai tei manako ra e tau kore aia me kare e kite kore? Ko tetai tauturu meitaki no teia tu ko tetai tuatua anga i rotopu ia Iehova raua ko tana peroveta ko Mose. I ta te Atua ra akaue anga ia Mose ei vaa tuatua nona ki mua ia Pharao e to Iseraela ra, kua manako te peroveta e e kite kore aia no te rave i taua angaanga ra. “E reo murare oki, e te ngunguau toku,” tana i karanga. Inara, kua pau atura te Atua: “Naai i anga i te vaa tangata nei? . . . Kare ainei ko au ko Iehova? E teianei, e aere koe, ei vaitata katoao au i toou vaa, e naku e akakite i taau ka tuatua.”​—Exodo 4:10-12.

Kua akaue atura Iehova ia Aarona te tuakana o Mose ra ei vaa tuatua nona, e kua tamata atura raua i te rave i ta raua angaanga i Aiphiti ra. (Exodo 4:14-16) Kare i te tokoiti ua te Au Kite o Iehova tei tu i te manako ngakau tau kore mei to Mose ra i te raveanga i te angaanga orometua i tera are i tera are me kare i te akakitekiteanga i te arataa ra. Mei ia Mose rai, na ta tatou kiteanga e tei ia tatou ta Iehova turuanga e ka kapitiia mai tetai orometua karape kia tatou ka rauka ia tatou te akakore atu i to tatou tu paruparu ua. Mei ia Mose i rauka ra te tatanu i te irinaki anga tae roa ki te rave anga i te au tuatua ririnui tei kitea ra ki roto i te maata anga o te puka o Deutoronomi o te Puka Tapu ra, ma te tauturu anga a Iehova ka rauka katoa ia tatou i te patu i te kite i te tuatuaanga.

Tetai Apii Anga ma te Akaraanga Tau

Kare katoa e tau kia kopae keia te anoano ma te ngakau tae kia tauturu atu i etai ke ra. Ko tetai tu ia tei ngere ra te peroveta ko Iona. Kua akaue atura Iehova ia Iona kia akamatakite i te au tangata o Nineve ra i te akapouanga te vaitata ra no taua oire ra. E mea poitirere ra, kua tataraara te aronga o Nineve ra. (Iona 3:5) Ko te tupu anga, kua taroaroa atu a Iehova i taua tumatetenga ra. Inara, kare a Iona i rekareka i te puapinga anga o tana angaanga tutu aere, kua riri aia e kare tana totou i akatupuia. I akapeea ta Iehova ra tauturu anga iaia kia rauka te manako tika?

Kua taangaanga a Iehova na tetai kikiona akatupuia ra ei apii ia Iona kia kite i te puapinga maata o te utuutuanga ia etai ke ra. Kua tupu temeio ua mai taua kikiona ra i te po e kua riro ei marumaru mareka anga no Iona, kua oti ke ana iaia i te anga tetai are piritanga nona ki vao i taua oire i Nineve ra. Kua “rekareka rava akera” Iona i taua kikiona taakaaka ra. Inara kua akono a Iehova i tetai anue kia motumotu i taua kikiona ra e mae atura. Kua itiia iora ki te ra e kua aere atu tetai matangi vera e maoake, kua riri a Iona e kua karanga: “E mea meitaki iaku te mate i te ora.” (Iona 4:5-8) Eaa ra te apii anga katoa no teia?

Kua tuatua atura Iehova kia Iona i te na ko anga: “Kua tangi koe i te kikiona, tei kore i angaangaia e koe; e kare oki koe i akatupu; ko tei tupu mai i te po okotai, e kua mate rai i te po okotai: E auraka ainei au nei e tangi ia Nineve, i tera ra oire maata, e ono takau tausani anga i te tangata kare i kite i to ratou rima katau e to ratou rima kaui, e te au puaka katoa oki e manganui?”​—Iona 4:9-11.

