Ripoti a te Aronga Tutu Patireia
Akatotoaanga i te Ua Patireia i te Au Atianga Ravarai
TE AKAMAROIROI ra te Tuatua na te Atua, koia te Pipiria, i te tu angaanga karape. Kua karanga te Ariki ko Solomona: “Ei te popongi ka ruru ei i taau ua, e ei te aiai auraka e tāpu ua i to rima: kare oki koe i kite i te ka tupu, me ko teia, me ko tera, peneiake ko te meitaki kapipiti katoa ra.”—Koheleta 11:6.
I te au atianga ravarai, te ruru ra te Au Kite o Iehova i te “ua” na te tutu aereanga i te tuatua meitaki o te Patireia o te Atua. E tere atu i te 230 au enua e te au pupu airani, te tamou ua atura ratou ‘kare e rā i tukua, i te apii anga atu e te tuatua anga atu ia Iesu Mesia.’ (Angaanga 5:42) Te akatutu maira te au kite anga ka aru mai e akapeea te Au Kite o Iehova ‘te koreanga e tāpu ua i to ratou rima’ i te angaanga tutu aere.
◻ I te Repapuriki o Kape Vete, te aaere ra tetai o te Au Kite o Iehova na te pae i tetai are auri iaia e tutu aere ra. I roto i te aua o te are auri, te noonoo ra etai au mouauri i roto i te tumu rakau. Te kite anga i te Kite i raro, kua aoa atu te au mouauri no etai au makatini. Kua tapeka te Kite i tetai au makatini Punanga Tiaki e te Awake! ki tetai toka e kua titiri ia ratou ki runga ake i te patu are auri. Tei tupu mai mei teia inangaro anga mua, e 12 au apii Pipiria tei akamataia. E toru au mouauri tei akatapu i to ratou au oraanga ki te Atua e kua oronga ia ratou uaorai kia papetitoia ki te vai. Kua tavini ana tetai o te au mouauri ei tangata evangeria tamou, me kore ei painia, e tere atu i te mataiti i teianei. Akapeea, ra, ratou i te rave anga i te angaanga tutu aere i roto i te are auri? Te mea mua kua akataka keia te are auri ki roto i te au tuanga ngai. I reira kua akatuangaia te ngai ki rotopu i te Au Kite e toru e kua angaanga mei tetai pia ki tetai pia. Kua aru teia aronga tutu Patireia i te au inangaro tei aite ra ki te tu ta te Au Kite o Iehova e rave ana i teianei ao—na te raveanga i te au atoro akaou anga. Okotai ra tuke, ko te putuputu o te au apii Pipiria e raveia ra. I te mea ka apii okotai me kore e rua taime i te epetoma no tetai ora me kore e maata atu, ka apii etai au mouauri i te au ra ravarai! Pera katoa, kua oronga te akatere tianara o te are auri i te tika anga ki te Au Kite kia rave i te au uipaanga putuputuanga katoatoa i roto i te are auri.
◻ I Potukara kua rauka i tetai vaine tetai au puka Punanga Tiaki i te mate anga tona mama ruau. I te mea kare aia i tetai o te Au Kite o Iehova, kare aia i inangaro i te akono i te au puka. Inara, kare aia i inangaro i te takore atu ia ratou. I tetai ra kua akakite aia ki tetai o te Au Kite o Iehova tei atoro mai iaia i te angaanga orometua mei tera ngutupa i tera ngutupa no runga i te au puka. Kua ui atu te Kite me kua kite ainei aia i te puapinga tikai o te au puka. Kua pau mai te vaine: “Teia oki te tu, kare au i kite i to ratou puapinga tikai, inara akapeea au e kite ei?” Kua ariki te vaine i tetai apii Pipiria, e kare i roa kua akaperepere i te au puka a tona mama ruau. I teianei koia katoa tetai Kite papetitoia o Iehova. Tetai rai, te apii katoa nei tana tamaine e tetai oa piri o te ngutuare tangata i te Pipiria. Mei teaa atura teia putunga puka te riro anga mai ei apinga puapinga maata!