Kia Matakite i te Au Orometua Pikikaa!

“Ka riro katoa oki i te orometua pikikaa to roto ia kotou na.”​—2 PETERO 2:1.

1. Eaa ta Iuda i akakoro kia tata, e eaa ra aia i taui ei i tana tumu manako?

MEI teaa ra tetai apinga poitirere! E au orometua pikikaa i te putuputuanga Kerititiano o te anere mataiti mua ra! (Mataio 7:15; Angaanga 20:29, 30) Kua kite a Iuda teina ake o Iesu ra i teianei tupu anga. Kua karanga aia e i manako aia kia tata atu ki tona au taeake akarongo “i te ora no te tangata ravarai nei,” inara kua akataka mai aia: “I manako akenei au e tata atu i te tuatua ia kotou na e tikaʼi, ei ako anga atu ia kotou kia taumāro tikai kotou i te akarongo.” Eaa ra a Iuda i taui ei i tana tumu tuatua? No te mea, i nana e, “kua akao poiri ua mai oki tetai papaki tangata ki roto [i te au putuputuanga], . . . ko tei ruri ke i te aroa ua o te Atua ei kanga anga.”​—Iuda 3, 4.

2. Eaa ra a 2 Petero pene 2 e Iuda oki i aiteite ei?

² I te akaraanga, kua tata a Iuda i tana i muri poto ake i ta Petero tata anga i te rua o tana reta ra. Kare e ekoko anga e kua kite a Iuda i taua reta ra. E tika, kua akakite aia i te au manako aiteite e manganui i roto i tana uaorai reta ririnui te ako anga. E no reira, ia tatou e akara matatio ra ia 2 Petero pene 2, ka kite tatou i te aiteite anga te reira ki ta Iuda reta ra.

Au Tupu Anga no te Au Apiianga Pikikaa

3. Eaa tei tupu ana i muatangana ta Petero i tuatua e ka tupu akaou?

³ I muri ake i ta Petero raurau anga i tona au taeake kia akono i te au totou, kua tuatua aia: “E peroveta pikikaa oki to roto i te tangata [o Iseraela] i muatangana, e ka riro katoa oki i te orometua pikikaa to roto ia kotou na.” (2 Petero 1:14–2:1) Kua rauka i te au tangata o te Atua i taito ra te au totou mou, inara kua tau katoa ratou kia matakite i te au apiianga viivii a te au peroveta pikikaa ra. (Ieremia 6:13, 14; 28:1-3, 15) “Kua kite oki au” ta Ieremia i tata, “i te mea rikarika i te au peroveta i Ierusalema: i te rave anga i te akaturi, te aere anga ma te pikikaa.”​—Ieremia 23:14.

4. Eaa ra i tau ei te au orometua pikikaa no te akapou anga?

⁴ I te akatakaanga i ta te au orometua pikikaa te ka rave i roto i te putuputuanga Kerititiano, kua tuatua a Petero: “Ko te ka akatupu poiri ua i te tuatua pikikaa mate ra, e te akaruke anga i te Atu [ia Iesu Karaiti] tei oko ia ratou ra, i te apai anga mai i te mate viviki ki runga ia ratou uaorai.” (2 Petero 2:1; Iuda 4) Ko te tupu anga openga no taua akonoanga taka ke o te anere mataiti mua ra ko Kerititome ia mei ta tatou e kite nei i te reira i teia tuatau. Kua akakite pu mai a Petero i te tumu i tika ravaʼi te au orometua pikikaa kia akapouia: “E e manganui te ka aru i ta ratou tuatua mate; e no ratou e akakinoiaʼi te arataa tuatua-mou ra.”​—2 Petero 2:2.

