“E Are Pure no te Pa Enua Ravarai”
“Kare aina kua tataia e ‘Toku nei are, e karangaia ïa e are pure no te pa enua ravarai’?”—MAREKO 11:17.
1. I te akamata anga ra eaa te tu pirianga i rekarekaia e Adamu raua ko Eva ma te Atua ra?
I TE oti anga te angaia a Adamu raua ko Eva, kua rekareka raua i tetai pirianga vaitata ma to raua Metua i te rangi ra. Kua tuatua akapiri anga manako atu te Atua ra ko Iehova kia raua e kua akataka atura i tana akakoro anga meitaki no te anaunga tangata katoa. E mea tika tikai, kua akakeu putuputuia raua kia akapaapaa ia Iehova no tana au angaanga memeitaki tei angaia maira. Me kua anoano a Adamu raua ko Eva i te arataki anga ia raua e manako ra i ta raua tuanga ei metua tane e ei metua vaine i te tuatau ki mua no te ngutuare tangata katoa ra, kua rauka ua ia raua i te tuatua atu ki te Atua mei tetai ua atu ngai i to raua kainga Parataito ra. Kare raua e anoano i te au angaanga a tetai taunga i roto i tetai iero ra.—Genese 1:28.
2. Eaa te taui anga tei tupu i te ara anga a Adamu raua ko Eva?
2 Kua tauiia te turanga i te inangaro anga tetai angera meameaau i te akavare ia Eva kia manako e ka meitaki mai tona turanga oraanga me ka kopae ke aia i te ngateitei o Iehova, te akakiteanga e ka riro aia “mei te Atua ra te tu.” Ma te tau ra, kua kai a Eva i te ua o te rakau ta te Atua i tuku ra i te ture ki rungao. I reira kua taangaanga a Satani ia Eva kia timata i tana tane. E mea tangi ra, kua akarongo atura Adamu ki tana vaine ara ra, ma te akakiteanga e e maata atu tona manako no tona pirianga ma tana vaine i tona pirianga ma te Atua ra. (Genese 3:4-7) Ko te aite anga, kua iki a Adamu raua ko Eva ia Satani ei atua no raua.—Akaaite ia 2 Korinetia 4:4.
3. Eaa te au tupu anga kikino no te meameaau o Adamu raua ko Eva ra?
3 I te raveanga i te reira, kua ngere aua nga tangata mua ra kare i to raua pirianga oko maata anake ua ma te Atua mari katoa ra ko te manakonako anga no te ora mutu kore ki roto i tetai parataito i te enua nei. (Genese 2:16, 17) Kua topa aere to raua nga kopapa ara ra tae roa kia mate i te openga. Kua akatuangaia to raua anaunga i teia turanga ara. “E,” ta te Pipiria i akataka maira, “kua taea katoaia oki te tangata ravarai e te mate.”—Roma 5:12.
4. Eaa te manakonako anga ta te Atua i oronga ki te au tangata ara ra?
4 E apinga tetai tei umuumuia ra ei akaongi i te au tangata ara ra ma Tei Anga tapu maira ia ratou. I te akautungaanga ia Adamu raua ko Eva, kua oronga te Atua i te manakonako anga ki to raua anaunga i te tuatau ki mua na te taputouanga i tetai “uanga” te ka akaora i te au tangata mei te au tupuanga mai o ta Satani meameaau ra. (Genese 3:15) I muri iora, kua akakite mai te Atua e ka aere mai te Uanga no te akameitaki anga na roto mai ia Aberahama. (Genese 22:18) Ma teianei akakoro anga aroa i roto i tona manako, kua iki te Atua i te au uanga o Aberahama, koia to Iseraela, kia riro ei iti tangata ikiia nona ra.
5. Eaa tatou i tau ei kia akamanako i te au tu o te Ture koreromotu a te Atua ra ma to Iseraela?
5 I te 1513 M.T.N., kua tomo atu to Iseraela ki roto i te pirianga koreromotu ma te Atua e kua akatika kia akarongo i tana au ture. Ka tau ra te Ture koreromotu kia riro ei apinga akamanako maataia ki te aronga katoatoa te anoano ra kia akamori i te Atua i teia tuatau nei no te mea kua tou mai te reira ki te Uanga taputouia ra. Kua karanga a Paulo e i roto i reira e “e ata anake te ture no te au mea memeitaki a muri atu.” (Ebera 10:1) I ta Paulo tuatua anga i teia akakiteanga, te uriuri manako ra aia i te angaanga a te kau taunga o Iseraela i te tapenakara rave aereia ra, me kare te puakapa akamori anga. Kua tapaia ia e ko “te nao o Iehova” me kare “te are o Iehova.” (1 Samuela 1:9, 24) Na te akara matatioanga i te angaanga tapu tei raveia i te are o Iehova i te enua nei, ka rauka ia tatou kia ariki tika tikai i te akanoonoo anga aroa ua e raukaʼi i te au tangata te riro anga kia akaongiia ma te Atua ra i teia tuatau nei.
