Kia Matakite i te Akarongo Kore

“Kia matakite, e te au taeake, ko te vai aea te ngakau kino akarongo kore katoa ki roto i tetai o kotou, i te akaruke anga i te Atua ora.”​—EBERA 3:12.

1. Eaa te mea poitirere tikai ta te au tuatua a Paulo ki te au Kerititiano Epera ra i akamaaraara mai kia tatou nei?

MEI teaa ra tetai manako tamatakuanga​—e ko te au tangata tei rekareka i tetai pirianga vaitata ma Iehova kia akatupu i tetai “ngakau kino” e kia ‘akaruke i te Atua ora’! E mei teaa ra tetai akamatakite anga no teia! Ko teianei au tuatua a te apotetoro ko Paulo kua tuatuaia, kare ki te aronga akarongo kore ra, mari ra ki te au tangata tei akatapu ra i to ratou oraanga kia Iehova na runga i te tumu anga i te akarongo ki te atinga oko o Iesu Karaiti ra.

2. Eaa te au uianga ta tatou ka tau kia akamanako?

² Akapeea e raukaʼi i tetai i roto i taua tu vaerua akameitakiia ra kia akatupu i “te ngakau kino akarongo kore”? E tika oki, akapeea e raukaʼi i tetai tei tongi ra i to te Atua aroa e te takinga meitaki ua kia akaruke iaia ra? E ka rauka ainei teia kia tupu ki tetai o tatou? Ko etai au manako tau teia, e mea tika ia no tatou kia akara i te tumu no teia akamatakiteanga.​—1 Korinetia 10:11.

No Teaa ra Taua Akoanga Ketaketa Ra?

3. E akataka i te au turanga tei tupu ki te au Kerititiano i te anere mataiti mua ra i Ierusalema e te koropini anga oki i reira ra.

³ I te akara anga e kua tata a Paulo i tana reta ki te au Kerititiano Epera i Iudea i te 61 T.N. Kua akakite tetai tata tuatua enua e ko tetai tuatau ia “kare e au me kare e tu tinamou no etai ua atu au tangata ngakau tau, e te tiratiratu, i roto i te oire o Ierusalema me kare tetai ua atu ngai i taua tapere katoa ra.” E tuatau ia no te rave kino e te ta ua, tei akatupuia na tetai kairo anga no te vai maianga o te nuku vaeau takinga kino o Roma, te mataku kore tu ua no te aronga ngati Iuda patoi i to Roma ra, e te au angaanga kikino a te aronga keia tei rave ra i te reira i te au tuatau oripu ua ra. Pouroa teia au tu kua akariro kia ngata rava no te au Kerititiano, tei tauta pakari ra kia kore e o atu ki roto i taua au tu ra. (1 Timoteo 2:1, 2) Ko te tika, no to ratou turanga neutara ua ra, kua manakoia ratou e tetai papaki ei aronga tau kore ua i roto ia ratou ra, pera katoa oki e ei aronga patoi i te ture. E putuputu te au Kerititiano ra i te takinga kinoia, e kua mamae ratou takitai i te ngere anga i ta ratou au apinga.​—Ebera 10:32-34.

4. Eaa te taomianga no tetai tu akonoanga tei tupu ra ki te au Kerititiano Epera?

⁴ I raro katoa oki te au Kerititiano Epera i te taomianga maata no tetai tu akonoanga. No te maroiroi o te au pipi tiratiratu a Iesu e te tupu anga viviki te totoa anga o te putuputuanga Kerititiano kua akakeu i te vareae e te riri oki o te au ngati Iuda​—e maata oki to te au arataki akonoanga. Kare a ratou apinga e tapu ei tamanata e te takinga kino anga i te au pipi a Iesu Karaiti.a (Angaanga 6:8-14; 21:27-30; 23:12, 13; 24:1-9) Noatu rai me kare tetai papaki Kerititiano i takinga kinoia, kua aviriia ratou e kua tuatua akakinoia e te au ngati Iuda. Kua tapepeia te Kerititiano ei tetai akonoanga tei akamata ouia tei ngere ra i te meitaki o te akonoanga ngati Iuda, kare e iero, kare e kau taunga, kare e oroa, kare e ravenga atinga, e te vai atura oki. Noatu rai ko to ratou arataki, ko Iesu, kua tamateia ei tetai tangata rave kino tei akaapaia ra. E raukaʼi kia akono i to ratou akonoanga, kua anoanoia te akarongo, te mataku kore, e te akakoromaki anga no te au Kerititiano ra.

