Te Tinamou Tikai—I Teianei e Tuatau Ua Atu

KARE e ekoko anga e ka rauka i te Atua ko Iehova i te oronga mai i te tinamou no tona iti tangata. Koia “te Mana katoatoa.” (Salamo 68:14) Te aite anga o tona ingoa umere “Nana e Akariro kia Tupu.” Te akataka ra teia iaia ei Okotai anake ra i teianei ao e pini ua ake te ka rauka i te autu i tetai ua atu manamanata e raukaʼi i te akatupu i tana au taputou e te akatupu i tona anoano. Te akakite ra te Atua uaorai e: “Koia katoa taku tuatua no roto i toku nei vaa; kare e oki puapinga kore ua mai kiaku nei, e tupu ra tei akakoroia e au ra; e manuia oki te mea i akaue atu ei au ra.”​—Isaia 55:11.

Ka oronga mai te Atua i te tinamou no te aronga tei irinaki iaia. Te akapapu maira tana Tuatua i teia. “Te ingoa o Iehova ra, e punanga ketaketa ïa,” i akakite ei te ariki pakari ko Solomona i raro ake i te akauru anga tu-Atua. “Te oro nei te aronga tuatua-tika ki reira, e kua ora iora.” Kua tuatua katoa aia: “Ko tei irinaki ia Iehova ra, e ora ïa.”​—Maseli 18:10; 29:25.

Te Tinamou no te Au Tavini o te Atua

Kua oronga ua mai ana rai a Iehova i te tinamou no te aronga tei irinaki ki runga iaia. Ei akaraanga, kua rekareka te peroveta ko Ieremia i te paruru anga a te Atua. I te koropini anga te au vaeau o Babulonia ia Ierusalema akaruke akarongo ra, i rave ei te au tangata ‘e kai oki i te kai ma te aite, e te taporoporo.’ (Ezekiela 4:16) Kua riro mai te turanga ei mea tumatetenga no te mea kua tunu etai au vaine e kua kai i ta ratou uaorai tamariki. (Te Aue o Ieremia 2:20; 4:10) Noatu kua opuia a Ieremia no tana angaanga tutu aere mataku kore, kua akapapu a Iehova e ‘kia orongaia te faraoa okotai nana no te rā okotai, no roto i te arataa o te tunu-kai ra, e kia ope roa te au faraoa o te oire i te pou.’​—Ieremia 37:21.

I to Ierusalema topa anga ki te au Babulonia, kare rava a Ieremia i taia ana e kare katoa i kikaia ana ei mouauri ki Babulonia. Mari ra, “kua oronga maira te rangatira [Babulonia] o te aronga vaeau i te manga nana, e tetai apinga, e kua tuku ua atura iaia.”​—Ieremia 40:5.

E au anere mataiti i muri mai kua akapapu a Iesu Karaiti i te au tavini o te Atua: “Auraka kotou e apiapi ua, ka na ko ei ra, Eaa ua ta matou kia kai? e, Eaa oki ta matou kia inu? e, Eaa to matou kakau kia kakau? (Te kimi ra oki te au etene i taua au mea katoa ra:) kua kite oki to kotou Metua i te ao ra e, kia rauka taua au mea katoa ra ia kotou e tikaʼi. E na mua ra kotou i te kimi i te basileia o te Atua, e te tuatua-tika nana ra; e kapiti katoaia mai taua au mea katoa ra ia kotou.”​—Mataio 6:31-33.

Ko te aite anga ainei teia e ka rekareka te au tavini o Iehova i te paruru anga tu-Atua mei te au kino o teia tuatau? Kare. Kare te aronga akarongo e matara mai mei te kino. E tika ka makiia te au Kerititiano, ka kite i te takinokino anga, ka riro mai ei aronga tei tupu te kino kia ratou, e ka mate i roto i te au tumatetenga, e ka mamae i tetai atu au tu.

Noatu e kare a Iehova i oronga mai ake i te tinamou katoa mei te kino, te akaari maira te au ripoti e te taangaanga ra aia i tona mana kia oronga na tona au tavini e te paruru ia ratou. Te paruru katoaia ra te au Kerititiano mei te au manamanata e manganui no te mea te taangaanga ra ratou i te au kaveinga Pipiria i to ratou oraanga. (Maseli 22:3) Pera katoa, te rekareka ra ratou i te tinamou o tetai pirianga i te ao katoa o te au tungane e te au tuaine pae vaerua ma te aroa, tei tauturu ra i tetai e tetai i te au tuatau anoano ra. (Ioane 13:34, 35; Roma 8:28) Ei akaraanga, ei ariu atu ki te turanga anoanoia o to ratou au taeake i te ngai veeia e te tamaki i Ruanata, kua viviki te Au Kite o Iehova i Europa i te oronga tauturu e te tuku e 65 tane kakau kia ratou e e $1,600,000 vairakau, te kai, e tetai atu au apinga.​—Akaaite ia Angaanga 11:28, 29.