Te Ngai Tapu Rava
6. Eaa tei tukuia ki roto i te Ngai Tapu Rava, e i akapeea to te Atua ra vai anga ki reira i te akatutu anga mai?
6 “Kare ra Tei Teitei e noo i te are i angaia e te rima,” ta te Pipiria i tuatua. (Angaanga 7:48) Inara, kua akatutuia mai to te Atua vai anga ki roto i tona are i te enua nei na tetai tumurangi i roto i te pia i roto roa tei tapaia ko te Ngai Tapu Rava. (Levitiku 16:2) I te akara anga, kua kaka marama mai teia tumurangi, ma te orongaanga i te marama no te Ngai Tapu Rava. Kua tukuia ki runga ake i tetai pia tapu tei tapaia ko “te aruna kite ra,” i roto i reira nga papa toka taraiia ra ma etai o te au akauenga ta te Atua i oronga ki to Iseraela ra. I runga i te tapoki o te Aruna ra e rua nga kerupi auro ma to raua nga peau na rungao, tei akatutu maira i te au mea ora vaerua teitei te turanga i roto i ta te Atua ra akaaerenga i te rangi. Kua tukuia te tumurangi marama temeio ra ki runga ake i te tapoki e i rotopu i nga kerupi ra. (Exodo 25:22) E akatutu anga teia i te Atua Mana Katoatoa tei akateronoia ra ki runga i tetai kariota i te rangi ra tei turuia e te au kerupi ora ra. (1 Paraleipomeno 28:18) Te akataka maira te reira i te tumu i pure ei te Ariki ko Hezekia: “E te Atua o Iseraela, e Iehova Sabaota e, e tei noo ki rotopu i nga kerubi.”—Isaia 37:16.
Te Ngai Tapu
7. Eaa te au apinga i roto i te Ngai Tapu ra?
7 Kua tapaia te rua o te pia o te tapenakara ko te Ngai Tapu. I roto i teia tuanga, i te pae kaui o te tomo anga te tu ra tetai tu anga ramepa manea e itu manga, e i te pae katau ko tetai kaingakai no te varaoa o te aroaro ra. I mua tika atu i reira te tu ra tetai atarau te kake maira tetai kakara no te atinga kakara ra. I mua tikai te reira i tetai arai tei akataka ra i te Ngai Tapu mei te Ngai Tapu Rava ra.
8. Eaa te au angaanga tei rave putuputuia e te kautaunga i roto i te Ngai Tapu ra?
8 I te au popongi katoa e te aiai katoa oki, ka tomo atu tetai taunga ki roto i te tapenakara e ka tutungi i te atinga kakara ki runga i te atarau no te aunga kakara ra. (Exodo 30:7, 8) I te popongi, i te tuatau te ka ra te atinga kakara, kua pikaoia ki te inu nga ramepa e itu tei akanooia ra ki rungao i te tu anga ramepa auro ra. I te aiai kua tutungiia te au ramepa ra ei akamarama no te Ngai Tapu ra. I te au Tapati ravarai ka tuku tetai taunga e 12 au varaoa ou ki runga i te kaingakai o te varaoa aroaro ra.—Levitiku 24:4-8.
Te Paepae
9. Eaa te akakoro anga no te ariki vai maata ra, e eaa te apiianga ta tatou i kite no te reira mai?
9 E paepae katoa oki to te tapenakara, tei koropiniia e tetai aua maaniia ki te kakau puakapa. I roto i teia paepae ko tetai ariki maata te ngai i orei ei te kau taunga i to ratou rima e te vaevae i mua ake ka tomo atu ei ki te Ngai Tapu. Ka orei katoa oki ratou i mua ake i te orongaanga au atinga ki runga i te atarau tei akanooia ki roto i te paepae ra. (Exodo 30:18-21) E akamaaraanga ketaketa teia umuumu anga no te tu ma ki te au tavini o te Atua i teia tuatau nei e ka tika ratou kia tauta no te tu ma i te pae kopapa, te tu akono tau, te manako, e te pae vaerua oki me te anoano ra ratou kia arikiia e te Atua ra ta ratou akamori anga. (2 Korinetia 7:1) I muri iora kua raveia mai te vaie no te ai ki runga i te atarau ra e te vai no te ariki maata e te au tavini o te iero kare ra i te ngati Iseraela.—Iosua 9:27.
