Te Apii ra Ainei Koe Mei ta Iesu i Rave?

“Kua va ua te tangata i tana tuatua: I apii oki aia ia ratou ma te mana, kare mei ta te au tata tuatua ra.”​—MATAIO 7:28, 29.

1. Koai ma tei aru ia Iesu i tona apii anga i Galilea ra, e eaa tei tupu kia Iesu?

TE AU ngai ravarai i aere ei a Iesu, kua akaputu atura te au urupu kiaia ra. “Aere atura Iesu na Galilea katoa e kako rava ake, i te apii anga i roto i to ratou au sunago ra, e te tuatua anga i te evangelia o te basileia, e te akaora anga i te au maki ravarai, e te au mate katoa o te tangata.” I te totoa anga te ripoti o tana au angaanga, “e motuanga tangata maata tei aru mai iaia no Galilea mai, no Dekapoli, no Ierusalema, no Iudea, e no te pae i Ioridana ra.” (Mataio 4:23, 25) I te akaraanga ia ratou, “aroa atura aia ia ratou, no te mea kua mate ratou i te roiroi, e kua pueurikiriki keia, mei te mamoe tiaki kore ra.” Iaia e apii ra kua kite ratou i tona aroa me kare inangaro maru no ratou; mei te mea rai e e inu vairakau parai ki runga i to ratou au puta tei akapiri vaitata atura ia ratou kiaia.​—Mataio 9:35, 36.

2. Kapiti atu ki te au temeio a Iesu ra, eaa tei akavaitata atu i te aronga tini ra?

² Mei teaa ra te au rapakauanga kopapa ta Iesu i rave temeio ra​—te tamaanga i te au repera, kua akarongo te taringa turi, kua kite te matapo, kua aaere te au pirikoki, kua ora akaou mai tei mate ra! E mea tika rava e kua riro teia au akakite anga umere i to Iehova mana i te raveanga angaanga na roto ia Iesu kua akapiri vaitata mai i te au urupu ra na roto i te au numero maata! Inara kare ko te au temeio anake ua te au apinga tei akapiri vaitata atura ia ratou; e maata te au urupu tei aere katoa mai oki no te rapakauanga i te pae vaerua i ta Iesu apiianga ra. E tamanako ana i tei tupu kia ratou, ei akatauanga, i muri ake i te akarongoanga i tana Tuatua rongonui i te Maunga ra: “E kia akaoti akerā Iesu i teianei tuatua anga, kua va ua te tangata i tana tuatua: I apii oki aia ia ratou ma te mana, kare mei ta te au tata tuatua ra.” (Mataio 7:28, 29) Kua taiku mai to ratou au rapi i te au tuatua ikuiku mei ko mai i te au rapi i taito ra ei mana no ratou. Kua apii a Iesu ia ratou ma te mana no ko mai i te Atua ra: “Ko taku e tuatua nei, ko ta te Metua ïa i akaue mai iaku, ko taku e tuatua nei.”​—Ioane 12:50.

Kua Itae Tana Apiianga i te Ngakau

3. Akapeea te tuke o ta Iesu rave anga i tana tuatua mei ta te au tata tuatua e te au Pharisea?

³ Ko te tuke anga i rotopu i ta Iesu apiianga e ta te au tata tuatua e te au Pharisea kare ko te au tumu tuatua anake​—koia te au tuatua mou mei ko mai i te Atua ra i te tuke anga ma te au tuatua ikuiku apainga teiaa na te tangata maira—​mari katoa ra ko te tu o te oronga anga mai i te reira. Ko te au tata tuatua e te au Pharisea e aronga akateitei e te tu akariri, ma te akaue anga i te au taoonga akatietie anga e te akarukeanga avirianga i te au tangata ei aronga “kua taumaaia ïa.” Inara, ko Iesu, e taakaaka, e maru, e takinga meitaki, e te tangi, e putuputu i te akatikaanga, e kua akakeuia aia ma te aroa no ratou. Kua apii a Iesu kare ma te au tuatua tika anake mari katoa ra ma te au tuatua rekaia mei tona ngakau maira, tei tomo tika atura ki te au ngakau o te aronga akarongo maira iaia. Kua akapiri vaitata maira tana tuatua rekareka i te au tangata kiaia ra, kua akakeu ia ratou kia aere viviki mai ki te iero kia akarongorongo atu kiaia, e kua akariro ia ratou kia aru vaitata atu iaia e te akarongo anga kiaia ma te mareka anga. E maata ratou tei aere mai kia akarongo atu iaia, ma te tuatuaanga: “Kare rava e tangata e tau te tuatua i ta tera ra tangata.”​—Ioane 7:46-49; Mareko 12:37; Luka 4:22; 19:48; 21:38.

