Kite Apii Anga—Taangaangaia ei Akapaapaa ia Iehova
“Ko tei tuatua i te tuatua nona uaorai, te kimi ra ïa i tona uaorai kakā: ko tei kimi ra i te kakā no tei tono mai iaia ra, e tuatua-mou tana.”—IOANE 7:18.
1. I na ea e i akapeea te raveanga i te kite apii anga i te akamataanga maira?
KITE APII ANGA kua akamata mai i te tuatau roa kua topa. No muri poto mai i ta te Atua ko Iehova ra, koia te Puapii Maata e te Puapii Teitei, anga mai anga i tana Tamaiti anau mua i akamata mai ei te raveanga i te kite apii anga. (Isaia 30:20; Kolosa 1:15) Koia Tetai tei rauka ra te kite mei ko mai i te Puapii Maata uaorai! I te tuatau e au tauatini ua atu mataiti tei kore e rauka kia tareia o te pirianga vaitata ma te Metua, kua rauka i taua Tamaiti—tei riro ra kia matauia e ko Iesu Karaiti—tetai kite apii anga oko maata no te au tu tau, te au angaanga, e te au akakoro anga a te Atua ko Iehova. I muri akera, ei tetai tangata i runga i te enua nei, kua rauka ia Iesu kia tuatua e: “Kare aku peu rave ua; ko ta taku Metua ra i apii mai iaku ra, ko taku ia e tuatua nei.”—Ioane 8:28.
2-4. (a) Kia tau ki ta Ioane pene 7, eaa te au turanga takapini i to Iesu aere anga ki te Oroa Patia Puakapa i te 32 T.N.? (e) Eaa ra te au ngati Iuda i va uaʼi i to Iesu kite i te apiianga?
2 I akapeea ta Iesu taangaanga i te kite apii anga tei rauka iaia ra? I roto katoa i te toru e te apa mataiti o tana angaanga orometua i te enua nei, kua tua roiroi kore ua aia ki etai ke ra i tana apinga i kite ra. Inara, ko teia, ma tetai akakoro anga maata i roto i tona manako. E eaa ra te reira? E akara matatio tatou i te au tuatua a Iesu i roto ia Ioane pene 7, te ngai tana i akataka mai ei i te akamata anga e te akakoroanga o tana apiianga.
3 E akamanako ana i te papaanga. I te tuatau pururu anga rau i te 32 T.N., vaitata e toru mataiti i muri mai i to Iesu papetito anga. Te akaputu ra te au ngati Iuda i Ierusalema no te Oroa Patia Puakapa. I nga ra mua tokoiti ua o te oroa, e maata te au tuatua anga no Iesu. I te pou anga e apa o te oroa ra, kua aere atu a Iesu ki te iero e kua akamata i te apiianga. (Ioane 7:2, 10-14) Mei tei matauia ra, kua akapapu aia iaia uaorai ei tetai Puapii maata.—Mataio 13:54; Luka 4:22.
4 Te akakite maira te irava 15 o Ioane pene 7 e: “Kua va ua iora te ngati Iuda, na ko akera, Noea ra te kite o teianei tangata, kare oki aia i apiiia?” Te kite ra ainei koe e eaa ratou i va uaʼi? Kare a Iesu i aere ana ki tetai ua atu apii rapi ra, no reira kare aia i kite apii ana—ko ta ratou ia i manako! Inara, kua rauka ua ia Iesu i te eeu e te tatau i te au tuanga i te au Tataanga Tapu ra ma te ngoie ua. (Luka 4:16-21) Eaa oki, kua apii atu teia kamuta no Galilea ia ratou i te Ture a Mose! (Ioane 7:19-23) Akapeea i raukaʼi teia?
5, 6. (a) Akapeea ta Iesu akataka anga i te tumu anga o tana apiianga? (e) Na roto i teea tu ta Iesu ra taangaanga i tona kite apii anga?
