Aaereanga ma te Atua—Te Au Takainga Mua

“E akavaitata atu ki te Atua, e nana e akavaitata mai kia kotou na.”​—IAKOBO 4:8.

1, 2. Eaa koe ka tuatuai e ko tetai angaanga tika maata ia kia tavini atu ia Iehova ra?

KUA mamae te tangata i roto i te are tapeka anga no etai mataiti. Ei reira kua patiia mai aia kia mama atu ki mua i te tutara o taua enua ra. Kua aere viviki ua te au tupu anga. E poitirere ua, kua kite taua mou auri ra iaia uaorai i te tavini anga no te ariki mana ririnui maata roa i reira i runga i te enua nei. Kua tukuia taua mou auri ra ki roto i tetai turanga no te apainga maata e te ngateitei rava oki. Ko Iosepha​—koia tetai tangata tei tapekaia ra tona nga vaevae i tetai tuatau ma te au tapeka ra​—i teianei kua aaere ma tetai ariki!​—Genese 41:14, 39-43; Salamo 105:17, 18.

² I teia tuatau nei, kua rauka i te au tangata te tika kia rave i te tavini anga no tetai tei maata roa atu ia Pharao o Aiphiti ra. Te pati maira Tei Teitei Rava o te ao katoa e pini ua ake ia tatou katoatoa kia tavini atu iaia ra. Mei teaa ra tetai tika memeitaki rava te reira kia rave e kia tatanu oki i tetai pirianga vaitata ma Iehova, koia te Atua Mana katoatoa ra! I roto i te au Tuatua Tapu ra, te mana ngateitei e te mekameka pera katoa oki te au, te manea, e te mareka anga te taokotaiia atura ma ia katoa. (Ezekiela 1:26-28; Apokalupo 4:1-3) Te koropini ra te aroa i tana au akonoanga katoatoa. (1 Ioane 4:8) Kare rava aia e pikikaa. (Numero 23:19) E kare katoa oki a Iehova e akareka kore i te aronga tiratiratu kiaia ra. (Salamo 18:25) Na te akonoanga i tana au umuumu anga tuatua tika, ka rauka kia rekareka tatou i te au oraanga mataora i teianei, ma te manakonakoanga i te oraanga mutu kore. (Ioane 17:3) Kare e tutara tangata te oronga ra i tetai ua atu apinga tei mamao ke atu te aite anga ki taua au akameitaki anga e te au tika orongaia mai oki.

3. Na roto i teea tu to Noa ra ‘aaere anga ma te Atua mou ra’?

³ I te tuatau roa kua topa, kua tamanako te pateriareka ko Noa kia akono kia rotai ma to te Atua ra anoano e tana akakoro anga oki. Kua tuatua te Pipiria nona e: “E tangata tuatua-tika a Noa, e te apa kore i tona uki, e kua aaere a Noa raua ko te Atua.” (Genese 6:9) Inara, kare a Noa i aaere tikai ma Iehova, no te mea “kare ua e tangata i kite i te Atua.” (Ioane 1:18) Kareka ra, kua aaere a Noa ma te Atua i te mea kua rave aia i ta te Atua ra i akaue atu kiaia kia rave. No te mea kua akono a Noa i tona oraanga kia rave i to Iehova anoano, kua rekareka aia i tetai pirianga vaitata e te maanaana ma te Atua Mana Katoatoa ra. Mei ia Noa rai, e au mirioni ua atu te ‘aaere ra ma te Atua’ na te akonoanga kia rotai ma ta Iehova ra akoanga e te apiianga oki. Akapeea tetai tangata i te akamata anga i taua aerenga ra?