5. Eaa te apainga na te au orometua pikikaa ra?

⁵ E tamanako ana i teia! No te mana o te au orometua pikikaa ra, e manganui i roto i te au putuputuanga te ka o atu ki roto i te peu kanga. Ko te tuatua Ereni tei uriia e “peu kanga” te akataka ra i te kore e arai i te akono tau kore, te ngere i te arairai anga, te tu viivii, kare e kotinga tau, tu akono akama kore. Kua tuatua a Petero i mua akenei e kua rave te au Kerititiano “i te rere ke anga atu i te kino e vai i teianei ao no te anoano tika kore ra.” (2 Petero 1:4) Inara te oki akaou atura tetai papaki ki taua tu viivii ra, e ko te au orometua pikikaa i roto i te au putuputuanga te tumu maata no te reira! E no reira ka akakinoia te arataa no te tuatua mou ra. Mei teaa ra te mii! E mea tika, ko teianei tetai tumu te ka tau te Au Kite o Iehova i teia tuatau kia akamanako pakari atu. Auraka rava tatou e akangaropoina e, tei runga i to tatou tu akono, ka rauka ia tatou te apai mai i te akapaapaa i te Atua ko Iehova e tona au tangata me kare ka akakino atu ia ratou.​—Maseli 27:11; Roma 2:24.

Akamataanga te Au Apiianga Pikikaa

6. Eaa te akakeu ra i te au orometua pikikaa, e akapeea ta ratou kimi anga kia rauka ta ratou e anoano ra?

⁶ Na te tu pakari, e tamanako tatou i akapeea ta te au orometua pikikaa akamata anga i ta ratou manakoanga viivii. Kua tuatua a Petero i te akamata anga e te rave marie ra ratou i te reira, me kare na roto i tetai tu kikite akavare ua. Kua tuatua katoa aia: “No te noinoi apinga ra, e apingaia ta ratou ia kotou, i ta ratou tuatua pikikaa.” No te anoano noinoi te akakeuia ra te au orometua pikikaa, mei tei akaketaketaia maira e te urianga The Jerusalem Bible e: “Ka tauta pakari ratou kia oko ia koe na ratou uaorai ma te au tuatua kikite ra.” Aiteite katoa, ta James Moffatt urianga i konei: “I to ratou inangaro ka akavare ratou ia koe ma te au taumaro anga kikite.” (2 Petero 2:1, 3) Penei ka akaraanga reka te au tuatuaanga a te au orometua pikikaa ki tetai kare ra i matakite ana i te pae vaerua, inara te akapapa matakiteia ra ta ratou au tuatua “ei oko” i te au tangata, ma te akavareanga ia ratou kia tavini atu i te au akakoro anga noinoi a te aronga akavare ra.

7. Eaa te apiianga tei riro kia matauia i te anere mataiti mua ra?

⁷ Kare e ekoko anga, kua aratakiia te au orometua pikikaa o te anere mataiti mua ra na te manakoanga o teianei ao i reira ra. Vaitata i te tuatau o ta Petero tataanga ra, te riro maira kia matauia tetai apiianga tei tapaia ra e apiianga Ngotiki. Kua irinaki te aronga Ngotiki e e kino te au apinga katoatoa e ko tei piri anake ki te vaerua te meitaki ra. E no reira, kua tuatua tetai papaki o ratou e kare e kino ana noatu eaa ta tetai tangata ka rave ma tona kopapa. Ta ratou i maro ana, e i te openga kare e vai mai ki te tangata tona kopapa. No reira, kua manako ratou, i te pae kopapa​—kapiti katoa te ainga​—kare i te apinga maata te au ara. I te akaraanga, kua akamata taua au manako ra kia mana ki runga i tetai papaki tei karanga ra e akonoanga Kerititiano ta ratou.

8, 9. (a) Eaa te manakoanga taruri keia tei tupu ki tetai papaki o te au Kerititiano mua ra? (e) Kia tau ki ta Iuda, eaa ta tetai papaki i te putuputuanga i rave ana?

⁸ Kua akakite tetai tangata apii Pipiria e “i vai ana etai i roto i te Ekalesia tei taruri ke i te apiianga aroa o te Atua,” me kare “aroa ua.” (Ephesia 1:5-7) Kia tau ki tana, kua aru te taumaroanga a tetai papaki ki teia: “Te tuatua ra ainei koe e e atea te [aroa ua] o te Atua te rava ra ei tapoki i te ara ravarai? . . . E rave ara ua atu tatou i reira, no te mea ka rauka i te [aroa ua] o te Atua te takore atu i te ara ravarai. Ko te tika te maata atu ta tatou rave ara ko te maata atu ia o te tuatau no te [aroa ua] o te Atua te ka taangaangaia.” Kua akarongo ana ainei koe i tetai manakoanga maata atu te taruri keia i te reira ra?