5 Kua akataka atura Iesu, mei ta tatou e tatau i Ioane 7 nga irava 16 e te 17 e: “Kua karanga atura Iesu kia ratou, na ko atura, Kare taku uaorai i taku e apii nei, nana ra, na tei tono mai iaku nei. Ko tei anoano marie i te akono i tona inangaro, ka kite aia i taku e apii nei, e na te Atua ainei, e naku uaorai ainei.” Kua anoano ratou kia kite e naai i apii atu ia Iesu, e kua akakite taka meitaki atu aia kia ratou e ko tona kite apii anga no ko mai i te Atua ra!—Ioane 12:49; 14:10.
6 I akapeea ta Iesu ra taangaanga i tona kite apii anga? Mei tei tataia ia Ioane 7:18 ra, kua na ko maira Iesu: “Ko tei tuatua i te tuatua nona uaorai, te kimi ra ïa i tona uaorai kakā: ko tei kimi ra i te kakā no tei tono mai iaia ra, e tuatua-mou tana, e kare ua e tuatua-tika kore i roto iaia ra.” Mei teaa ra te tauanga e kia taangaanga a Iesu i tona kite apii anga ei apai mai i te kaka kia Iehova, a “te Kite katoatoa ra”!—Iobu 37:16.
7, 8. (a) Akapeea te taangaanga tau i te kite apii anga? (e) Eaa nga akakoro anga tumu e a o te kite apii anga tau ra?
7 No reira ka kite tatou i tetai apiianga puapinga mei ko mai ia Iesu ra e—ka tau te kite apii anga kia taangaangaia, kare ei akakaka ia tatou uaorai, mari ra kia apai mai i te akapaapaa ia Iehova. Kare e mataara meitaki atu no te akono i te kite apii anga. Akapeea, i reira, e raukaʼi ia koe i te taangaanga i te kite apii anga kia apai mai i te akapaapaa anga kia Iehova?
8 Te aite anga o te apii akakite “kia tereni na te apii anga tikai e te ravenga akara matarikiia i tetai tu karape, i te angaanga, me kare akono anga.” E akamanako tatou i teianei ie a akakoro anga no tetai kite apii anga tau e akapeea ka raukaʼi kia taangaanga tataki tai i te reira ei akapaapaa ia Iehova. Ka tika te kite apii anga tau kia tauturu ia tatou (1) kia meitaki te tatau, (2) kia taka meitaki te tata, (3) kia tupu i te pae manako e te akono tau, e te (4) kia rauka te terenianga tau te anoanoia ra no te oraanga i te au ra tataki tai.
Apiianga kia Meitaki te Tatau
9. Eaa ra i puapinga maataʼi kia akono ei tetai tei tatau meitaki ra?
9 Te mea papa muaia te apiianga kia meitaki te tatau. Eaa ra i puapinga maataʼi kia riro ei tetai tei meitaki i te tatau? Te akataka maira The World Book Encyclopedia: “Te tatauanga . . . e tumu anga ia i te apiianga e ko tetai ia o te au tu karape puapinga maata i te oraanga i te au ra ravarai. . . . Te tauturu ra te aronga tatau karape i te akatupuanga i tetai totaiete puapinga e te uua maata oki. I taua tuatau rai, ka rekareka meitaki ratou uaorai, e te merengo maata anga te au oraanga.”
10. Akapeea te tauturu ia tatou na te tatauanga i te Tuatua a te Atua kia ki i te rekareka, kia tere atu te merengoanga te au oraanga?
