Au Uianga a te Aronga Tatau

Akapeea ra te au puapinga o te au angaanga a te taunga maata a Iesu Karaiti, tei taikuia ra ia Ebera 4:15, 16, i tau ei ki te “mamoe ke atu” i teianei ra?

Noatu e e aite anga maata ta Iesu tuanga ei Taunga Maata ki te aronga te ka piri atu kiaia i te rangi ra, ka puapinga katoaia te au Kerititiano e manakonako anga to ratou no te enua nei i te au angaanga taunga a Iesu i teia tuatau.

Mei ia Adamu mai, kua akateiaaia te au tangata e te ara. Te mamae ra tatou mei te tu tiama kore i akairiia maira, mei te au Iseraela rai. Kua uri atu ratou ki te akapupu anga o te kau taunga maata e te au oa taunga, tei oronga i te au atinga no ta ratou uaorai au ara e pera katoa no te au tangata. Kare i roa ana, kua akatainuia a Iesu ei taunga “mei ia Melekizedeka te tu.” I muri ake i te akatuakaou angaia, kua mama mai a Iesu ki mua ia Iehova te oronga anga i te puapinga o tona atinga tiama ei tangata ra.​—Salamo 110:1, 4.

Eaa ra te aite anga o teia kia tatou i teia tuatau? I roto i tana reta ki to Epera ra, kua uriuri manako a Paulo i ta Iesu angaanga ei Taunga Maata. I roto ia Ebera 5:1, ka tatau tatou: “Ko te kau taunga mamaata katoa i ikiia no roto i te tangata nei, kua akonoia ïa na te tangata, ei rave i te au mea o te Atua ra, ei apai i te atinga e te tarangaara ra.” I na, i roto i te Ebe 5 irava 5 e te 6, kua akaari a Paulo e kua riro a Iesu ei taunga maata, te ka arataki atu ei au puapinga no tatou.

Akapeea ra? Kua tata a Paulo: “E Tamaiti ua rai oki aia, i kite aia i te akamoraro i tona au mate; E no te mea kua akatapu ravaia aia ra, riro atura ïa ei tumu no te ora mutu kore no te aronga katoa e akarongo iaia ra.” (Ebera 5:8, 9) I te akamata anga, penei te maani ra taua irava ra ia tatou kia akamanako e akapeea e raukaʼi te meitaki ia tatou i roto i te ao ou, e e raukaʼi te ora mutu kore me akakoreia te tu ara o te aronga te vai tiratiratu ra ki te Atua e kia Iesu. E manakonako anga meitaki te reira, tei akatumuia ki runga i te puapinga o to Iesu atinga oko tau ra e tana angaanga ei Taunga Maata.

Noatu ra, ma te tika anga, penei ka puapingaia tatou i teia tuatau nei mei tana tuanga me kare angaanga ei Taunga Maata ra. E akara ia Ebera 4:15, 16: “Kare oki to tatou i te taunga maata e kore e tika kia aroa mai ia tatou i to tatou au paruparu nei; i rokoia katoa oki aia i te au timataanga katoa, mei ia tatou katoa nei rai, kare rava ra e ara. E teianei e akavaitata ua atu tatou i te terono o te aroa ua ma te mataku kore, kia aroaia mai tatou nei, e kia rauka te meitaki ei tauturu mai ia tatou i te tuatau e tau ei ra.” Aea ra te “tuatau e tau ei ra”? Me anoano tatou i te aroa e te meitaki. Ko tatou katoatoa, no to tatou tu tiama kore, e mea tau kia akamanako atu i teia anoano no teia nei.

Kua akakite mai a Ebera 4:15, 16 i te tumu tuatua no Iesu ra​—e taunga i te rangi i teianei—​tei riro katoa ana ei tangata ra, no reira ka rauka iaia te manako ngakau mai. Kiaai ma? Kia tatou. Aea? I teia tuatau nei. Iaia ei tangata ra, kua kite a Iesu i te au taitaia e te au taomi anga tei matauia e te au tangata. I tetai atianga, kua pongi a Iesu e kua kaki vai. E noatu te tu tiama, kua roiroi aia. E tau ia ei akapapu anga kia tatou. No teaa ra? No te mea kua kite a Iesu i te tu roiroi natura, kua kite oki aia e te akapeea ra tatou i te au taime. Kia maara katoa, kua akakoromaki rai a Iesu i te taumaroanga vareae i rotopu i tana au apotetoro. (Mareko 9:33-37; Luka 22:24) Ae, e au manamanata rai tona. Kare ainei te reira e oronga mai kia tatou i te akapapu anga e te kite ra aia me e manamanata to tatou, e te tu paruparu? E tika tikai.