⁹ Kua patoi atu te apotetoro ko Paulo i te manako anga tarevake no runga i te aroa ua o te Atua ra i tana ui anga: “Ka tamou rai tatou i te rave i te ara, kia maata mai te aroa?” Kua ui katoa oki aia: “Ka rave tatou i te ara no te mea tei raro ake tatou i te aroa ua, kare i raro ake i te ture ra?” Ki taua nga uianga takitai ra kua pau ketaketa atura Paulo: “Auraka rava ïa.” (Roma 6:1, 2, 15) Te taka meitaki ra mei ta Iuda i akakite maira, ko tetai aronga kua “ruri ke i te aroa ua o te Atua ei kanga anga.” Inara, kua akakite maira Petero e no taua aronga ra ‘kare to ratou akapouanga e tavareia.’​—Iuda 4; 2 Petero 2:3.

Au Akatauanga Akamatakiteanga

10, 11. Eaa nga akaraanga akamatakiteanga e toru ta Petero i oronga maira?

¹⁰ Ei akaketaketa anga e ka rave te Atua i te akautunga i te aronga rave akakoro i te tarevake ra, kua oronga mai a Petero mei te au Tuatua Tapu e toru nga akatauanga akamatakiteanga. Te mea mua, kua tata aia: “Kare te Atua i akaperepere i te au angela i rave i te ara ra.” Kua tuatua a Iuda no ratou “ko tei kore i akono i ta ratou orai taoonga ra, akaruke iora ra i to ratou nooanga tikai,” i te rangi. Kua aere mai ratou ki te enua nei i mua ake i te Vaipuke ra e kua rave i te tu kopapa tangata kia raukaʼi te rave i te pirianga ainga ma te au tamaine a te tangata nei. Ei akautunga no ta ratou tu akono tau kore, e te tika kore, kua makaia atu ratou ki roto i “te poiri i te po,” me kare mei ta te tataanga a Iuda i tuatua ra, ko tei “tapekaia ïa e ia i te pirianganaoa matara kore ki raro ake i te poiri, e tae ua atu ki te akavaanga i te rā maata ra.”​—2 Petero 2:4; Iuda 6; Genese 6:1-3.

¹¹ I muri akera, kua taiku maira Petero i te au tangata o te tuatau ia Noa ra. (Genese 7:17-24) Kua tuatua aia e i te tuatau ia Noa ra “kare [te Atua] i akaperepere i to te ao taito ra, . . . ka apai mai ei aia i te nina-anga ki teianei ao akono kore i te Atua ra.” I te openga, kua tata a Petero e kua akariro atura te Atua “ei akaraanga na te aronga e tāpu i te akono kore i te Atua a muri ake” na te “akariro atura i nga oire ra ko Sodoma e Gomora, ei reu ai.” Kua oronga katoa a Iuda i te akakiteanga kapitiia mai e ko taua aronga ra kua “tuku ua ia ratou uaorai i te ravenga [“poneia,” NW] ra, e te anoano tika kore” oki. (2 Petero 2:5, 6; Iuda 7) Kare te au tangata i rave anake i te pirianga ainga tau kore ma te au vaine mari ra kua inangaro katoa oki i te kopapa o etai atu tane ke ra, penei katoa oki ki te kopapa o te au puaka.​—Genese 19:4, 5; Levitiku 18:22-25.

12. Kia tau ki ta Petero, akapeea te tutaki anga i te tu akono tuatua tika ra?

¹² Inara, i taua tuatau rai, kua akakite mai a Petero e te tutaki ra a Iehova i te aronga tei tavini tiratiratu ra iaia. Ei akaraanga, kua akakite aia i akapeea ta te Atua “akaora iora ia Noa i te tangata i ako i te tuatua-tika ra, ma etai e tokoitu ra,” i Tana apai mai anga i te Teruvi. Kua akakite katoa mai aia i ta Iehova ra akaora anga ia “Lota tuatua-tika ra,” i te tuatau ia Sodoma ra, ma te taopengaanga: “Kua kite mari te Atu i te akaora i te aronga akono i te Atua i roto i te timataanga ra, e te tāpu i te aronga tuatua-tika kore e, kia tae ki te rā akava anga, kia mate.”​—2 Petero 2:5, 7-9.

