“Ko Iehova, e Atua Takinga-Meitaki, e te Aroa Ua”

“Ko Iehova, Ko Iehova, e Atua takinga-meitaki, e te aroa ua, e te akakoromaki maata, e te meitaki maata, e te tuatua-mou.”​—EXODO 34:6.

1. (a) Eaa te akapumaana anga ta te Pipiria e oronga maira no te aronga tei kite ra i te aere keanga ta ratou au akaperepere i te akamori anga ma? (e) Akapeea to Iehova ra manako no te aronga rave tarevake?

“KUA tuatua mai taku tamaine kiaku e kare aia e anoano akaou kia riro ei tuanga no te putuputuanga Kerititiano ra,” ko ta tetai metua Kerititiano ia i tuatua. “No te au ra, au epetoma, e te au marama ua i muri iora, kua kite au i tetai mamae kino te kakati maira i roto i toku kopapa. E kino atu ia i te mate.” E mea taitaia tikai kia kite i tetai tei akaperepereia ra te tapae ke ra mei te arataa o te akamori mou. Kua tupu ainei taua tu ra kia koe? Me koia ia, ka akapumaanaia koe kia kite e te manako aroa maira Iehova noou. (Exodo 3:7; Isaia 63:9) Inara akapeea tona manako no taua aronga rave tarevake ra? Te akaari maira te Pipiria e te pati aroa ua maira Iehova ia ratou kia akaoraia ki tana akaperepere anga. Kua pati ngakau tae aia ki te au ngati Iuda meameaau o to Malaki tuatau ra: “E ariu mai kotou kiaku, e naku e ariu atu kia kotou.”​—Malaki 3:7.

2. Akapeea ta te Pipiria akaari anga e ko te aroa ua tetai tuanga maata o to Iehova ra tu ei Atua?

² Kua akakite maataia mai to te Atua aroa ua no Mose i runga ia Maunga Sinai. I reira, a Iehova i akakite mai ei iaia uaorai ei tetai “Atua takinga-meitaki, e te aroa ua, e te akakoromaki maata, e te meitaki maata, e te tuatua-mou.” (Exodo 34:6) Te akaketaketa maira teianei akakite anga e ko te aroa ua tetai tuanga maata o to Iehova ra tu Atua. Te anoano ra aia “kia rauka katoatoa ra te tataraara,” ta te apotetoro Kerititiano ko Petero i tata. (2 Petero 3:9) Inara, kare te aroa ua o te Atua ra i kotinga koreia. “E kare e tuatua ki te tangata kino e, e tangata kino kore,” kua tuatuaia kia Mose. (Exodo 34:7; 2 Petero 2:9) Inara, “ko te Atua oki te aroa,” e ko te aroa ua tetai tuanga maata o taua tu ra. (1 Ioane 4:8; Iakobo 3:17) Ko Iehova ra “kare aia e akamou i tona riri e tuatau ua atu,” e “e mea rekareka iaia te aroa.”​—Mika 7:18, 19.

3. I akapeea te tuke anga to Iesu manako no te aroa ua ma to te au tata tuatua e te au Pharisea ra?

³ Ko Iesu tetai akaata anga apa kore ua no tona ra Metua i te rangi. (Ioane 5:19) Ko tana akono anga aroa ua i te aronga rave tarevake ra kare ia i tetai pirianga ki ta ratou au ara ra mari ra e akakite anga i taua tu manako ngakau maru ra tana i akakite ki te aronga e maki kopapaia ra. (Akaaite ia Mareko 1:40, 41.) Ae, kua tuku a Iesu i te aroa ua ki roto i te “au mea mamaata” o te Ture a te Atua ra. (Mataio 23:23) Ei tuke anga, e akamanako i te au tata tuatua e te au Pharisea, tei matauia ra to ratou au manako anga i te ture no te tuatua tau kia takore takiri atu i te aroa ua ra. I to ratou akara anga ia Iesu e kapiti atura ma te aronga rave ara, kua akaapa ratou e: “Te kite mei teianei tangata i te aronga rave ara, e te kaikai katoa ra ma ratou.” (Luka 15:1, 2) Kua pau atura Iesu i te aronga akaapa ra iaia ma nga akatutuanga e toru, te akakite tataki tai ra i to te Atua ra aroa ua.

