Akakoreia Tetai Keia Anga i Aperika Opunga

Akakiteia e Eunice Ebuh

“Kua paraniia e te aronga keia rave pupui ra ta ratou rave anga no te ra matauia no ta matou Apii Puka Putuputuanga i to matou kainga. Te vai atea ra matou i to matou nga pa no te au taeake e te au tuaine e te aronga inangaro katoa oki. Penei kua kite taua aronga keia ra i ta matou au ravenga e te ora uipaanga. Kua kite tikai matou e kua keiaia e ratou tetai motoka no tetai ngai ke e kua aere mai kia tatari i te pae i to matou pa i te ra e te ora oki no te apiianga puka ra.

“Ko tei rokoia i taua epetoma ra i aere mai ei ratou ko te epetoma ia no te tutaka anga a te akaaere kotinga. Kare i uipa mai ki to matou are, kua uipa atura matou ki te Are Uipaanga Patireia. I muri ake i te uipaanga kua uipa atu te aronga pakari ki reira. Te mea matauia ka oki atu matou ko nga tamariki ki te kainga, inara kua pati mai taku tane, koia ra tetai o te aronga pakari, kia tatari atu matou iaia. Kua karanga aia e kare aia e roa. No reira kua tatari matou.

“I muri akera kua kite matou e kare e taka te matini o te motoka. Kare i rauka i te akaaere kotinga raua ko taku tane te akataka i te reira. Kare katoa oki i rauka i te mekaniki ta matou i pati atu kia akatika i te reira.

“Kua aaere ua atu te tamariki ki te kainga. Ei muri akera kua oki katoa atu au ki te kainga. Kua tae atu au e vaitata i te ora ngauru. Kare au e te tamariki katoa oki i tomo atu ki te kainga na roto i te motoka, no reira kare i umuumuia kia vaiia te pa maata ra.

“I taku tomo anga ki toku pia moe, kua rongo au i tetai pupui, maata te paku anga. Kua kimi toku manako eaa te tupu ra. Kua tauta au i te terepaoni i te akava, mari ra kare te terepaoni i tangi. Kua eke atu au ki te taua i raro e kua roka atu i te ngutupa tomoanga mai e auri ia, i reira kua aere viviki atu au i te roka i te ngutupa i rotopu ra. Kua tamate au i te au mori. Te mataku ra taku tamariki, no reira kua tuatua atu au kia vai maru ua ratou. Kua pure kapiti matou no ta Iehova ra paruru anga. I taua tuatau ra te vai maira taku tane i te Are Uipaanga Patireia i te tautaanga kia akataka i te motoka.

“Kua akara atura au ki vao i te maramarama e kua kite atu au i tetai tangata te takoto ra i te arataa i vao i te pa. I te akara anga kua aere ke atu te aronga keia ra, no reira kua apai au i taua tangata tei taia ra ki roto i toku motoka e kua apai atu iaia ki te are maki. E turanga kino ia, inara kua tau au kia rave i tetai apinga. Inara, e mea mii, kua mate aia i tera mai ra.

“Noatu rai taua tumatetenga ra, penei e kino atu te au tupu anga. No te tutaka a te akaaere kotinga ra no reira kare matou i rave i te apiianga puka i to matou ngutuare. Te kinoanga te matini o te motoka no reira kare matou i aere mai ki te kainga ei tetai ngutuare tangata. Ko taku tane, koia ra ta te aronga keia ra ka opu, kare i tae mai ake ki te kainga tae roa ki te turuaipo. Ko teia e etai atu au tumu kua riro ei meitaki no matou i taua po ra.

“Ko Iehova to matou punanga ketaketa e to matou akapuanga. Ka tau ia mei ta te tuatua tapu i tuatua ra: ‘Kia kore a Iehova e tiaki i te oire ra, e ara anga puapinga kore to te tiaki ra.’”​—Salamo 127:1.