Akapeea Tatou me Pure ki te Atua?

I TE pati anga tetai pipi kia apiiia i te pure, kare a Iesu i tapupu ana i te oronga i te reira kiaia. Kia tau kia Luka 11:2-4, kua pau aia: “Me pure koe, e tuatua: E te Metua, kia akatapuia toou ingoa. Kia tae toou patireia. E oronga mai i te manga i tau ia matou i te au ra. E akakore mai i ta matou au ara, mei ia matou katoa i akakore i tei ara ia matou nei. Auraka e arataki ia matou kia timataia.” (Douay Version Katorika) Kua matauia teia e ko te Pure a te Atu. E rito tikai teia akakite anga.

Okotai mea, te akakite maira te tuatua mua kia tatou e ka aere ta tatou au pure kiaai​—ki to tatou Metua. Te kite ra kare a Iesu i tuku ana i tetai ngai kia pure ki tetai atu peretana, tutu itoro, “tainiti,” me kore ra kiaia. I te mea e, kua akakite te Atua e: “Kare au e oronga i toku kaka ki tetai atu, e kare katoa taku akapaapaa anga ki te au mea akatikitikiia.” (Isaia 42:8, Dy) Te au pure tei tukuia ki tetai atu mea me kore ki tetai ua atu i te pae mai i to tatou Metua i te rangi kare i reira te reira e akarongoia mai e ia, noatu te ngakau tae o te tangata akamori ra. I roto i te Pipiria, ko te Atua ko Iehova anake ua tei kapikiia “tei akarongo i te pure ra.”​—Salamo 65:2.

Penei ka karanga etai pae e te riro ua ra te “au tainiti” ei aronga rotopu ra ki te Atua. Inara kua ikuiku a Iesu uaorai e: “Ko au te mataara, e te tuatua-mou e te ora; kare ua e tangata e tae ki te Metua ra, mari ra ei iaku. Ko ta kotou e pati ma toku ingoa, naku ïa e rave, kia akakakāia te Metua i te Tamaiti.” (Ioane 14:6, 13) No reira kua kopae a Iesu i te manako kia riro tetai ua atu tei kapikiia e tainiti kia rave i te tuanga ei rotopu. Ka akara katoa ana i ta te apotetoro Paulo i karanga no runga ia Karaiti: “Kare aia i mate anake no tatou​—kua mama mai ra aia mei te mate, e i reira i te rima katau o te Atua te tu ra aia e te pati ra no tatou.” “Te ora ua ra aia e tuatau ua atu ei rotopu no te katoatoa tei aere ki te Atua na roto iaia.”​—Roma 8:34; Ebera 7:25, Jerusalem Bible Katorika.

Te Ingoa Tei Tau Kia Akatapuia

Te au tuatua a Iesu tei aru mai: “Kia akatapuia toou ingoa.” Akapeea e raukaʼi i tetai i te akatapu, koia oki, te akangateitei, me kore te akataka meitaki, i te ingoa o te Atua naringa kia kiteia te reira e te taangaangaia ra te reira? E tere atu i te 6,000 au taime i roto i te “Koreromotu Taito,” kua akatakaia te Atua na tona ingoa uaorai ko Iehova.

Tetai tataanga i raro ake no Exodo 6:3 i roto i te Douay Version Katorika te karanga ra no runga i te ingoa o te Atua: “Kua karanga etai aronga o teia tuatau i te ingoa o Iehova . . . , i te tangi anga tikai o te ingoa [o te Atua], i roto i te tataanga Epera, no tetai tuatau roa kare tona tuatua anga i kiteia i teianei.” No reira te New Jerusalem Bible Katorika i taangaanga ei i te ingoa Yahweh. Noatu te reka ra etai aronga apii i te reira tuatua anga, “Jehovah” te tu tika tikai e te akanoo tamouia o te tuatuaanga i te ingoa tu-Atua i te reo Engarani. Te vaira te au mataara uaorai o tetai atu au reo i te tuatuaanga i te ingoa tu-Atua. Te mea puapinga koia oki kia taangaanga tatou i te ingoa e raukaʼi i te akatapu i te reira. Kua apii ainei taau akonoanga ia koe kia taangaanga i te ingoa o Iehova na roto i te pure?

Te Au Tumu Manako Tau no te Pure

I muri mai kua apii a Iesu i tana au pipi kia pure: “Kia tae toou patireia.” Te tuatua katoa ra te Evangeria a Mataio i teia au tuatua: “Kia raveia toou anoano i te enua nei mei te rangi katoa ra.” (Mataio 6:10, Dy) Te Patireia o te Atua e kavamani ia i te rima o Iesu Karaiti. (Isaia 9:5, 6) Kia tau ki te totou Pipiria, kare e roa atu ana ka akaatea te reira i te au kavamani tangata katoatoa e ka apai mai i tetai tuatau au i te ao katoa. (Salamo 72:1-7; Daniela 2:44; Apokalupo 21:3-5) No reira te akariro ra te au Kerititiano mou i te aerenga mai o te Patireia ei tumu tuatua taiku putuputuia i ta ratou au pure. Kua apii ainei taau akonoanga ia koe kia pera?