4. Eaa nga akatutu anga e rua ta Iesu i akakite maira e eaa te tumu o te reira taki tai?

⁴ Te mea mua, kua tuatua a Iesu no tetai tangata tei akaruke e 99 mamoe kia aere e kimi i tetai tei ngaro ra. Ko tana tumu? “E rekareka maata to runga i te rangi i te tangata ara okotai kia tataraara, i te aronga tuatua-tika e kia iva ua atu te ngauru anga ma iva, te kore e tau ia ratou te tataraara.” I muri mai, kua tuatua a Iesu no tetai vaine tei kimi ra no tetai moni titerama tei ngaro ra e kua rekareka i te kiteaanga te reira. Tana akataka anga? “Mei te reira katoa te tu o to te au angela a te Atua ra rekareka, kia tataraara te tangata rave ara okotai ra.” Kua akakite a Iesu i te toru o tana akatutuanga na roto i te tu parapore.a Kua riro te reira kia manakoia e te aronga e manganui ei te tua poto meitaki roa tei tuatuaia ra. Na te akamanako anga i teianei parapore ka tauturu ia tatou kia ariki e kia aru oki i to te Atua ra aroa ua.​—Luka 15:3-10.

Kua Akaruke Tetai Tamaiti Meameaau i te Kainga

5, 6. I akapeea te akakite anga a te teina o nga tamaroa e rua i te toru o ta Iesu akatutu anga i tetai ngere anga poitirere no te pae ariki anga?

⁵ “Toko rua a tetai tangata tamariki tamaroa: Kua karanga atura te tama muri ki te metua. E taku metua, o mai ana i taku tuanga i to tatou nei apinga. Kua tua atura aia i te apinga ravarai na raua. E topa akera etai rā kare e rainga, kua akaputuputu iora te tama openga i tona apinga katoa, e aere atura i tona tere ki te enua mamao, kua kaituauau atura i tona apinga i te kanga.”​—Luka 15:11-13.b

⁶ Kua akakite te tama openga i konei i tetai ngere i te ariki anga poitirere ra. Te mea mua, kua pati aia i tona tuanga, e i muri iora kua kaimoumouia e ia tona apinga “i te kanga.” Kua uriia mai taua tuatua “i te kanga” ra mei tetai tuatua Ereni tona aite anga “e oraanga oripu ua.” Kua akakite tetai tangata apiipiiia e ko taua tuatua ra “te akataka maira i te akaruke anga takiri i te tu tau ra.” Ma te tumu meitaki ra, e putuputu te tapaia taua tangata ou i ta Iesu parapore ra ei tetai tamaiti kaimoumou apinga, ko tetai tuatua te akataka maira i tetai tangata tei kaituauau ra e te kaimoumou oki.

7. Koai ma i teia tuatau nei te akatutu maira i te tamaiti kaimoumou ra, e eaa ra te manganui anga o ratou ra ka kimi ei i te tu takake ki roto i “te enua mamao”?

⁷ E au tangata ainei etai i teia tuatau te akatutu maira i te tamaiti kaimoumou apinga ra? Ae. E mea mii ra, e toko iti ua ra kua akaruke i te “kainga” tinamou o to tatou Metua i te rangi ra, koia a Iehova. (1 Timoteo 3:15) Te manako ra tetai papaki o teia aronga e e maata roa te tu arairaiia o te ngutuare o te Atua ra, e ko te mata akarakara mai o Iehova e maata atu te tapupu anga i to te paruru anga. (Akaaite ia Salamo 32:8.) E akamanako ana i tetai vaine Kerititiano tei akonoia maira kia tau ki te au kaveinga Pipiria inara kua o atu i muri iora ki te kai tau kore i te kava e te apinga akakona. I te akaraanga ki muri i runga i taua tuatau poiri i tona ora anga, kua tuatua aia: “I anoano au kia akapapu e ka rauka iaku kia akatupu i tetai oraanga meitaki atu noku uaorai. Kua anoano au kia rave i taku i inangaro kia rave, e kare au i anoano na tetai atu e akakite mai kiaku i tetai mea tuke.” Mei te tamaiti kaimoumou rai, kua kimi teianei vaine i te turanga nana uaorai e akatere. E mea kino ra, no tana au ravenga tau kore i te Tuatua Tapu kua riro aia kia akaateaia ki vao i te putuputuanga Kerititiano ra.​—1 Korinetia 5:11-13.