10 Me ka rauka i te tatauanga i te tauturu ia tatou kia rekareka “meitaki e te merengo maata anga te au oraanga,” mei teaa ra te tere atu te tika o teia i te tatauanga i te Tuatua a te Atua ra! Te akatuera ra te reira tatauanga i to tatou au manako e te au ngakau ki to Iehova ra au manako e tana au akakoroanga, e ka oronga mai te kite meitaki i te reira i te puapinga ki to tatou oraanga. Kapiti katoa oki, “e mea ora oki te tuatua a te Atua, e te ririnui,” ta Ebera 4:12 i tuatua. Ia tatou e tatau ra i te Tuatua a te Atua e te tamanako oonu anga ki runga i te reira, te akapiri vaitataia ra tatou ki tona Pu Tata, e ka akakeuia tatou kia rave i te au taui anga i to tatou oraanga kia riro kia maata te akamarekaanga iaia. (Galatia 5:22, 23; Ephesia 4:22-24) Ka akakeu katoa oki ia tatou kia tua ma etai ke ra i te au tuatua mou ta tatou e tatau ra. Ka riro teia ravarai kia apai mai i te akapaapaa ki Tei Apii Kite Maata ra, koia te Atua ko Iehova. E tika rava kare e mataara meitaki atu kia taangaanga i to tatou kite i te tatau anga!
11. Eaa te tau ra kia kapitiia ki roto i tetai porokarama tau i taau uaorai apii?
11 Me e tangata ou me kare e ruaine, te akamaroiroiia maira tatou kia apii kia meitaki te tatau, no te mea e tuanga puapinga maata ta te tatauanga i to tatou oraanga Kerititiano. Kapiti atu ki te tatauanga putuputu i te Tuatua a te Atua ra, ko tetai porokarama no te apii ia koe uaorai ka kapiti katoa i te akamanakoanga i te irava Puka Tapu no roto mai i te Examining the Scriptures Daily, te tatauanga i Te Punanga Tiaki e te Awake!, e te teateamamaoanga no te au uipaanga Kerititiano. E akapeea oki te angaanga orometua Kerititiano? Te taka meitaki ra, te tutuanga i te ngai tangata, te oki akaou anga ki te aronga inangaro, e te akonoanga i te au apii Puka Tapu i te ngutuare te umuumu katoaia ra te kite meitaki i te tatauanga.
Apiianga kia Taka Meitaki te Tata Anga
12. (a) Eaa ra i puapinga maataʼi kia apii i te tata taka meitaki? (e) Eaa te tataanga meitaki rava tei raveia?
12 Te rua o te akakoro anga ko tetai kite apii anga tau kia tauturu ia tatou kia kite i te tata taka meitaki. Kare te tataanga e oronga anake i ta tatou au tuatua e te au manako mari ra ka akatinamou katoa ia ratou. E manganui, e manganui ua atu te au anere mataiti kua topa, i tataʼi etai au 40 tangata ngati Iuda ki runga i te raupo me kare pakiri manu i te au tuatua tei riro ra ei akapapa anga i te au Tuatua Tapu akauruia ra. (2 Timoteo 3:16) E tika tikai ko teia te tataanga meitaki maata rava tei raveia! Kare e ekoko anga na Iehova i arataki te tataanga e te tata akaouanga i taua au tuatua tapu ra na roto mai i te au anere mataiti, e kia itae meitaki mai kia tatou te tu. Kare ainei tatou e akameitaki e kua tuku mai a Iehova i tana au tuatua kia tataia, e kare i irinaki ua i te oronga ua mai na te tuatua vaa?—Akaaite ia Exodo 34:27, 28.
13. Eaa te akakite maira e i kite to Iseraela e akapeea te tata anga?
13 I te au tuatau taito ra, e au pupu taka ke anake, mei te aronga tata tuatua i Mesopotamia e Aiphiti ra, tei kite i te tata. Na roto i te tu taka ke roa ma to te pa enua ra, i Iseraela kua akamaroiroiia te katoatoa kia apii i te tata. Te akauenga ia Deuteronomi 6:8, 9 no to Iseraela kia tata i te reira ki runga i te au pou o to ratou are, noatu rai me e akatutu anga, te akataka maira e kua kite ratou akapeea te tata. I te tuatau te ou ra, kua apiiia te au tamariki akapeea i te tata. Ko te Karena Gezer, koia tetai o te au akatauanga o te tata anga Epera taito ra, kua manakoia e tetai papaki o te aronga apiiia e ko tetai akonoanga ia ei tamouanga ngakau na te au tamaroa apii ra.