4. Eaa te apinga i roto i ta Iesu tutuanga tei akaanga atu i te au tangata e manganui?

⁴ E mea papu, ko tetai o te au tumu i rekarekaʼi te au tangata i tana apiianga no tona taiku anga i te au akatutu anga. Kua akara a Iesu i te au apinga ta etai katoa i akara ra, inara kua manako aia i te au apinga kare ra ratou i manako ana. Te au riri te tupu ra i te kainga, te au manu e maani ra i to ratou koanga, te au tangata ruru ra i te ua, te au tiaki te apai maira i te au punua mamoe i ngaro ra, te au vaine te tui ra i te au pananaki ki runga i te kakau piro ra, te au tamariki te tarekareka ra i te ngai okoanga, te aronga tautai te kika maira i ta ratou au kupenga​—te au apinga noa ua tei akaraia ra e te katoatoa—​kare ra i te apinga noa ua i te au mata o Iesu ra. Te au ngai ravarai i akara aia, kua kite aia eaa tana ka rauka kia taangaanga ei akatutu i te Atua e Tona Patireia me kare ei akataka i tetai tumu no runga i te totaiete tangata takapini iaia ra.

5. Kua akatumuia ta Iesu au akatutuanga ki runga i teaa, e na teaa i meitaki ei tana au parapore?

⁵ Kua akatumuia ta Iesu au akatutu anga ki rungao i te au apinga ta te au tangata e akara ra e manganui te au taime i te au ra ravarai, e me ka kapitiia atu teia au tuatua mou ki teia au apinga matauia ra, kua tauru vivikiia e te oonuia ki roto i te au manako o te aronga te akarongorongo maira. Kare taua au tuatua mou ra e akarongorongo uaia; te kiteia ra ratou e te mata o te manako e kua ngoie ua i te maaraaraia i muri akera. Kua akairoia ta Iesu au parapore na te tu mama ua, kare i akaapiapiia ki etai au apinga puapinga kore ua te ka riro ei mea arai i te mataara e ka akameangiti mai i to ratou kiteanga i te au tuatua mou ra. Ei akaraanga, e akamanako ana i te parapore no te tangata tupu Samaria ra. Ka kite pu koe eaa te tu o tetai tangata tupu meitaki. (Luka 10:29-37) Tera katoa oki nga tamaroa e rua ra​—kua tuatua tetai e ka angaanga aia i te kainga vine ra inara kare aia i rave, ko tetai tei karanga kare aia e angaanga inara kua rave aia i te angaanga. Kua kite viviki ua koe e eaa te aiteanga tikai no te akarongo—​koia te raveanga i te angaanga tei akaueia ra. (Mataio 21:28-31) Kare e au manako i vareamoe me kare i oripu ua i te tuatau o ta Iesu ra apiianga. Kua ki to ratou au manako i te akarongoanga e te akaraanga.

Kua Tuku Ua a Iesu me Kua Akaperepere te Aroa i te Reira

6. Ko teea te tuatau e tauturu maataʼi te manako tau, me kare te tuku ua anga?

⁶ E manganui te au taime me tuatua te Puka Tapu no te tu manako tau, kua akakite mai te tata anga i raro ake e ko tona aite anga kia tuku ua. E tuku ua te pakari no ko mai i te Atua ra me e au turanga etai te tau ra. Ka tika tatou kia manako tau, me kare kia tuku ua, i etai taime. Ka tau te aronga pakari kia mareka i te tuku ua me te akaperepere ra te aroa i te reira e ka akatikaia e te tataraara. (1 Timoteo 3:3; Iakobo 3:17) Kua akaruke mai a Iesu i etai au akatauanga umere no te tuku uaanga, i te akatikaanga i te au tuke anga ki te au ture matauia me ka akakite mai te aroa e te inangaro i te reira.