8. (a) Eaa te tauturu anga te ka rauka kia orongaia ki te aronga tei anoano ra kia akono tuke roa ki ta te Atua au turanga ra? (e) Eaa tetai i tau ei kia akamanako marie i tana iki anga i te tumu no te akamori anga ra?

⁸ E mea ati ngakau tikai me ka akakite tetai oa akarongo i te anoano kia noo tuke roa ki ta te Atua ra au turanga. (Philipi 3:18) Me tupu mai teia tu, ka tauta te aronga pakari e etai atu oki ma te au tu tau i te pae vaerua ra kia akatikatika i tei apa ra. (Galatia 6:1) Tera ra, kare tetai e oparaia kia ariki i te amo no te taoonga ei pipi Kerititiano. (Mataio 11:28-30; 16:24) Me tae ratou ki te mataiti kua pakari mai, noatu ko te aronga mapu ka tika kia iki ratou uaorai i te tumu no te akamori anga. I te openga, e tu rangatira to tatou taki tai no te rima rave te ka oronga i tetai tuatua ki te Atua ra nona uaorai. (Roma 14:12) Inara, ka ‘kokoti katoa tatou i ta tatou te ka ruru’​—ko tetai apiianga ta te tamaiti kaimoumou i ta Iesu parapore ra kare i roaia ka kite.​—Galatia 6:7, 8.

Manakonako Kore i Tetai Enua Mamao Ra

9, 10. (a) Eaa te taui anga no te au turanga ta te tamaiti kaimoumou ra i kite, e i akapeea tona manako anga i te reira? (e) E akatutu mai e i akapeea to tetai papaki i teia tuatau nei tei akaruke ra i te akamori mou, kite anga i tetai tu kino aiteite ki to te tamaiti kaimoumou ra.

⁹ “E ope rava akera tona apinga, rokoia iora taua enua ra e te onge maata; kite akera aia i te ngere. Kua topiri atura aia ki tetai tangata tupu o taua enua ra, ko tei unga atu iaia ki te au kainga nona e angai i te puaka-maori. E kua kaki atura aia i te kai e keingaia e te puaka-maori, kia ki tona kopu: kare ra e tangata i oronga mai iaia.”​—Luka 15:14-16.

¹⁰ Noatu rai e kua ngere aia, kare ra taua tamaiti kaimoumou ra i akamanako ake i te okianga ki te kainga ra. Kareka ra, kua aravei atu aia i tetai tangata tupu tei oronga maira i tetai angaanga nana kia angai te puaka maori. I te mea e kua akataka te Ture a Mose e e manu viivii te au puaka maori ra, penei kare taua angaanga ra e tau ki tetai ngati Iuda. (Levitiku 11:7, 8) Inara naringa taua tamaiti kaimoumou ra i kite i tetai ua atu akakeuanga i tona akava ngakau, ka tapupu aia i te reira. No te mea, kare e rauka iaia kia manako atu i tona pu, koia ra tetai tangata tupu no reira, kia manako atu ma te au manako ngakau o tetai tangata ke tei ngere kinoia ra. Te aite ra te turanga o taua tamaiti kaimoumou ra ki tei tupu nei ki te aronga e manganui i teia tuatau tei akaruke ra i te arataa tikatika ua no te akamori ma ra. E putuputu, taua aronga ra i te riro kia o atu ki te au angaanga tei manakoia e ratou i mua ana ei tu taekeanga. Ei akatauanga, e 17 mataiti, tetai tangata ou ra i meameaau ei i tona akatupuanga ake ei Kerititiano. “Na te akaturi e te kai apinga akakona i takore atu i te au apiianga akatumuia i te Pipiria no etai mataiti ra,” kua akatika aia. Kare i roaia, kua kite teianei tangata ou iaia uaorai i roto i te are tapekaanga no te keia anga ma te pupui e te ta ua oki. Noatu rai e kua oki akaou mai aia i muri akera ki te ora anga pae vaerua, mei teaa ra tetai tutaki teiaa tana i rave no “te navenave poto ua o te tuatua kino ra”!​—Akaaite ia Ebera 11:24-26.

