E Angera Tiaki Ainei Toou?

TE IRINAKI ra ainei koe e e angera tiaki toou? E manganui te tangata te manako akapera ra. No te reira manako, kua tuatua ia e e apinga takake ta tetai vaine i Kanata opunga no runga i te au angera. Me oronga koe kiaia i toou ingoa katoa e te $200, kua tuatua aia e ka rauka iaia i te akaaravei ia koe ki toou angera tiaki. Te mea mua, ka manakonako aia na te akara tika anga i te ai o te kanara. Aru mai, e orama tana e i roto i te reira te oronga maira toou angera tiaki i tetai tuatua kiaia kia oronga atu kia koe. E pera katoa, ka oronga mai te vaine i tetai tutu e mei teaa rai te akara anga o toou angera.

Ki tetai, penei te aiteite ra teia ki te tua no runga i te ariki Varani ko Louis IX. Kua oko aia tei tamanakoia i te au uruuru oko maata tei tuatuaia e kua topa mai mei te au peau o te Angera Maata ko Mikaela. Koi uiui iai te reira tua, e manganui tei kore i ekoko i te tuatua a te vaine Kanata ra.

Kua Umere i te Au Angera

I te au mataiti i ou ake nei kua maata te inangaro no te au angera. I roto i te tivi e te au teata, te au puka, te au makatini, e te au nuti reta, te akakiteia maira kia tatou no te au angera te akapumaana ra i tei maki tikai, te akapumaana ra i tei mamae ra, te oronga ra i te pakari, e te opu ra i te tangata tataki tai mei te matenga. I Marike, vaitata rai e 20 mirioni aronga akara te akarakara ra i te au teata tivi i te epetoma te akatutu maira i te angera e akao maira ki roto i te au oraanga o te tangata. Kua akapapa tetai toa oko puka e tere atu i te 400 puka te tuatua ra no runga i te au angera.

Kua akakite tetai puka i ou ake nei i te au kite anga e akapeea te au angera tiaki i te akaora anga i te au oraanga o te au vaeau i te ngai tamaki anga. Te akakite ra te au pepa tapipiri i runga i te motoka e te paruruia ra te aronga akaoro e te au angera tiaki. Te akamaata ra te au akaaerenga, te au uipaanga, e te au apii anga i te apii i te au angera e te tuatuaia ra e te tauturu ra i te tangata kia komunikeiti kia ratou.

E vaine tata a Eileen Freeman no tetai puka e toru no runga i te au angera e kua akapou taime te aronga nenei o tetai tianara ki te reira tikai. Kua karanga aia e: “Te irinaki nei au i te au angera ravarai i runga i te rangi te vaira te angera tiaki i runga i te Enua, e peretana ko tana angaanga kare e kia akapaapaa ua i te Atua i te ngai rangi ra pera katoa i te akono anga i te au tangata e tetai atu mea ora i te Enua. Kua tukunaia mai tetai angera tiaki kia tatou tataki tai i te toangaia mai tatou e ka akara mai ia tatou ia tatou e maata maira i roto i te kopu, na roto i to tatou anau anga mai, na roto i to tatou oraanga i te ao, tae roa atu i te tiaki anga te angera ia tatou mei te au arai anga o teianei ao ki roto i te kaka anga o te rangi.” Te akataka tau nei teia i te au manako matauia o te au angera tiaki.

I roto i teia au tuatau taitaia e te ngata, e mea pumaana i te irinaki e e angera tiaki to tatou, ko tana angaanga koia oki kia paruru ia tatou. Eaa ra ta te Atua Tuatua, te Pipiria, e tuatua ra no teia? Ka tauta ainei tatou i te aravei atu i te au angera? Te manako maira ainei ratou i to tatou au turanga akono e te au irinaki anga akonoanga? Eaa te tauturu ka rauka ia tatou mei ia ratou? Ka paunaia teia au ui anga i roto i te atikara ka aru mai.