Tuatau e te Mutu Kore—Eaa ta Tatou i Kite Tikai no Raua?
“I TE akaraanga e ko te tuatau teia o te au tu umere roa atu tei kiteia e te tangata,” i akakite ei tetai enetaikoropitia. Ae, kia akataka i te tuatau i roto i te au tuatua mama ua vaitata rai kare e rauka. Penei ka tuatua tatou e ka “pati,” ka “aere,” ka “rere,” te tuatau noatu e te neke ra tatou i roto i te “aerenga o te tuatau.” Inara kare tatou i kite tikai e eaa ta tatou e tuatua nei.
Kua akatakaia te tuatau e ko te “mamao i rotopu i te au tupu anga e rua.” Inara, te akakite maira ta tatou i kite e kare te tuatau e irinaki ana ki runga i te au tupu anga; i te akaraanga te aere ua ra te reira noatu me ka tupu tetai apinga e me kare ra. Kua akakite tetai tangata kimi kite e kare te tuatau e vai ana inara e mea manako uaia. Ka riro ainei tetai apinga kua patuia to tatou kite anga ki runga kia tuatua uaia e e akamanako ua anga no tatou?
To te Pipiria Manako i te Tuatau
Kare te Pipiria i oronga mai i tetai akataka anga no te tuatau, penei te akakite maira te reira e kare rava e rauka i te tangata i te marama tikai. E mei te atea ope kore rai o te rangi ra, te kite katoa nei tatou e mea ngata i te marama. I te akaraanga, ko te tuatau, ko tetai ia o te au mea ka rauka ua i te Atua i te marama, koia ua rai oki “mei tupua roa mai e tuatau ua atu.”—Salamo 90:2.
Noatu kare te Pipiria i akataka mai i te tuatau, kua tuatua ra te reira i te tuatau ei mea tika tikai. Ei akamata anga, te akakite maira te Pipiria kia tatou e kua anga te Atua i te “turama”—te ra, te marama, e te au etu—ei akanoo i te tuatau, ei “akairo oki, e no te au tuatau, e no te au rā, e no te au mataiti.” E manganui te au tupu anga tei tataia i roto i te Pipiria kua akatumu ngaueue koreia ki roto i te aerenga o te tuatau. (Genese 1:14; 5:3-32; 7:11, 12; 11:10-32; Exodo 12:40, 41) Kua tuatua katoa ra te Pipiria i te tuatau e ko tetai apinga ka tau tatou kia taangaanga meitaki e raukai kia o atu ki roto i ta te Atua akameitaki anga o tetai tuatau mutu kore—te manakonakoanga o te oraanga e tuatau ua atu.—Ephesia 5:15, 16.
Oraanga Mutu Kore—Te Tau ra Ainei?
E mea apiapi i te tauta kia marama e eaa tikai te tuatau, ki te tangata e manganui te manako oraanga mutu kore, me kare te oraanga e tuatau ua atu, e mea ngata tikai. Penei ko tetai tumu no teia kua piri atu ta tatou i kite no te tuatau ki te aerenga o te anau anga, te tupu anga, te pakarianga, e te matenga. No reira, kua rauka ia tatou i te akataka i te aerenga o te tuatau na roto i te ravenga pakarianga. No te manganui, kia manako na tetai ua atu tu te aati ra i te manako tikai o te tuatau. ‘Eaa ra e kia tuke atu te au tangata ravarai ki te reira mei te mea tei raro ake tetai atu au mea ora?’ penei ka ui mai ratou.
Ko tei akangaropoina uaia i roto i teia akamarama anga koia oki te tau ra te tangata ravarai mei te toenga o te au mea angaia i etai au ngai. Ei akaraanga, kua ngere te au animara i te tu kite karape tei rauka i te tangata. Noatu i teia, kare ratou e manako ua atu i tei rauka i to ratou tu kite i te akakeu ia ratou kia rave. Kare tei ia ratou te au apinga kite pera katoa te kite kia akaari i te aroa e te akameitakianga tei rauka ra i te tangata. Me kua orongaia ki te tangata ma te maata i teia au tu e te kite karape tei akariro i te oraanga kia puapinga, eaa ra i kore ei i rauka kia orongaia kia ratou te tuatau me tuatuaia no runga i te oraanga?
I tetai tua, kare ainei i te mea umere e te ora ra te au tumu rakau, kare e manako ana, e tauatini ua atu mataiti i tetai atianga, e i te tangata kite kua ora ua e 70 ki te 80 mataiti i te averiti? Kare ainei i te mea umere e ka rauka i te au onu, kare o te reira tu kite e te au kite karape, kia ora e tere atu i te 200 mataiti, kareka ra i te au tangata, tei akapuapingaia ma teia au tu, te ora ua ra e meangiti roa ra?
Noatu kare e marama meitakiia te tuatau e te mutu kore e te tangata, te vaira te taputou no te ora mutu kore ei manakonakoanga akatumu meitakiia i roto i te Pipiria. I roto i te reira, te tuatua “ora mutu kore” te kiteia ra vaitata e 40 taime. Inara me ko ta te Atua akakoroanga e kia noo te au tangata e tuatau ua atu, eaa ra te reira i kore ei i kiteaia? Ka uriuriia teia uianga i roto i te atikara ka aru mai.