10. Eaa etai orongaanga tei raveia ki runga i te atarau no te atinga ra?
10 I te au popongi ravarai e te aiai ravarai, kua tutungiia tetai toa punua mamoe ei atinga ki runga i te atarau ma tetai orongaanga varaoa e te atinga inu oki. (Exodo 29:38-41) Kua orongaia etai atu au atinga i te au ra akatakaia ra. I etai tuatau kua raveia tetai atinga no tetai rave anga ara a tetai tangata ra. (Levitiku 5:5, 6) I etai atu tuatau ka rauka kia oronga ua tetai tangata Iseraela i te atinga au e riro ei na te kau taunga e taua tangata nana ra te atinga e kai. Na teia i akakite e ka rauka i te au tangata rave ara te au ma te Atua ra, mei te mea rai e rekarekaanga i te kaikai anga kapiti ma ia katoa ra. Noatu rai ko te tangata ke ra ka rauka kia riro mai ei tangata akamori ia Iehova e kia rave i te oronga ua anga atinga i Tona are ra. Inara e tau ei kia akaari i te akangateitei kia Iehova, ka ariki te kautaunga i te au atinga meitaki anake ra te tu. Ka tau te atinga varaoa mata titona ra kia pueu meitaki, e ko te au manu no te au atinga ka tau katoa kia iro koreia.—Levitiku 2:1; 22:18-20; Malaki 1:6-8.
11. (a) Eaa tei raveia i te toto o te au atinga manu ra, e kua tou atu teia ki teaa? (e) Eaa to te Atua ra manako no te toto tangata e to te manu katoa oki?
11 Kua apainaia te toto o teia au atinga ki te atarau. Kua riro teia ei akamaaraara ki te iti tangata i te au ra tataki tai e e aronga ara anake ratou te umuumu ra i tetai ei oko tei riro tona toto akamaringiia ei tapoki anga tamou no to ratou au ara e ei akaora ia ratou mei te mate. (Roma 7:24, 25; Galatia 3:24; akaaite ia Ebera 10:3.) Kua akamaaraara katoa teia taangaanga tapu i te toto ki to Iseraela e te akatutu ra te toto i te ora anga e ko te oraanga no ko mai i te Atua ra. Ko tetai ua atu angaanga na te tangata no te toto kua tureia mai e te Atua mei mua mairai.—Genese 9:4; Levitiku 17:10-12; Angaanga 15:28, 29.
Te Ra Tapokiangaara
12, 13. (a) Eaa te Ra Tapokiangaara ra? (e) I mua ake ka raukaʼi i te taunga maata i te apai mai i te toto ki te Ngai Tapu Rava ra, eaa tei anoanoia iaia ra kia rave?
12 Okotai taime i te mataiti i tei tapaia ra ko te Ra Tapokiangaara, te iti tangata pouroa o Iseraela, kapiti katoa te aronga tangata ke tei akamori ra ia Iehova, kua anoanoia kia akamutu i te angaanga katoatoa e te akakore kai. (Levitiku 16:29, 30) I teia ra puapinga maata, kua tamaia te iti tangata mei te ara na roto i tetai tu akatutu anga kia rekarekaʼi i te pirianga ponuiaau ma te Atua ra no tetai atu mataiti. E tamanako ua tatou i te turanga e ka akamanako ei i etai o te au tumu maata.