11. I akapeea te akakino roa anga te tupu anga ki te tamaiti kaimoumou ra, e i akapeea tetai papaki i teia tuatau nei i te kite anga i te au maunu o teianei ao ei “pikikaa puapinga kore”?

¹¹ Kua akakino roaia te tupu anga ki te tamaiti kaimoumou ra no te tika e “kare ra e tangata i oronga mai iaia.” I ea tona au oa i kitea ouia ra? I teianei e kua kore ana moni, kua riro aia mei tetai “te ririia ra” e ratou. (Maseli 14:20) Mei te reira katoa oki, i teia tuatau, e manganui te aronga tei aere ke ra mei te akarongo kua kite e ko te au maunu e te au manako o teianei ao te tau ra ei “pikikaa puapinga kore.” (Kolosa 2:8) “Kua mamae maata au e te ngakau mamae oki ma te kore anga ta Iehova ra arataki anga,” ta tetai vaine ou i tuatua tei akaruke ra i te akaaerenga a te Atua no tetai taime. “I tauta au kia o atu ki teianei ao, inara no te mea kare au i aite tikai kia etai ke ra, kua kopae ke ratou iaku. Kua manako ngakau au mei tetai tamaiti kua ngaro ra tei umuumu ra i tetai metua kia arataki iaku. I reira au i kite ei e ko Iehova taku e umuumu ra. Kare roa au i anoano akaou kia noo takake iaia i muri akera.” Kua riro te tamaiti kaimoumou i ta Iesu akatutu anga ra kia aiteite te kite anga.

Rako Tangata Maira Taua Tamaiti Kaimoumou Ra

12, 13. Eaa te au tika tei tauturu ra i tetai papaki i teia tuatau nei kia rako tangata mai? (Akara i te pia.)

¹² “E rako tangata maira aia, kua na ko akera aia. E manganui to taku metua tavini i ouia ra, e kai maata ta ratou e te toe ra tetai pae, e te mate nei au i te pongi! E tu au e aere ki taku metua ra, e karanga atu au kiaia, E taku metua, kua ara au i Tei te rangi ra, e ia koe katoa oki. E kare atura e tau kia tuatuaia au e, e tamaiti naau: e akariro koe iaku mei tetai i te au tavini ou noou nei. Kua tu akera aia, aere atura ki tona metua.”​—Luka 15:17-20.

¹³ “E rako tangata maira” taua tamaiti kaimoumou ra. No tetai tuatau, kua rave ana aia i te kimianga marekaanga, mei te mea rai e tei roto i tetai ao moemoea. Inara i teianei kua kite tikai aia i tona turanga tika i te pae vaerua. Ae, noatu rai e kua topa aia, te vaira tetai manakonako anga no teianei tangata ou. Ka kitea tetai apinga meitaki i roto iaia. (Maseli 24:16; akaaite ia 2 Paraleipomeno 19:2, 3.) Ka peea oki te aronga akaruke i te anana a te Atua ra i teia tuatau nei? Ka tau ainei kia manakoia e kua mamao roa ratou katoatoa i te manakonako anga, e i te au tu ravarai kua akapapu ta ratou ravenga meameaau e kua akakino ratou i te vaerua tapu o te Atua ra? (Mataio 12:31, 32) Kare i pera. Kua tamamaeia tetai papaki o ratou na to ratou aerenga tau kore, e i muri iora e manganui o ratou kua rako tangata maira. “Kare ua au i akangaropoina ia Iehova no tetai ra okotai,” ta tetai tuaine i tuatua, i te akamanakoanga i te tuatau akapou taka ke mei te akaaerenga a te Atua. “Kua pure tamou au e na tetai tu, a tetai ra, ka ariki akaou mai aia iaku ki roto i te tuatua mou.”​—Salamo 119:176.

