Kua Rave Raua i To Iehova Anoano

Mose Raua ko Aarona—Nga Tangata Tutu Mataku Kore i te Tuatua a te Atua

KA TAMANAKO ana i te tutu: Te tu ra a Mose e 80 mataiti e tona tuakana, ko Aarona, ki mua i te tangata ririnui rava atu i runga i te enua nei​—ko Pharao o Aiphiti. Ki te au Aiphiti e maata atu teia tangata i te komono i te au atua. Kua irinaki ratou iaia uaorai ei atua. Kua akaraia aia e ko te kapua anga o Orati, e atua katu aeto. Kapiti katoa kia Aititi, e Otiriti, kua akaaere a Orati i te toru tai maata i roto i te au atua e te au atua vaine o Aiphiti.

Tetai ua atu ka aravei ia Pharao ka kite atu i te tu kino o te katu atepi e atoro maira ki vao mei rotopu i tona korona. Kua irinakiia, e ka rauka i teia ovi te tutua i te ai e te akapou anga ki runga i etai au enemi o Pharao. I teianei kua aere mai a Mose raua ko Aarona ki mua i teia ariki atua ma tetai pati anga kare e tupu akaou​—e kia tuku aia i te au Iseraela tei akatuikaaia kia aere e raukaʼi ia ratou te akono i te tamataora anga ki to ratou Atua, ko Iehova.​—Exodo 5:1.

Kua taputou takere a Iehova e ka paketaketa te ngakau o Pharao. No reira, kare a Mose raua ko Aarona i poitirere ana i tana pau anga marokiakia: “Koai a Iehova, ka akarongo atu ei au i tona reo, ka tuku atu ei ia Iseraela? Kare au i kite ia Iehova, kare oki au e tuku ia Iseraela.” (Exodo 4:21; 5:2) No reira, kua akapapaia te akanoonoo anga no tetai maro anga umere tikai. I te aravei akaou anga, kua oronga a Mose raua ko Aarona i te akapapu anga umere kia Pharao e te komono ra raua i te Atua mou e te mana katoatoa.

Kua Tupu Tetai Temeio

Tei akaueia e Iehova, kua rave a Aarona i tetai temeio tei akapapu i to Iehova tu teitei i runga ake i te au atua o Aiphiti. Kua titiri aia ki raro ki mua ia Pharao i tana rakau, e i reira rai kua riro mai te reira e e ovi maata! Kua umereia teia temeio, kua kapiki atu a Pharao i tana au taunga angaanga manamana.a Ma te tauturu o te au mana temoni, kua rauka i teia au tangata i te rave i tetai mea aiteite ma ta ratou uaorai au rakau.

Me i manako ana a Pharao e tona au orometua, e mea poto ua te reira. Tamanako ana i to ratou nga mata i te apuku taki tai anga ta Aarona ovi i ta ratou au ovi! Kua kite tei i reira e kare e rauka i te au atua Aiphiti te akata atu i te Atua mou, ko Iehova.​—Exodo 7:8-13.

Inara, noatu i muri i teia, kua vai paketaketa rai te ngakau o Pharao. I muri ua ake i to te Atua apai anga mai i te au papaki anga kino tikai e tai ngauru, me kore te au mate ra, ki rungao ia Aiphiti i te openga ra a Pharao te akakite anga kia Mose e Aarona: “Ka tu, ka aere ke korua i toku au tangata, korua katoa ma te au tamariki a Iseraela; e aere, e akamori ia Iehova, i ta korua i tuatua maira.”​—Exodo 12:31.

Au Apiianga no Tatou

Na teaa ra i raukaʼi ia Mose raua ko Aarona te aravei atu i te tangata ririnui ko Pharao o Aiphiti? I te akamata anga, kua akaari a Mose i te ngere anga i te irinaki i tona tu, te karangaanga “e reo murare oki e te ngunguau.” Noatu i muri mai i te akapapuia anga e to Iehova tauturu, kua pati aia: “E tono koe i tei tau ia koe kia tono ra.” Mei tera te tu, kua pati a Mose e kia tono te Atua i tetai atu. (Exodo 4:10, 13) Noatu rai, kua taangaanga a Iehova i te tangata maru ko Mose, te oronga anga kiaia te pakari e te maroiroi tei anoanoia no te rave i tana angaanga.​—Numero 12:3.

I teia tuatau, te rave nei te au tavini o te Atua ko Iehova e Iesu Karaiti i te akaue anga kia “akariro i to te pa enua katoa ei pipi.” (Mataio 28:19, 20) Kia rave i ta tatou tuanga i te akatupuanga i teia angaanga, ka tau tatou kia taangaanga meitaki i te kite Tuatua Tapu e tetai au tu karape te rauka ra ia tatou. (1 Timoteo 4:13-16) I te mea e ka akara atu ki to tatou tu kite kore, e ariki ua tatou ma te akarongo i etai tukuanga angaanga ta te Atua i oronga mai kia tatou. Ka tau iaia te akamaroiroi ia tatou kia rave i tona anoano.​—2 Korinetia 3:5, 6; Philipi 4:13.

I te mea e te aro atura a Mose i te au tangata e te au patoi anga temoni, kua anoano tikai aia i te tauturu ririnui atu i te tangata. No reira, kua akapapu a Iehova iaia: “I na, kua akariro au ia koe ei Atua kia Pharao ra.” (Exodo 7:1) Ae, tei ia Mose te turu anga tu-Atua e te mana. Ma to Iehova vaerua i runga iaia, kare a Mose tumu no te mataku ia Pharao me kore te au pupu tutara akaparau.

Kia irinaki katoa tatou ki runga i to Iehova vaerua tapu, me kore mana ririnui, no te akaoti i ta tatou angaanga. (Ioane 14:26; 15:26, 27) Ma te turuanga tu-Atua ka rauka ia tatou i te tuatua i te au tuatua a Davida, tei imene: “Ka irinaki au i te Atua, kare au e mataku; eaa ta te tangata nei puapinga kia rave mai iaku?”​—Salamo 56:11.

Na roto i tona tu tangi kare a Iehova i akaruke ana ia Mose i roto i tana tukuanga angaanga. Mari ra, kua tuatua te Atua e: “E toou tuakana ra ko Aarona ei peroveta ïa naau. Ko koe te karanga atu i te au mea ravarai taku e akaue kia koe na: e na toou tuakana na Aarona e karanga atu kia Pharao.” (Exodo 7:1, 2) Mei teaa ra te aroa ia Iehova no te angaanga i roto ua i te au kotinga te ka rauka ia Mose no te rave!

Te oronga maira te Atua kia tatou ma tetai taokotai anga ma te au taeake Kerititiano te ariki ra i te au akaaoanga te riro anga ei Au Kite no Iehova, Tei Teitei Rava. (1 Petero 5:9) No reira, noatu te au arairai anga ta tatou ka aravei atu, e kia aite tatou mei ia Mose raua ko Aarona​—e nga tangata tutu mataku kore i te tuatua a te Atua.

[Tataanga Rikiriki i Raro]

[Tutu i te kapi 25]

Mose raua ko Aarona kua komono mataku kore ia Iehova i mua ia Pharao