Akapeea te Au Tiaki Kerititiano i te Akono Anga ia Koe

I TE au ngai e manganui ka rauka te kite e akapeea te au tiaki i te akono anga i te anana. Te arataki ra ratou, te paruru ra, e te oronga ra na te au mamoe. Te akamanakoia atura teia e te au tangata pakari Kerititiano, i te mea e ko ta ratou angaanga te kapitiia maira te au angaanga tiaki. E tikai, e apainga na ratou i te ‘akaangai i te ekalesia a te Atua’ e ‘kia matakite i te anana katoa.’​—Angaanga 20:28.

Me e mema koe no te putuputuanga Kerititiano, akapeea te au tiaki i te pae vaerua i te akono anga ia koe? E ka akapeea koe i te ariu anga atu ki ta ratou au tauta anga noou? Eaa ra te putuputuanga i anoano ei i ta ratou tauturu?

Paruru Anga Atu ki Teaa?

I te tuatau taito te tuku ra te au riona e etai au manu taae ke atu i te anana i roto i te kino e te ta ra i te mamoe tataki tai. Kua oronga atu te au tiaki i te paruru anga. (1 Samuela 17:34, 35) Ina, te ‘aaere nei oki [Satani te Tiaporo] mei te liona ngunguru ra, i te kimi anga i te tangata e pou iaia.’ (1 Petero 5:8) Kare aia e tamaki ua ana ma te riri i te akaaerenga katoa a Iehova i te enua nei mari ra i te au tavini tataki tai katoa o te Atua. Eaa to Satani akakoroanga? Te inangaro ra aia i te akaparuparu i te iti tangata o Iehova e te paruru katoa ra ia ratou kia kore e ‘akono i te au akauenga a te Atua’ e te raveanga i “te tuatua-akakite a Iesu Mesia ra.”​—Apokalupo 12:17.

Kua akaapa a Iehova i te au tiaki kavamani o Iseraela i taito ra no tei kore i akono i te mea e kua riro tana mamoe “ei kai, na te au puaka taae katoa o te ngangaere ra.” (Ezekiela 34:8) Inara, e inangaro ngakau tae tikai to te aronga pakari Kerititiano i te paruru i te au tangata i roto i te putuputuanga kia kore tetai e ngaro no tei kore i akonoia me kore ra no te akakeu anga a Satani, teianei ao, me kore te “au luko” tei akaruke i te akarongo. (Angaanga 20:29, 30) Akapeea ra te au tiaki i te tauturu anga i te au mema katoatoa o te anana kia akono meitaki e kia matakite? Ko tetai ravenga na te orongaanga i te au ako Tuatua Tapu tei akapapa meitakiia mei runga mai i te paata i te Are Uipaanga Patireia. Tetai ravenga ke atu na roto i te au tuatua akamaroiroi, e te papu tikai i mua ake e i muri ake i te au uipaanga. E ko tetai ravenga puapinga atu na te atoroanga i te “au mamoe” uaorai i te kainga. (Akaaite ia Salamo 95:7.) Inara eaa tikai te angaanga tiaki? Akapeea ra te reira atoro anga i te rave angaia? E koai tei tau kia atoroia?

Eaa ra te Angaanga Tiaki?

Kare te angaanga tiaki i te atoro anga akaoaoa ua ma te tuatua anga no runga i te au mea puapinga kore ua. Kua akakite tetai tangata pakari e: “Te mataora tikai ra te maata anga o te au papuritia i te tatauanga i tetai irava me kore ra i te uriurianga no runga i tetai tangata i roto i te Puka Tapu. E tika, kare na te tangata pakari ua e rave te tuatuaanga katoatoa. E mea matauia e ko te papuritia Patireia tei atoroia atu te rekareka ra i te akakite ua i tona au manako no runga i te Puka Tapu, e na te raveanga i teia e akaketaketa i tona uaorai akarongo. Penei ka rauka i te tangata pakari i te apai atu i tetai makatini Punanga Tiaki me kore ra Awake! e raukaʼi te uriuri atu i tetai atikara akamatutu. Penei na teia uriurianga i te pae vaerua e akataka mai i te tuke i te angaanga tiaki mei te atoro anga akaoaoa ua.”

