Ka Rauka Ainei ia Koe te Irinaki i Toou Akava Ngakau?

I RARO ake i te au turanga matauia, e apinga irinaki uaia te compass. E tou tamou ana tona nira, tei akatakaia e te magnetic field o te enua, ki te tokerau. No reira ka rauka i te aronga teretere i te irinaki i te compass no te arataki anga me kare e akairo enua kia arataki ia ratou. Inara eaa te ka tupu me tukunaia tetai apinga taimana i te pae te compass? Ka taka mai te nira ki te apinga taimana kare e tou ki te tokerau. Kare i reira te reira i te arataki anga tau.

Ka tupu rai tetai apinga aiteite mei te reira ki te akava ngakau tangata. Kua tuku Tei Anga i teia tu manako i roto roa ia tatou kia riro ei arataki anga tau. I te mea kua angaia mai tatou i to te Atua tu, ka tau te akava ngakau i te tou putuputu ia tatou ki te arataki anga tika me anoanoia tatou i te tuku i te au iki anga. Ka tau te reira i te akakeu ia tatou kia akaata i te au turanga akono a te Atua. (Genese 1:27) Ma te putuputu, te pera ra. Ei akaraanga, kua tata te apotetoro Kerititiano ko Paulo no tetai aronga kare tei ia ratou ta te Atua ture akakiteia ‘kua rave ua i ta te ture ra.’ Eaa ra? No te mea “te akakite ra oki to ratou akava-ngakau.”​—Roma 2:14, 15.

Noatu ra, kare te akava ngakau e ariu ua mai ana me te anoanoia ra te reira. No te tu tiama kore o te tangata, te anoano ra tatou i te rave i te au apinga kua kite tatou e tarevake ia. “Te rekareka nei oki au i te ture a te Atua i te akonoanga i te tangata i roto ra;” i na Paulo ei, “te kite nei ra au i tetai ture i roto i toku kopapa nei, i te māro mai anga i te ture i roto i toku ngakau, e te akariro anga iaku ei tuikaa na te ture kino i roto i toku nei kopapa.” (Roma 7:22, 23) Me tuku putuputu ua tatou ki te au manako tarevake, ma te marie ka takinoia to tatou akava ngakau e i te openga ra ka akamutu i te akakite anga mai kia tatou e tarevake taua tu.

Inara, noatu te tu tiama kore, ka rauka ia tatou te akatika i to tatou akava ngakau kia tau ki ta te Atua au turanga. E tikai, e mea puapinga kia rave tatou i te reira. Ka taki atu tetai akava ngakau ma, tereni meitakiia kare ua ki tetai pirianga maana, ma te Atua inara e mea puapinga ki to tatou ora anga. (Ebera 10:22; 1 Petero 1:15, 16) Pera katoa, ka tauturu tetai akava ngakau meitaki ia tatou kia tuku i te au iki anga pakari i te ora anga, te ka taki atu ki to tatou au e te mataora. Kua tuatua te tata taramo no tetai tangata e akava ngakau tona mei te reira rai: “Te ture a tona Atua tei roto ïa i tona ngakau kare oki tona vaevae e paeke.”​—Salamo 37:31.

Terenianga i te Akava Ngakau

E maata atu ra te o maira ki te terenianga i te akava ngakau i te akamanako anga i te au papaanga ture e oti ka aru pakari i te reira. Ko te reira ta te au Pharisea i to Iesu tuatau i rave. Kua kite teia au arataki akonoanga i te Ture e kua tata i tetai peu tata meitakiia, i te manako anga ka tauturu teia i te tangata kia kopae i te aatianga i te Ture. No reira, kua viviki ratou i te patoi i ta Iesu pipi no te aaki anga i te titona i te Tapati e kua kai atura i te au ua. Kua akaao ratou ia Iesu no te rapakau anga i te rima maro o tetai tangata i te Tapati. (Mataio 12:1, 2, 9, 10) No teia nga angaanga, kia tau ki te peu Pharisea, kua aati i te a o te ture.​—Exodo 20:8-11.

Te taka meitaki ra, e kua apii te au Pharisea i te Ture. Inara kua tau ainei to ratou akava ngakau ki ta te Atua au turanga? Kare rava! Eaa ra, i muri ua ake i te akakino anga no runga i ta ratou i manako kua aatiia te ture Tapati, kua uriuri manako te Pharisea no Iesu “kimi iora i ta ratou tuatua iaia, e ta.” (Mataio 12:14) E akamanako ana​—kua riri tikai teia au arataki akonoanga manako tuatua tika ia ratou uaorai i te manako no te kai anga i te ua titona tei aaki vaveia e te rapakau anga i te Tapati; inara kare ratou i manako reka kore ana no te tauta anga i te ta ia Iesu!