Noatu te akatika ra a Iehova i te au timata anga kia topa ki runga i te au Kerititiano mou, tei ia ratou te akapapu anga e ka oronga aia kia ratou te maroiroi, te tauturu, e te pakari no te akakoromaki. Te tataanga ki te au taeake irinaki, kua karanga te apotetoro Paulo e: “Kare e timata anga i apuku ia koe mari ua tei matauia ki te tangata nei. Inara te akono meitaki ra te Atua, e kare aia e tuku ia koe kia timataia e tere roa atu i taau ka rauka i te akakoromaki, inara i te pae i te timata anga ka rauka katoa iaia te arataa ki vao e raukaʼi ia koe i te akakoromaki i te reira.”​—1 Korinetia 10:13; The Emphatic Diaglott.

Ta te Atua e Rave ra no Tona Iti Tangata

I teia tuatau, e au mirioni ua atu au tangata te rekareka ra i te rave i te anoano o te Atua. Kare ratou e maroia ra kia tavini i te Atua; te rave ua ra ratou no te mea kua kite ratou iaia e te aroa ra iaia. Te ariu anga atu, te aroa ra a Iehova i tona au tavini tiratiratu, te akakoro ra aia i te taui i te enua ei parataito te ngai e rekarekaʼi te au tangata akarongo i te au, te oraanga meitaki, e te tinamou e tuatau ua atu.​—Luka 23:43.

Ka rave te Atua i teia na roto i tetai kavamani i te rangi, na tana Ariki akataoongaia, ko Iesu Karaiti, ei Tutara. (Daniela 7:13, 14) Te tuatua ra te Pipiria i teia kavamani ei “basileia o te Atua” e ei “basileia o te ao.” (1 Korinetia 15:50; Mataio 13:44) Ka tupau te Patireia o te Atua i te au kavamani tangata katoatoa. I te mea kia rauka te au kavamani e manganui i te enua nei, okotai rai kavamani ka vai. Ka tutara te reira ma te tuatua tika ki rungao i te au enua katoatoa.​—Salamo 72:7, 8; Daniela 2:44.

Te oronga ra a Iehova i te pati anga ki te katoatoa kia noo ki raro ake i te Patireia. Ko tetai ravenga e rave ra aia i teia na roto i te tua maata anga i te Pipiria, te puka te akataka ra i ta te Patireia ka rave no te tangata nei. Ko te Pipiria te puka tua maata ravaia atu i teianei ao, e te rauka ra te reira i teianei, ei mea katoa me kore i tetai tuanga ua, i roto i te tere atu i te 2,000 au reo.

Te tauturu aroa ra te Atua ko Iehova i te au tangata kia marama i ta te Pipiria e apii ra no runga i te Patireia. Te rave ra aia i teia na te ikuikuanga e te tukuanga i te au tangata kia akataka i te au Tuatua Tapu ki tetai atu. E tere atu i te rima mirioni au Kite o Iehova te tutu aere ra i teianei i te tuatua meitaki o te Patireia o te Atua i roto i te tere atu i te 230 au enua.

E Tinamou Tikai Ainei no te Katoatoa?

Ka ariki ainei te katoatoa i te pati anga kia riro mai ei tangata turu i te Patireia o te Atua na te aruanga i tana au turanga tuatua tika? Kare, no te mea e manganui te au tangata kare ratou e inangaro i te rave i te anoano o te Atua. Te patoi ra ratou i te tauta anga no te tauturu ia ratou kia taui i to ratou oraanga kia meitaki mai. E tikai, te akaari ra ratou ia ratou uaorai mei te aronga ta Iesu i karanga: “Kua matorutoru oki te ngakau o teianei aronga, kua turi o ratou taringa, e kua topiri ratou i o ratou mata; ko te akara aea o ratou mata, ko te rongo aea o ratou taringa, ko te kite aea o ratou ngakau, ko te akaariuia mai, e ko te akaoraia atu ratou e [te Atua].”​—Mataio 13:15.

Akapeea e raukaʼi te tinamou tikai i te enua nei i rotopu i te aronga tei patoi ra i te noo kia rotai ki te au tu tika o te Atua? Kare e rauka. Ka takino te au tangata Atua kore i te tinamou o te aronga te inangaro ra i te tavini ia Iehova.