Ma te tau, kua akaari katoa a Iesu e ka rauka ta tatou au pure kia kapitiia mai te au mea uaorai tei manataia e tatou. Kua karanga aia: “E oronga mai i te manga i tau ia matou i te au ra. E akakore mai i ta matou au ara, mei ia matou katoa i akakore i tei ara ia matou nei. Auraka e tuku ia matou kia timataia.” (Luka 11:3, 4, Dy) Te aite anga o ta Iesu au tuatua e ka rauka ia tatou i te kimi i te anoano o te Atua i te au mea o te au ra, e ka rauka ia tatou i te aere kia Iehova no runga i tetai ua atu mea te ka tamanata ia tatou me kore ra ka tamanata i to tatou tu au o te manako. Na te pati putuputuanga i te Atua na teia tu ka tauturu ia tatou kia ariki i to tatou irinaki anga ki runga iaia. Ka rauka i reira ia tatou i te kite maata atu i tona mana ki rungao i to tatou au oraanga. Na te patianga i te au ra ki te Atua kia akakore mai i to tatou au apa e mea puapinga ia. I reira tatou e kite maata mai ei i to tatou au ngai paruparu​—e ka akakoromaki maata atu i te au tarevake o tetai atu. Ta Iesu akamaroiroi anga kia pure tatou kia akaoraia mei te au timata anga e mea tau katoa te reira, te akamanako anga tikai i te au tu akono tau kore o teianei ao. Kia rotai atu ki te reira pure, ka matakite tatou kia kopae i te au turanga e te tu penei ka arataki ia tatou ki roto i te rave anga tarevake.

Kare e ekoko anga, i reira, e e maata ta te Pure a te Atu e akakite maira kia tatou no runga i te orongaanga i te au pure tei akamareka ra i te Atua. Inara kua anoano ainei a Iesu e kia rave tatou i teia pure e e tuatua taokioki ngoie ua i te reira?

Te Ako Anga Maata Atu no Runga i te Pure

E maata ta Iesu au ikuiku anga i oronga no runga i te pure. Ia Mataio 6:5, 6, ka tatau tatou: “E kia pure koe, auraka mei ta te aronga pikikaa ra: ko tei inangaro i te pure tu ua i roto i te au sunago, e te pae arataa ra, kia akaraia ratou e te tangata. . . . Kareka kia pure koe, e aere ki roto i toou pia, e topiri marie i te pa, ka pure ei ki toou Metua, e na to Metua, tei kite ua mai i te mea ngaro, kore ua rai aia e kitea, e o mai akakite ua i taau tutaki.” Te apii maira teia au tuatua ia tatou kare te pure e tau kia orongaia na roto i tetai tu akaariari, te tu va ua kia riro ei mea akamea ua ki tetai atu. E akakite ua ana ainei koe i toou manako ngakau kia Iehova i te ngai muna, mei ta te Pipiria e raurau maira?​—Salamo 62:8.

Kua oronga a Iesu i teia akamatakite anga: “I roto i ta kotou au pure auraka e tuatua neneva ua mei te au peikani ra, no te mea te manako ra ratou e na te taangaanga anga i te au tuatua e manganui ka akariro ratou ia ratou uaorai kia rongoia mai.” (Mataio 6:7, JB) Ma te taka meitaki, kare a Iesu e reka ana i te tamou ngakau anga i te au pure​—e kare katoa te tatauanga ia ratou no roto mai i tetai puka. Te kopae katoa ra tana au tuatua i te taangaanga anga i te ei rotario.

Kua akakite tika tetai puka Katorika i teia: “Ta tatou pure meitaki roa atu ko to tatou uaorai au manako ua nei me aere tatou kiaia ma te akameitaki me kore ra ma te anoano, i tetai au taime ma te mii, me kore ra i ta tatou rave anga i te au ra te akangateitei anga iaia.” E au tuatua ua nei ta Iesu uaorai au pure, kare i te mea tamou ngakauia. Ei akaraanga, e tatau i te pure a Iesu tei tataia ia Ioane pene 17. Te aru ra te reira i te pure akatau anga, te akatumuanga i to Iesu anoano kia kite i to Iehova ingoa i te akatapu angaia. E pure tuatua ua nei ta Iesu e te ngakau tae tikai e te ngateitei.

Te Au Pure te Rongoia ra e te Atua

Me kua apiiia koe kia oronga i te au pure tei tamou ngakauia, kia pure ki te “au tainiti” me kore ki te au tutu itoro ra, me kore kia taangaanga i te au apinga akonoanga, mei te ei rotario, penei te manako o te pureanga na te tu tei akanooia e Iesu ka riro ia ei mea matakuia i te akamata anga. Inara, te mea puapinga koia kia kite i te Atua​—tona ingoa, tana au akakoro anga, tona tu. Ka rauka ia koe i te akatupu i teia na roto i tetai apii anga meitaki o te Pipiria. (Ioane 17:3) Te papa ua ra te Au Kite o Iehova e te puareinga ua ra i te tauturu ia koe. No te mea oki, kua tauturu ratou e mirioni ua atu takapini i teianei ao kia “tongi ana kia kite i te meitaki o Iehova!” (Salamo 34:8) Ko te maata atu o taau kite anga i te Atua, ko te maata atu o toou akakeu angaia kia akapaapaa iaia na roto i te pure. E ko te maata atu o taau akapiri vaitata anga kia Iehova na roto i te pure ngateitei ra, ko te piri vaitata atu o toou pirianga kiaia ra.

No reira te raurauia ra te aronga akamori mou katoatoa o te Atua “auraka e tukutuku i te pure.” (1 Tesalonia 5:17) Kia papu e te rotai tikai ra taau au pure ki te Pipiria, kapiti mai te au ikuiku anga a Iesu Karaiti. Na teia tu ka papu ia koe e ka marekaia taau au pure e te Atua.

[Tutu i te kapi 7]

Ko te maata atu o ta tatou apii anga ia Iehova, ko te maata atu o to tatou akakeu angaia kia pure kiaia mei te ngakau