14, 15. Eaa etai au tu papu e te meitaki kia taangaanga i te kite i te tata?
14 Inara akapeea tatou me taangaanga i te kite i te tata na roto i tetai tu papu e te meitaki? E mea tika na te tata anga i etai au tumu i te au uipaanga Kerititiano, te au akaputuputuanga, e te au uruoaanga. Tetai reta, noatu me ka tataia ei “etai au tuatua tokoiti ua,” ka oronga i te akamaroiroi anga ki tetai te maki ra me kare ka tuatua akameitaki atu ki tetai taeake i te pae vaerua me kare tuaine tei takinga meitaki ra me kare tei maoraora maira kia tatou. (1 Petero 5:12) Me kua taka ke tei akaperepereia e tetai i roto i te putuputuanga i te mate, ka “akapumaana atu” tetai reta poto ua me kare kati na tatou ki taua tangata ra. (1 Tesalonia 5:14) Kua akataka mai tetai tuaine Kerititiano tei taka ke ra tona metua vaine i te kaneta e: “Kua tata mai tetai oa kiaku i tetai reta meitaki. E tauturu tikai te reira no te mea kua rauka iaku i te tatau taokioki akaou i te reira.”
15 Ko tetai mataara meitaki roa no te taangaanga i te kite kia tata na te tataanga i tetai reta te ka apai mai i te akapaapaa anga kia Iehova kia oronga i tetai akakite anga i te Patireia. Penei ka tau kia tata atu ki te au tangata inangaro te noo ra i te ngai taka ke. I etai tuatau penei no te maki ka rave anga ngata noou kia aere mei tera are ki tera are no te tuatau poto ua. Penei ka rauka i tetai reta i te tuatua atu i roto i te tataanga taau ka tuatua atu e tangata ki te tangata.
16, 17. (a) Eaa te tupu anga te akakite maira i te puapinga o te tataanga reta ei oronga akakiteanga i te Patireia? (e) Ka rauka ainei ia koe i te akakite mai i tetai tupuanga mei te reira te tu?
16 E akamanako ana i tetai tupu anga. I etai mataiti e manganui kua topa kua tata tetai Kite i tetai reta ma te orongaanga i te akakite anga Patireia ki te vaine takaua na tetai tangata tei akakiteia ra tona matenga ki roto i te nutipepa i reira. Kare e pau anga i rauka mai. Ia Noema 1994, e tere atu i te 21 mataiti i muri iora, i reira kua rauka mai i te Kite ra tetai reta no ko mai i te tamaine a taua vaine ra. Kua tata taua tamaine ra:
17 “Ia Aperira 1973, kua tata mai koe ki taku mama kia akapumaana iaia i muri ake i te matenga o taku papa. E iva oku mataiti i taua taime ra. I apii taku mama i te Puka Tapu, inara kare aia i riro ake ei tavini no Iehova. Inara, na tana apii anga i taki atu ki toku kapiti anga ma te tuatua mou. I te 1988, i akamataʼi au i taku apii Puka Tapu—e 15 mataiti i muri ake i te raukaanga taau reta. Ia Mati 9, 1990, i papetitoiaʼi au. Te akameitaki nei au no taau reta o te au mataiti e manganui kua topa e e mataora nei i te akakite atu kia koe e kua tupu taua au ua taau i ruru ra, ma te tauturu a Iehova. Na taku mama i oronga mai i taau reta naku e akono, e te anoano nei au kia kite koai a koe. Te manakonako nei au e ka tae atu teia reta nei kia koe.” Kua tae atu te reta a te reira tamaine, ma tona ngai e te numero tereponi tei kapitiia atu, ki te Kite tei tata atura i te au mataiti e manganui i mua akera. E tamanako ana i te poitirere anga taua vaine ou ra i te tae atu anga kiaia te tuatua i te tereponi no ko mai i te Kite—tei rave tamou ra na te tata anga reta i te tua anga i te manakonako anga Patireia ma etai ke atu!