Kare te Atua e maro i te au tangata kia taui, inara kare aia e akakoromaki i te kino e tuatau ua atu. Noatu te akakoromaki marie ra a Iehova i te tuku i tona Au Kite kia apii i te au tangata no runga i tona au tu e te au akakoro anga, kare aia e tamou ua atu i te rave ua i te reira. Kua akakite a Iesu Karaiti e: “E tutu aereia te evangelia o te basileia nei, e kako rava ake te ao katoa nei; ei kite no te pa enua ravarai; ko te openga iora ïa i reira ra.”​—Mataio 24:14.

Eaa te aite anga o “te openga” no te aronga tei patoi i te au turanga a te Atua? Tera te aite anga ka tupu te akava anga e te akapou anga kino kia ratou. Te tuatua ra te Pipiria no runga i te tukuanga mai i te “mate i te aronga kare i kite i te Atua, e tei kore i akarongo i te evangelia o to tatou Atu o Iesu Mesia: Ko te ka akautungaia mai ïa i te mate mutu kore.”​—2 Tesalonia 1:6-9.

Ina​—Te Tinamou Tikai e Tuatau Ua Atu!

I muri ake i te akapou anga o te aronga tei patoi i te au tu au o Iehova, ka tuku mai te Patireia o te Atua i tetai tuatau kaka o te tinamou no te aronga tuatua tika i te enua nei. (Salamo 37:10, 11) Mei teaa atura te tuke i te reira ao ou ki tei nooia nei e tatou i teia tuatau nei!​—2 Petero 3:13.

Ka kore te onge e te pongi. E maata ta te katoatoa ka kai. Te karanga ra te Pipiria e ‘ka rekareka te tangata katoa i te kai memeitaki ra.’ (Isaia 25:6) Kare te kai e rava kore, no te mea “e manga sitona okotai rima i ki i te enua nei, i runga i te take o te au maunga ra.”​—Salamo 72:16.

Kare te au tangata e noo akaou i roto i te au are piropiro e te au ngai kino pakari te au are. I raro ake i te Patireia o te Atua, ka rauka i te katoatoa te au kainga memeitaki, e ka kai ratou i te au kai tei uua mai i runga i to ratou uaorai enua. Te taputou maira te Pipiria: “E patu ratou i te au are, e na ratou uaorai e noo; e na ratou e tanu i te au kainga vine, ka kai ei i te kai i reira.”​—Isaia 65:21.

Kare e totoa te kore anga o te au ngai angaanga, ka vai te au angaanga puapinga, e ka kite te au tangata i te au tupu anga meitaki mei te reira. Te karanga ra te Tuatua na te Atua e: “E rekareka tei ikiia e au ra, i te angaanga a to ratou uaorai rima. Kare ratou e angaanga puapinga kore ua.”​—Isaia 65:22, 23.

I raro ake i te tutara anga Patireia, kare te au tangata e mamae e e mate mei te au maki. Te akapapu maira te Tuatua na te Atua kia tatou e: “Kare oki to reira e karanga e, Kua maki au.”​—Isaia 33:24.

I roto i te Parataito enua kare e roa atu ana ka riro mai ei mea tika tikai, ka akakoreia te mii e te mamae, te taitaia e te mate. Ae, pera katoa te mate! Ka noo te au tangata e tuatau ua atu ki roto ia Parataito! Te akakite maira te Pipiria kia tatou i te Atua “e nana e orei i te roi-mata katoatoa; e e kore rava te mate, e te aue, e te mii; e te mamae oki, e kore katoa ïa; no te mea kua kore te au mea taito.”​—Apokalupo 21:4.

I raro ake i te tutara anga a Iesu Karaiti, te “Ariki no te au,” ka riro te oraanga i te enua nei i te openga ra ei mea tinamou tikai. E tikai, ka vai te tinamou i te ao katoa i raro ake i te okotai kavamani tutara anga aroa e te tika​—te Patireia o te Atua.​—Isaia 9:5, 6; Apokalupo 7:9, 17.

[Tataanga i te kapi 4]

“Te akakite maira te tinamou tangata i te akarongo no apopo, . . . [te akarongo ki roto i te] tu papu o te turanga poritiki e te puapinga.”​—E vaine te noo ra i Asia

[Tataanga i te kapi 5]

“Ko te mea maata rava atu e akatupu ra ia koe kia manako tinamou kore ko te ta ua e te tu tau kore.”​—E tangata te noo ra i Marike Apatonga

[Tataanga i te kapi 6]

“Kare au i tinamou ana i te tuatau o te . . . tomo anga. Me tei roto tetai enua i te tamaki, akapeea te au tangata i te manako tinamou anga?”​—E tama aere apii akamata anga i Itinga Rotopu

[Tataanga i te kapi 7]

“Ka kite au i te tinamou me kite au e ka rauka iaku i te aaere i te au mataara i te po ma te kore e tauatiia.”​—E tamaine apii i Aperika