Kua Rave Ratou i to Iehova Anoano

Kua Akakite Mataku Kore a Paulo ki Mua i te Au Tangata Ngateitei

KA KITEA uaia te tuke anga i rotopu i nga tangata e rua. Kua aao tetai i te korona e tetai i te nga pirianganaoa. E ariki tetai; e tangata mou auri tetai mai. I muri ake i te rua mataiti i roto i te are auri, te tu nei te apotetoro ko Paulo ki mua i te tutara o te ngati Iuda, ko Heroda Ageripa II. Kua aere mai te ariki e tona tokorua, ko Berenike, “ma te tietie maata, e tomo maira ki roto i te ngai akarongo tuatua e te au rangatira mamaata katoa, e te aronga taoiau i taua oire ra.” (Angaanga 25:23) Kua tuatua tetai akakiteanga e: “Penei te vaira e anere ua atu au tangata i reira.”

Na te kavana akataoonga ouia, ko Fesito, i akapapa i taua uipaanga. Kua mareka ua te kavana i mua ake iaia, ko Feliki, i te tuku ua ia Paulo kia noo ki roto i te are auri. Inara kua uiui a Fesito i te tika anga o te au akaapa anga ia Paulo. Eaa ra, kua maro pakari a Paulo e kare aia i apa, e kua umuumu kia tae ki mua ia Kaisara! Kua akakeu to Paulo akavaanga i te Ariki ko Ageripa kia inangaro i te kite. “Te inangaro katoa nei au i te akarongo i taua tangata nei,” i nana ei. Kua akapapa viviki atura a Fesito, i te umere anga penei e eaa to te ariki manako no teia mou auri tuke akerai.​—Angaanga 24:27–25:22.

Tera mai ra, kua kite a Paulo iaia uaorai e tu ra ki mua i tetai urupu tangata ngateitei. “Kua meitaki rava au, ko au e tuatua iaku uaorai i teianei rā ki mua i toou aroaro nei,” i nana ei kia Ageripa, “no te mea, kua kite koe i te au peu ravarai, e te au tuatua katoa a te ngati Iuda: e teianei, teia taku tuatua kia koe, ka akarongo marie mai koe kiaku.”​—Angaanga 26:2, 3.

Ta Paulo Paruru Anga Mataku Kore

Te mea mua, kua akakite a Paulo kia Ageripa no runga i tona tuatau i topa ei tangata takino i te au Kerititiano. “E naku i akamataku atu kia akakino ratou,” i nana ei. “Takinga-kino atura au ia ratou e tae ua atura ki te oire ke ra.” Kua akakite atura a Paulo i te rauka anga iaia te orama e i roto i te reira kua ui atu a Iesu tei akatuia kiaia: “Eaa koe i takinga-kino mai ei iaku? e mea ravengata naau kia takatakai i te ko.”a​—Angaanga 26:4-14.

I reira kua akaue atu a Iesu ia Saula kia akakite aere ki te au tangata o te enua “i te au mea katoa taau i kite akenei, e te au mea taku e akakite atu rai kia koe.” Kua akakite a Paulo e kua tauta pakari aia i te akatupu i tana tukuanga angaanga. Inara, “no taua tuatua ra,” i akakite ei aia kia Ageripa, “i opu mai ei te ngati Iuda iaku i roto i te iero, e te rave maira oki e tamate rava iaku.” Te akakeu anga i to Ageripa tu inangaro i te akonoanga Iuda, kua tuatua a Paulo e te o maira tikai ki roto i tana akakite anga i te “tuatua anga atu i taua au tuatua anake ra i ta te peroveta tini e ta Mose i tuatua maira e, ka tupu” no runga i te matenga e te tuakaouanga o te Mesia ra.​—Angaanga 26:15-23.

