Au Uianga a te Aronga Tatau

Eaa te aiteanga o ta te apotetoro Paulo tuatua i tona karanga anga “i te akangaro anga i te au mea i muri ra, e te uapou anga atu i tei mua ra”? (Philipi 3:13) Ka rauka tikai ainei i tetai tangata i te akangaro i tetai mea?

Kare, i te maata anga o te tu kare tikai e rauka ia tatou i te akaatea i tetai manako mei to tatou manako. Ko te tika, e maata ta tatou e ngaropoina ana tei inangaroia e tatou kia maara e e manganui te au mea ta tatou ka maara e ngari ake tatou i te akangaropoina viviki atu. Eaa, i reira, te aiteanga o ta Paulo tuatua i tona tata anga i te au tuatua ia Philipi 3:13? Na te au putunga tuatua i te pae e tauturu mai ia tatou kia marama.

I roto ia Philipi pene 3, kua akatutu a Paulo i tona “irinaki i ta te kopapa.” Kua akakite aia i tona turanga ngati Iuda kite rava e tona tu maroiroi no te Ture​—e au mea te ka riro ei au puapinga e manganui nona i roto i te iti tangata Iseraela. (Philipi 3:4-6; Angaanga 22:3-5) Noatu rai, kua anga ke aia i taua au puapinga ra, te akariro anga ia ratou ei mea puapinga kore. No teaa ra? No te mea kua kitea e ia etai mea meitaki atu​—‘te meitaki maata i te kite i te Atu ra ia Iesu Mesia.’​—Philipi 3:7, 8.

Ta Paulo akakoroanga puapinga maata kare kia rauka tetai turanga i teianei ao, mari ra kia rauka “te tuakaouanga mei te mate maira.” (Philipi 3:11, 12) No reira, aia i tata ei: “I te akangaro anga i te au mea i muri ra, e te uapou anga atu i tei mua ra, Te aruaru atu nei au na te akairo, kia rauka iaku te tutaki i ta te Atua ra kapiki anga no runga maira i te Mesia nei ia Iesu.” (Philipi 3:13, 14) I to Paulo karanga anga e “te akangaro anga i te au mea i muri ra,” kare te aiteanga e kua akangaro aia “i te au mea i muri ra” mei tona manako. Kua maara tikai iaia te reira, i te mea e koi papa ua ake ra aia ia ratou. Tetai rai, i roto i te reo Ereni mua, kua taangaanga aia i tetai tu verepa te akakiteanga i tetai angaanga e tupu ra, kare i oti. Kua karanga aia “akangaro anga,” kare “kua akangaroia.”

Te tuatua Ereni tei uriia “akangaro” (e·pi·lan·thaʹno·mai) e tukeke tona au tu aiteanga, ko tetai koia oki “kia manata koreia,” me kore “akangaropoina.” Kia tau ki te Exegetical Dictionary of the New Testament (etitiia e Horst Balz e Gerhard Schneider), ko te aiteanga teia o te “akangaro anga” i roto ia Philipi 3:13. Kare a Paulo i manako putuputu ana i te au mea tana i akaruke. Kua kite aia ia ratou ei mea manata anga meangiti. E au mea “puapinga kore” ratou me akaaiteia ki te manakonakoanga no te rangi.​—Philipi 3:8.

Akapeea te au tuatua a Paulo i te taangaanga angaia i teia tuatau? Penei, mei ia Paulo ra, kua rave tetai Kerititiano i te au atinga no te tavini i te Atua. Penei kua akaruke aia i tetai ngai angaanga apinganui no te rave i te angaanga tutu aere tamou. Me kore ra penei no roto mai aia i tetai kopu tangata apinganui tei tipu ra iaia ki vao i te pae o te moni no te mea kare ratou e ariki ana i te tuatua mou. Te riro ra taua tu atinga ei mea meitaki, inara kare ratou i tetai mea kia manata putuputuia. Ka “akangaro” tetai Kerititiano, ka akamutu i te manata atu, “i te au mea i muri ra” e ka manako i te tuatau kaka e tiaki maira iaia ki mua.​—Luka 9:62.

Penei ka rauka te kaveinga i muri ake i ta Paulo au tuatua i te taangaangaia na tetai atu tu. Akapeea tetai Kerititiano tei o ki roto i te tu tarevake i mua ake i te apii anga i te Atua? (Kolosa 3:5-7) Me kore ra i muri ake i te riroanga mai ei Kerititiano, kua rave aia i te ara pakari e kua akoia e te putuputuanga. (2 Korinetia 7:8-13; Iakobo 5:15-20) Me e tu tataraara tikai tona e kua taui i tona au tu, kua “oreiia” aia ma te ma. (1 Korinetia 6:9-11) Ko tei tupu ra kua topa te reira ki muri. Penei kare e ngaropoina tikai iaia tana i rave​—e tika ra, e mea pakari nona i te apii mei te reira kia kore aia e rave akaou i te ara. Tetai rai, ka “akangaro” aia i te kore anga e akaapa putuputu ua iaia uaorai. (Akaaite ia Isaia 65:17.) No te mea kua akakoreia te ara i tau ki te atinga o Iesu, ka tauta aia i te tuku i tei topa ra ki muri iaia.

Ia Philipi 3:13, 14, te akatutu ra a Paulo iaia uaorai ei tangata oro i roto i tetai taemoemo anga, “te uapou anga atu i tei mua ra” kia taeria te akakoroanga. Ka akara tetai tangata oro ki mua, kare ki muri. Pera katoa, ka tau tetai Kerititiano kia akara ki te au akameitakianga ki mua, kare ki te au mea tei akarukeia ki muri. Te karanga katoa ra a Paulo e: “E manako ke ra to kotou i tetai mea atu, na te Atua e akakite mai ia kotou i te reira.” (Philipi 3:15) No reira, e pure ki te Atua kia tauturu ia koe kia tatanu i teia manako. E akaki i toou manako ma te au manako o te Atua mei tei kitea i roto i te Pipiria. (Philipi 4:6-9) E manakonako i te aroa o Iehova noou e te au akameitakianga taau ka rekareka no te reira oki. (1 Ioane 4:9, 10, 17-19) I reira, na roto i te vaerua tapu ka tauturu a Iehova ia koe kia kore e manata atu i taau i akaruke ra ki muri. Mari ra, mei ia Paulo ra, ka akara koe ki te tuatau kaka ki mua.​—Philipi 3:17.