14. Eaa te iki anga ta te tamaiti kaimoumou ra i rave, e i akapeea tana akaari anga i te tu akaaka i te raveanga i te reira?

¹⁴ Inara eaa ta te aronga tei aere ke ra te ka rauka kia rave no to ratou turanga? I te parapore a Iesu kua iki te tamaiti kaimoumou ra kia oki ki te kainga e kia pati no te akakore anga ara a tona metua. “E akariro koe iaku mei tetai i te au tavini ou noou nei,” ta te tamaiti kaimoumou ra ia i akatika kia tuatua. Ko tetai tavini ou e tangata rave angaanga i te ra taki tai te ka rauka kia akamutuia i te akakite anga i te ra okotai ua. E akaaka io teia i tetai tavini tei aite ra tona tu, mei tetai mema o te ngutuare tangata ra. No reira kare taua tamaiti kaimoumou ra i manako e kia pati atu kia akaokiia aia ki tona turanga mua ra ei tetai tamaiti. Kua mareka ua aia kia ariki i te turanga akaaka rava e raukai i te akapapu i tona tiratiratu akaouia ra ki tona metua i tera ra i tera ra. Inara, kua tomo atu taua tamaiti kaimoumou ra no tetai poitirere anga.

Tetai Turou Anga Akapumaana Ngakau

15-17. (a) Eaa ta te metua ra i rave i te akaraanga atu i tana tamaiti? (e) Eaa te akakiteia maira e te kakau, te tapeka, e te tamaka oki ta te metua i oronga ra no tana tamaiti? (ng) Eaa te akakiteia maira na te akanoonoo anga a te metua ra i tetai kaikai anga?

¹⁵ “E tei te ngai mamao rai aia, kua akara maira tona metua iaia, aroa maira, oro maira, takave maira i runga i tona kaki, kua ongi maira iaia. Kua karanga atura taua tamaiti ra kiaia, E taku metua, kua ara au i Tei te rangi ra, e ia koe katoa oki, e kare atura e tau kia tuatuaia au e, e tamaiti naau. Kua karanga atura ra te metua ki tona au tavini ra, Apai mai ana i te kakau pu meitaki ra, e akakakau mai iaia nei, e momono i tetai tapeka ki tona rima, e aao oki te tamaka ki tona vaevae. E tiki oki i te punua puakatoro akaangai ra e ko; kia kaikai tatou, e kia rekareka oki: Ko taku tamaiti nei oki, i mate ana, e kua ora mai nei; i ngaro ana, e kua kitea mai nei. Rekareka atura ratou.”​—Luka 15:20-24.

¹⁶ Tetai ua atu metua aroa ka anoano ra kia ora mai tana tamaiti i te pae vaerua. No reira, ka rauka ua ia tatou kia tamanako i te metua o taua tamaiti kaimoumou ra i te akaraanga i te arataa i mua i tona ngutuare i te au ra taki tai katoa, ma te manakoanga apiapi no te okianga mai tana tamaiti. I teianei kua kite atu aia i tana tamaiti te aere maira i te arataa! Kare e ekokoanga kua manga tuke te akara anga o taua tamaiti ra. Inara, kua kite atu tona metua iaia “e tei te ngai mamao rai” aia. Kua kite aia kia mamao ke atu i tona au kakau veruveru ra e tona vaerua apikepike ra; kua kite atu aia i tana tamaiti, e kua oro atura aia kia aravei iaia!