Te Anoanoia ra te Kite Tika

4. Akapeea ta Iehova ra apiianga i tona au tangata?

⁴ Kia aaere ma Iehova ra, ka tau tatou kia kite iaia na mua. Kua akakite mai te peroveta ko Isaia: “E riro kia tae ki te au rā openga ra, e akatinamouiaʼi te maunga ra o te are o Iehova ki runga i te take o te au maunga ra; e akateiteiia ïa ki rungao i te au tuaivi ra; e putuputu ua mairai te au etene katoa ra ki reira. E manganui te tangata e aere ma te tuatua e, Aere mai, ka aere tatou ki runga i te maunga o Iehova, ki te are o te Atua o Iakoba; e nana e apii mai ia tatou i tona au aerenga; e ka aere tatou na tona ra au arataa. I na Ziona atu oki te ture i te riro anga atu, e te tuatua a Iehova i na Ierusalema atu ïa.” (Isaia 2:2, 3) Ae, ka rauka ia tatou kia irinaki e ka apii mai a Iehova i te aronga katoatoa te kimi ra kia aaere i tona au arataa. Kua oronga mai a Iehova i tana Tuatua, koia te Pipiria, e te tauturu maira aia ia tatou kia kite i te reira. Tetai mataara tana e rave ra i te reira e na roto i “te tavini akono meitaki e te pakari.” (Mataio 24:45-47) Te taangaanga ra a Iehova i ‘te tavini akono meitaki’ kia oronga mai i te apiianga pae vaerua na te au puka akatumuia i te Pipiria, te au uipaanga Kerititiano, e te akanoonoo anga apii Pipiria tutaki koreia i te ngutuare. Te tauturu katoa maira te Atua i tona au tangata kia kite i tana Tuatua na roto i tona vaerua tapu.​—1 Korinetia 2:10-16.

5. Eaa ra te tuatua mou o te Tuatua Tapu i oko maatai?

⁵ Noatu rai e kare tatou e tutaki moni ana no te tuatua mou Pipiria, e apinga oko maata ia. Ia tatou e apii ra i te Tuatua a te Atua, te apii ra tatou no te Atua uaorai​—i tona ingoa, i tona uaorai tu, i tana akakoro anga, e te tu o tana akono anga i te au tangata nei. Ka kite katoa tatou i te au pauanga akamataraanga i te au uianga tumu i te oraanga: Eaa tatou i tae mai ei ki konei? Eaa te Atua i tuku ei kia tupu te mamaeanga? Eaa ta te tuatau ki mua e mou maira? Eaa ra tatou ka ruaine ei e ka mate atu ei? E oraanga ainei tetai i muri ake i te matenga? Pera katoa, ka kite tatou eaa to te Atua ra anoano no tatou, koia oki, akapeea tatou me aaere kia akamareka tikai iaia. Ka kite tatou e e tau tana au umuumu anga e te puapinga meitaki ra me ka akono tatou ia ratou. Me kare ta te Atua ra apiianga, kare rava tatou e kite i taua au apinga ra.

6. Eaa te aerenga ta te kite tika i te Pipiria e rauka ra ia tatou kia aruaru?

⁶ E mana ririnui te tuatua mou o te Pipiria ra e te akakeu ra ia tatou kia rave taui anga i to tatou au oraanga. (Ebera 4:12) I mua ake i te tauruanga i te kite i te au Tuatua Tapu ki roto i to tatou manako, ka rauka anake ia tatou te aerenga na “to teianei ao ra.” (Ephesia 2:2) Inara na te kite tika i te Tuatua a te Atua ra e akapapa mai tetai aerenga tuke no tatou e raukai “kia tau to [tatou] aerenga i te Atu i te au mea katoa e mareka mai ei ra.” (Kolosa 1:10) Mei teaa ra te rekareka anga kia rave i ta tatou nga takainga mua ra i te aaereanga ma Iehova, koia te Peretana maata rava i te ao katoa e pini ua ake!​—Luka 11:28.

Nga Takainga Puapinga Maata e Rua​—Te Akatapu Anga e te Papetito Anga

7. Ia tatou e apii ra i te Tuatua a te Atua, eaa te tuatua mou no te aratakianga a te tangata nei ka kiteia e tatou?

⁷ Me tupu to tatou kiteanga i te Pipiria, ka akamata tatou i te akara matatio i te au akatereanga a te tangata e to tatou uaorai au oraanga i te marama pae vaerua o te Tuatua a te Atua ra. Ka kiteaia tetai tuatua mou puapinga maata i reira. Kua akakiteia mai taua tuatua mou ra e te peroveta ko Ieremia i te tuatau roa kua topa, i tana tataanga: “Kua kite oki au, e Iehova e, e kare tei te tangata uaorai tona aerenga: kare tei te tangata e aere nei, i te akono i tona uaorai takainga tapuae.” (Ieremia 10:23) Te au tangata​—tatou pouroa​—te umuumu ra i ta te Atua arataki anga.