7. Eaa etai akatauanga no ta Iesu ra tuku ua anga?

⁷ Kua tuatua mai a Iesu: “Kareka te uuna iaku ki mua i te aroaro o te au tangata nei, e uuna katoa au iaia ki mua i te aroaro o taku Metua i te ao ra.” Inara kare aia i kopae ke ia Petero, noatu rai e kua uuna a Petero iaia e toru taime. E au turanga tau etai, e mea papu e kua akamanakoia e Iesu. (Mataio 10:33; Luka 22:54-62) Pera katoa oki e au turanga tau etai i te aati anga a tetai vaine i te Ture a Mose e mate atekeria ra tona i te aereanga mai ki roto i te aronga tini ra. Kare katoa a Iesu i akaapa atu iaia. Kua kite aia i te tu apiapi taitaia o taua vaine ra. (Mareko 1:40-42; 5:25-34; akara katoa ia Luka 5:12, 13.) Kua tuatua a Iesu ki tana au apotetoro auraka e akataka iaia e ko te Mesia aia, inara kare aia i mou tamou ki te reira ture i tana akataka anga iaia uaorai e koia ia ki tetai vaine Samaria i te ruavai ra. (Mataio 16:20; Ioane 4:25, 26) I roto i teia au tu katoa, kua akariro te aroa, te aroa ua, e te inangaro kia tika te tuku uaanga.​—Iakobo 2:13.

8. Ko teea tuatau e akamingi ei te aronga tata tuatua e te au Pharisea i te au ture, e i naea ka kore ei ratou e akapera?

⁸ E tuke ra te kore anga te au tata tuatua ra e te au Pharisea e tuku ua. No ratou uaorai ka aati ratou i ta ratou au ikuiku anga Tapati kia taki atu i ta ratou toa puakatoro ki te vai. Me kare me topa ta ratou toa puakatoro me kare ta ratou tamaiti ki roto i tetai ruavai, ka aati ra ratou i te Tapati kia taki mai iaia ki vao. Inara no te au tangata noa ra, kare ratou e tuku ua i tetai ngai meangiti ua! Ko ratou “kare ra tetai rima o ratou e akatukia atu i taua [au umuumuanga].” (Mataio 23:4; Luka 14:5) Kia Iesu ra, e maata atu to te au tangata puapinga i te maata anga o te au ture ra; ki te au Pharisea ra, e maata atu te au ture i to te au tangata.

Riroanga ei “Tamaiti no te Akauenga”

9, 10. I muri ake i te oki akaouanga ki Ierusalema, kua kitea atura Iesu e tona nga metua ki ea, e eaa te puapinga maata o ta Iesu ra uiuianga?

⁹ Te aue ra tetai papaki e okotai ua tupu anga tei tataia no to Iesu ou anga ra. Inara e manganui kare i kite i te puapinga maata o taua tupu anga ra. Kua akakiteia mai te reira kia tatou ia Luka 2:46, 47: “E po toru akera, kite atura raua iaia ki roto i te iero, te noo ra i rotopu i te au orometua, te akarongo atura e te ui atura kia ratou. Umere anake iora te aronga katoa i akarongo iaia ra i tona kite e tana tuatua.” Te akakite maira te Kittel’s Theological Dictionary of the New Testament i te manako e i roto i teia tu ko te tuatua Ereni no te “ui atura” kare i te kimi manako ua no te tamaiti ra. Ka rauka taua tuatua ra kia taikuia ki te uianga tei uiia ra ki roto i te akavaanga, te kimikimi anga, uianga patoi, noatu rai ko te “au uianga kimikimi e te kikite a te au Pharisea e te au Sadukea,” mei tei taikuia maira ia Mareko 10:2 e te Mareko 12:18-23.

