E Arai i te Riri kia Kore e Akaturori ia Koe

“E UTI oonu i te aʼo!” “E tare ki te tai ngauru!” “E kakati i to arero!” Te matau ra ainei koe i teianei au takiota tuatua? Penei ka tuatua ua koe ia ratou kia koe uaorai ei akamaru i te pekapeka i roto ia koe. Ko etai au tangata, i te tauta anga kia akakore i tetai mura anga riri, ka aere no tetai aaere anga. Ko teianei etai au tu mama ua kia akamaru i te riri e kia akaora i te pirianga ma etai atura.

Inara, i etai mataiti ua akenei, kua oripu ua te manako o te aronga e manganui no te apiianga tuke tuke a te aronga kite me ka tau kia akatereia me kare kia taomiia te riri. Ei akatauanga, kua akakite mai etai au taote no te manako i te apii anga e “me ka akariro ia koe kia meitaki mai te manako ngakau,” e tuku ua atu i toou riri ki vao. Kua akamatakite etai e ko te mura putuputuanga mai te riri ko “tetai akakite anga ketaketa mai ia i te mateanga i te taime e ou ra i ta etai atu au tumu kino mei te kai avaava ra, te toto kake, e te cholesterol teitei ra.” Te akataka meitaki maira te Tuatua a te Atua: “Akapakia te makitakita e akaruke i te riri otooto: auraka toou ra kinokino kia tae roa ki te rave i te mea kino.” (Salamo 37:8) Eaa ra te Pipiria i oronga mai ei i taua akoanga taka meitaki ra?

Ka taki atu te au manako ngakau akatere koreia ki te au raveanga akatere koreia ra. Kua kiteaia teianei i te akamataanga mua mai te tuatua enua o te tangata nei. Ka tatau tatou: “Riri rava akerā Kaina, e akatumatuma atura tona mata.” Kua taki atu teia iaia kiea? Kua mou atura tona riri kiaia e kua akatere atura aia, no te maata o te reira kua akaketaketa i tona ngakau ki ta Iehova ra akamaroiroi anga kia rave aia i te meitaki ra. Kua taki atu to Kaina riri tavaa koreia ra iaia ki roto i te vaarua o te ara​—koia te taanga i tona teina.​—Genese 4:3-8.

Ko Saula, koia te ariki mua o Iseraela, kua o atu ki tetai turanga aiteite i tona akarongo anga i to Davida ra akapaapaa anga maata. “Kua karanga atura te au vaine i to ratou akatangi anga, na ko atura, Kua mate ta Saula e kua tausani, kua ngauru ra te tausani i ta Davida. Riri rava akerā Saula, e mea mainaina nana taua tuatua ra.” Kua tutara te riri i to Saula manakoanga e kua opara iaia kia tamata i etai tamate anga ia Davida. Noatu rai e kua rave a Davida i etai tautaanga no te akaoa anga, kare a Saula i anoano kia aruaru atu i te au e te akaongi anga oki. I te openga ra, kua ngaro takiri iaia ta Iehova akaperepere anga.​—1 Samuela 18:6-11; 19:9, 10; 24:1-21; Maseli 6:34, 35.

E mea matauia ra, me tuku ua tetai ki te riri akatere koreia, ka tuatua ua aia e ka rave oki i te au apinga te ka akamamae i te aronga katoa te o atura. (Maseli 29:22) Kua riri oki a Kaina e Saula no te mea ia raua tatakitai, i tona uaorai aerenga, kua vareae e kua makitakita oki. Inara, ka tupu ua mai te au ririanga no etai tumu tuke tuke. Na tetai akaapaanga tau kore, na te tuatua akakino, tetai kite koreanga, me kare tetai akono anga tika kore ka riro ei akamura te ka akaka i tetai riri anga.

Te akakite maira nga akatauanga a Kaina raua ko Saula i tetai ngere anga no raua uaorai. I te akara anga kua ngere ta Kaina orongaanga i te akakeu anga no te akarongo. (Ebera 11:4) Ko to Saula ngere anga i te akarongo i ta Iehova ra akauenga e tana tauta anga oki kia akatika iaia uaorai kua taki atu ki tona ngere anga i ta te Atua akaperepere e te vaerua katoa oki. Te taka meitaki ra e, kua akakino eia nga tangata e rua i to raua pirianga ma Iehova.

