Ka Rauka te Irinaki Anga i te Akaouia!

NOATU e akairo te kino o te irinaki anga no te “tuatau openga ra,” kua kitea katoaia te ngere anga i te irinaki anga e tauatini ua atu mataiti i topa. (2 Timoteo 3:1) Kua tupu teia i roto i tetai ngai kare i manakoia ana​—i roto i tetai parataito. Te tuatua ra te Pipiria no te reira ngai: “Kua tanu oki te Atua ra ko Iehova i te kainga i te pae i te itinga o te rā i Edene ra; e kua tuku iora aia i te tangata i tana i anga ra ki reira. Kua akatupu oki te Atua ra ko Iehova i te au rakau taurekareka katoa kia akara, e tei meitaki ei kai, i taua one ra; e te rakau o te ora i rotopu i taua kainga ra, e te rakau e kite ei i te meitaki e te kino.”​—Genese 2:8, 9.

Ka akamarama mai te au irava ka aru mai i te tumu no teia ki te kino o te irinaki anga o teia tuatau. Ka tatau tatou: “E kua tuatua maira te Atua ra ko Iehova ki te tangata, na ko maira, E kai ua koe i to te au rakau katoa o te kainga nei: Kareka i to te rakau e kite ei i te meitaki e te kino, auraka koe e kai i to reira; i te rā e kai ei koe i to reira, ka mate ïa koe.” (Genese 2:16, 17) E tumu ainei ta Adamu no te ekoko i ta Iehova i tuatua atu?

Ka tatau ua atu tatou: “E pakari maata to te ovi i to te au manu katoa o te enua, i ta te Atua ra ta Iehova i anga ra; e kua tuatua maira aia ki te vaine, Koia ïa, kua tuatua mai te Atua e, Auraka korua e kai i to te au rakau katoa o te kainga nei? E kua karanga atura te vaine ki taua ovi ra, E kai maua i to te au rakau o te kainga nei: Mari ra o to taua rakau i rotopu i te kainga nei, kua tuatua mai ïa te Atua e, Auraka korua e kai i to reira, auraka oki korua e arapaki atu, ka mate aea korua. Kua tuatua maira taua ovi ra ki te vaine, Kare rava korua e mate: Kua kite oki te Atua e, i te rā e kai ei korua i to reira, ka puera ïa to korua mata, e ka riro korua mei te Atua ra te tu, i te kite i te meitaki e te kino. E kite akera te vaine e rakau meitaki ei kai, e te taurekareka no te mata, e te rakau anoano oki kia rauka te kite; kua rave iora aia i te kai no rungao ra, kai iora, apai atura oki ki tana tane, e kua kai katoa iora oki aia.”​—Genese 3:1-6.

I te kopaeanga i ta te Atua akamatakiteanga taka meitaki, kua akaari a Adamu raua ko Eva i te ngere anga i te irinaki anga ia Iehova. Kua akatutu raua i tei patoi i te Atua ko Satani, tei tuatua kia Eva na roto i te ovi tikai. Kua ngere ia Satani i te irinaki anga i ta Iehova tu no te tutara anga. No teia ra e tetai ngakau aruaru akaparau, kua meameaau aia i te Atua e kua pikikaa i te au tangata ravarai kia pera katoa. Kua akakeu aia ia ratou kia manako e kare te Atua e tau kia irinakiia.

Tei Tupu Mai? Ko te Au Piri Anga Maro

Penei kua kite ana koe i te aronga kare e irinaki ana i tetai ka ngata ia ratou i te akono i te au pirianga oa. Kua tata a Publilius Syrus, e tata Ratino o te anere mataiti mua M.T.N., e: “Ko te irinaki anga te tatua anake o te pirianga oa.” Na roto i ta raua rave anga i te meameaau, kua akaari a Adamu e Eva e kare raua i irinaki ana i te Atua. No reira, kare o te Atua tumu i te irinaki ia raua. Tei tupu mai mei te pururu anga te irinaki anga, me kore te manako anga, kua ngere i te nga tangata mua to raua pirianga oa ma te Atua. Kare e akakite anga e kua tuatua akaou atu a Iehova kia raua i muri ake i te akautunga anga ia raua no te meameaau anga.

Kua kino katoa te pirianga i rotopu ia Adamu raua ko Eva. Kua akamatakite a Iehova kia Eva: “E akamaata au i toou mamae tamariki ra; e ka anau mai taau tamariki ma te mamae; e ka kauraro koe ki taau tane, e ei runga ake aia ia koe.” (Genese 3:16) Kua tuatua The Jerusalem Bible e: “Nana e tutara i runga ake ia koe.” I te mea ka akono i te upoko aroa i runga i tana vaine, mei ta te Atua i inangaro ra, kua riro mai a Adamu i teianei e ko tona pu, i te tutaraanga i runga ake iaia.