8. (a) Na teaa e akakeu i te au tangata kia rave akatapu anga ki te Atua ra? (e) Eaa te akatapu anga Kerititiano ra?

⁸ Na te kiteanga i teianei tika puapinga maata ka akakeu ra ia tatou kia kimi i te arataki anga mei ko mai ia Iehova ra. E na te aroa no te Atua ra e akakeu ia tatou kia akatapu i to tatou oraanga kiaia. Te aite anga o te akatapu anga ki te Atua koia oki kia akavaitata atu kiaia na roto i te pure e kia taputou mou kia taangaanga i to tatou oraanga kia tavini atu kiaia e kia aaere na roto i tona au aerenga tiratiratu. I te raveanga i teia, ka aru tatou i te akatauanga a Iesu, tei oronga ra iaia uaorai kia Iehova ma te manako anga ngaueue kore kia rave i te anoano tu-Atua ra.​—Ebera 10:7.

9. Eaa ra te aronga tataki tai i akatapu ei i to ratou oraanga kia Iehova?

⁹ Kare rava te Atua ko Iehova e taomi me kare e opara oki i tetai ua atu kia rave i te akatapu anga kiaia. (Akaaite ia 2 Korinetia 9:7.) Pera katoa oki, kare te Atua e manako mai i tetai kia akatapu i tona oraanga ki Aia no tetai manako ngakau poto ua. I mua ake ka papetitoiai, ka tika tetai tangata kia riro ei pipi na mua, e te umuumuia ra tetai tauta anga pakari kia apii kia kite meitaki. (Mataio 28:19, 20) Kua pati a Paulo i te aronga kua oti ke ra i te papetitoia ‘kia tuku atu ratou i to ratou au kopapa ei atinga ora, e te tapu, e tau oki i te Atua, ko te akamori e tau ïa ia ratou.’ (Roma 12:1) Na tetai akono anga aiteite oki tei tau ra ia tatou e raukai ia tatou kia rave i tetai akatapu anga ki te Atua ra kia Iehova. I muri ake i te apii anga e eaa te o atura e te manakoanga matakite i taua tumu ra, ka akatapu mareka ua tatou e te rekareka oki i to tatou oraanga ki te Atua ra.​—Salamo 110:3.

10. Eaa te pirianga o te akatapu anga ki te Papetito anga?

¹⁰ I muri ake i te akavaitataanga muna ua ki te Atua na roto i te pure kia akakite i to tatou manako anga kia aaere i tona au aerenga, ka rave tatou i tetai atu takainga tapuae ra. Ka akakite tatou i to tatou akatapu anga ki te au tangata na to tatou papetito anga i te vai. E akakite anga teia i te ngai tangata ra e kua tia tatou kia rave i to te Atua ra anoano. I te akamata anga tana angaanga orometua i te enua nei, kua papetitoia a Iesu e Ioane, na te reira te akanooanga i tetai akatauanga no tatou. (Mataio 3:13-17) I muri iora, kua akaue a Iesu i tana au pipi kia akariro te au tangata ei pipi e kia papetito oki ia ratou. No reira, ko te akatapu anga e te papetito anga ko nga takainga tapuae anoanoia ia no etai ua atu tei anoano ra kia aaere ma Iehova.

11, 12. (a) Penei akapeea te akaaite atu anga i te papetito anga ki tetai akaipoipo anga ra? (e) Eaa te tu aiteite ka rauka kia akatutuia i rotopu i to tatou pirianga ma Iehova e to rotopu i tetai tane e te vaine ra?

¹¹ Ko te riroanga ei tetai pipi akatapuia, e tei papetitoia na Iesu Karaiti te aiteite ra i tetai tu ki te akaipoipo angaia. I te au enua e manganui, te na mua ra etai au takainga tapuae i te ra akaipoipoanga. Ka aravei tetai tangata e tetai vaine, e ka akamatau tetai i tetai, e ka inangaro ia raua uaorai. I muri akera ka momokia. Na te akaipoipoanga e akakite ki te au tangata e eaa tei ikiia ra na te tu muna​—kia tomo atu ki te pirianga akaipoipo e ei reira ka noo kapiti ei ei tane e te vaine. Na te akaipoipoanga e akairo ki te au tangata ra te akamataanga o taua pirianga takake ra. Na taua ra ra e akairo i te akamataanga o taua akaipoipo anga ra. Pera katoa oki, na te papetito anga e akairo i te akamata anga o tetai oraanga tei akatapu ra ki te aaereanga i roto i tetai pirianga akatapuia ma Iehova ra.