Au Angaanga te Tau ra te Akautunga

13. Koai ma tei tapuia ra no te akava anga, e penei eaa te au moemoea ta ratou e manako ra?

¹³ Kua tou maira Petero i te aronga tei tapuia ra no ta te Atua ra akava anga, koia oki, “tei akono ua i ta te kopapa ra, i te anoano viivii ra, ko tei akavaavaa i te aronga tutara ra.” Te vaitata ua ra tatou i te kite i to Petero riri iaia i tuatuaʼi: “E mataku kore, e te māro i to ratou uaorai anoano, kare i mataku kia akakino mai i te aronga teitei ra.” Kua tata a Iuda e “teianei aronga i varea e te moe maata, te akaviivii nei i te kopapa, . . . e te akakino nei i te aronga taoonga.” (2 Petero 2:10; Iuda 8) Penei te moemoea ra ratou i te au manako ainga viivii te akamaroiroi ra i ta ratou aruaru anga i te inangaro ainga tau kore. Inara, i teea tu, ta ratou “akavaavaa i te aronga tutara ra,” e te tuatua “akakino nei i te aronga taoonga”?

14. Na roto i teea tu ta te au orometua pikikaa “akavaavaa i te aronga tutara ra” e te tuatua “akakino nei i te aronga taoonga”?

¹⁴ Te rave ra ratou i te reira i te mea te akavaavaa ra ratou i te aronga akamanaia e te Atua ra. Te akono ra te aronga pakari Kerititiano i te angaanga a te Atua kaka ko Iehova e tana Tamaiti oki, ei tetai tupu anga, te vaira tetai kaka anga ki rungao ia ratou. E tika, te rave ra ratou i te au tarevake, mei ta Petero uaorai, inara te raurau ra te au Tuatua Tapu i te au mema o te putuputuanga kia kauraro i taua aronga kaka ra. (Ebera 13:17) Kare to ratou au tarevake anga i te tumu kia tuatua akakinoia ratou. Kua tuatua a Petero e ko te au angera “kare rava ïa i tapepe akakino i te [au orometua pikikaa] ra,” noatu rai e te tau tika ra kia pera. “Kareka teianei aronga,” ta Petero i tuatua ua atu, “mei te au puaka manako kore, i angaia no te āru, e no te mate, i te akakino anga i te au mea kitea kore ia ratou ra, ka ope takiri ïa i te mate.”​—2 Petero 2:10-13.

“Ka Kaikai Uaʼi . . . ma Kotou Katoa”

15. Eaa te au ravenga a te au orometua pikikaa, e teiea te ngai e aruaru ei ratou i ta ratou au akavare anga?

¹⁵ Noatu rai ko teianei aronga viivii “e manako e mea meitaki kia kanga i te ao ra” e “e topata ïa, e kino ïa,” e aronga aere ke oki ratou. Ka rave “poiri ua” ratou, i ta ratou “tuatua pikikaa,” mei ta Petero i akakite i mua akera. (2 Petero 2:1, 3, 13) No reira penei kare ratou e akapapa tikai i te akaaoanga i te au tauta anga a te aronga pakari kia mou i ta te Atua ra au turanga akono tau me kare kia aru i to ratou uaorai inangaro ainga. Kareka, kua tuatua a Petero e “te noo ra ma te kanga i ta ratou pikikaa, ka kaikai uaʼi ratou ma kotou katoa ra.” E kua tata a Iuda: “E topata ïa ratou i ta kotou au kaingakai aroa ra.” (Iuda 12) Ae, mei te au toka kokoi i raro ake i te vai ra penei ka akangaa ia raro o te pai ra, ma te akariroanga kia maremo te au mataro matakite kore ra, te akakino ra te au orometua pikikaa i te aronga matakite kore ra ta ratou i akameamea pikikaa ua ra te aroaia ra i ta ratou “au kaingakai aroa ra.”

16. (a) Eaa te “au kaingakai aroa ra,” e i roto i teea au ngai aiteite e rave ei te aronga akono tau kore i teia tuatau nei? (e) Te tukuia atura te manako anga o te au orometua pikikaa ki rungao iaai, no reira eaa ta taua aronga ra ka tika kia rave?