¹⁰ Kua tuatua ua atu taua tikitinari ra: “I [te] manako anga i teia taiku anga penei kia uiia me . . . te akakite ra a [Luka] 2:46 e, kare i te uianga kimi kite no te tamaiti ra, mari ra ko Tona autu anga i te taumaro anga. Ka tau meitaki te [Luka 2 irava] 47 ma te manako openga nei.”a Ta Rotherham urianga i te Luka 2 irava 47 te akakite maira i te reira ei tetai maro anga: “I teianei te aronga katoa tei akarongo atu kiaia ra kua va ua ratou uaorai, no tona kite e tana au pauanga.” Te tuatua maira ta Robertson Word Pictures in the New Testament e ko te aite anga o to ratou va ua anga e “kua tu mai ratou ki vao ia ratou uaorai mei te mea rai te akapuku maira o ratou mata ki vao.”

11. Eaa te tupu anga kia Maria raua ko Iosepha i ta raua i akara e i akarongo oki, e eaa ta tetai tikitinari akonoanga e tuatua ra?

¹¹ I te tae anga mai nga metua o Iesu ki reira, “poitirere atura raua.” (Luka 2:48) Te karanga ra a Robertson e ko te aite anga o taua tuatua Ereni i roto i teia tuatua anga “kia poitirere viviki ua, kia akaoro atu na tetai moto anga.” Kua tuatua kapiti atu aia e “kua rere poitirere atura” a Iosepha raua ko Maria i ta raua i akara e i akarongo ra. I tetai tu, kua riro ke ana a Iesu ei orometua umere. E i te manako anga i teia tupu anga i te iero ra, kua karanga te angaanga a Kittel e “kua akamata ke ana a Iesu i Tona ouanga ra i te maro anga i riro ra Tona aronga patoi kia akamutu i te openga ra.”

12. Eaa tei akatakaia i ta Iesu uriuri anga manako ma te au arataki akonoanga i muri akera?

¹² E kua akamutu ra ratou! I etai au mataiti i muri iora, na taua tu uiuianga ra i autu ei a Iesu i te au Pharisea ra tae roa e “kare atura tetai i ui mai kiaia, mei te reira rā mairai, i te mataku.” (Mataio 22:41-46) Pera katoa te au Sadukea kua akamutekiia no runga i te uianga no te tuakaou anga, e “kare rava atura ratou i ui akaou mai kiaia i te mataku.” (Luka 20:27-40) Kare katoa te aronga tata tuatua i meitaki mai. I muri ake i tetai uiui anga na tetai o ratou ra kia Iesu, “kare rava atura e tangata i ui akaou mai kiaia, i te mataku.”​—Mareko 12:28-34.

13. Na teaa i akariro i taua atianga i te iero ra ei mea puapinga maata i to Iesu ra oraanga, e eaa tetai atu matakite anga ta te reira e akakite maira?

¹³ Eaa ra teia atianga tei kapitiia ra a Iesu ratou ko te au orometua i te iero ra i tau ei kia akatakaia mai mei tona ou anga no te akakitekite anga? E tuatau ariu anga te reira i roto i te oraanga o Iesu. I tona 12 anga mataiti, kua riro aia mei ta te au ngati Iuda i tapa ra e “tamaiti no te akauenga,” kua tau kia apai i te akonoanga i tona au ture katoatoa ra. I to Maria akaapa anga kia Iesu no te manako taitaia tana i akatupu ra kia raua ko Iosepha, kua akakite maira te pauanga a tana tamaiti e penei kua kite aia i te tu temeio o tona anauia mai anga e tona tuatau ki mua ei Mesia. Te akatakaia maira te reira na tona akakiteanga na roto i tetai mataara tika tikaʼi, e ko te Atua tona Metua: “Eaa korua i kimi ei iaku? kare korua i kite e, ei roto rai au i te are o taku Metua e tau ei?” E mea tau ra, ko teia te au tuatua mua na Iesu mai tei tataia ki roto i te Puka Tapu, e te akakite maira i tona matakite i ta Iehova akakoro anga no tona tonokia mai anga ki te enua nei. E no reira, ko teia tupu anga katoa ko tetai ia o te mea puapinga maata rava.​—Luka 2:48, 49.