13 Tei roto te taunga maata i te paepae o te tapenakara. Kua oti te orei iaia uaorai i te vai o te ariki maata ra, kua ta aia i tetai toa puakatoro no te atinga. Kua riringiia te toto o te puakatoro ra ki roto i tetai ariki; ka taangaangaia te reira na roto i tetai tu taka ke ei tapoki no te au ara o te kopu taunga o Levi ra. (Levitiku 16:4, 6, 11) Inara i mua ake ka rave maata atu ei i te atinga, te vaira tetai mea ka tau te taunga maata i te rave. Ka apai aia i te aunga kakara akakakara (papu ra te tukuanga i te reira ki roto i tetai tipunu) e te au reu vera mei te atarau i roto i tetai ariki ai. I teianei kua tomo atu aia ki te Ngai Tapu e kua aere atu ki te arai o te Ngai Tapu Rava. Kua aere marie aia takapini i te arai e kua tu atu ki mua i te aruna o te koreromotu ra. I muri ake ra, kia kore i te ngai kiteia mai e tetai ua atu tangata, kua riringi atu aia i te akakakara ki runga i te au reu vera ra, e kua akakiia te Ngai Tapu Rava ra ma tetai tumurangi kakara reka ra.—Levitiku 16:12, 13.
14. Eaa te taunga maata i tomo ei ki roto i te Ngai Tapu Rava ra ma te toto o nga manu tuke e rua ra?
14 I teianei te mareka ra te Atua kia akaari i te aroa e kia akaongiia na roto i tetai tu akatutu anga. No teia tumu kua tapaia te tapoki o te Aruna ko te “nooanga o te aroa ra” me kare te “tapoki tapokiangaara.” (Ebera 9:5, NW, tataanga i raro ake) Kua aere atu te taunga maata ki vao i te Ngai Tapu Roa, kua mou i te toto toa puakatoro ra, e kua tomo akaou atu ki te Ngai Tapu Rava ra. Mei tei akaueia i te Ture ra, kua tuku atu i tona maikao rima ki roto i te toto ra e kua pipi atura e itu taime ki mua i te tapoki o te Aruna ra. (Levitiku 16:14) I muri akera kua oki atu aia ki te paepae e kua ta i tetai puakanio, ei tetai atinga ara “na te au tangata ra.” Kua apai mai aia i tetai tuanga o te toto o te puakanio ra ki roto i te Ngai Tapu Rava ra e kua rave atu i te reira mei tana i rave ma te toto o te toa puakatoro ra. (Levitiku 16:15) Kua rave katoaia etai atu angaanga puapinga maata i te Ra Tapokiangaara ra. Ei akatauanga, kua tuku te taunga maata i tona nga rima ki runga i te mimiti o te rua o te puakanio ra e kua aaki iora i “te viivii o te tamariki a Iseraela.” Kua taki oraia atu teia puakanio ki te enua motutaa kia apai ke atu i te au ara a te iti tangata ra na roto i te tu akatutu anga. Na roto i teia tu kua raveia te tapokiangaara i te au mataiti tataki tai “na te au taunga, e na te au tangata katoa o te uipaanga ra.”—Levitiku 16:16, 21, 22, 33.
15. (a) Eaa te tu aiteite o te iero o Solomona ra ki to te tapenakara? (e) Eaa ta te puka o Ebera i tuatua no te angaanga tapu tei raveia i te tapenakara e te iero oki?
15 No te 486 mataiti mua o te tuatua enua no Iseraela ei te au tangata koreromotu o te Atua, ko te tapenakara apai aereia ra to ratou ngai no te akamori i to ratou Atua, ia Iehova. I reira, kua orongaia kia Solomona o Iseraela ra te tika kia patu i tetai are tinamou. Noatu rai e maata atu e te mekameka teia iero, kua aruia te parani tu-Atua kia aiteite te akaraanga ki to te tapenakara ra. Mei te tapenakara ra, kua akatutu mai ia i tetai akanoonoo anga maata atu, e kia meitaki atu no te akamori anga ta Iehova “i patia, kare ta te tangata.”—Ebera 8:2, 5; 9:9, 11.
Te Iero Mua e te Rua oki o te Iero
16. (a) Eaa te patianga aroa ta Solomona i rave i tona akatapuanga i te iero ra? (e) I akapeea ta Iehova ra akaari anga i tona ariki anga i te pure a Solomona?