¹⁶ I te akaraanga ko teianei “au kaingakai aroa ra” e au atianga tamataora te ngai i akaputu ei te au Kerititiano o te anere mataiti mua kia rekareka i te kaikai anga e te taokotai anga oki. Te akaputu katoa ra te Au Kite o Iehova i etai tuatau tamataora, penei no te kaikai akaipoipo anga, no te au pikiniki, me kare no tetai kapitianga aiai. Akapeea te aronga kanga i te taangaanga anga i taua au atianga ra ei akavare anga i etai? Kua tata a Petero: “Kua ki to ratou mata i te akaturi . . . e i te taē anga i te aronga tinamou kore.” Te akono ra “e ngakau mātau ua to ratou i te noinoi apinga” ki runga i te aronga apikepike ua i te pae vaerua tei kore ra i akariro i te tuatua mou tikai na ratou uaorai. E no reira kia matakite i tei tupu ra i to Petero tuatau, e kia paruru marie! E arai atu i etai ua atu au ravenga viivii, e auraka e akanenevaia na te manea me kare te kopapa akara anga akaieie o tetai tei tamata ra i te au ravenga tau kore!​—2 Petero 2:14.

“Te Arataa o Balaama”

17. Eaa “te arataa o Balaama,” e eaa ta te reira i akatupu ki te 24,000 o to Iseraela ra?

¹⁷ Kua kite teianei aronga “taumaaia” i te tuatua mou no etai tuatau. Penei te akara anga ra e te rave angaanga ra ratou i roto i te putuputuanga. Inara kua tuatua a Petero e: “Kua akaruke ratou i te ara mou, tatipake atura, i te aru anga i te arataa o Balaama a Beora, ko tei anoano i te tutaki o te tuatua-tika kore ra.” (2 Petero 2:14, 15) Ko te arataa o te peroveta ko Balaama ra e ako anga i tetai ravenga akavare anga tau kore no tona uaorai puapinga. Kua tuatua aia ki te Ariki ko Balaka o Moabi ra e ka taumaaia e te Atua to Iseraela me ka rauka kia akavareia te au tangata ra kia rave i te poneia. Ei tetai tupu anga, e manganui te au tangata o te Atua ra tei akavareia e te au vaine Moabi, e 24,000 tei tamateia no to ratou tu akono tau kore.​—Numero 25:1-9; 31:15, 16; Apokalupo 2:14.

18. Akapeea to Balaama rave marokiakia anga, e eaa ta te tupuanga i akakite no te au orometua pikikaa ra?

¹⁸ Kua akakite maira Petero e kua akataroaroaia a Balaama i te tuatua anga tona atini kiaia, inara ko Balaama kua “anoano i te tutaki o te tuatua-tika kore ra” e maata rava oki e noatu rai i te tupu anga te reira, kare aia i akamutu i “tona aerenga neneva.” (2 Petero 2:15, 16) Mei teaa ra te kino! E aue to tetai ua atu mei ia Balaama tei tauta ra kia taviivii i te au tangata o te Atua na te timataanga kia rave i te tu akono tau kore! Kua mate atu a Balaama no tana kino i rave ra, e akatutu anga no te ka tupu ki te katoatoa te ka aru i tona arataa.​—Numero 31:8.

Ta Ratou Au Akavare Anga Tiaporo

19, 20. (a) Te akaaiteia atura te aronga mei ia Balaama ra ki teaa, e no teaa ra? (e) Koai ta ratou e akavare ra, e naea oki? (ng) Eaa ka raukaʼi ia tatou kia tuatua e na te tiaporo ta ratou akavare anga, e akapeea e raukaʼi ia tatou i te paruru ia tatou uaorai e etai atu, mei ia ratou ra?

¹⁹ I te akatakaanga i te aronga aiteite kia Balaama, kua tata a Petero: “E rua [me kare, e au puna] vai kore ia ratou; e tumurangi peke aere ua i te uriia ra.” No tetai tangata ori aere i te metepara ma te kaki vai ra, ko tetai puna vai kore penei ka riro ei matenga. No reira rai “te poiri kerekere i vaooiaʼi e tuatau ua atu” no te aronga tei akatutu maira i taua au apinga ra! “Kia tuatua oki ratou i te tuatua maata marikonga kore e te akatietie ra,” kua tata katoa a Petero, “te vare ra ia ratou, no te kanga e te anoano o te kopapa ra, i tei ora takiri mai ana no roto i te aronga e noo i roto i te apa ra.” Ka akavare ratou i te aronga kamakura na “te tuatua akarangatira ra ia ratou,” kua na ko maira Petero, “e e tuikaa oki ratou uaorai na te kino.”​—2 Petero 2:17-19; Galatia 5:13.