5. Eaa ra i puapingaʼi no te au Kerititiano i Iudea ra kia vai matakite i te pae vaerua?

⁵ I runga katoa oki i te reira, te noo ra te au Kerititiano Epera i Iudea i tetai tuatau kino i te tuatua enua o taua iti tangata ra. E manganui te au apinga ta to ratou Atu, ko Iesu Karaiti, i tuatua ei akairo no te openga o te akatereanga ngati Iuda kua tupu ke ana i reira. Kare te openga i mamao atu. E oraʼi, ka tau te au Kerititiano ra kia vai matakite i te pae vaerua e kia papa i ‘te oro ki te au maunga.’ (Mataio 24:6, 15, 16) E akarongo ainei to ratou e te maroiroi tei anoanoia ra kia rave viviki, mei ta Iesu i akaue atura? E akara anga ekoko anga tetai i reira.

6. Eaa ta te au Kerititiano i Iudea ra i umuumu viviki?

⁶ I te raungauru mataiti i mua ake i te takore anga takiri i te akatereanga ngati Iuda o te au mea ra, kua taka meitaki e i raro ake te au Kerititiano Epera ra i tetai taomianga kino mei roto mai e mei vao katoa oki o te putuputuanga ra. Te umuumuia ra te akamaroiroi anga no ratou. Inara te anoano katoaia ra te ako anga e te arataki anga ei tauturu ia ratou kia kite e e tika te aerenga ta ratou i iki ra e kare ratou i mamae ua e i akakoromaki puapinga kore oki. E mea mataora ra, kua tu mai a Paulo ki taua atianga ra e kua tauturu mai ia ratou.

7. Eaa tatou i tau ei kia tamanako i ta Paulo i tata ki te au Kerititiano Epera ra?

⁷ Ta Paulo i tata ki te au Kerititiano Epera ra ka tau katoa oki ei manako anga na tatou. No teaa ra? No te mea te noo nei tatou i tetai tuatau tei aiteite katoa ra ki to ratou. I te au ra taki tai te kite nei tatou i te au taomi anga mei te ao mai i raro ake i ta Satani akatere anga. (1 Ioane 5:19) Te akatupuia nei ki mua i to tatou mata ko te au totou a Iesu e te au apotetoro ra no runga i te tuatau openga e “te openga o te teianei ao.” (Mataio 24:3-14; 2 Timoteo 3:1-5; 2 Petero 3:3, 4; Apokalupo 6:1-8) I runga katoao, ka tau tatou kia matakite i te pae vaerua kia tau ia tatou “te ora i teianei au mea katoa e vaitata mai nei.”​—Luka 21:36.

Tetai Tei Maata Atu ia Mose

8. Na te tuatuaanga i tei tataia ra ia Ebera 3:1, eaa ta Paulo i raurau atura i tona au oa Kerititiano kia rave?

⁸ I te taikuanga i tetai tumu puapinga maata, kua tata a Paulo: “E akamanako meitaki i te Aposetolo ra i te Taunga Maata o ta tatou nei tuatua, i te Mesia ra ia Iesu.” (Ebera 3:1) Te aite anga o te “akamanako meitaki” e “kia kite taka meitaki . . . , kia kite marama tikai, kia akamanako piri vaitata.” (Vine’s Expository Dictionary of Old and New Testament Words) No reira, te raurau ra Paulo i tona au taeake akarongo kia rave i tetai tauta anga pakari kia rauka tetai ariki anga tika i te tuanga ta Iesu i rave i to ratou akarongo e te ora oki. Na te raveanga i teia ka akamaroiroi i ta ratou akakoroanga kia vai ngaueue kore i te akarongo. Eaa, i reira, ta Iesu ra tuanga, e eaa oki tatou ka “akamanako meitaki” ei iaia?

