Kua Rave Ratou i to Iehova Anoano
Kua Akatuera te Akakore Anga i te Ara te Mataara no te Ora
APINGA muna ta te tai ngauru tamaiti a Iakoba tei tu ki mua i te paraimi minita o Aiphiti. I te au mataiti i mua ana kua oko ratou i to ratou teina ko Iosepha ki roto i te tuikaa, te paranianga i te akakite ki to ratou metua tane e kua tamateia aia e tetai manu taae.—Genese 37:18-35.
Ina, i etai 20 mataiti i muri mai, kua maro te onge kino tikai i teia au tangata e tai ngauru kia aere atu ki Aiphiti i te oko ua titona. Inara kare i aere meitaki ana te au mea. Kua akaapa te paraimi minita, tei angaanga katoa ei tangata tua i te kai, ia ratou ei aronga aroro. Kua tuku aia tetai o ratou i roto i te are auri e kua maro atu e kia oki te katoa anga ki te kainga e kia apai mai i to ratou teina, ko Beniamina. I te akapera anga ratou, kua akanoo te paraimi minita i tetai parani ei opu ia Beniamina.—Genese 42:1–44:12.
Kua patoi a Iuda, tetai o te tamaiti a Iakoba. ‘Kia kore matou e akaoki mai ia Beniamina,’ i nana ei, ‘ka mate to matou metua.’ E oti kua tupu tetai apinga kare a Iuda e kare katoa etai o tona au taeake teretere i tapapa ana. I muri ake i te akauenga i te katoatoa kia akaruke i te pia, toe ua mai te au tamaiti a Iakoba, kua aue maata te paraimi minita. I reira, te rauka anga tona tu, kua akakite atu aia: “Ko au ko Iosepha.”—Genese 44:18–45:3.
Tu Akaaroa e te Akaora Anga
“Te ora ra toku metua tane?” Kua ui atu a Iosepha ki tona apa tuakana. Kare e pau anga. E tikai, kare to Iosepha apa tuakana i kite e eaa te ka tuatua atu. Ka mataora ainei ratou, me kare ka mataku ainei ratou? I te mea, ia ratou e 20 mataiti te ou anga, kua oko ratou i teia tangata ki roto i te tuikaa. Ka rauka ia Iosepha te mana i te tuku ia ratou ki roto i te are auri, te tuku ia ratou ki te kainga ma te kore e kai, me kare—te manako i te reira—ka tamate ia ratou! No te au tumu meitaki, ‘kare akerai i tika [to Iosepha apa tuakana] kia karanga ua atu kiaia, i te maata o to ratou koiriria i tona tu.’—Genese 45:3.
Kua akamaru viviki atu a Iosepha i teia aronga. “Ka aere mai ana kotou i vaitata iaku nei,” i nana ei. Kua akarongo ratou. I reira kua tuatua aia: “Ko au to kotou teina ra ko Iosepha, ko ta kotou i oko ki Aiphiti ra. E tenana, auraka e aue, auraka oki e riri ia kotou uaorai, ko kotou i oko mai iaku i ko nei; na te Atua oki i tono mai iaku nei na mua ia kotou, kia ora te tangata.”—Genese 45:4, 5.
Kare to Iosepha tu akaaroa i oronga uaia ma te kore e tumu. Kua kite takere aia i te au kite anga e kua tataraara ratou. Ei akaraanga, i te akaapa anga a Iosepha i tona apa tuakana ei aronga aroro, kua rongo atu aia ia ratou i te tuatua anga kia ratou uaorai: “Kua ara tatou i to tatou teina ra . . . i rokoia mai ei tatou e teianei tumatetenga.” (Genese 42:21) Pera katoa, kua tuku ua a Iuda kia riro mai ei tavini ei mono ia Beniamina e raukai i taua tangata ou ra kia oki ki tona metua tane.—Genese 44:33, 34.
No reira, kua tika a Iosepha i te oronga i te tu akaaroa. Ae, kua kite aia e na te akapera anga ka tupu mai te ora ki te katoa anga o tona pamiri. No reira, kua akakite a Iosepha ki tona apa tuakana kia oki ki to ratou metua tane, ko Iakoba, e kia tuatua kiaia: “Te tuatua maira to tamaiti ra ko Iosepha, Kua akariro te Atua iaku ei tutara no Aiphiti katoa ra: e aere mai koe ki raro kiaku nei, auraka a tavare: E ei te enua nei ei Gosena koe e noo ei, kia vaitata mai koe kiaku nei: ko koe, ma taau au tamariki, e ta to au tamariki ra tamariki, e to au mamoe ra, e to au puakatoro ra, e taau apinga ravarai: E ei reira au e angai ei ia koe.”—Genese 45:9-11.
Iosepha Maata Atu
Ka rauka a Iesu e kia kapikiia e ko Iosepha Maata Atu, no te mea te vaira te tu aiteite i rotopu i teia nga tangata. Mei ia Iosepha, kua takinokinoia a Iesu e tona ai taeake, te au uanga a Aberahama. (Akaaite ia Angaanga 2:14, 29, 37.) Inara, kua kite nga tangata i te taui anga tuke. Kare i roa ana, kua tauiia to Iosepha turanga ei tavini ei paraimi minita, te rua kia Pharao. Mei te reira rai, kua akatu a Iehova ia Iesu mei te mate e kua akangateitei iaia ki tetai turanga “i te rima katau o te Atua.”—Angaanga 2:33; Philipi 2:9-11.
Ei paraimi minita, kua rauka ia Iosepha i te oronga i te kai ki te katoatoa tei aere mai ki Aiphiti i te oko ua titona. I teia tuatau, i runga nei i te enua e pupu tavini akono meitaki e te pakari to Iosepha Maata Atu na roto ia ratou te oronga ra aia i te kai pae vaerua “i te ora mou ra.” (Mataio 24:45-47; Luka 12:42-44) E tikai, te aronga te aere mai nei kia Iesu “kare ratou e pongi akaou, kare oki e kaki vai akaou . . . na te Punua-mamoe oki ko tei noo i rotopu i te terono ra e angai ia ratou, e e arataki oki ia ratou ki te au pupui anga o te vai ora.”—Apokalupo 7:16, 17.
Ei Apiianga no Tatou
Te oronga maira a Iosepha i tetai akaraanga meitaki o te tu akaaroa. Na te tika pakari i umuumu e kia takino aia i te aronga tei oko iaia ki roto i te tuikaa. Ei akatuke anga, na te tu tangi i akakeu iaia kia akangaropoina i to ratou tu apa. Kare a Iosepha i pera ana. Kareka ra, kua timata aia i te tu tataraara o tona apa tuakana. I te kite anga aia e tika tikai to ratou tu, kua akakore aia i ta ratou ara.
Ka rauka ia tatou i te aru ia Iosepha. Me akatutu mai tetai tangata tei ara ia tatou i te taui anga ngakau tikai, ka tau tatou kia akakore i tana ara. Ae, auraka tatou e tuku i te tu tangi kia akamatapo ia tatou i te tu tarevake. I tetai tua, auraka tatou e tuku i te au manako kopae kia akamatapo ia tatou ki te au angaanga tataraara tikai. No reira e “tauturu atu tetai ki tetai, e akakore tetai i ta tetai ara.” (Kolosa 3:13) Na te akapera anga, te aru ra tatou i te Atua, ko Iehova, tei “akakore mai i te ara.”—Salamo 86:5; Mika 7:18, 19.