¹⁷ I te itae anga te metua ki tana tamaiti, kua takave maira i runga i tona kaki e kua ongi aroa atura iaia. I reira kua akaue atura ki tona au tavini kia oronga i tetai kakau no tana tamaiti, i tetai tapeka no tona rima, e te tamaka oki. Kare te kakau i tetai kakau ua nei, mari ra “ko te kakau pu meitaki”​—penei ko tetai tei akamanea meitakiia no te tu orongaia ra ki tetai manuiri ngateitei. I te mea kare te tapeka rima e nga tamaka i te mea kiteaia i te au tavini ra, te akataka maira te metua kia marama e te turouia ra tana tamaiti ei tetai mema tikai no tona ngutuare. Inara e maata atu ta te metua ra i rave. Kua ikuiku aia kia akonoia tetai kaikai anga ei akakite i te oki anga mai o tana tamaiti. Te taka meitaki ra e kare teianei tangata e akakore ana i te ara a tana tamaiti ma te reka kore me kare no te oki ua mai anga tana tamaiti; kua anoano tikai aia kia oronga i te akakore anga ara. Kua akariro te reira kia rekareka aia.

18, 19. (a) Eaa ta te parapore no te tamaiti kaimoumou ra i apii mai ia koe no Iehova? (e) Mei tei akaariia maira i tana akonoanga ma Iuda e Ierusalema ra, akapeea ta Iehova ra ‘tapapa anga’ no te oki mai anga tei ara ra?

¹⁸ I teianei, eaa ta te parapore no te tamaiti kaimoumou ra i apii mai kia tatou no te Atua ta tatou e mareka nei kia akamori? Te mea mua, e ko Iehova e “takinga-meitaki, e te aroa ua, e te akakoromaki maata, e te meitaki maata, e te tuatua-mou.” (Exodo 34:6) E tika, ko te aroa ua tetai tu maata ia o te Atua ra. Ko tona tu matauia ia no te akonoanga i te aronga e umuumu anga to ratou ra. I reira, kua apii mai ta Iesu ra parapore ia tatou e kia tika ia Iehova “i te akakore mai i te ara nei.” (Salamo 86:5) Mei te mea rai e te akara matakite maira aia, kia kite i tetai ua atu taui anga o te ngakau i te tuanga o te au tangata ara nei te ka oronga mai i tetai tumu anga nona kia akatotoa mai i te aroa.​—2 Paraleipomeno 12:12; 16:9.

¹⁹ Ei akatauanga, e tamanako ana i ta te Atua ra au akonoanga ma to Iseraela. Kua akauruia e Iehova te peroveta ko Isaia kia akataka ia Iuda e Ierusalema ei aronga ‘makiia mei te upoko tae ua atu ki te tapuae.’ Inara, kua tuatua katoa aia: “E tapapa rā Iehova, kia takinga-meitaki aia ia kotou, e e tu aia ki runga kia aroa aia ia kotou.” (Isaia 1:5, 6; 30:18; 55:7; Ezekiela 33:11) Mei te metua i te parapore a Iesu ra, mei te mea rai e te ‘akara maira Iehova i te arataa.’ Te manako maata maira aia i te oki mai anga o tetai ua atu tei akaruke ra i tona ngutuare. Kare ainei teianei i ta tatou te ka manakonako atu no tetai metua aroa ra?​—Salamo 103:13.

20, 21. (a) Na teea tu te akakeu anga i te aronga e manganui i teia tuatau nei kia akavaitataia mai e to te Atua ra aroa ua? (e) Eaa te ka uriuri manakoia i te atikara te aru maira?

²⁰ I te au mataiti taki tai, te akakeu ra te aroa ua o Iehova i te aronga e manganui kia rako tangata mai e kia oki mai oki ki te akamori mou. Mei teaa ra te rekareka ta teianei te apai maira ki ta ratou aronga akaperepere! Ei akatauanga, e tamanako ana i te metua Kerititiano tei taikuia ra i te akamata anga mai. E mea mataora, kua ora akaou mai tana tamaine i te pae vaerua e te tavini ra i teianei ei tetai orometua i te au tuatau ravarai. “Te mataora nei au mei tei rauka ra i tetai tangata ke atu i teianei akatereanga taito o te au mea nei,” tana i tuatua. “Kua tauiia toku au roi-mata mii ki te au roi mata rekareka anga.” E mea tika tikai, te rekareka katoa maira Iehova!​—Maseli 27:11.