²⁰ No te tu tiaporo te au akavare anga a taua au puapii viivii ra. Ei akaraanga, penei ka tuatua ratou: ‘Te kite ra te Atua e paruparu ua tatou e ka ngoie ua kia inangaro. E no reira me ka rave ua tatou uaorai e ka akamerengo i to tatou inangaro ainga, ka aroa mai te Atua. Me ka aaki tatou i ta tatou ara, ka akakore ua aia i te reira mei tana i rave i to tatou aere anga mua mai ki roto i te tuatua mou.’ Kia maara e i taangaanga te Tiaporo i taua tu tamata anga ma Eva ra, i tana taputouanga kiaia e ka rauka iaia i te ara ua ma te kore e utunga. I to Eva turanga, kua karanga aia e na te ara anga i te Atua e oronga i te marama e te tu rangatira kiaia. (Genese 3:4, 5) Me ka rokoia tatou i te aravei anga i taua tu tangata viivii ra i te kapiti anga ma te putuputuanga ra, e apainga ta tatou kia paruru ia tatou uaorai e pera katoa oki ia etai atu na te ripotianga i taua tangata ra ki te aronga e apainga ta ratou i roto i te putuputuanga Kerititiano ra.​—Levitiku 5:1.

Paruruia e te Kite Tika

21-23. (a) Eaa te au tupu anga no te kore e akono i te kite tika ra? (e) Eaa tetai atu manamanata ta Petero i uriuri te ka akamanakoia i muri ake nei?

²¹ Kua akaoti a Petero i teianei tuanga o tana reta na te akatakaanga i te au tupu anga no te kore e akono i te kite tana i tuatua i mua akera e puapinga maata ki “te ora, e te akono i te Atua.” (2 Petero 1:2, 3, 8) Kua tata aia: “Kua ora oki ratou i te viivii o teianei ao, i te kite i te Atu ra, i te Ora ia Iesu Mesia, ka ii akaou atu ei, e kua vi rai ratou i te reira, e kino maata ua atu tei to ratou openga i tei muatangana.” (2 Petero 2:20) Mei teaa ra te mii! Ko taua aronga ra i to Petero tuatau kua titiri ke atu i te manakonako anga meitaki no te oraanga mate kore i te rangi no nga atianga poto ua o te mareka anga i te ainga tau kore ra.

²² No reira kua tuatua a Petero: “E meitaki ake ia ratou naringa kare rava i kite i te arataa tuatua-tika ra, eiaa e kite ra ka ariu ke atu ei i te tuatua tapu i tukuia mai ia ratou ra. Kua tupu io nei ra ia ratou te potonga tuatua tika ra e, ‘Kua oki te kuri ki tona uaorai ruaki, e te tinana i mā ki te takaviri anga i te vari.’”​—2 Petero 2:21, 22; Maseli 26:11.

²³ Tetai atu manamanata tei akamata i te tupu ki te au Kerititiano mua te aiteite ra ki te tupu nei ki tetai papaki i teia tuatau. I te reira tuatau, te kopekope ra etai pae i te taroaroa anga o to Karaiti parutia taputouia maira. E akara matatio tatou i akapeea ta Petero tuatua no teianei tumu.

Te Maara Ainei ia Koe?

◻ Eaa nga akaraanga akamatakiteanga e toru ta Petero i akakite maira?

◻ Akapeea ta te au orometua pikikaa “akavaavaa i te aronga tutara ra”?

◻ Eaa te arataa o Balaama ra, e penei akapeea ta te aronga aru i te reira tauta anga kia akavare ia etai ke ra?

◻ Eaa te au tupu anga no te kore e akono i te kite tika ra?

[Tutu i te kapi 16, 17]

Ka riro a Balaama ei akaraanga akamatakiteanga