I muri ake i te ara anga raua, kua tauta a Adamu i te tuku i te apa ki runga i tana vaine. I tona manako no tana i rave i tueruiaʼi raua ki vao mei te kainga apakore ki roto i tetai enua kare i oti meitaki, kua akaapaia kia angaanga i roto i te au turanga reka kore i mua ake ka oki atu ei ki te one. (Genese 3:17-19) Ka rauka ia tatou i te akamanako e ko teia te tumu tauetono anga i rotopu i nga tokorua. Penei e maata roa ta Adamu i manako, i te tuatua anga e kare rava aia e akarongo akaou ia Eva. Penei kua manako aia e kua tika aia i te tuatua anga kiaia, e, ‘Mei teianei, ko au te pu!’ I tetai tua, penei kua kite a Eva e kua autu kore a Adamu i tana tuanga ei upoko no te ngutuare, i te akatupu anga iaia kia kore e irinaki iaia. Noatu eaa te tu, na te akaari anga i te ngere anga i te irinaki anga i te Atua, kua ngere i te tangata to ratou pirianga oa kiaia e kua akakino i to ratou pirianga tetai ki tetai.

Koai ta Tatou ka Irinaki?

Kare e tau i te katoatoa to tatou tu irinaki anga, mei tei akatutuia mai e te akaraanga o Adamu e Eva. Akapeea tatou i te kite anga e koai tei tau e koai tei kore i to tatou tu irinaki anga?

Te ako maira a Salamo 146:3 ia tatou e: “Auraka e irinaki ki te ui ariki, i te tamaiti a te tangata nei, kare oki ona ora.” Ia Ieremia 17:5-7, ka tatau tatou: “Kia taumaaia te tangata e irinaki ki te tangata ra, ko tei akariro i te tangata ei rima nona, e tei akaruke tona ngakau ia Iehova.” I tetai tua, “e ao to te tangata e irinaki kia Iehova, e ko Iehova tona manako anga.”

I akatikaia, te tuku anga i te irinaki anga ki roto i te tangata kare e tarevake ana. Te tuatua ra taua irava e ko te irinaki anga i roto i te Atua kare ravaia e monoia, inara ko te tuku anga i te irinaki ki roto i te tangata apa ua i tetai taime ka taki atu ki te tumatetenga. Ei akaraanga, ko te au tangata tei irinaki i te au tangata kia rauka mai te ka rauka ua i te Atua i te rave​—te oronga anga mai i te ora e te apai anga mai i te au tikai e te tinamou​—te aro atura i te maromaroa.​—Salamo 46:9; 1 Tesalonia 5:3.

Ko te tika, ka rauka i te tangata ravarai e te au akaaerenga tangata kia irinaki uaia na tetai tu me rave rotai ratou i te angaanga ma ta te Atua akakoroanga e te akatutu anga i te au kaveinga akono tu Atua. No reira, me ka akauru tatou i tetai atu kia irinaki ia tatou, e tuatua tatou i te tika, e kia tiratiratu e kia irinakiia. (Maseli 12:19; Ephesia 4:25; Ebera 13:18) Na te rave akono anga ia tatou uaorai kia tau ki te au kaveinga Pipiria e akatikaiaʼi te irinaki anga o tetai ki roto ia tatou e ka riro ei tumu no te akamatutu anga e te akamaroiroi anga.

Akaou Anga i te Irinaki Anga

E tumu anga papu to te Au Kite o Iehova no te tuku anga i te irinaki anga ki roto i te Atua e te akamaroiroi anga i tetai atu kia pera katoa. E tiratiratu a Iehova, ko tei tau kia irinakiia no tana i tuatua, no te mea “tei kore e tika i te Atua kia pikikaa.” Kare rava te irinaki anga tei tukuia ki roto i te Atua aroa e taki atu ki te reka kore.​—Ebera 6:18; Salamo 94:14; Isaia 46:9-11; 1 Ioane 4:8.

Te au tangata taokotaiia i te irinaki anga ia Iehova e tei akono i tana au kaveinga te akakeu pakariia ra kia akaari i te irinaki anga ki tetai atu. I roto i te ao mamae anga i te kino i te irinaki anga, mei teaa ra te rekareka anga i te kite anga i te au tangata te irinakiia ra! Akamanako ana mei teaa te tuke te ao me e irinaki anga pu tikai to tatou ki roto i ta tetai e tuatua ra e te rave ra! I te ao ou e aere maira ta te Atua i taputou mai ko teia te turanga. Kare rava e kino i te irinaki anga!

Te inangaro ra ainei koe i te noo ki reira? Me koia ia, te pati atu nei te Au Kite o Iehova ia koe kia akamatutu i toou irinaki anga i te Atua e i tana au taputou na te apii anga ma te maata atu no runga i tana au umuumu anga no te oraanga. Te oronga maira tetai apii anga o te Pipiria te akapapu anga e te vaira te Atua, e te manako maira aia i to te au tangata oraanga, e kare e roa atu ka rave aia i te akatika i te au manamanata i te ao na roto i tana Patireia. E mirioni ua atu tei apii no te tuku i to ratou irinaki anga i roto i te Atua e tana Tuatua, te Pipiria. Ka rekareka atu te Au Kite o Iehova i te akatutu kia koe i te angaanga ngai tangata o te apii Pipiria te oronga ra ratou kare e tutakiia. Me kare e tata ki te aronga nenei o teia makatini no tetai akakite anga maata atu.

[Tataanga i te kapi 5]

Ka taki atu te ngere anga i te irinaki anga i te Atua ki te au pirianga tangata kino

[Tataanga i te kapi 6]

Ka tau te tangata ravarai kia irinaki uaia na tetai tu me rave rotai ratou i te au kaveinga akono tu Atua