²¹ Inara e maata atu te vai maira ki te parapore no te tamaiti kaimoumou ra. Kua rave ua atu a Iesu i tana tua kia raukai iaia te akakite i te tuke anga o to Iehova ra aroa ua ma te turanga ketaketa e te akava anga matauia i roto i te aronga tata tuatua e te au Pharisea ra. I akapeea tana rave anga i te reira​—e eaa oki te aite anga o teianei no tatou​—ka uriuri manakoia ki roto i te atikara te ka aru mai.

[Au Tataanga Rikiriki i Raro]

E Akara Akaou Anga

◻ Akapeea te tuke anga o to Iesu tu manako ki te aroa ua ma to te au Pharisea ra?

◻ Koai ma i teia tuatau nei te akatutu maira i te tamaiti kaimoumou, e naea ra?

◻ Eaa te au turanga tei apai maira i te tamaiti kaimoumou kia rako tangata mai?

◻ Akapeea ta te metua ra akaarianga i te aroa ua ki tana tamaiti tataraara ra?

[Pia i te kapi 11]

KUA RAKO TANGATA MAIRA RATOU

Eaa tei tauturu i tetai papaki tei akaateaia ki vao i te putuputuanga Kerititiano kia rako tangata mai ratou? Te akakite marama mai nei te au tuatua te aru mai nei no taua tumu ra.

“I roto i toku ngakau te kite ua ra au e teiea te tuatua mou. Te au mataiti i apiiai i te Pipiria e te aereanga ki te au uipaanga Kerititiano kua akariro i tetai tupu anga maata kiaku. Akapeea e raukai iaku kia akaariu roa atu i toku mokotua kia Iehova? Kare koia tei akaruke mai iaku; ko au ra tei akaruke iaia. I te openga, kua akatika au e kua tarevake e kua marokiakia au e te tika ua ra te Tuatua a Iehova i tera taime katoa​—‘ka kokoti koe i taau ka ruru.’”​—C.W.

“Kua akamata taku pepe tamaine i te tuatua, e kua akatuki te reira i toku ngakau i te mea kua anoano au kia apii iaia i te au apinga e koai a Iehova e akapeea te pure kiaia ra. Kua kore au e moe, e kua roa i tetai po kua akaoro atu au ki tetai paka e kua aue ua. Kua aue au, e kua pure kia Iehova no te taime mua i tetai tuatau roa. Ko taku ua tei kite e te anoano akaou ra au ia Iehova ki roto i toku oraanga, e kua manakonako au kia akakore mai aia iaku.”​—G.H.

“Me tu mai te tumu no te akonoanga, kua akakite au ki te au tangata e me naku e iki te akonoanga tei apii ra i te tuatua mou, ka riro rai au ei tetai o te Au Kite o Iehova ra. I reira, kua tuatua au e ko au tetai o ratou ra, inara kare i rauka iaku te akono i te reira, no reira kua akaruke au. I te kite anga i teia, e putuputu au i te manako ngakau akaapa e te mataora kore oki. I te openga kua akatika au e, ‘Te maromaroa ra au. Ka tau au kia rave i etai au tauianga maata.’”​—C.N.

“I te toru ngauru ma rima mataiti kua topa kua akaateaia maua ko taku tane. I reira i te 1991, kua rokoia kia maua tetai poitirere anga mareka i te aravei angaia mai e nga tangata pakari e rua tei akakite maira kia maua e ka rauka ua te oki akaouanga kia Iehova ra. E ono marama i muri iora, kua rekareka maata maua no tei akaoki akaouia ki roto. Ko maua ko taku tane e 79 e te 63 mataiti, o tetai e tetai.”​—C.A.