Kua akaari te au taunga nunui i te au manako tarurike mei te reira rai. Kare teia au tangata kino i manako kino ana i te oronga anga ratou kia Iuda e 30 moni ario na te iero ei pikikaa ia Iesu. Inara i te akaoki anga a Iuda i te moni kare i manako ia ana, te titiri anga ki roto i te iero, kua aro atu te akava ngakau o te au taunga nunui ma tetai maro anga ture. “Kare e tika i te ture” i na ratou ei, “kia tuku [te au moni] ki roto i te putunga moni tapu nei, e oko toto teia.” (Mataio 27:3-6) I te akara anga, kua manamanata te au taunga nunui e kua viivii ta Iuda moni i teianei. (Akaaite ia Deuteronomi 23:18.) Inara, kare teia pupu tangata i kite ana i te tarevake i te akapou anga i te moni no te oko kia pikikaaia te Tamaiti a te Atua!

Kia Rotai ki to Iehova Manakoanga

Te akaari maira te au akara anga i runga ake nei e maata atu te umuumuia maira no te tereni anga i te akava ngakau i te akaki ua anga i te manako i te au papaanga ka raveia e kare e raveia. I akatikaia, e puapinga te kite anga i te au ture a te Atua, e te anoanoia ra te akarongo anga i te reira no te ora. (Salamo 19:7-11) Inara, kapiti mai i te kite anga i te au ture a te Atua, e tau tatou kia akatupu i tetai ngakau te rotai ra ki to Iehova manakoanga. I reira e kite ei tatou te tupuanga o te au totou a Iehova na roto ia Isaia, te akakite ra: “E kite ra to kotou mata i to kotou au orometua: E na to kotou taringa e akarongo i tetai manga tuatua i muri mai ia kotou, i te na ko anga, Teia te ara, e na reira te aere; kia anga kotou i te pae katau, e kia anga kotou i te pae kaui.”​—Isaia 30:20, 21; 48:17.

E tikai, kare te aiteanga o teia e me aro tatou i tetai iki anga teiaa, e ka akakite tikai mai tetai reo kia tatou e eaa te ka rave. Noatu ra, me te rotai ra to tatou manakoanga ki to te Atua no runga i te au mea, ka meitaki to tatou akava ngakau i te tauturu ia tatou te tuku anga i te au iki anga te ka akamareka iaia.​—Maseli 27:11.

E akamanako ana ia Iosepha, tei noo i te 18 anere mataiti M.T.N. I te raurau anga te vaine a Potiphara iaia kia rave i te akaturi, kua patoi a Iosepha, te na ko anga: “Eaa oki au e tikaʼi kia rave i tenana kino maata, e te ara i te Atua?” (Genese 39:9) I to Iosepha tuatau, kare e ture i tataia no ko mai i te Atua te akaapa ra i te rave anga akaturi. Pera katoa, te noo ra a Iosepha i Aiphiti, e mamao ke atu mei te ako anga ngutuare tangata me kore te au ture pateriareka. Eaa, i reira, tei akariro ia Iosepha kia patoi i te timata anga? Kia tuku ngoie uaia, ko tona akava ngakau tereniia. Kua akono a Iosepha i to te Atua manako e ko te tane e te vaine ei “kopapa okotai.” (Genese 2:24) No reira kua kite aia e mea tarevake i te apai i te vaine a tetai ke. Kua rotai to Iosepha manakoanga ki to te Atua no taua manako. Kua akakino te akaturi i tona tu akono.

I teia tuatau, e meangiti ua te tangata mei ia Iosepha rai. E maata te ainga tau kore, kare te manganui e manako ana i tetai apainga ki Tei Anga ia ratou, kia ratou uaorai, me kare ki to ratou tokorua kia ma i te pae akono. Te aite ra te turanga mei tera rai tei akatakaia i te puka a Ieremia: “Kare akera tetai i tataraara i tona kino, i te na ko anga e, I aa ua ana au? kua anga anake ratou ravarai i tona uaorai aerenga, mei te oroenua e oro pu ua ki roto i te tamaki anga.” (Ieremia 8:6) No reira, te vaira te anoano maata no tatou kia rotai ki to Iehova manakoanga. E maata ta tatou apinga umere ka tauturu ia tatou kia pera.

Tetai Tauturu ei Tereni i te Akava Ngakau

Te au Tuatua Tapu akauruia “e mea meitaki ei apiianga, ei akoanga, ei akakiteanga apa, e ei akakite mai i te tuatua-tika ra. Kia apa kore te tangata o te Atua, ma te tau tikai i te au angaanga memeitaki katoa ra.” (2 Timoteo 3:16, 17) Na tetai apii anga i te Pipiria e tauturu ia tatou kia tereni i ta te Pipiria e kapiki ra ko to tatou “mātau i kite,” e raukaʼi te akataka ke te tika mei te tarevake. (Ebera 5:14) Ka tauturu te reira ia tatou kia akatupu i te inangaro i te au apinga ta te Atua e inangaro ra e kia reka kore tikai i te au apinga tana e rikarika ra.​—Salamo 97:10; 139:21.