Tupuanga te Manako, te Akono Tau, e te Pae Vaerua
18. I te tuatau Puka Tapu ra, akapeea te au metua i te akono anga i te manako e te akono tau i te kite apii anga i ta ratou tamariki?
18 Ko te toru o te akakoro anga ko tetai kite apii anga tau e tauturu ia tatou kia akatupu i te manako e te akono tau. I te au tuatau Puka Tapu ra ko te apiianga i te manako e te akono tau o te tamariki tei manakoia ei tetai o te au angaanga maata na te au metua. Kare kia apiiia anake te tamariki i te tatau e te tata mari ra, te mea maata atu, ko te apii anga i te Ture a te Atua, tei kapiti ra i ta ratou au angaanga ravarai o te oraanga. No reira, kua kapiti katoa te kite apii anga i te apiianga no ta ratou au apainga akonoanga e te au kaveinga akatereanga akaipoipo, te au pirianga ngutuare tangata, te tu akono tau i te ainga, pera katoa ta ratou apainga no to ratou tangata tupu. Na taua kite apii anga ra i tauturu ia ratou kia akatupu kare i te manako anake e te akono tau mari ra i te pae vaerua katoa oki.—Deuteronomi 6:4-9, 20, 21; 11:18-21.
19. Ka kitea e tatou ki ea te kite apii anga te akaari maira kia tatou i te akono tau meitaki kia akonoia e te tauturu ra ia tatou kia akatupu i te pae vaerua?
19 Ka peea i teia tuatau nei? E puapinga maata to te Kite apii anga meitaki. Ka tauturu te reira ia tatou kia tupu i te tu o te manako. Inara ka ariu tatou ki ea no te kite apii anga te ka akakite mai kia tatou i te akono tau meitaki kia akono te ka tauturu ia tatou kia tupu i te pae vaerua? I roto i te putuputuanga Kerititiano, ka rauka ia tatou te o atu ki tetai porokarama no te kite apii anga teokaratiki kare ra e kiteia i tetai atu ngai i runga i te enua nei. Na taau uaorai apii anga i te Puka Tapu e te au puka akatumuia ki runga i te Puka Tapu pera katoa oki te apiianga orongaia mai i te au uipaanga putuputuanga, te au akaputuputuanga, e te au uruoaanga, ka rauka ia tatou teia kite apii anga tamou oko maata—koia te kite apii anga tu-Atua—kare e tutaki! Eaa ta te reira ka apii mai ia tatou?
20. Eaa ta te kite apii anga tu-Atua te apii maira ia tatou, e eaa te tupu ra mei te reira mai?
20 Me akamata tatou i te apii i te Puka Tapu, ka kite tatou i te au apiianga tumu no te Tuatua Tapu, koia ‘te au tuatua mua.’ (Ebera 6:1) Ia tatou ka rave ua atu, ka tauru tatou i te “kai pakari ra”—koia oki, te au tuatua mou oonu atu. (Ebera 5:14) Inara, e tere atu i te reira, ka kite tatou i te au kaveinga tau i te Atua ra te apii maira ia tatou e akapeea te akono i te ora anga ta te Atua e anoano ra ia tatou kia rave. Ei akatauanga, ka kite tatou i te kopae ke i te au tu e te au ravenga te ‘ka akaviivii i te kopapa’ e kia rave i te akangateitei i te mana taoonga e no te tangata e te apinga na etai ke ra. (2 Korinetia 7:1; Tito 3:1, 2; Ebera 13:4) Kapiti katoa oki, ka ariki tatou i te puapinga maata o te tu tiratiratu e te rave meitaki i ta tatou angaanga e te puapinga o te akonoanga i te au akauenga Puka Tapu no te akono tau i te pae o te ainga. (1 Korinetia 6:9, 10; Ephesia 4:28) Ia tatou ka tere ki mua i te akonoanga i teia au kaveinga i to tatou oraanga, ka tupu tatou i te pae vaerua, e ka akaoonu i to tatou pirianga ma te Atua. Pera katoa oki, ka akariro to tatou akono tu Atua ia tatou ei aronga meitaki no te enua, noatu teiea tatou e noo ra. E na teia e akakeu ia etai ke atu kia akakaka i te Tumu o te kite apii anga—koia te Atua ko Iehova.—1 Petero 2:12.