¹² E akamanako ana i tetai atu tu aiteite. I muri ake i to raua ra akaipoipoanga, ka tau kia oonu atu e kia pakari atu oki te aroa i rotopu i te tane e te vaine ra. Kia akapiri vaitata rava atu tetai ki tetai, ka tau nga tokorua akaipoipo ra kia tauta noinoi kore kia tamou marie e kia akamaroiroi oki i to raua pirianga akaipoipo anga. Noatu rai e kare tatou e tomo atu ki tetai pirianga akaipoipo ma te Atua ra, i muri ake i to tatou papetito angaia ka tika tatou kia akono kia tamou marie tetai pirianga vaitata ma Iehova ra. Te akara ra aia e te ariki ra i ta tatou au tauta anga kia rave i tona anoano e ka akavaitata mai oki kia tatou. “E akavaitata atu ki te Atua,” ta te pipi ko Iakobo i tata, “e nana e akavaitata mai kia kotou na.”​—Iakobo 4:8.

Aaereanga i to Iesu Au Tapuae

13. I te aaereanga ma te Atua ra, naai te akatauanga ta tatou te ka aru?

¹³ Kia aaere ma Iehova, ka tika tatou kia aru i te akatauanga tei akanooia mai e Iesu Karaiti. Kua tata te apotetoro ko Petero: “I kapikiiaʼi oki kotou; i mate katoa oki te Mesia uaorai no kotou; e kua vaoo oki i te akaraanga na kotou, kia aru kotou i tona takainga vaevae.” (1 Petero 2:21) I te mea e apa kore ua a Iesu e ko tatou e apa ua, kare e rauka ia tatou kia aru tikatika ua i te akaraanga tana i akanoo maira. Tera ra, te manako maira Iehova ia tatou kia rave i te meitaki te ka rauka ia tatou. E akamanako tatou i nga tuanga e rima o to Iesu ra oraanga e tana angaanga orometua oki ta te au Kerititiano akatapuia te ka tau kia tauta i te aru.

14. Eaa te o atura ki te kiteanga i te Tuatua a te Atua?

¹⁴ E kite tika e te taka meitaki oki to Iesu i te Tuatua a te Atua ra. I te tuatau o tana angaanga orometua ra, e putuputu tana taiku anga mai i te au Tuatua Tapu Epera. (Luka 4:4, 8) Inara, kua taiku katoa mai oki te aronga arataki akonoanga rave kino o taua tuatau ra mei te au Tuatua Tapu ra. (Mataio 22:23, 24) Ko te tuke anga koia oki kua kite a Iesu eaa te aite anga o taua au Tuatua Tapu ra, e kua akono i te reira i tona oraanga. Kare e kua kite anake aia i te aite anga o te Ture ra mari ra kua kite katoa oki i te vaerua o te reira. Ia tatou e aru nei i te akaraanga a Karaiti, ka tau katoa oki tatou kia tauta kia kite tika i te Tuatua a te Atua ra, kia marama i te aiteanga, me kare te vaerua, o te reira. Na te raveanga i te reira, ka riro tatou ei aronga rave angaanga tu-Atua tei marekaia tei rauka ra kia ‘tika oki i te tua i te tuatua-mou ra.’​—2 Timoteo 2:15.

15. Akapeea ta Iesu akanoo akatauanga i te tuatua anga no te Atua?

¹⁵ Kua tuatua a Iesu Karaiti ki etai ke ra no tona Metua i te rangi ra. Kare a Iesu i kaipenu i tona kite i te Tuatua a te Atua ra kiaia anake ua. Noatu rai ko tona au enemi kua tuatua iaia ei “Orometua,” no te mea i te au ngai ravarai tana i aere kua tuatua atu aia kia etai ke ra no Iehova e Tona au akakoro anga oki. (Mataio 12:38) Kua tutu aere a Iesu i te ngai tangata i roto i te iero, i roto i te au tunako, i te au oire, e te ngai i uta. (Mareko 1:39; Luka 8:1; Ioane 18:20) Kua apii aia ma te tu aroa e te takinga meitaki, i te akaarianga aroa no te aronga tana i tauturu atura. (Mataio 4:23) Ko te aronga katoa oki tei aru i ta Iesu ra akatauanga kua kite e manganui te au ngai e te au ravenga kia apii atu ia etai ke ra no te Atua ko Iehova e tana au akakoro anga umere ra.