Kua akakite tetai atu tangata pakari kite e: “I mua ake i te atoro anga, ka akapou te tangata pakari i tetai taime no te akamanako atu i te au mea i anoanoia e te papuritia tana ka atoro atu. Eaa ra te ka akamaroiroi i te papuritia? E tuanga puapinga maata te akameitaki anga ngakau tae no te au angaanga tiaki, i te mea e te akaketaketa ra te reira i tetai tangata kia akakoromaki.” Ae, e maata atu te angaanga tiaki i te atoro anga akaoaoa ua te ka raveia e tetai ua atu tangata i roto i te putuputuanga.

Eaa ra Tetai Tiaki i Atoro Atu ei ia Koe?

Me atoro tetai tangata pakari i tetai kainga, kua papa aia i te akamaroiroi atu i te au taeake irinaki e te tauturu ia ratou kia mou piri ki te akarongo. (Roma 1:11) No reira me inangaro tetai tangata pakari me kore e rua i te atoro atu ia koe, akapeea koe i te ariu anga atu? Kua tuatua tetai akaaere tutaka e: “Me rave uaia te au angaanga tiaki i te taime e manamanata tetai, penei ko te manako mua ka o mai no teia atoro anga, ‘Eaa ra taku tarevake i rave?’” Te aru ra te au tiaki aroa i te pae vaerua ia Iehova, tei akono i te tata taramo ra e kua ‘akaoki ua rai i tona vaerua,’ i te au taime tumatetenga tikai e te au mea takake.​—Salamo 23:1-4.

Te akakoroanga o te angaanga tiaki koia oki “kia meitaki, kare oki kia mate.” (2 Korinetia 13:10) Te akamaroiroi ra, i reira, te au tuatua ariki i te akakoromaki, te toto mapu, e te angaanga tiratiratu a te tangata i atoroia atu. Kua akakite tetai tangata pakari e: “I runga i tetai angaanga tiaki, kare i te mea meitaki i te akaari e ko te akakoroanga o tetai i aere atu ei kia kitea atu e te uriuri atu i te au manamanata. E tika, penei ka inangaro te papuritia uaorai i te tuatua no runga i tetai manamanata takake. E me te kokikoki ra tetai mamoe me kore ra te akatakake ra iaia uaorai mei te katoa anga o te anana, ka anoanoia te tangata pakari kia oronga i tetai apinga kia tauturu atu.”

Kare e ekoko anga ka utuutu meitaki te au tiaki Kerititiano i tetai ua atu te aite ra ki te aronga i taikuia i roto i teia au tuatua: “Naku [na Iehova] e kimi i tei ngaro ra, e e akaoki mai i tei îîa keia, e e tākaikai i tei aati ra, e e akamaroiroi i tei maki ra.” (Ezekiela 34:16) Ae, penei ka anoanoia te au mamoe kia kimiia, kia akaokiia mai, kia takaikaiia, me kore kia akaketaketaia. Kare te au tiaki o Iseraela i akono atu i teia au apainga. Te raveanga i teia au angaanga te umuumuia ra tetai tiaki kia akavaitata atu ki tetai mamoe e kia akono atu i te au mea e anoanoia ra e te reira. Ko teia i reira, te mea tuke i te au angaanga tiaki tataki tai i teia tuatau nei.

Te Anoano ra te Au Mamoe Maroiroi i te Utuutu Anga

Ka taopenga ainei tatou e kare te au tiaki i te pae vaerua o teia tuatau nei e anoanoia kia akamanako tikai i te au mamoe maroiroi? Ina, me o tetai mamoe tikai i roto i te manamanata, ka ngoie ua ake te tauturu atu i te reira me e irinaki tona i te tiaki. Kua akakite tetai puka e “kare te au mamoe e akavaitata ua mai ana ki te au tangata, e raukaʼi ta ratou irinaki anga kare i te mea ngoie ua.” I rotopu i tetai au mea ke atu, te akakite ra taua puka ra i teia arataki anga e raukaʼi te irinaki anga a te mamoe: “E tuatua putuputu atu ki te mamoe. Ka matau ratou i te reo, e ka riro ei akapapu anga ia ratou. E atoro putuputu atu i te mamoe i roto i te koro.”​—Alles für das Schaf. Handbuch für die artgerechte Haltung (Te Au Apinga Katoatoa no te Au Mamoe. E Puka no Runga i te Akono Meitaki Anga ia Ratou).