Mei teaa ra te ririnui o taua apii anga ma te akaraanga tau ra! E maata atu to Iona manako anga no te kikiona akatupuia ra i tona manako anga no te au tangata e tauatini ua atura. Noatu rai e mea maata te manako anga no tetai ua atu tuanga o ta te Atua ra au mea i anga mai, ko te tauturuanga i te akaora anga i te au oraanga au tangata e angaanga maata rava atu tona puapinga.

Ikuikuanga ma te Akakoromaki

Mei ta Iona rai i kite ra, kare i te mea ngoie ua te rave anga i ta tatou angaanga orometua. (2 Timoteo 4:5) Inara, ko te tu akono akakoromaki kia etai ke ra ka tauturu mai ia.

Akapeea toou manako me e marie tetai o taau aronga e apiiia ra i te Puka Tapu me kare e tu manako tau kore ua? Te apii maira to tatou Pu Ikuiku Maata Rava Atu ia tatou e akapeea te akono i taua manamanata ra. Kua akaari aia i te tu akakoromaki maata i to Aberahama uiui anga maata iaia ra i te au uianga no te akapouanga tei vaitata maira ki runga ia Sodoma e Gomora ra. “E akapou katoa ainei koe i te tangata tuatua-tika, e te akono kore i te Atua?” ta Aberahama i ui atu. “Penei ake e rima ngauru ua tangata tuatua-tika tei taua oire ra,” ta Aberahama i manono atu. “E akapou rai koe, kare koe e akakore i te ara a to taua ngai ra, i taua au tangata tuatua-tika e rima ngauru i roto ra?” Kua akakeu te pauanga akatika anga a Iehova ia Aberahama kia manono ua atu tae roa kia topa mai te numero ki te tai ngauru. Kua kite oki a Iehova e ko te ngutuare anake ua o Lota ra tei tau kia akaoraia, e kua oti te akapapa anga no te reira. Inara kua tuku akakoromaki ua te Atua ia Aberahama kia uiui tamou marie iaia tae roa kia mou ia Aberahama te maata o to Iehova ra aroa ua.​—Genese 18:20-32.

Kua akamanako marie a Iehova i to Aberahama kite kotingaia ra e tona au manako ngakau e tona ra manako aroa. Me ka kite katoa oki tatou i te au tu kotingaia o ta tatou aronga e apii ra, ka tauturu ia ia tatou kia akaari i te tu akakoromaki iaia e tauta ra kia kite i tetai apiianga takake me kare kia akakore atu i tetai ravenga kua tupu ra kiaia.

E Apii Ua Atu Mei ia Iehova Maira

Ko te Atua ko Iehova tikai te Pu Ikuiku Maata Rava Atu. Na roto i te au akatutu anga, te au uianga, te au apiianga ma te akaraanga tau, kua oronga akakoromaki mai aia i te kite. E rave tatou i te reira i te aru anga i tana au ravenga no te apiianga, ka riro mai tatou uaorai ei au orometua meitaki atu.

I te mea ko te aronga apii ra ia etai ke atu ka tau kia kore e akono kore i te apiianga ia ratou uaorai, e akono ua atu tatou “kia apiiia e Iehova.” (Isaia 54:13) Kua tata a Isaia: “E ka riro to kotou au mata ei au mata tei kite ra i to kotou Pu Ikuiku Maata Rava Atu. E ka akarongo toou uaorai taringa i tetai tuatua i muri ia koe i te tuatuaanga: ‘Teia te mataara. E aaere na reira, e toku iti tangata,’ penei e e tau toou iti tangata i te aere ki te tua katau e penei e e tau ki te tua kaui.” (Isaia 30:20, 21, NW) Na te tamou marieanga i te aaere na to Iehova ra ara e te tauturuanga ia etai ke ra kia rave i te reira, ka rauka ia tatou te tuatau takake no te apiianga mei to tatou Pu Ikuiku Maata Rava Atu no te tuatau mutu kore ua atu.

[Tutu i te kapi 28]

Kua ui atura Iehova kia Iobu: “E naau ainei i akaue i te aeto i rere ei ki runga ra, ka angaʼi tona koanga ki runga take ra?”

[Tutu i te kapi 28]

Na te kikiona akatupuia ra, kua apii atu a Iehova ia Iona kia maata atu te manako anga no te au tangata ra