Kua tamanata mai a Fesito. “Kua nenevaia koe i te kimi maata anga i te tuatua” i karanga ei aia. Kua pau atu a Paulo: “Kare ua au i nenevaia, e Fesito teitei; ko te tuatua-mou ra taku e karanga nei e te auouo kore.” I reira kua tuatua atu a Paulo no Ageripa: “Kua kite ua oki te ariki i taku i tuatua ua atu nei i mua i tona aroaro i teianei au tuatua: kare rava teianei au tuatua i ngaro iaia, kua kite au; kare ua oki teia te mea i raveia i te ngai poiri.”​—Angaanga 26:24-26.

I reira kua tuatua tika atu a Paulo kia Ageripa. “E te ariki, e Ageripa, kua akarongo koe i te au peroveta?” Kare e ekoko anga kua akariro te reira uianga kia reka kore a Ageripa. Ina, e ingoa tona kia akonoia, e me akatika aia ki ta Paulo te piri ra aia ki tei kapikiia e Fesito e “neneva.” Penei kua kite i te tu imiimi o Ageripa, kua pau atu a Paulo i tana uianga. “Kua akarongo koe, kua kite au,” i nana ei. I teianei kua tuatua a Ageripa, inara kua akono aia i tana tuatua kare i inangaro kia kite. “Kua vaitata au i te riro,” kua tuatua aia kia Paulo, “ei Kerisitiano ia koe.”​—Angaanga 26:27, 28.

Kua taangaanga karape a Paulo i ta Ageripa tuatua kopae kikite ei akakite i tetai tumu manako ririnui. “Toku ïa anoano i te Atua,” i nana ei, “auraka ko koe anake ra, ko te aronga ravarai ra e akarongo mai iaku i teianei rā, kia vaitata, e kia aite rava mai kiaku nei, auraka ra teianei tapeka.”​—Angaanga 26:29.

Kua kite a Ageripa e Fesito e kare e apinga kia tau a Paulo kia tamateia me kore kia tapekaia. Noatu rai, kare e rauka i te akaateaia tana pati anga kia tukunaia tana akavaanga kia Kaisara. No reira oki a Ageripa i karanga ei kia Fesito: “E tuku uaia teianei tangata, naringa kare aia i karanga e, Ei ia Kaisara au.”​—Angaanga 26:30-32.

Ei Apiianga no Tatou

Te oronga maira ta Paulo ravenga no te akakiteanga ki mua i te aronga ngateitei tetai akaraanga meitaki no tatou. I te tuatua anga ki te Ariki ko Ageripa, kua tuatua a Paulo ma te kite pakari. Kare e ekoko anga kua kite aia i te noo anga mako kore o Ageripa e Berenike. E piri anga kopu tangata to raua, e tuaine tikai a Berenike no Ageripa. Inara i teia atianga kare a Paulo i iki ana i te tuatua no runga i te tu akono. Mari ra, kua tuatua maata aia no runga i te tumu manako ta raua ko Ageripa i kite. Pera katoa, noatu kua apiiia a Paulo e te Pharisea ko Gamaliela, kua tuatua aia e kua kite rai a Ageripa i te au peu ngati Iuda. (Angaanga 22:3) Noatu to Ageripa au tu akono ra, kua tuatua a Paulo kiaia ma te ngateitei no te mea kua akono a Ageripa i tetai turanga mana akaaere.​—Roma 13:7.

Ia tatou e akakite mataku kore ra i ta tatou au irinaki anga, kare ia i te akakoroanga no tatou kia tuatua aere me kore kia akakino i te au ravenga kino o to tatou aronga akarongo. Mari ra, e raukai ia ratou i te ariki ngoie i te tuatua mou, ka tau tatou kia tuatua maata i te au tu papu tikai o te tuatua meitaki, te tuatua maata anga no runga i te au manakonakoanga ta tatou e akono nei. Me tuatua ki te aronga mamaata me kore te aronga mana, kia akangateitei tatou i to ratou turanga. (Levitiku 19:32) Na roto i teia tu, e raukaʼi ia tatou te aru ia Paulo, tei tuatua: “Kua akaarite au iaku uaorai i te au mea katoa i te tangata ravarai nei, kia ora iaku tetai papaki i taua au ravenga katoa nei.”​—1 Korinetia 9:22.

[Tataanga Rikiriki i Raro]