9. Eaa ra a Paulo i taiku ei ia Iesu ei “aposetolo” e ei “taunga maata” oki?

⁹ Kua kapiti atu a Paulo i nga tuatua “aposetolo” e te “taunga maata” kia Iesu. Ko tetai “aposetolo” ko tetai tei tonokia e i konei te taiku ra i ta te Atua rave anga no te komunikeitianga ma te au tangata ra. Ko tetai “taunga maata” ko tetai na roto atu iaia ta te au tangata ra akavaitata anga ki te Atua ra. Ko teia nga apinga e rua e tuanga puapinga i te akamori mou, e ko Iesu tei akatupu i aua tuanga e rua ra. Koia tei tonokia maira mei te rangi kia apii i te au tangata i te tuatua mou no te Atua ra. (Ioane 1:18; 3:16; 14:6) Ko Iesu katoa oki tei akataoongaia ei te Taunga Maata tikai i te akanoonoo anga te iero vaerua a Iehova no te akakore anga ara. (Ebera 4:14, 15; 1 Ioane 2:1, 2) Me te ariki tika ra tatou i te au akameitakianga ta tatou ka rauka na roto ia Iesu, ka rauka ia tatou te mataku kore e te manako anga papu kia tu ngaueue kore i te akarongo ra.

10. (a) Akapeea ta Paulo tauturu i te au Kerititiano Epera kia ariki i te teitei o te akonoanga Kerititiano i te akonoanga ngati Iuda ra? (e) Eaa te tuatua mou takapini ta Paulo i taiku ei akaketaketa i tana tumu?

¹⁰ Ei akaketaketa anga i te puapinga o te akarongo Kerititiano ra, kua akaaite atu a Paulo ia Iesu kia Mose ra, koia ta te au ngati Iuda i manako ra e ko te peroveta maata katoa i roto i to ratou ai tupuna ra. Naringa te au Kerititiano Epera ra ka mou ma te ngakau katoa i te tika e e maata atu a Iesu ia Mose, kare a ratou tumu i reira kia ekoko i te teitei atu o te akonoanga Kerititiano ki runga ake i te akonoanga ngati Iuda. Kua akakite a Paulo e i te mea e kua manakoia a Mose e e tau no te irinakiia ma te “ngutuare” o te Atua​—koia te iti tangata, me kare putuputuanga, o Iseraela​—ko tetai tavini tiratiratu ua aia, me kare e tavini. (Numero 12:7) I tetai pae, ko Iesu e Tamaiti aia, ko te pu o runga i te are ra. (1 Korinetia 11:3; Ebera 3:2, 3, 5) Ei akaketaketa i tana tumu, kua taiku a Paulo i teianei tuatua mou katoa: “E akatu oki to te au are ravarai nei; ko tei akatu ra i te au mea katoa, ko te Atua ïa.” (Ebera 3:4) Kare tetai e taumaro atu i to te Atua ra tu maata atu i to tetai ke atura, no te mea koia Tei Akatu, me kare Tei Anga mai, i te au mea katoatoa. E mea tau, i reira, i te mea ko Iesu to te Atua ra oa angaanga, e mea tika e e maata atu aia i etai au mea katoa i angaia ra, kapiti katoa oki ia Mose.​—Maseli 8:30; Kolosa 1:15-17.

11, 12. Eaa ta Paulo i raurau i te au Kerititiano Epera kia mou piri tikai “e tae ua atu ki te openga,” e akapeea tatou me akono i tana ako anga ra?

¹¹ E tika tikai, i roto te au Kerititiano Epera ra i tetai turanga teitei akaperepereia ra. Kua akamaara atura Paulo kia ratou e kua “rauka katoa te kapiki anga no te rangi maira” ia ratou, ko tetai tuanga tei tau ra kia akateiteiia ki runga ake i tetai atu apinga ta te akatereanga ngati Iuda ra ka oronga. (Ebera 3:1) Kua tika ta Paulo au tuatua ra kia akariro i taua aronga Kerititiano akatainuia ra kia manako akameitaki e kua tau ratou no tetai akatuanga ou ra kare e kia mii e kua akakore ratou i te au apinga tei kapitiia atura ma ta ratou ipukarea ngati Iuda ra. (Philipi 3:8) I te raurauanga ia ratou kia mou i ta ratou tuanga e auraka e manako kore ua i te reira, kua tuatua a Paulo: “Kareka te Mesia ra, ei tamaiti ïa i [te Atua] uaorai ngutuare: ko tatou oki taua ngutuare nona ra, kia mou piri tika rai tatou i to tatou irinakianga, e te tiakianga rekareka ra, ma te maroiroi, e tae ua atu ki te openga ra.”​—Ebera 3:6.