Te Aroa ra Iesu e te Kite ra i te Tamariki

14. Eaa te au tumu meitaki penei ka akatupuia e tei tataia no Iesu iaia e ou ra i te iero te ka akamatakite i te aronga ou?

¹⁴ Ka tau teia tuatua tataia kia akamareka takake i te aronga ou ra. Te akaari maira i akapeea to Iesu apii anga akatenga i tona tupu anga kia riro mai ei tangata pakari. Kua va ua te au rapi i te iero ra i te pakari o teia “tamaiti no te akauenga” e 12 mataiti. Inara kua angaanga ua atu aia ma Iosepha ki roto i tana ngai kamuta, “akarongo atura” iaia e Maria, e tupu atura “te akaperepereia mai e te Atua e te tangata katoa.”​—Luka 2:51, 52.

15. Akapeea ta Iesu turu anga i te aronga ou ra i tona tuatau i te angaanga orometua i te enua nei, e eaa te aite anga o teia no te aronga ou i teia tuatau?

¹⁵ E turu maata a Iesu i te aronga ou i te tuatau o tana angaanga orometua i te enua nei: “E kia akara mai te kau taunga nunui e te au tata tuatua i te au ravenga tuke tana i rave ra, e te tamariki i roto i te iero i te kapiki anga, e te na ko anga e, Hosana i te tamaiti a Davida; makitakita rava akera ratou, E kua tuatua maira kiaia, Te kite na koe i ta ratou e tuatua nei? Kua karanga aturā Iesu, A: kare kotou e tatau ra, I rauka ia koe te akameitaki no roto i te vaa o te tamariki meangiti e te kai u?” (Mataio 21:15, 16; Salamo 8:2) Mei te reira rai tana turu maata i te au anere ua atu tauatini aronga ou i teia tuatau nei i te aronga te tamou marie ra i to ratou tiratiratu e te akatupu ra i te paapaa anga, ko tetai papaki o ratou kua rave i te reira ma te tutaki atu ki to ratou au oraanga!

16. (a) Eaa te apiianga ta Iesu i apii ki tana au apotetoro na te akatuanga i tetai tamaiti ou ki roto ia ratou ra? (e) I teea tuatau taitaia tikai i to Iesu oraanga i vai ei tona manako no te au tamariki ra?

¹⁶ I te taumaro anga te au apotetoro ra e koai o ratou tei maata, kua tuatua atura Iesu ki te 12: “Ko te tangata i anoano e, ei mua aia, ei akaopenga rava aia e tikaʼi, e ei tavini no ratou ravarai. Kua rave atura aia i tetai tamaiti iti, kua tuku atura i rotopu ia ratou, kua ikiiki iora, na ko atura ia ratou, Ko te kite mai i tetai tamaiti iti mei teianei, no toku nei ingoa, kua kite mai aia iaku; e ko te kite mai iaku ra, kare ïa ko au anake tana i kite maira, koia ra, ko tei tono mai iaku nei.” (Mareko 9:35-37) Pera katoa oki, iaia e aere atura ki Ierusalema no te taime openga, kia aro atu i tetai akava anga kino rava e te mate, kua akataka aia i te tuatau no te au tamariki: “Ka tuku mai ana i te tamariki mea riki, kia aere ua mai kiaku nei, auraka e akakoreia atu; mei ia ratou nei oki to te basileia o te Atua.” E reira “kua rave atura aia ia ratou, kua ikiiki iora, kua tuku atura i tona rima ki rungao ia ratou, akaora atura ia ratou.”​—Mareko 10:13-16.

17. Eaa ra i ngoie uaʼi no Iesu kia tuatua atu ki te au tamariki, e eaa te ka tau kia maaraara te au tamariki nona ra?

¹⁷ Kua kite a Iesu eaa te tu ei tamaiti ki roto i te ao o te aronga mamaata. Kua noo kapiti aia ma te aronga mamaata, kua angaanga kapiti ma ratou katoa, kua kite aia i te kauraro anga ia ratou ra, e pera katoa oki kua kite aia i te maanaana, te manako ngakau tinamou no te aroaia e ratou. E te au tamariki, ko teia Iesu rai e oa ia no kotou; kua mate aia no kotou, e ka ora atu kotou e tuatau ua atu me ka akarongo kotou ki tana au akauenga.​—Ioane 15:13, 14.