Te anoanoia ra i reira te aravei atu i tetai e raukaʼi te pirianga irinaki i rotopu i te tiaki e te au mamoe. Te tika katoa ra te reira i roto i te putuputuanga Kerititiano. Kua akakite tetai tangata pakari e: “No tei kitea uaia i roto i te putuputuanga ei tangata pakari tei atoro putuputu atu i te au mamoe te riro ra ei mea ngoie ua i te atoro atu i tetai e au manamanata tona.” No reira, kare te au tiaki i te pae vaerua e tauta i te angai e te utuutu i te au mamoe i te Are Uipaanga Patireia anake. Me ka tika i te au turanga, ka tauta te aronga pakari i te kite i te au mamoe na te raveanga i te au angaanga tiaki ki to ratou au kainga. Kua maara i tetai Kerititiano e i te tuatau te ou ua ra aia ei tangata pakari akataoongaia, kua tereponi mai te arataki akaaere e kua pati mai iaia kia atoro e kia akapumaana atu i tetai taeake tei mate tana tamaine i roto i tetai tumatetenga kino tikai i runga i te mataara. Kua akatika te tangata pakari e: “Mei teaa toku manamanata, i te mea e kare rava au i atoro ana i te reira taeake e kare katoa i kite e e noo ana aia kiea! E mea mataora i reira i te karanga anga mai tetai tangata pakari e ka aru mai aia iaku.” Ae, te tauturu ra te aronga pakari i tetai e tetai i runga i te au angaanga tiaki.

I te akapapaanga e te raveanga i tetai au angaanga tiaki, penei ka kapitiia atu tetai tangata pakari e tetai tavini orometua te itae atura i te “angaanga meitaki” a te akaaere. (1 Timoteo 3:1, 13) Mei teaa te maata i te mareka anga o te tavini orometua te kiteanga e akapeea te tangata pakari i te akono anga i te au mamoe i runga i te angaanga tiaki! Te piri vaitata atura i reira te aronga pakari e te au tavini orometua ki te katoatoa i roto i te putuputuanga, te akaketaketaanga i te ruru o te aroa Kerititiano e te taokotai anga.​—Kolosa 3:14.

Paranianga i te Taime no te Au Angaanga Tiaki

I te akaruke anga tetai pupu o te aronga pakari i te au angaanga tiaki kia rave uaia e te aronga akaaere i te Apii Puka a te Putuputuanga, kua atoroia te au papuritia katoatoa o etai au pupu i roto i nga marama e ono, inara kare rava e tangata i atoroia ana i roto i etai au pupu ke atu. Kua akakeu teia i tetai tangata pakari kia tuatua e: “I te akaraanga ko etai au tangata pakari te rave ua ra e te rave maata ra i te angaanga tiaki, inara ko etai papaki te anoano ra i te akamaroiroi anga a to ratou au taeake pakari kia rave atu i te reira.” No reira kua akanoonoo tetai au pupu o te aronga pakari kia atoroia atu te au papuritia katoatoa e te au tiaki i roto i tetai tuatau akatakaia.

E tika, ka rauka i tetai tangata pakari me kore i tetai ua atu papuritia i te atoro i tetai tangata i roto i te putuputuanga kare e tiaki atu i tetai akanoonoo anga takake kia maaniia. I mua ake ka raveiaʼi tetai angaanga tiaki, ka ringi atu tetai tangata pakari e ka karanga e, “E rave ana au i te angaanga tiaki ma tetai pamiri i te au marama tataki tai. Ka meitaki ainei kia atoro atu au ia koe no tetai ora me e tere atu a tetai taime i teia marama ki mua? Eaa te taime tano kia koe?”