E akatuke i aua nga turanga ra ma to Davida, e tumu ra tana kia riri no te akonoanga tei akatupuia maira e Saula kiaia. Kua akono meitaki a Davida i tona vaerua. No teaa ra? Kua tuatua aia: “Kia akakore mai oki a Iehova, auraka au kia pera ki toku pu, ki to Iehova ra tangata i akatainuia ra, auraka toku rima kia rave ua atu iaia, ko tei akatainuia oki aia e Iehova ra.” Kua taka meitaki i te manako o Davida tona pirianga ma Iehova, e kua akatupu meitaki te reira i tana au akonoanga ma Saula. Kua vaio taakaaka ua aia i taua au tumu ra ki roto i to Iehova nga rima ra.​—1 Samuela 24:6, 15.

Ko te tika, te au pekapeka no te riri akono koreia e au mea kino ia. Kua akamatakite te apotetoro ko Paulo: “Kia riri kotou ra, auraka kia araia.” (Ephesia 4:26) Noatu rai e ngai to te riri tuatua tika, te vaira tetai tu kino e ka rauka kia riro te riri ei toka turori anga no tatou nei. No reira rai, te aro atura tatou i te akaaoanga no te akatereanga i to tatou riri. Akapeea e raukai ia tatou kia rave i te reira?

Tetai mataara meitaki kia akatupu i tetai pirianga maroiroi ma Iehova. Te akamaroiroi maira aia ia koe kia akatuera i to ngakau e to manako kiaia. E akakite kiaia i taau au utuutu anga e toou au manako, e ka pati atu no tetai ngakau maru kia autu i te riri. (Maseli 14:30) Kia irinaki e “tei te aronga tuatua-tika ra to Iehova mata, e tei ta ratou kapiki tona taringa.”​—1 Petero 3:12.

Ka rauka i te pure te akapapa ia koe. Na roto i teea tu? Ka rauka i te reira tetai akatupu anga oonu tei ngata ra kia kiteaia i taau au akonoanga ma etai atu ra. Kia maara i akapeea ta Iehova ra akono anga ia koe. Mei ta te au Tuatua Tapu i tuatua ra, “kare akenei [a Iehova] i akaoko mai ia tatou e kia aite ki ta tatou au ara.” (Salamo 103:10) E puapinga maata to te vaerua akakore i te ara “ko te rauka mai aea ta Satani ngai” ia koe. (2 Korinetia 2:10, 11) Pera katoa oki, na te pure e akatuera i to ngakau ki te arataki anga a te vaerua tapu, te ka rauka kia taruri ke i te au apinga ketaketa te akatomoanga ki roto i te oraanga. Te oronga mareka maira Iehova i te ‘au tei maata ua atu i te kite tangata,’ te ka rauka kia tatara mai ia koe mei te mana mou anga no te riri ra.​—Philipi 4:7.

Inara, ko te pure, ka tika kia kapitiia ma tetai akara anga matatio i te au Tuatua Tapu e raukai ia tatou ‘kia kite ei tatou i to Iehova ra anoano.’ (Ephesia 5:17; Iakobo 3:17) Me e raveanga ngata noou uaorai kia akatere i toou riri, e tauta kia kite i to Iehova ra manakoanga ki runga i taua tumu ra. E akara akaou i te au tuatua tapu tei piri tikai ki te akatere anga i te riri ra.

Te oronga maira te apotetoro ko Paulo i teianei akamaaraaraanga puapinga maata: “E takinga-meitaki tatou i te tangata ravarai, kia maata atura ki to te ngutuare o te akarongo ra.” (Galatia 6:10) E akaariu atu i to kotou au manako e te au ravenga memeitaki kia etai ke ra. Na taua angaanga tau, e te tika ra ka akamaroiroi i te manako atu ia etai ke e te irinaki oki te ka akamaru i te au kite koreanga te ka ngoie ua te akatupu i te riri ra.

Kua tuatua te tata taramo: “E akaaiteite ana koe i toku aerenga ki taau ra tuatua; e auraka rava e kino kia akaapo mai ki runga iaku. E au maata to te aronga i inangaro i taau ture; kare o ratou e turorianga.” (Salamo 119:133, 165) Ka tika katoa te reira noou.

[Pia/​Tutu i te kapi 9]

AU TAKAINGA KIA AKATERE I TE RIRI

□ E pure kia Iehova.​—Salamo 145:18.

□ E akara matatio i te au Tuatua Tapu i te au ra takitai.​—Salamo 119:133, 165.

□ Kia rave maata i te au angaanga tau.​—Galatia 6:9, 10.