16 I te akatapuanga i taua iero kaka ra, kua kapiti atura Solomona i teia patianga akauruia: “I te tangata ke ra, kare to Iseraela i toou nei au tangata, no to ingoa maata ra i tae mai ei mei te enua mamao mai . . . , kia aere mai ratou, e kia pure tika mai ki teianei are: E akarongo mai koe i reira i runga i te rangi i te ngai taau e noo ra, ka akatika mai ei i ta taua tangata ke ra i kapiki ia koe ra; kia kite to te ao katoa nei i toou ingoa, e kia mataku ia koe, mei toou katoa ra iti-tangata mei ia Iseraela nei; kia kite oki ratou i teianei are i akatuia e au nei, e kua tapaia i te ingoa noou ra.” (2 Paraleipomeno 6:32, 33) Na roto i tetai tu ekoko kore tikai, kua akaari mai te Atua i tona ariki anga i ta Solomona ra pure akatapu anga. Kua topa maira te ai no te rangi mai e kua akapou rava akera i te au atinga manu i rungao i te atarau, e ki rava akera te iero i te kaka o Iehova ra.—2 Paraleipomeno 7:1-3.
17. Eaa tei tupu ki te iero ta Solomona i patu ra, e no teaa ra?
17 E mea mii ra, kua ngere to Iseraela i to ratou tu mataku tau no Iehova. I muri akera, kua taviivii ratou i tona ingoa maata na te rave akamaringi toto, te akamori itoro, te akaturi, te piri anga ainga kopu tangata, e na te takinga kino i te au matiroeroe, te au vaine takaua, e te au tangata ke ra. (Ezekiela 22:2, 3, 7, 11, 12, 26, 29) E no reira, i te mataiti 607 M.T.N., kua rave te Atua i te akautunga na te apaianga mai i te au vaeau o Babulonia kia akapou i te iero ra. Ko te aronga tei ora mai o to Iseraela kua riro atu ei tuikaa ki Babulonia.
18. I te rua o te iero ra, eaa te au tika tei akatueraia ki tetai papaki o te au tangata kare ra i te ngati Iseraela tei turu ra i te akamori ia Iehova ma te ngakau katoa?
18 I muri ake i te 70 mataiti kua oki akaou atu te toenga o te ngati Iuda tei tataraara ra ki Ierusalema e kua orongaia atu te tika kia patu akaou i te iero o Iehova. E mea tau ra kia kite e, kua ngere ratou i te kau taunga e te ngati Levi no te tavini anga ki roto i teia iero ou nei. Ei tetai tupu anga, kua orongaia ki te au Netini, no te au uanga o te au tavini iero kare ra i te ngati Iseraela kua riro ia ratou te au angaanga maata ei rave tavini anga i te are o te Atua ra. Inara, kare to ratou turanga i aiteite atu ki to te kau taunga e to te ngati Levi ra.—Ezera 7:24; 8:17, 20.
19. Eaa te taputou ta te Atua i tuatua no te rua o te iero ra, e i akapeea te akatika anga i taua au tuatua ra?
19 I te akamata anga kua riro te akaraanga e kare te rua o te iero e aite atu ki te mea mua ra. (Hagai 2:3) Inara kua taputou a Iehova: “E naku e akangaueue i te enua katoa ra, e e tae mai tei inangaroia e te au enua katoa ra: e akaki oki au i teianei are ki te kakā . . . Te kakā o teianei are openga, e maata ïa i to tei muatangana ra.” (Hagai 2:7, 9) Kua tau tikai ki teia au tuatua, kua riro te rua o te iero nei kia maata atu te kaka. Kua vai ia e 164 mataiti te roa atu, e e manganui atu te aronga akamori no te au enua e manganui atu tei aere mai ki roto i tona au paepae. (Akaaite ia Angaanga 2:5-11.) Kua akamataia te akatikatika anga i te rua o te iero ra i te tuatau i te Ariki ko Heroda, e kua akamaataia tona au paepae. Kua akateiteiia ki runga i tetai papa toka maata e kua koropiniia ki etai au porotito manea, kua aiteite atu te tu mekameka ki te iero mua ta Solomona i patu ra. Kua kapiti katoa te reira i tetai paepae maata i vao ake no te au tangata o te pa enua tei anoano ra i te akamori ia Iehova. Na tetai paruru toka i akataka ke i teianei Paepae o te au Kenitara mei te au paepae o roto maira tei akatakaia no te ngati Iseraela anake ua.
20. (a) Eaa te taka ke anga maata tei akairoia ra e te iero patu akaouia ra? (e) Eaa tei akaari mai e i tamanako tarevake te au ngati Iuda ra i te iero, e eaa ta Iesu i rave i te akakite anga i teia?