¹² Ae, me kia ora mai te au Kerititiano Epera ra i te openga o te akatereanga ngati Iuda o te au mea ra, ka anoanoia ratou kia mou marie i to ratou manakonako orongaia mai e te Atua “tae ua atu ki te openga.” Ka tika katoa tatou kia rave i taua apinga rai i teia tuatau me te anoano ra tatou kia ora atu i te openga o teia akatereanga. (Mataio 24:13) Kare tatou e tika kia tuku i te au apiapi anga o te oraanga, e te manako kore ua oki o te au tangata, me kare to tatou uaorai au tu manako apa ua nei kia akariro ia tatou kia ngaueue i to tatou akarongo i te au taputou a te Atua ra. (Luka 21:16-19) E kite ei e akapeea tatou i te akamaroiroi anga ia tatou uaorai, e tamanako atu tatou i te au tuatua kapiti mai a Paulo.

“Auraka e Akamārokiakia i to Kotou Ngakau”

13. Eaa te akamatakiteanga ta Paulo i oronga, e akapeea tana akapiri atuanga ia Salamo 95 ra?

¹³ I muri ake i te akamanakoanga i te turanga akaperepereia o te au Kerititiano Epera ra, kua oronga mai a Paulo i teianei akamatakite anga: “Mei ta te vaerua tapu i tuatua maira: ‘Kia tika ia kotou i teianei rā i te akarongo i tona reo, Auraka e akamārokiakia i to kotou ngakau, mei tei te akakoko anga ra, mei tei te rā timata anga, i te medebara ra.’” (Ebera 3:7, 8) Te taiku maira Paulo i ta Salamo 95 ra, e no reira ka rauka kia tuatua e “mei ta te vaerua tapu i tuatua maira.”b (Salamo 95:7, 8; Exodo 17:1-7) E mea akauruia e te Atua te au Tuatua Tapu ra na tona vaerua tapu.​—2 Timoteo 3:16.

14. Akapeea ta to Iseraela ra rave anga ki ta Iehova ra i rave no ratou, e no teaa ra?

¹⁴ I muri io i te matara anga mai i te tuikaa i Aiphiti, kua orongaia ki to Iseraela te ngateitei maata no te tomoanga ki roto i tetai pirianga koreromotu ma Iehova ra. (Exodo 19:4, 5; 24:7, 8) Inara, kare ratou i akaari i te ariki anga no ta te Atua i rave no ratou, kare i roaia kua rave meameaau ratou. (Numero 13:25–​14:10) I akapeea te reira i tupu ei? Kua tou maira Paulo i te tumu: no te akamarokiakia anga i to ratou ngakau. Inara akapeea te au ngakau tei kite ra e tei akarongo ra i te Tuatua a te Atua i riro ei kia marokiakia? E eaa ta tatou ka tau kia rave ei kopae ke atu i te reira tu?

15. (a) Akapeea to te ‘Atua uaorai reo’ i te akarongo angaia, i te tuatau kua topa e i teianei oki? (e) Eaa te au uianga te tau ra tatou kia ui ia tatou uaorai no ‘te reo o te Atua’?

¹⁵ Kua akamata mai a Paulo i tana akamatakiteanga ma te takiota tuatua “kia tika ia kotou . . . i te akarongo i tona reo.” I tuatua te Atua ki tona au tangata na roto ia Mose e etai atu au peroveta ra. I reira, kua tuatua atu a Iehova kia ratou na roto i tana Tamaiti, ko Iesu Karaiti. (Ebera 1:1, 2) I teia tuatau, tei ia tatou ta te Atua ra Tuatua akauruia katoa, koia te Pipiria Tapu. Tei ia tatou katoa oki “te tavini akono meitaki e te pakari,” ta Iesu i akataoonga kia oronga i “te kai [vaerua] i te tuatau tau.” (Mataio 24:45-47) E no reira, te tuatua ua maira te Atua. Inara te akarongo ra ainei tatou? Ei akatauanga, akapeea ta tatou akarongo anga ki te ako anga no te kakau e te akamaneaanga me kare te iki anga i te tamataora e te akatangi anga imene? Te “akarongo” ra ainei tatou, koia oki te tamanako atura ainei tatou e te rave ra oki i ta tatou i akarongo atu? Me tei ia tatou te ravenga no te au kotoe anga me kare te kore e akarongo i te ako anga, te akatuera atura tatou ia tatou uaorai ki te kino kikite no te akamarokiakia i to tatou au ngakau.

