Ripoti a te Aronga Tutu Patireia

Te Tutu Aere Uaia Atura te Au Tuatua Mou Pipiria i Airerani

I TE au mataiti i ou ake nei kua riro te enua manea o Airerani ei ngai tupu anga maata te kino. I taua taime rai, kua ariu meitaki mai te au tangata Airerani ki te tuatua akakite a te Pipiria no te manakonako anga tei apainaia atu kia ratou e te Au Kite o Iehova. Te akakite maira te au tupuanga ka aru mai no Airerani i teia.

■ I Dublin kua piri atu tetai o te Au Kite o Iehova e tana tamaine meangiti i roto i te angaanga tutu aereanga mei tera ngutupa ki tera ngutupa. Kua aravei raua i tetai vaine ko Cathy tona ingoa te angaanga pakari ra ma tana au tamariki e manganui. Kua pati te Kite me ka rauka rai i tana tamaine, te apiipii ra e akapeea me tutu aere, i te tua i tetai akakite anga poto kiaia. Kua akatika a Cathy, e kua oronga te tamaine meangiti i te oronga anga tei manako meitakiia e te taka marama. Kua umere tikai a Cathy i te tu ngakau tae kitea uaia e te tu ngateitei tikai o te tamaine meangiti, e kua ariki aia i te oronga anga o tetai pepa Pipiria.

I muri maira kua akamanako a Cathy no runga i te akapapa anga meitaki e te tu mako o te tamaine ou tei atoro ra. “Kua umere tikai au e ka rauka i tetai tamaine meangiti i te tua i tetai tuatua akakite anga reka ma te kore i akaata i te tu kite tikai,” i nana ei. “Kua iki au e me atoro akaou mai te Au Kite o Iehova a tetai taime, ka akarongo au ia ratou.”

I taua taime rai kua neke atu a Cathy ki tetai taoni meangiti i te apatonga opunga ia Airerani i te pae mai i te kotinga o nga enua ko Cork e Kerry. I etai taime i muri maira kua aere atu te Au Kite o Iehova ki tona ngutupa, e kua pati atu aia ia ratou ki roto. Kua ariki aia i tetai apii putuputu o te Pipiria e i teianei te aere nei ki te au uipaanga putuputuanga ma tetai o tana au tamariki. Te mareka nei a Cathy i te anoano tika tikai o te tamaine meangiti i te tua atu i te tuatua meitaki kiaia.

■ I te ngai o Tullamore, kua rave te Au Kite i te au uriurianga Pipiria ma tetai vaine ko Jean tona ingoa tei tere atu i te itu mataiti. I etai taime kua akaari aia i te tu inangaro e kua ariki i te au puka, inara i tetai atu au taime kua kore tona inangaro. I tetai ra, i te atoro anga tetai Kite ko Frances tona ingoa e tetai taeake ia Jean, kua kite raua iaia i roto i te tu patoitoi. “Noatu e eaa ta maua i karanga atu,” i akakite mai ei te Kite, “kua kino rava atu aia. I te openga ra, kua karanga mai aia kia maua kia aere ke atu e kua reru mai i te ngutupa.”

Kua manako a Frances me ka raveia tetai atu atoro anga ka tupu akaou te reira. ‘Penei kare e paunaia te taime i te atoro atu iaia me kare aia e inangaro roa ana i te tuatua akakite,’ kua manako a Frances. Inara, kua uriuri aia i te reira ki tana tane, ko Thomas, e kua papu tikai aia. I te na reira akaou anga raua, kua rave akaouia tetai aravei anga ia Jean. Kua oaoa mai aia e kua ariki i te au kopi o te au makatini Punanga Tiaki e te Awake! Kua reka rai etai atu au atoro anga, e kua akamata a Thomas raua ko Frances i tetai apii Pipiria putuputu i te kainga kiaia.

Eaa ra i taui ei? Kua akamarama mai a Jean e i te tuatau i akaari ei aia i te tu patoitoi ki te Au Kite, koi anau ua ake ra aia e koi aere ua maira mei te are maki. E no te angai ra i tana pepe ou i te u e te angai ra i tana pepe maata i te kai ma te tipunu, e kua rauka ua iaia te moe e tai e te apa ora i te po. “Ko te mea openga taku ka inangaro i te rave,” i na Jean ei, “te tuatua no runga i te akonoanga.”

I roto rai i te rua marama kua aere atu a Jean ki te au uipaanga pouroa, e i roto rai i te a marama kua piri atu aia ki roto i te angaanga orometua. E tai ngauru marama mei te taime mai i akamata ei aia i tana apii Pipiria, kua papetitoia aia. I teianei te tauturu nei to Jean uaorai tupuanga iaia i roto i te angaanga orometua. Te akakite maira aia e: “Me aravei au i tetai tangata e tu akakino tona, ka tauta au e kua marama au. E tata ua ana au no runga i te reira. Penei ka taui te turanga me oki akaou atu au; penei kua meitaki mai te reira tangata e ka ariu mai.”