Terenianga Tau no te Oraanga i te Au Ra Tataki Tai
21. Eaa te terenianga tau i rauka i te tamariki i te tuatau Puka Tapu ra?
21 Te a o te akakoro anga no tetai kite apii anga tau koia oki kia rauka i tetai tangata te terenianga tau te umuumuia ra no te oraanga i te au ra tataki tai ra. Kua kapitiia te kite apii anga a te metua i te tuatau Puka Tapu ra ma te terenianga tau. Kua apiiia te au tamaine i te au angaanga karape i te ngutuare. Te akakite maira te pene openga o Maseli 31:10-31 e e manganui e te tuke tuke te reira. E no reira, kua riro te au tamaine kia papa no te rave i te angaanga uru mamoe, te raranga, e te tunu kai e te akono i te au angaanga o te ngutuare, te oko apinga, te okoanga potonga enua. Kua apii katoaia te au tamaroa i te angaanga a to ratou metua, me e tanutanu me kare tetai atu angaanga. Kua kite a Iesu i te kamuta mei tona metua angai mai, koia a Iosepha; no reira, kua tapaia aia kare ko “te tamaiti a te kamuta” anake ra mari katoa ra ko “te kamuta.”—Mataio 13:55; Mareko 6:3.
22, 23. (a) Eaa ta te kite apii anga tau kia teateamamao i te tamariki ra? (e) Eaa te akakeu anga tau ia tatou i te ikianga kia tere atu te kite apii anga me ka akara anga e te anoanoia ra te reira?
22 I teia tuatau katoa oki, te kapiti ra te kite apii anga tau meitaki i te teateamamao anga kia akono i te au umuumu anga no te ngutuare tangata a tetai tuatau. Te akakite maira te au tuatua a te apotetoro ko Paulo ia 1 Timoteo 5:8 e ko te takinga meitaki i to tetai tangata ra ngutuare tangata e apainga tapu ia. Kua tata aia: “Ko te tangata oki kare i takinga-meitaki i tona uaorai, e maata ua atu rai i tona uaorai ngutuare, kua akaruke ïa aia i te akarongo, e e maata atu ïa tona kino i to te tangata akarongo kore ra.” Ko te kite apii anga, i reira, ka tau kia teateamamao i te tamariki no te au apainga ta ratou ka rave i te oraanga e pera katoa kia akapapa ia ratou kia riro ei aronga rave angaanga maata i te ngai tangata ra.
23 Kia peea te maata o te kite apii anga ta tatou ka tau kia aruaru? Penei ka tuke teia mei tetai enua ki tetai enua. Inara me te anoanoia ra te terenianga no te angaanga kia tere atu i te kotinga a te ture, tei runga i te au metua te arataki anga i ta ratou tamariki i te tukuanga tika no runga i te kite apii anga me kare terenianga, ma te paunuanga i te au puapinga te ka rauka e te au tu tau kore oki ta taua au apiianga kapitiia maira. Inara, eaa te akakeu anga tau i tetai i te ikianga kia tere atu te kite apii anga me ka manakoia e mea tika ia? E mea papu e kare i te apinganui, te akakaka iaia uaorai, me kare te akapaapaa. (Maseli 15:25; 1 Timoteo 6:17) Kia maara i te apiianga ta tatou i kite i ta Iesu akatauanga ra—e mea tau kia taangaanga i te kite apii anga ei apai mai i te akapaapaa kia Iehova. Me ka iki tatou kia tere atu te kite apii anga, ka tau to tatou akakeu anga ei te anoano kia rava te turu anga ia tatou uaorai kia raukaʼi ia tatou i te tavini ia Iehova i te ki katoa te ka rauka i te angaanga orometua Kerititiano.—Kolosa 3:23, 24.