16. Eaa tetai tu e akamarokiakiaʼi i to tatou au ngakau?

¹⁶ Ka rauka katoa kia akamarokiakiaia to tatou au ngakau me ka kore tatou e rave i te ka rauka ia tatou e te tau ra oki kia raveia. (Iakobo 4:17) Noatu ra te au mea ravarai ta Iehova ra i rave na to Iseraela, kare ratou i akono i te akarongo, kua akameameaau kia Mose, kia iki kia irinaki i tetai ripoti kino no Kanaana, e kare i akatika kia tomo atu ki te Enua Taputouia ra. (Numero 14:1-4) No reira kua tuatua a Iehova e ka akapou ratou e 40 mataiti ki roto i te metepara​—kia rava te roa no te au mema akarongo kore ra o taua uki ra kia mate atu ki reira. No te rikarika ia ratou, kua tuatua te Atua e: “E aronga ngakau tarevake ratou, e kare ratou i kite i toku ra au aerenga. Ko tei taputouia e au i toku riri anga ra e, Auraka roa ratou kia o i toku ra akaangaroianga.” (Ebera 3:9-11) Te kite ra ainei tatou i tetai apiianga no tatou i teia?

Tetai Apiianga no Tatou

17. Noatu e i kite ratou i ta Iehova au angaanga mana e i akarongo oki i tana au tuatuaanga, eaa ra to Iseraela i akarongo kore ei?

¹⁷ Kua kite te uki o to Iseraela tei aere maira ki vao i Aiphiti ma to ratou uaorai mata e kua akarongo ma to ratou uaorai au taringa i te au angaanga mana e te au akakiteanga a Iehova ra. Inara, kare o ratou akarongo e ka rauka i te Atua kia taki meitaki mai ia ratou ki roto i te Enua Taputouia ra. No teaa ra? “Kare ratou i kite i toku ra au aerenga,” ta Iehova i tuatua. Kua kite ratou i ta Iehova i tuatua e i rave oki, inara kare ratou i akatupu i te irinaki anga e ka rauka iaia kia utuutu mai ia ratou. No te maata to ratou manako anga i ta ratou uaorai i anoano e i inangaro oki e kua meangiti ua to ratou manako anga i to te Atua ra aerenga e tana akakoroanga oki. Ae, kua ngere ratou i te akarongoanga i tana taputou.

18. Kia tau ki ta Paulo, eaa te aerenga angaanga te ka akatupu i “te ngakau kino akarongo kore”?

¹⁸ Ko teianei au tuatua katoa ki to Epera ra te tau ra te mana kia tatou katoa oki: “Kia matakite e te au taeake, ko te vai aea te ngakau kino akarongo kore katoa ki roto i tetai o kotou, i te akaruke anga i te Atua ora.” (Ebera 3:12) Kua itae a Paulo ki te rotopu o te au tumu ra na te touanga atu e ko “te ngakau kino akarongo kore” ko te tupu anga ia no te “akaruke anga i te Atua ora.” I mua akera i roto i teianei reta, kua tuatua aia i ‘te topa uaanga’ no te manako kore anga. (Ebera 2:1) Inara, ko te tuatua Ereni tei uriia ra e “akaruke anga” tona aite anga “kia tu ke atura” e te piri atura ki te tuatua “apoteiti.” Te akakite ra i tetai araianga akakoroia, akarukeanga, e te rave keanga, ma tetai tu patoi anga tei titiriia mai ki roto ra.