16. Akapeea te vaitata o te pirianga o Iesu ma tona au oa akamori ia Iehova ra?

¹⁶ Kua kite a Iesu i tetai tapekaanga piri vaitata ma etai atu tei akamori ra ia Iehova. Ia Iesu e tuatua atura ki te aronga tini i tetai atianga, kua aere maira tona metua vaine e tona ai taeake akarongo kore ra kia tuatua atu kiaia. Te akakite maira te tataanga Pipiria e: “Kua karanga atura tetai kiaia, I na, te tu ua maira to metua vaine e to ai taeake ki vao, te inangaro i te tuatua mai kia koe. Kua tuatua maira aia ki tei tuatua mai kiaia ra, na ko maira, Koai taku metua vaine? Koai oki toku ai taeake? Kua tou atura tona rima ki tana aronga pipi, na ko maira, I na, taku metua vaine, e toku ai taeake! Te akono i te inangaro o taku Metua i te ao ra, ko toku ïa taeake, taku tuaine, e taku metua vaine.” (Mataio 12:47-50) Kare te aite anga o teia e kua kopae ke a Iesu i tona pamiri, no te mea kua akakite mai etai atu tupu anga e kare aia i rave akapera. (Ioane 19:25-27) Inara, kua akaketaketa mai teia tataanga i to Iesu ra inangaro no tona au taeake akarongo. Mei te reira katoa i teia tuatau nei, te aronga te aaere ra ma te Atua ka kimi i te akaoa anga ma etai atu au tavini o Iehova e ka tupu ake kia inangaro akaperepere ia ratou ra.​—1 Petero 4:8.

17. Eaa to Iesu ra manako ngakau no te raveanga i te anoano o tona Metua i te rangi ra, e eaa ta te reira ka tau kia akatupu kia tatou?

¹⁷ Na te raveanga i te anoano tu-Atua, kua akaari a Iesu i tona inangaro no tona Metua i te rangi ra. Kua akarongo a Iesu ia Iehova i te au mea ravarai. Kua na ko maira aia: “Teia taku kai, ko te akono i tona anoano, to tei tono mai iaku ra, ma te akaoti i tana angaanga.” (Ioane 4:34) Kua tuatua katoa Karaiti: “Kare oki au i tukumoe i te rave i te mea e mareka mai ei [te Atua].” (Ioane 8:29) Kua aroa maata a Iesu i tona Metua i te rangi ra e “kua taakaaka iaia uaorai i te akonoanga e tae ua atu ki te mate, ki te mate satauro ra.” (Philipi 2:8) No reira, kua akameitaki a Iehova ia Iesu, ma te akateiteianga iaia ki tetai turanga mana e te ngateitei i raro anake aia ia Iehova uaorai ra. (Philipi 2:9-11) Mei ia Iesu rai, ka akaari tatou i to tatou inangaro no te Atua ra na te akonoanga i tana au akauenga e na te raveanga i tona anoano.​—1 Ioane 5:3.

18. Na roto i teea tu ta Iesu ra akanoo anga i tetai akatauanga i te tumu no te pure ra?

¹⁸ E tangata pure a Iesu. Kua pure aia i tona papetito anga. (Luka 3:21) I mua ake i te ikianga i tana au apotetoro e 12 ra, kua rave aia i te pure anga i taua po roa katoa ra. (Luka 6:12, 13) Kua apii a Iesu i tana au pipi e akapeea me pure. (Luka 11:1-4) I te po i mua ake i tona matenga, kua pure aia no tana au pipi e ma ratou katoa oki. (Ioane 17:1-26) Ko te pure tetai tuanga puapinga maata i to Iesu ra oraanga, mei tei tau katoa ra oki te reira i to tatou oraanga, i te mea e au pipi tatou nana. Mei teaa ra tetai akangateitei anga te reira kia tuatua atu ki Tei Ngateitei i te Ao Katoa e Pini Ua Ake na roto i te pure anga! Pera katoa oki, te pau maira Iehova i te au pure, no te mea kua tata a Ioane: “Teia taua taitaia kore no tatou i rauka iaia ra, kia pati ua atu tatou i te au mea ravarai i tau iaia ra, te akarongo maira aia ia tatou: E te kite nei tatou e te akarongo maira aia ia tatou i te au mea ta tatou i pati atu, kua kite tatou e e rauka ia tatou i ta tatou i pati atu iaia ra.”​—1 Ioane 5:14, 15.

