Kua Rave Ratou i to Iehova Anoano

Akapaapaaia a Iesu ei Mesia e te Ariki!

KUA riro te urupu maniania e aere ra ki Ierusalema ia Nisana 9, 33 T.N., ei akapoitirere i te au Iuda e manganui. Noatu e kare i te mea tuke ua ake i te kite i te au tangata te aere pu anga ki roto i te oire i mua ake i te Pasa, e tuke rai teia aronga turoto. Te tangata puapinga tikai i rotopu ia ratou e tangata te aere ra na runga i te punua a tetai atini. Ko Iesu Karaiti taua tangata, e kua oora te au tangata i te au kakau e te au atava nu tamara ki mua iaia ia ratou e aoa ra: “Hosana i te Tamaiti a Davida; Kia ora aia, ko tei aere mai ma te ingoa o Iehova; Hosana i te rangi teitei.” I te kite anga i te urupu tangata, e manganui i Ierusalema takere tei akakeuia kia piri mai ki roto i te upokotu anga.​—Mataio 21:7-9; Ioane 12:12, 13.

Noatu e te akapaapaaia ra aia i te reira taime, kua kite a Iesu e te tiaki maira te au timata anga iaia. I roto anake ua i te rima ra, ka tamateia aia i taua oire rai! Ae, kua kite a Iesu e e ngai kino a Ierusalema, e kua akanoo aia i tona aere anga kitea uaia ki roto i te oire ma te reira manako anga tikai.

Akatupuia Tetai Totou Taito

I te 518 M.T.N., kua totou a Zekaria i to Iesu aere anga ma te autu ki Ierusalema. Kua tata aia: “Ka maeva na, e te tamaine a Ierusalema e; i na, te aere maira to ariki kia koe ra; e tuatua-tika tana, e tei iaia te ora; e akaaka tona, e te noo anga ki runga i te asini, e te punua oki, te anaunga a te asini. . . . E nana e tuatua i te au ki te au etene; e riro oki tona au mei tetai tai e tae ua atu ki tetai tai, e mei te kauvai mai e tae ua atu ki te au openga o te enua ra.”​—Zekaria 9:9, 10.

No reira kua riro to Iesu aere anga ki Ierusalema ia Nisana 9 ei akatupu i te totou Pipiria. Kare te reira i tetai tupu anga tupu ua mari ra kua parani meitakiia. I mua atu ana, i vao ua ake ia Ierusalema, kua ikuiku a Iesu i tana nga pipi e rua: “Ka aere ana korua ki tera ra vila, e kite korua i tetai asini i reira, kua erekia, ma tana punua i te pae, e tatara, e taki mai i ko nei kiaku nei. E kia tuatua mai tetai tangata kia korua, e karanga atu korua, E tau teia i te Atu; e nana e tuku mai i reira ra.” (Mataio 21:1-3) Inara eaa a Iesu i inangaro ei i te aere ki Ierusalema na runga i tetai atini, e eaa te aiteanga o to te urupu ariu anga mai?

E Tuatua Akakite Anga Taoonga Ariki

I te maata anga o te taime e ririnui maata atu te tutu kite mataia i te tuatua tei tuatuaia. No reira, i tetai au taime kua akariro a Iehova i tana au peroveta kia akatutu i ta ratou tuatua na te akaketaketa anga i ta ratou tuatua totou. (1 Ariki 11:29-32; Ieremia 27:1-6; Ezekiela 4:1-17) Ka riro teia ravenga komunikeiti anga kite maataia ei akara anga tamou tikai ki runga i te manako o tetai tangata ngakau maro roa atu e akarakara ua ra. Mei tera katoa, to Iesu akatutu anga i tetai tuatua akakite anga ririnui i te na runga anga i tetai atini ki roto i te oire o Ierusalema. Akapeea?

I te au tuatau Pipiria kua taangaangaia te atini ma te au akakoro anga ngateitei. Ei akaraanga, i te aere anga ki tona akatainuanga ei ariki kua na runga a Solomona i to tona metua tane “mule,” e uanga manu tuke no te toa atini. (1 Ariki 1:33-40) No reira na to Iesu aere anga ki Ierusalema na runga i tetai atini tera te aiteanga te oronga ra aia iaia uaorai ei ariki.a No te au tu o te urupu tangata i akaketaketaiaʼi teia tuatua akakite anga. Kare e ekoko anga, te maata anga o te pupu tangata i reira e au tangata Galilea, tei oora ra i to ratou kakau ki mua ia Iesu​—e akatutu anga akamaara anga i te akakite anga atea ua o to Iehu akataoonga anga ei ariki. (2 Ariki 9:13) Na to ratou ariki anga ia Iesu ei “te Tamaiti a Davida” i akapapu roa atu i tona tika anga tau ki te taoonga tutara. (Luka 1:31-33) E na ta ratou taangaanga anga i te au atava nu tamara te akaari tika anga i to ratou tu kauraro ki tona mana taoonga ariki.​—Akaaite ia Apokalupo 7:9, 10.

No reira kua riro te upokotu anga tei aere ki Ierusalema ia Nisana 9 ei tuku atea ua i te tuatua akakite anga taka meitaki e ko Iesu ta te Atua Mesia e te Ariki akataoongaia. E tikai, kare te katoa anga i mataora ana i te kite anga ia Iesu i te oronga angaia na teia tu. Te au Pharisea tikai kua manako ratou e e tau kore pakari kia akaariia taua tu ngateitei ariki kia Iesu. “E te Orometua,” i maro ei ratou, kare e ekoko anga ma te au reo riri, “e ako ake ana koe i to au pipi nei.” Kua pau atu a Iesu: “E akakite atu au kia kotou, kia muteki ua ratou nei, kua kapiki ua mai ïa te au toka nei i reira.” (Luka 19:39, 40) Ae, ko te Patireia o te Atua te tumu manako o ta Iesu tutu aereanga. Ka akakite mataku kore ua aia i teia tuatua noatu e ka ariki te au tangata i te reira e me kare.

Ei Apiianga no Tatou

Kua rauka te tu mataku kore maata ia Iesu kia aere ki Ierusalema i te tu tei totouia e te peroveta ko Zekaria. Kua kite aia e na te raveanga i te reira ka riro ei akakeu i te riri veravera o tona au enemi. I mua ake i tona aerenga ki te rangi, kua tono a Iesu i tana au pipi kia tutu aere i te tuatua meitaki o te Patireia o te Atua e te “akariro i to te pa enua katoa ei pipi.” (Mataio 24:14; 28:19, 20) Ei akatupu i teia angaanga kia rauka katoa te tu mataku kore. Kare te katoa anga e mataora i te akarongo mai i te tuatua. Etai pae e tuke to ratou tu, tetai pae ka patoi i te reira. Kua tuku etai au kavamani i te au arairai anga ki runga i te angaanga tutu aere me kore ra kua arai takiri i te reira.

Noatu ra, kua kite te Au Kite o Iehova e kia tutu aereia te tuatua meitaki o te Patireia akatumuia o te Atua, noatu me ka akarongo mai te au tangata e me ka patoi i te reira. (Ezekiela 2:7) Ia ratou e rave ua atura i teia angaanga akaora anga, te akapapuia ra ratou i ta Iesu taputou: “E i na, tei vaitata ua ra au ia kotou, e tae ua atu ki te openga o teianei ao.”​—Mataio 28:20.

[Tataanga Rikiriki i Raro]