Au Uianga a te Aronga Tatau

Ka rauka ainei ia tatou i te tuatua i te au tavini o te Atua o teia tuatau e manakonakoanga to ratou no te enua e e aiteite te maata o to te Atua vaerua ia ratou pera katoa te au Kerititiano akatainuia i te vaerua?

Kare teia uianga i te mea ou ua. Kua akaraia rai teia tumu nei i te “Au Uianga a te Aronga Tatau” i roto i The Watchtower o Aperira 15, 1952. E manganui tei riro mai ei Au Kite mei te reira taime mai, no reira ka rauka ia tatou i te uriuri manako i te uianga e i te rave anga ka uriuriia ta te reira akakite anga mua i karanga ra.

Ma te puapinga tikai, ko te pauanga koia oki, ae, ka piri te au taeake e te au tuaine akarongo o te mamoe ke atu ma te aiteite ra ki te aronga akatainuia i te raukaanga mai te vaerua tapu o te Atua.​—Ioane 10:16.

Kare ra te aite anga o teia e e aiteite ua te angaanga anga o te vaerua ki runga i te aronga tataki tai katoatoa. Ka oki ana ki muri i te akamanako i te au tavini akarongo i te au tuatau Kerititiano o mua ra, tei rauka tikai ra te vaerua o te Atua. Ma te ririnui mei te vaerua, kua rauka ia etai ia ratou i te ta i te au manu taae kikino, te akaora i te maki, pera katoa te akatu mai te aronga tei mate ra. E kua anoano ratou i te vaerua no te tata i te au puka akauruia o te Pipiria. (Akava 13:24, 25; 14:5, 6; 1 Ariki 17:17-24; 2 Ariki 4:17-37; 5:1-14) Kua karanga The Watchtower e: “Noatu e kare no te pupu akatainuia, kua ki ratou i te vaerua tapu.”

Mei tetai atu akaraanga, ka akamanako ana i te au tane e te au vaine o te anere mataiti mua tei akatainuia ma te vaerua tapu, te riroanga mai ei au tamariki vaerua na te Atua ma te manakonakoanga no te rangi. Kua akatainu pouroaia ratou, inara kare te aite anga e kua aiteite te angaanga anga o te vaerua ki rungao ia ratou katoatoa. Te taka meitaki ra te reira ia 1 Korinetia pene 12. I reira kua uriuri te apotetoro Paulo i te au apinga aroa o te vaerua. Ka tatau tatou i te au 1 Kori 12 irava 8, 9, e te 11: “I orongaia mai te tuatua o te pakari e te Vaerua, ki tetai tangata; e te tuatua o te kite i tetai, e taua Vaerua rai; Ta tetai ra, ko te akarongo ïa, na taua Vaerua rai; ta tetai ra, ko te kite ïa i te akaora maki, na taua Vaerua rai. . . . Na taua Vaerua okotai rai i anga i taua au mea katoa nei, i te tua marie anga i ta te tangata ravarai i tana i anoano ra.”

Ma te puapinga rai, kare i rauka ana i te katoa anga o te aronga akatainuia o te reira taime te apinga aroa temeio o te vaerua. Ia 1 Korinetia pene 14, kua taiku a Paulo i tetai uipaanga putuputuanga tei rauka i tetai te apinga aroa o te au reo, inara kare e tangata okotai i reira tei rauka ra te apinga aroa o te urianga. Noatu rai, i etai atianga i mua atu, kua kite ratou takitai i te akatainuanga ma te vaerua. E mea tau ainei i te karanga e ko te taeake tei rauka ra te apinga aroa o te au reo e e maata atu te vaerua iaia i to tetai atu tei tae mai? Kare. Kare tetai atu aronga akatainuia i ngere ana, mei te mea atura kare e marama meitaki ana i te Pipiria mei te reira ra me kore kare katoa e rauka i te aro atu i te au timata anga. Kua angaanga te vaerua na roto i tetai tu takake ki rungao i te taeake te ka rauka i te tuatua i te au reo. Noatu ra, ka anoanoia aia e ratou ra kia noo vaitata ua ia Iehova e ‘kia ki ra i te Vaerua,’ mei ta Paulo i tata ra.​—Ephesia 5:18.

No runga i te aronga toenga i teia tuatau, kua rauka tikai ia ratou te vaerua o te Atua. I tetai tu kua angaanga te reira ki runga ia ratou na roto i tetai tu takake​—i te taime i akatainuiaʼi ratou e te angaiia ei tamariki vaerua. I muri akera ‘kua ki ratou i te Vaerua,’ te rauka anga tona tauturu me kimi ratou i te marama taka meitaki atu i te Pipiria, te arataki i te angaanga tutu aere, me kore te aro atu i te au timata anga​—no ratou uaorai me kore ra i te pae o te akaaerenga.

Te au mema o te “mamoe ke,” noatu e kare i rauka te kite anga o te akatainu anga, i tetai atu au tu ka rauka te vaerua tapu. Kua akakite The Watchtower o Aperira 15, 1952, e:

“Te rave ra te ‘mamoe ke’ o teia tuatau i taua angaanga tutu aere rai pera katoa te aronga toenga, i raro ake i te au turanga manamanata, e te akaari ra rai i taua tu akarongo e te akono tika. Te kaikai ra rai ratou i taua kaingakai pae vaerua, te kai ra rai i taua kai ra, te akarongo ra rai i taua au tuatua mou. I te mea no te pupu ratou o te enua, ma te au manakonakoanga no te enua e tetai inangaro tikai i te au mea no te enua, penei ka reka maata atu ratou i te au tuatua tapu no runga i te au turanga enua i roto i te ao ou; inara ko te toenga akatainuia, ma te au manakonakoanga no te rangi e te inangaro pakari uaorai i te au mea o te vaerua, penei ka apii aruaru maata atu ratou i taua au mea ra i roto i te Tuatua na te Atua. . . . Inara te vaira te tika e ka rauka taua au tuatua mou ra e taua marama anga i nga pupu e rua, e tei runga ua i te aronga tataki tai te taangaanga ia ratou uaorai i te apii tei akataka ra i te marama anga i te au mea no te rangi e no te enua i te ka rauka ia ratou. Te vaira te vaerua o te Atu ma te au tuanga aiteite ki nga pupu e rua, e ka oronga aiteiteia te kite e te maramaanga kia raua, ma te au rauka anga aiteite no te akarongoanga i te reira.”