19. (a) Eaa te au tu o Iesu ka tau tatou kia aru? (e) I teea au tu e puapingaiai tatou mei te apiianga i te oraanga e te angaanga orometua a Iesu?

¹⁹ E maata ra ta tatou no te apii mei te akara matatioanga i oraanga e te angaanga orometua o Iesu Karaiti i te enua nei! E akaata oki i te au tu tana i akakite maira: te inangaro, te aroa, te takinga meitaki, te maroiroi, te tu tau, e te manako tau, te taakaaka, te mataku kore, e te noinoi kore oki. Te maata atu ta tatou i kite no Iesu, te maata atu ia to tatou anoano kia riro ei au pipi tiratiratu nana. Te akapiri vaitata katoa ra te kite ia Iesu ia tatou kia Iehova ra. No te mea ra, e akaata anga apa kore ua a Iesu no tona Metua i te rangi ra. No tona piri anga vaitata kia Iehova ra e kua rauka iaia kia tuatua: “Ko te akara mai iaku nei, kua akara ïa i te Metua.”​—Ioane 14:9.

E Irinaki i te Atua kia Akamaroiroi ia Tatou

20. Akapeea e raukai ia tatou te irinaki anga i te aaereanga ma te Atua?

²⁰ Me te apii ra te tamariki i te aaere, e ngaueue ua to ratou takainga tapuae. Akapeea ratou i te apii anga kia kite i te aaere ma te irinaki anga? Na te tamata anga e te akakoromaki. No reira, ko te aronga aaere ma Iehova ra ka tauta kia aaere ma te irinaki anga, ngaueue kore. Ka umuumu katoaia te tuatau e te akakoromaki anga no teia. Kua tou mai a Paulo i te puapinga no te akakoromaki anga i te aaereanga ma te Atua ra i tana tata anga: “Te tuatua meitaki atu nei rai matou kia kotou, e te au taeake, e te ako atu nei ia kotou i te Atu ra ia Iesu e, mei ta kotou i kite akenei ia matou i te tu o to kotou aerenga e tau ei i te Atua, kia maata atu rai to kotou akapera anga.”​—1 Tesalonia 4:1.

21. Ia tatou e aaere ra ma Iehova, eaa te meitaki ka rekarekaia e tatou?

²¹ Me te akamori katoa ra tatou i te Atua, ka tauturu aia ia tatou kia aaere ma ia katoa. (Isaia 40:29-31) Kare e apinga ta teianei ao e oronga mai te ka tau kia akaaiteia atu ma te au akameitaki anga tana e oronga maira ki te aronga te aaere ra i tona au aerenga. Ko ia ‘Tei akakite ia tatou i te mea e puapingaiaʼi tatou nei; ko tei arataki ia tatou na te arataa e tau ei kia aere tatou nei. Angairi tatou i akarongo mai ki te au akauenga nana, kua riro ia to tatou au nei te vai taʼe ra; e ta tatou tuatua-tika mei te ngaru moana ra.’ (Isaia 48:17, 18) Na te arikianga i te patianga kia aaere ma te Atua katoa ra e kia tiratiratu oki i te raveanga i te reira, ka rauka kia rekareka tatou i te au ma ia katoa ra e tuatau ua atu.

Akapeea Koe me Pau?

◻ Eaa i riro ei ei tu ngateitei kia aaere ma te Atua mou ra?

◻ Eaa ra te apii, te akatapu anga e te papetito anga i te takainga akamata anga i te aaereanga ma Iehova ra?

◻ Penei ka akapeea tatou i te aru anga i te au takainga tapuae o Iesu ra?

◻ Akapeea tatou i kite ei e ka akamaroiroi mai a Iehova ia tatou ia tatou e aaere ra ma ia katoa?

[Au Tutu i te kapi 13]

Te apii, te akatapu anga, e te papetito anga e au takainga umuumuia i te aaereanga ma te Atua ra