Te Irinaki ra Ainei Koe i te Reinikaneiti Anga?
“TE MAARA ra ainei ia koe te tamaine tei noo i te pae mai taau i akainangaro ra ia koe e maata maira i Initia nei?” i tataʼi a Mukundbhai ki tana tamaiti, e tamaiti apii teitei i te Unaite Teite. “Te akaipoipo nei aia i nga mea epetoma ua nei. Kua manako mai au e ka inangaro koe i te kite.”
Eaa ra te metua tane i akakite ei i teia nuti ki tana tamaiti? Mei te mea, e na Mukundbhai i akamutu takiri i to raua akainangaro anga mapu ou no tetai au mataiti roa i topa. Pera katoa, no Unaite Teite te tamaiti te ngai i aruaru ei i te apiianga kite teitei no tetai ono mataiti. Kare aia i tata mai ana ki te tamaine i taua tuatau, e kua kite a Mukundbhai i te reira.
Eaa i reira, te manata? Tei akaariia kua irinaki a Mukundbhai ki roto i te reinikaneiti anga, me kore te anau akaou anga.a Me e mea tupu ua te akainangaro anga mapu i rotopu i nga tangata e rua i to raua tuatau patana anga i te oraanga i mua atu ana, e mea kino i reira kia akatakakeia raua i teianei i te mea kua tae raua ki te mataiti tei tau kia akaipoipo. Kua inangaro ua a Mukundbhai i te akakite ki tana tamaiti i mua ake ka riro mai ei te tamaine ei vaine na tetai ke i roto i teia oraanga.
Ka akamanako ana i tetai akara anga. No tetai au ra kua noo mamae ua tetai tamaine e a ona mataiti ki roto i te are maki i Mumbai, Initia. Tona manamanata e ara toto kinokino i roto i tona pukuatu. Kua taitaia tona nga metua puapingaia i te kite i te tamaine i te mamae anga. Inara kua manako raua: “Ka anoanoia maua kia ariki i te reira. Penei kua rave aia i tetai apinga i tona oraanga i mua atu ana i tupu ei teia kiaia.”
E tuanga puapinga ta te irinaki reinikaneiti anga i roto i te au oraanga o te au mirioni ua atu i roto i te akonoanga, Initu, Buda, Iaini, Tiiki, e tetai atu au akonoanga tei akamataia i Initia. Te au kite anga i te oraanga—mei te akainangaro anga e tae ua atu ki te mamae anga pakari—kua tamanakoia e au tupu anga o te au angaanga tei raveia i tetai oraanga me kore au oraanga i mua atu ana.
E manganui i te au enua Opunga tei umere katoa i te apiianga o te reinikaneiti anga. Te irinaki ra te vaine akatutu teata ko Shirley MacLaine i te reira. Te vaine tata ko Laurel Phelan o Vancouver, British Columbia, Kanata, kua karanga e au akamaara anga tona o te 50 au oraanga i topa. I tetai tare anga Gallup 1994 tei raveia na te CNN/USA Today, e tere atu i te 270 o te 1,016 aronga mamaata tei irinaki i te reinikaneiti anga. E tuanga katoa te reinikaneiti anga no te tupuanga Tuatau Ou. Inara eaa te akakite anga tika te turu ra i teia irinaki anga?
Ko “te au akamaara anga o tetai oraanga i mua atu ana!” i karangaʼi te aronga irinaki i te reinikaneiti anga. No reira, i te akamata anga a Ratana i Bangkok e toru ona mataiti kia rauka “te au akamaara anga o tona oraanga tei topa ei vaine akonoanga tei mate i tona au mataiti 60,” kua ariki te maata anga o te aronga akara i tona tupu anga ei akapapu anga tikai o te reinikaneiti anga.
Inara, te tupu maata nei te au ekoko anga. E ka rauka tetai atu au akamarama anga no runga i te au akamaara anga o te au oraanga i mua ana.b I roto i tana puka Hinduism: Its Meaning for the Liberation of the Spirit, kua karanga te tangata Initu kimi kite ko Nikhilananda e ko te ‘au kite anga i muri ake i te matenga kare ia e rauka i te akapapuia kia maramaia.’ Inara kua akakite papu aia i “te apiianga anau akaou anga e e papu maata roa atu i tei papu kore.”
Inara te turu ra ainei te Pipiria i teia apiianga? E eaa te manakonakoanga no tei mate ta te Tuatua akauruia a te Atua e oronga maira?
[Au Tataanga Rikiriki i Raro]
a Te “reinikaneiti anga,” i karangaʼi The New Encyclopædia Britannica, tona aite anga “anau akaou anga o te meta ki roto i tetai me kore e tere atu au mea ora i muri ake i tetai, penei e tangata, e manu, me kore, i etai au taime, e rau rakau.” Te taangaanga katoaia ra te tuatua “anau akaou anga” no te akatutu i teia tupu anga, inara ko te tuatua “reinikaneiti anga” tei matauia i te arikiia. E taangaanga ana te au tikitinari reo Initia i teia nga tuatua tetai e tetai.
b E akara i te kapi 5-7 o to Tiunu 8, 1994, itiu o te Awake!
[Au Tutu i te kapi 4]
Akautungaia ainei aia no te au ara tei raveia i roto i tetai oraanga i mua atu ana?