24. Eaa te apiianga tei kiteia ra mei ko mai ia Iesu kare tatou e tau kia akangaropoina?
24 No reira, kia maroiroi tatou i ta tatou tauta anga kia rauka tetai kite apii anga tau. E mou tatou i te puapinga katoa o te porokarama te raveia nei no te kite apii anga tu-Atua te orongaia maira i roto i te akaaerenga a Iehova. E auraka e ngaropoina ia tatou te apiianga puapinga maata ta tatou i kite mei ia Iesu Karaiti mai ra, koia te tangata meitaki rava te kite apii anga tei aaere ra i te enua nei—ka tau te kite apii anga kia taangaangaia, kare ei akakaka ia tatou uaorai, mari ra kia apai mai i te akapaapaa ki tei Apii maata o te katoatoa, koia te Atua ko Iehova ra!
Eaa Taau Pau Anga?
◻ Akapeea ta Iesu ra taangaanga i tona kite apii anga?
◻ Eaa ra i puapinga maataʼi kia kite i te tatau anga meitaki?
◻ Akapeea tatou me taangaanga i te kite i te tata kia apai mai i te akapaapaa kia Iehova?
◻ Akapeea te kite apii anga tu-Atua i te tauturu anga ia tatou kia tupu i te akono tau e te pae vaerua oki?
◻ Eaa te terenianga te tau ra kia kapitiia ki te kite apii anga tau?
[Pia i te kapi 13]
Tauturu Tau no te Aronga Apiipii
I te au Uruoaanga Tapere “Aronga Akapaapaa Rekareka” i te 1995/96, kua oronga mai te Watch Tower Society i tetai poroutia ou ko te Jehovah’s Witnesses and Education te ingoa. Ko teia poroutia ki i te kara e 32 kapi kua nenei akatakaia na te aronga apiipii. I teianei kua oti i te uriia ki roto ie 58 reo.
Eaa ra tetai poroutia no te aronga apiipii? Ei tauturu ia ratou kia kite meitaki i te au irinaki anga o te aronga apiiia e au tamariki na te Au Kite o Iehova ra. Eaa to roto i taua poroutia ra? Na roto i tetai tangi anga marama e te papu, te akataka maira te reira i to tatou au manako no runga i te au tumu mei te kite apii anga kapitiia atu, te au ra anau anga e te Keritimeti, e te takianga te rima ki te reva. Te akapapu katoa ra te poroutia ki te aronga apiipii e te anoano ra tatou i ta tatou tamariki kia akono i tei maata ia ratou i te apiianga e ta tatou ka anoano tikai kia rave ma te aronga apiipii, e te manako anga meitaki i te kite apii anga a ta tatou tamariki.
Akapeea me taangaanga i te poroutia Education ra? I te mea kua teateamamaoia te reira na te aronga apiipii, e tua atu tatou i te reira ma te au puapii, te au puapii maata, e etai atu au opita o te apii. Penei na teia poroutia ou e tauturu i taua aronga apiipii katoatoa ra kia kite i to tatou au manako e te au irinaki anga e eaa tatou i anoano ei i etai taime i te tika kia tuke tatou. Te akamaroiroiia ra te au metua kia taangaanga i taua poroutia ra ei tetai tumu anga no te uriuri anga manako ma te aronga apiipii i ta ratou tamariki.
[Tutu i te kapi 10]
I roto ia Iseraela i taito ra kua mou akateiteiia te kite apii anga