20 Ko teia ko te rua o te iero kua rekareka i te tuke anga maata no tei aere atu te Tamaiti a te Atua, koia Iesu Karaiti, i te apii i roto i tona nga paepae. Inara mei te tu i te iero mua ra, te mea matauia no te ngati Iuda kare o ratou manako tika no te riro anga ko ratou ei akono i te are o te Atua ra. Kua akatika ua ratou i te aronga okooko kia rave i ta ratou pitiniti ki roto i te paepae o te au Kenitara. Pera katoa oki, kua akatika uaia te au tangata kia aere atu na roto i te iero kia tae atu ki tetai tuanga o te oire i te apaianga apinga takapini i Ierusalema. E a ra i mua ake i tona matenga, kua tamaia e Iesu te iero i taua au ravenga ra, iaia i tuatuaʼi: “Kare aina kua tataia e: ‘Toku nei are, e karangaia ïa e are pure no te pa enua ravarai?’ kua akariroia io nei ra e kotou ‘e ana no te aronga keia ra.’”—Mareko 11:15-17.
Kua Akaruke te Atua i Tona Are i te Enua Nei e Tuatau Ua Atu
21. Eaa ta Iesu i akakite no runga i te iero i Ierusalema ra?
21 No ta Iesu angaanga mataku kore i te raveanga i te akamori ma i te Atua, kua manako papu te au arataki akonoanga ngati Iuda kia tamate iaia. (Mareko 11:18) I te kiteanga e kare e roa atu ka taia aia, kua tuatua atura Iesu ki taua aronga arataki akonoanga ngati Iuda ra e: “Kua vaio tane[a]ia to kotou nei are.” (Mataio 23:37, 38) Na te reira kua akakite aia e kare e roa atu kare te Atua e ariki i te tu akamori tei raveia ra i te iero akatutu anga i Ierusalema ra. Kare ia e vai mai ei “are pure no te pa enua ravarai.” I te akakite anga tana nga pipi kia Iesu i te au are mamaata o te iero ra, kua na ko maira aia: “Te kite nei kotou i teianei au mea katoa? . . . Kare tetai toka e vaioia ki rungao i tetai, e ope rava i te uriia ki raro.”—Mataio 24:1, 2.
22. (a) I akapeea ta Iesu au tuatua no runga i te iero ra i te akatupu angaia? (e) Kare i tuku i to ratou au manakonako anga ki runga i tetai oire i te enua nei, eaa ta te au Kerititiano mua ra i kimi?
22 E 37 mataiti i muri mai kua akatupuia ta Iesu ra totou i te mataiti 70 T.N., i te akapou angaia e te vaeau o Roma a Ierusalema e tona iero katoa. Kua oronga mai te reira i te akapapu anga maata e kua akaruke tikai te Atua i tona are akatutu anga. Kare a Iesu i totou mai i te patu akaouanga i tetai atu iero ki Ierusalema. No runga i te reira oire i te enua nei, kua tata te apotetoro ko Paulo ki te au Kerititiano Epera ra: “Kare oki o tatou e oire e mou i ko nei, te umuumu nei ra tatou i taua oire ra no a muri atu.” (Ebera 13:14) Kua tapapa atu te au Kerititiano mua ra i te riroanga ei tuanga no te “Ierusalema i te rangi ra”—koia te Patireia o te Atua mei te oire rai. (Ebera 12:22, NW) E no reira, kare te akamori mou ia Iehova e rave akaouia i tetai oire ki runga i te enua nei. I ta tatou atikara te ka aru mai, ka akamanako tatou i te akanoonooanga meitaki roa atu ta te Atua i akanoo mai no te aronga katoatoa tei anoano kia akamori iaia ra “ma te vaerua e te tuatua-mou.”—Ioane 4:21, 24.
Au Uianga Akamanako Akaou Anga
◻ Eaa te pirianga ma te Atua ra i ngaro ke ia Adamu raua ko Eva?
◻ Eaa ra i tau ei tatou kia akamanako i te au tu o te tapenakara ra?
◻ Eaa ta tatou i kite mei te au angaanga i raveia i te paepae o te tapenakara ra?
◻ Eaa ra te Atua i akatikaʼi i tona iero kia akapouia?
[Au Tutu i te kapi 10, 11]
Te Iero tei Patu Akaouia e Heroda
1. Ngai Tapu Rava
2. Ngai Tapu
3. Atarau o te Atinga Kakara
4. Tai Akatoia
5. Paepae o te Kau Taunga
6. Paepae o Iseraela
7. Paepae o te Au Vaine