19. Penei akapeea te koreanga e akarongo i te ako anga i te taki atuanga ki te au tupu anga kikino? E akatutu mai.

¹⁹ No reira, ko te apiianga, koia oki me ka topa tatou ki roto i te ravenga no te kore “te akarongo i tona reo,” na te kopaeanga i te ako anga no ko mai ia Iehova ra no roto i tana Tuatua e te tavini akono meitaki oki, kare e roaia ka riro to ratou au ngakau kia matorutoru, kia marokiakia. Ei akatauanga, ko tetai nga tokorua kare ra i akaipoipoia penei kua piri vaitata roa. Ka peea me ka manako kore ua atu raua i taua tumu ra? Ka paruru ainei te reira ia raua kia kore e rave akaou i ta raua i rave ana, me kare ka akariro ainei te reira kia ngoie ua no raua kia rave akaou i te reira? Mei te reira katoa oki, me ka oronga mai te pupu tavini i te ako anga no tei umuumuia kia iki meitaki i ta tatou akatangi anga imene e te tamataora anga, e te vai atura, te ariki meitaki ra ainei tatou i te reira e ka rave ei i te akatikatika anga tei umuumuia ra? Kua raurau a Paulo ia tatou e ‘auraka e akaruke i to tatou akaputuputu anga.’ (Ebera 10:24, 25) Noatu rai teianei ako anga, kua manako kore ua tetai papaki no te au uipaanga Kerititiano ra. Penei ka manako ngakau ratou e ko te kore e aere ki etai me kare noatu me ka akaruke takiri i etai uipaanga kare e kino e tupu mai.

20. Eaa ra i tau ei kia akarongo tatou ki te ako anga Tuatua Tapu na roto i tetai tu papu tikai?

²⁰ Me ka kore tatou e akarongo papu tikai ki te “reo,” o Iehova tei akataka meitakiia maira i roto i te au Tuatua Tapu e te au puka akatumuia ra ki runga i te Pipiria, kare e roaia ka kite tatou ia tatou uaorai “i te akaruke anga i te Atua ora.” Ka ngoie ua te riro te manako koreanga i te ako anga kia tupu ei tetai akameangitianga, akaapaanga, e ei kopaeanga oki i te reira. Me ka kore e akatikatikaia, te tupu anga ko “te ngakau kino akarongo kore katoa,” e ko te ora mai anga i taua aerenga ra te matauia e mea ngata roa ia. (Akaaite ia Ephesia 4:19.) Kua tata tau tikai a Ieremia: “E pikikaa maata to te ngakau i te au mea katoa nei, e kua kino takiri: koai te kite?” (Ieremia 17:9) No teianei tumu, kua raurau a Paulo i tona au oa akarongo Epera ra: “E ako marie ra tetai ki tetai auraka ei rā e tukua, koi vai ake te ao; ko te akamarokiakia aea tetai o kotou na i te pikikaa o te ara.”​—Ebera 3:13.

21. Eaa ra te akamaroiroiia maira tatou katoatoa kia rave, e eaa ta tatou au manakonakoanga?

²¹ Mei teaa ra to tatou mataora e te vaira ta Iehova tuatuaanga kia tatou i teia tuatau nei, na roto i tana Tuatua e tana akaaerenga! Te akameitaki nei tatou e te rave ua nei “te tavini akono meitaki e te pakari” i te tauturu anga ia tatou “kia tamou marie rai tatou i to tatou irinaki mua ra ma te maroiroi, e tae ua atu ki te openga ra.” (Ebera 3:14) Ko teianei te tuatau no tatou kia akarongo ki te aroa o te Atua ra e tana arataki anga. Ia tatou e rave ra i te reira, ka rauka ia tatou te rekareka i tetai atu o ta Iehova au taputou meitaki ra​—koia oki te ‘o’ atu anga i tona akaangaroianga. (Ebera 4:3, 10) Ko te reira te tumu ta Paulo i uriuri manako ma te au Kerititiano Epera, e ko te reira katoa oki ta tatou te ka akamanako i te atikara te aru mai nei.

[Au Tataanga Rikiriki i Raro]

Ka Rauka Ainei ia Koe te Akataka?

◻ Eaa ra Paulo i tataʼi i taua ako anga ketaketa ra ki te au Kerititiano Epera ra?

◻ Akapeea ta Paulo tauturu anga i te au Kerititiano Epera ra kia ariki e tei ia ratou tetai apinga meitaki atu i te oraanga i raro ake i te akonoanga ngati Iuda ra?

◻ Akapeea e riro ei te ngakau o tetai ra kia marokiakia?

◻ Eaa ta tatou ka tau kia rave kia kopae ke i te tupuanga “te ngakau kino akarongo kore ra”?

[Tutu i te kapi 10]

Te akono ra ainei koe i te akarongo ia Iesu, te Mose Maata Atu?