18. Eaa te manako rekareka ka tau tatou kia akamou ki roto i te manako, kia maata oki i te au tuatau taitaia me kare kino?

¹⁸ Ko te rave i ta Iesu e akaue maira kare ia i te ngata roa mei tei akaraia ra. E te aronga ou, tera aia te vai maira no kotou e no etai katoa ra, mei ta tatou e tatau ra ia Mataio 11:28-30: “E aere mai kotou kiaku nei, ko te aronga katoa i roiroi, e te aronga teiaa i te apainga, naku e akaanga i to kotou roi. Ka rave mai i taku amo ki rungao ia kotou [me kare, “Aere mai kiaku ra i raro ake i taku amo,” NW, tataanga i raro ake], e kia apiiia kotou e au; te maru nei au, e ngakau akaaka toku, e rauka oki ia kotou te akaangaroianga i to kotou vaerua. Te maru nei taku amo, e te māmā nei taku apainga.” E tamanako ana, ia koe e aaere nei na roto i te oraanga tavinianga ia Iehova, te aaere ra a Iesu i te pae ia koe, i te akariroanga kia maru te amo e kia mama te apainga. E manako rekareka tikai te reira no tatou katoatoa!

19. Eaa te au uianga no ta Iesu au mataara no te apiianga penei ka tau tatou kia akamanako mei tetai taime ki tetai taime?

¹⁹ I muri ake i te tamanakoanga i etai au mataara tokoiti ua ta Iesu i apii mai ei, te kite ra ainei tatou e te apii ra tatou mei tana i rave ra? Me kite tatou i te aronga te makiia ra te kopapa me kare te onge ra i te pae vaerua, te akakeuia ra ainei tatou ma te aroa kia rave i te ka rauka ia tatou kia tauturu ia ratou? Me apii atu tatou ia etai ke ra, te apii atura ainei tatou i te Tuatua a te Atua, me kare, mei te au Pharisea ra, te apii ua ra ainei tatou i to tatou uaorai au manako? Te matakite ra ainei tatou kia kite i te au apinga takapini ia tatou te ka tau kia taangaangaia ei akataka, ei akaari, ei akamarama, e kia akatere atu i te kiteanga i te tuatua mou i te pae vaerua? Te kopae ra ainei tatou i te mouanga ketaketa i etai au ture me, no etai turanga, e tau atu te aroa e te aroa ua na te tuku ua anga i te akono anga i taua au ture ra? E ka peea te au tamariki? Te akaari ra ainei tatou i te manako maru e te aroa takinga meitaki mei ta Iesu i rave ra? Te akamaroiroi ra ainei koe i taau tamariki kia apii na te mataara ta Iesu i rave iaia e tamaroa ra? Ka akono ainei koe ma te ngaueue kore mei ta Iesu i rave ra mari ra kia papa no te ariki maanaana i te aronga tataraara ra, mei te moa e akakoukou i tana anaunga i raro ake i tona peau ra?​—Mataio 23:37.

20. Penei eaa te manako rekareka te ka akapumaana ia tatou uaorai ia tatou e tavini ra i te Atua?

²⁰ Me ka tauta tatou kia rave i te meitaki te ka rauka ia tatou kia apii mei ta Iesu i rave ra, e mea papu e ka akatika aia ia tatou ‘kia tuku ia tatou ki raro ake i tana amo ma ia katoa ra.’​—Mataio 11:28-30.

[Au Tataanga Rikiriki i Raro]

Maara Ainei ia Koe?

◻ Eaa ra te au urupu i akaputu atu ei kia Iesu?

◻ Eaa ra a Iesu i tuku uaʼi i etai ture i etai taime?

◻ Eaa ta tatou ka kite mei ta Iesu uiuianga i te au orometua o te iero ra?

◻ Eaa te au apiianga te ka kite tatou mei to Iesu ra pirianga ma te au tamariki?