Ko te akakoro anga o te apii Pipiria, i reira, koia kia rauka te tu e te ravenga tau o te tuatua mou e i te rauka ua anga te kite. I roto i tona itiu o Tepetema 1, 1976, kua akakite The Watchtower e: “I roto i ta tatou apii anga i te au Tuatua Tapu ka tau tatou kia marama i to te Atua tu tika, te aroa e te tuatua tika e kia tatanu oonu i teia ki roto i to tatou ngakau kia riro mai ei tuanga no tatou mei te kaikai anga e te akaea anga. Ka tauta tatou kia ara tikai ki tetai tu apainga na te tatanuanga i te kite i te mea tika e te mea tarevake. E maata atu i te reira, kia akakeu tatou i to tatou akava ngakau kia manako pakari tikai i tana apainga ki te Oronga Ture e te Akava apa kore. (Isa. 33:22) No reira koi apii ei no runga i te Atua, ka tauta tatou kia aru iaia i te au tu ravarai o te ora anga.”

Raukaanga “te Ngakau o te Mesia”

Ka tauturu katoa te apii anga i te Pipiria ia tatou kia rauka “te ngakau o te Mesia,” te tu manako akarongo e te akaaka tei akaariia e Iesu. (1 Korinetia 2:16) I te rave anga i te anoano o tona Metua e rekareka anga ia, kare i te mea ka aru otomatiki uaia, ma te kore te manakoanga. Kua akataka totouia tona tu e te tata taramo ko Davida, tei tata: “E mea tau naku te rave i toou anoano, e taku Atua; te vai nei oki taau ture tei roto i toku nei ngakau.”a​—Salamo 40:8.

Te raukaanga “te ngakau o te Mesia” e mea puapinga ki te tereni anga i te akava ngakau. I runga nei i te enua ei tangata apa kore, kua akaata a Iesu i te au tu e te tu peretana o tona Metua ma te ki tikai i roto i te au kotinga tangata. No reira, kua rauka iaia i te tuatua: “Ko te akara mai iaku nei, kua akara ïa i te Metua.” (Ioane 14:9) I te au turanga katoa iaia i te enua nei, kua rave a Iesu i ta tona Metua i inangaro iaia kia rave. No reira, me apii tatou i to Iesu ora anga, te kite taka meitaki nei tatou e mei teaa rai te Atua ko Iehova.

Ka tatau tatou ia Iehova e “takinga-meitaki, e te aroa ua, e te akakoromaki maata, e te meitaki maata.” (Exodo 34:6) E putuputu te taime, kua akaari a Iesu i teia au tu i te akono anga i tana au apotetoro. I te taumaro putuputu anga ratou e koai tei maata atu, kua apii marie a Iesu ia ratou na roto i te tuatua e te akaraanga e ko tei “anoano i te akamaata i o kotou, kia riro ïa ei tavini no kotou; e ko te inangaro kia maata aia i o kotou na, ei tavini akaaka aia no kotou.” (Mataio 20:26, 27) Ko teia tetai akaraanga ei akaari e ka rauka ia tatou kia rotai ki to te Atua manakoanga na te akamanakoanga i te oraanga o Iesu.

Ko te maata ta tatou i kite no Iesu, ka meitaki atu tatou no te aru i to tatou Metua i te rangi, ko Iehova. (Ephesia 5:1, 2) Ko tetai akava ngakau tei rotai ki to te Atua manakoanga ka taki ia tatou ki te arataki anga tau. Te taputou maira a Iehova i te aronga te irinaki ra iaia: “E apii atu au ia koe, e akakite atu ei kia koe i taau arataa kia aere ra; e ako atu au ia koe; ei runga ia koe toku mata vaoo ei.”​—Salamo 32:8.

Puapinga Anga mei Tetai Akava Ngakau Tereniia

Te kite anga i te tu akarongo kore o te au tangata apa, kua akamatakite a Mose i te au Iseraela: “E akamaara tikai i te au tuatua ravarai taku e karanga atu kia kotou i teianei rā; e na kotou e akaue atu ki ta kotou au tamariki, kia akono e kia rave i te au tuatua ravarai i teianei ture.” (Deuteronomi 32:46) Ka tau katoa tatou kia tata i ta te Atua ture ki runga i to tatou ngakau. Me akapera tatou, ka arataki ngoie to tatou akava ngakau i to tatou takainga e ka tauturu ia tatou kia tuku i te au iki anga tau.

E tikai, kia matakite tatou. Te tuatua ra te materi Pipiria: “E ana rai te tangata i te arataa e, e mea tika i tona ra manako; ko te openga ra o taua arataa ra, ko te mate ïa.” (Maseli 14:12) Eaa ra e ko teia te tu? No te mea, mei ta te Pipiria e tuatua ra: “E pikikaa maata to te ngakau i te au mea katoa nei, e kua kino takiri: koai te kite?” (Ieremia 17:9) No reira, te anoano ia ra tatou katoatoa kia aru i te akauenga a Maseli 3:5, 6: “E irinaki kia Iehova ma to ngakau katoa ra; auraka ra e irinaki ki toou uaorai kite. Auraka e akangaropoina iaia i toou katoa ra au aerenga; e nana e akakite kia koe i toou ra au arataa.”

[Tataanga Rikiriki i Raro]

[Tutu i te kapi 7]

Mei te “compass” rai, ka taki atu te akava ngakau tereniia e te Pipiria ia tatou ki te arataki anga tau

[Akameitakianga]

Compass: Courtesy, Peabody Essex Museum, Salem, Mass.