Me paruparu koe, eaa taau ka rauka i te rave? Kua karanga ainei a Paulo e kia tiaki ua atu koe e tae ua atu, ki roto i te ao ou, i toou Taunga Maata ra, ia Iesu ra, kia tauturu ia koe kia riro mai toou manako e te kopapa i te tiama? Kare. Te karanga ra a Paulo e: “Kia rauka te meitaki ei tauturu mai ia tatou i te tuatau tau ei ra,” e kua o atu teia tuatau. Pera katoa, ia Iesu ei tangata ra, kua kite aia i te mamae e te au tu ngata, “te au timataanga katoa, mei ia tatou katoa nei rai.” No reira me aro atu tatou i taua au mea ra, kua papa aia i te tauturu ia tatou, tei akatumuia ki runga i tana i marama i ta tatou e kite ra. Kare ainei te reira e akapiri vaitata atu ia koe kiaia ra?

E akara i teianei i te Ebe 4 irava 16. Te karanga ra a Paulo e ka rauka ia tatou​—te kapiti mai ra teia i te aronga akatainuia e te aronga o te mamoe ke atu—​i te aere atu ki te Atua ma te tu mataku kore i te tuatua. (Ioane 10:16) Kare ta te apotetoro aite anga e ka rauka ia tatou i te tuatua ua i tetai apinga na roto i te pure ta tatou e inangaro ra, pera te riri, e te au mea kare e tano ana. Mari ra, no te tumu o to Iesu atinga e tana tuanga ei Taunga Maata, ka rauka ia tatou te pure atu ki te Atua noatu e e aronga ara tatou.

Ko tetai atu mataara te ka rauka te akapuapinga ia tatou i teia taime nei mei te au angaanga a to tatou Taunga Maata, ko Iesu Karaiti ra, te o maira ta tatou au ara, me kare te au tarevake. E tika tikai kare tatou e tapapa i te reira i roto i teia akatereanga e ka taangaanga a Iesu i te meitaki maata o tona atinga kia tatou. Noatu me ka rave aia i te reira, kare rai e rauka ia tatou te ora mutu kore. E akamaara ana ainei i te tupu anga tei rekotiia i roto ia Luka 5:18-26, no runga i te tangata akangoru te tuku angaia tona roi na roto i te tapoki are ra? Kua karanga atu a Iesu kiaia: “E tama, kua akakoreia taau ara.” Kare te aite anga e na tetai au ara takake i akatupu i te akangoru anga. Te tau ra te aite anga e ko ta te tangata ra au ara noa ra, e i tetai tua ra ka o atu tona tu tiama kore tei iri maira, i te akatupu i te au mamae anga.

Te akatumu anga ia ki runga i te atinga tana ka oronga mai, ka rauka ia Iesu i te apai ke i te au ara a te tangata, mei te puakanio akaora ra i te apai ke anga i te au ara o Iseraela i te Ra Tapokianga Ara. (Levitiku 16:7-10) Inara, ko te tangata akangoru ra e tangata rai aia. Ka ara akaou aia, kare e roa atu ana ka mate aia, mei te aronga ara ra. (Roma 5:12; 6:23) Ko ta Iesu e tuatua ra kare te aite anga e kua orongaia te ora mutu kore ki te tangata i taua taime ra. Mari ra kua akameitaki maataia te tangata ra ma te akakore anga i taua taime ra.

I teianei e akamanako ana i to tatou turanga. Ei aronga tiama kore, ka ara rai tatou i te au ra katoa. (Iakobo 3:2) Eaa te ka rauka ia tatou i te rave no runga i te reira? I runga i te rangi e Taunga Maata aroa to tatou te ka rauka ia tatou i te akavaitata atu kia Iehova na roto i te pure. Ae, mei ta Paulo i tata ra, ka rauka ia tatou ravarai te ‘akavaitata ua atu i te terono [o te Atua ra] o te aroa ua ma te mataku kore, kia aroaia mai tatou nei, e kia rauka te meitaki ei tauturu mai ia tatou i te tuatau e tau ei ra.’ No reira, pouroa te aronga o te mamoe ke atu i teia tuatau nei te rauka ra te au puapinga anga umere tikai, kapiti atu te akava ngakau marama ra, mei te au angaanga taunga maata a Karaiti.

Ka rauka i te au Kerititiano ravarai te manakonako ra i te enua nei i te akara ki mua ki te au puapinga maata o te ao ou te aere maira. I reira ka rauka i to tatou Taunga Maata i te rangi ra i te taangaanga maata i te meitaki o tona atinga, te aratakianga atu i te akakore anga i te ara. Ka rauka katoa iaia i te oronga maata atu i te au puapinga na te akonoanga i te oraanga o te au tangata i te pae kopapa e te pae vaerua. E ka totoa maata a Iesu i te apii a te au tangata o te Atua i runga i te enua nei, i te mea oki e te apiianga i te Ture apainga maata ia na te au taunga i Iseraela. (Levitiku 10:8-11; Deuteronomi 24:8; 33:8, 10) No reira, ia tatou e puapinga ra mei te au angaanga taunga a Iesu i teia tuatau nei, e maata atu te tapapa maira ia tatou!