Au Akameitakianga no te Au Angaanga Tiaki

I te au taomianga o teia akatere anga kino e aere atura ki te maata anga, te maata atura te puapinga o te au atoro anga akamaroiroi a te au tiaki marama. Me orongaia te akamaroiroi anga e te tauturu ki te au tangata katoatoa i roto i te anana na roto i te au angaanga tiaki, ka kite te mamoe tataki tai i te paruru anga e te tu tinamou.

No runga i te putuputuanga te atoro putuputuia atura te au papuritia Patireia katoatoa e te au tiaki, kua ripotiia e: “Kua rauka i te au papuritia te tu papu tikai no runga i te au angaanga tiaki. E mea matauia no tetai papuritia i te aravei atu i tetai o te aronga pakari i te ui atu e aea aia e rave akaou ei i tetai atoro anga, i te mea e kua rekareka te papuritia i te uriuri anga akamatutu i te tuatau o te atoro anga i topa. Ko tetai tumu i tauturuiaʼi te vaerua o te putuputuanga kia meitaki mai ko te au angaanga tiaki.” Te akataka maira tetai au ripoti e me tavini te au tiaki ma te aroa na te reira mataara, ka tupu te putuputuanga i roto i te aroa, te taokotai anga, e te tu maanaana. Mei teaa ia akameitaki anga!

Te atoro ra te au tiaki Kerititiano kia tere te oraanga o te mamoe i te pae vaerua ki mua. Te inangaro ra te aronga pakari i te akamaroiroi e te akaketaketa i to ratou au taeake irinaki. Me akatueraia mai tetai manamanata pakari te ka umuumu i te akoanga i te tuatau o te atoro anga, penei e mea meitaki i te rave i tetai au akanoonoo anga no te uriuri anga a tetai taime ke atu, me kua aruia tikai te tangata pakari e tetai tavini orometua. Noatu e eaa te turanga, ka tau e kia taopengaia te atoro anga tiaki na roto i te pure.

Ka inangaro ainei tetai tiaki i te pae vaerua i te atoro atu i toou kainga i te tuatau e vaitata maira ki mua? Me koia ia, e tapapa mataora atu i te akamaroiroi anga te vai maira noou. Ka aere mai aia i te akono ia koe e te akaketaketa ia koe i toou akakoro anga kia tamou ua atu ki runga i te mataara te taki atura ki te ora mutu kore.​—Mataio 7:13, 14.

[Pia i te kapi 26]

Au Manako no te Au Angaanga Tiaki

◻ E akataka i tetai taime: I te maata anga o te taime e mea meitaki i te akataka i tetai taime. Me e parani ta tetai tangata pakari no te akatikatika atu i tetai manamanata pakari, e mea tau i reira i te akakite atu i te papuritia no runga i teia i mua ake.

◻ Akapapa anga: E akamanako atu i te tu e te turanga o te tangata. E oronga atu i te akameitaki anga ngakau tae. E akakoro koe i te oronga atu i “ta te Vaerua” ei akamaroiroi, e ei akaketaketa i te akarongo.​—Roma 1:11, 12.

◻ Koai te ka aru atu: Ko tetai tangata pakari ke atu me kore ko tetai tavini orometua tau tikai.

◻ I te tuatau o te atoro anga: Ka tau te tangata pakari kia maru ua, kia aroa, kia papu tikai, e kia ngoie ua i te taui. E ui atu no runga i te pamiri, te peea ua ra ratou, e te vai atura. E akarongo meitaki. Me akatueraia mai tetai manamanata pakari, penei e mea meitaki i te akanoonoo i tetai angaanga tiaki takake.

◻ Te roa o te atoro anga: E tamou i te ora i akatakaia, e e akaruke i te ngutuare koi vai ei te rekarekaanga no te atoro anga.

◻ Akaotianga i te atoro anga: E mea tau te pure e te arikiia ra.​—Philipi 4:6, 7.

[Tutu i te kapi 24]

Te oronga ra te au tiaki Kerititiano i te paruru anga i te pae vaerua

[Au Tutu i te kapi 26]

Te oronga maira te au angaanga tiaki i te au atianga meitaki no te akamaroiroi i te pae vaerua