E Akapapa no te Tauatini Mataiti te Tau Ra!

KA APAI mai te Tutara Anga Tauatini Mataiti o Karaiti i te au akameitakianga tare koreia ki te pamiri tangata. I raro ake i ta Iesu akatere anga aroa, ka taakiia te au tangata ravarai mei te tu taitaia i teianei ki tetai tu apa kore kaka. Ka akamanako ana e eaa te aite anga i te reira noou. E oraanga kopapa maroiroi! Ka akamanako ana i te ara mai anga i te au popongi ravarai ma te manako meitaki i te ra i mua ake. Te akara nei te au mirioni tane, vaine, e te tamariki ki mua i te oraanga i taua tuatau mataora. Te tapapa ra ratou i te reira, te pure ra no te reira. Kua akapapu ta ratou apii anga i te Pipiria ia ratou e ka riro teia au akameitakianga e na ratou kia rekareka.

Inara, i mua ake ka akamatai i tana Tutara Anga Tauatini Mataiti, ka tau a Iesu Karaiti kia tama i te enua i te aronga pouroa tei patoi i tana tutara anga. Ka rave aia i teia i te tamaki anga tei kapikiia e ko Aramakito i roto i te Pipiria. (Apokalupo 16:16) Kare te au Kerititiano tikai e ta ki roto i te reira tamaki anga. Na te Atua te tamaki. E kare te reira e ka akatupuia ki tetai ngai i te enua. Te tuatua ra te Pipiria e ka taeriaia te reira i te au kona mamao o te enua. Ka tamateia te au enemi o te tutara anga o Karaiti. Kare etai o ratou e ora!​—Ieremia 25:33.

I reira ka uri a Iesu kia Satani te Tiaporo e tana au temoni. Akamanako ana i teia tutu, e mei ta te tangata tata o te puka Apokalupo i kite ra: “Kite atura au i tetai angela [ko Iesu Karaiti] i te eke anga mai mei te rangi mai, e tei iaia te taviri o te vaarua takere kore ra, e pirianganaoa maata tei tona rima. Kua opu iora aia i te taae, i taua ovi taito ra, koia oki te diabolo ra, ko Satani, kua tapeka iaia kia okotai tausani i te mataiti.” (Apokalupo 20:1, 2) I muri mai, ka takore mutu koreia a Satani e tana au temoni.​—Mataio 25:41.

“E aronga maata rava, kare takiri e pou kia tatau,” ka ora atu ia Aramakito. (Apokalupo 7:9) Ka arataki a Karaiti i teia aronga kia puapinga tikai mei te “pupui anga o te vai ora,” mei tetai tiaki mamoe ka arataki i tana mamoe ki te vai akaora. (Apokalupo 7:17) Kare e tamanamanataia to ratou tere anga ki mua i te pae vaerua e Satani e tana au temoni, ma te marie ka tauturuia teia aronga ora o Aramakito kia autu i to ratou au tu ara ua e taeriaia atu e ratou te tu apa kore!

I raro ake i ta Karaiti tutara anga aroa, ka meitaki mai te au turanga ora anga. Ka takore te Atua ko Iehova, na roto ia Iesu Karaiti, i te au tumu o te mamae e te mii. Ka “orei [aia] i te roi-mata katoatoa; e e kore rava te mate, e te aue, e te mii; e te mamae oki, e kore katoa ïa; no te mea kua kore te au mea taito.” (Apokalupo 21:4) Kua akataka te peroveta ko Isaia i te tutu, i te tuatuaanga: “Ei reira e akapueraiaʼi te mata o te matapo ra, e e akapu tataiaʼi te taringa o te turi ra. Ei reira te pirikoki e rererere aere ei mei te aili, e imene mai oki te vaa o te murare.” (Isaia 35:5, 6) E te aronga mate, te “tangata rikiriki e te aronga mamaata,” ka ora akaou mai ma te manakonakoanga kia kore e mate akaou!​—Apokalupo 20:12.

I teianei, te akaputuputuia nei te “aronga maata rava” te ka ora atu ia Aramakito. Te akapapa nei ratou no te Tutara Anga Tauatini Mataiti o Karaiti. Noatu kare ratou i kite e aea e akamatai te reira tutara anga, kua papu ratou e i roto i to te Atua taime tau, ka akatupuia te reira. Ka rauka e ko koe tetai i rotopu ia ratou, inara ka anoanoia e kia papa katoa koe​—kare na te okoanga i taau au apinga e te teretereanga ki tetai ngai enua, inara na te apii anga i te Atua ko Iehova e tana au akakoroanga na roto i te apii anga i te Pipiria. Ma te kore e tutaki me kare anoano anga, ka rekareka te Au Kite o Iehova i te akaari atu kia koe e ka akapeea te apii anga i te Pipiria i te tauturu ia koe e toou pamiri. Ka mataora te aronga nenei o teia makatini i te oronga atu i te au tuatua akakite.

[Pia i te kapi 7]

Te Tauatini Mataiti​—Tika Tikai me Kare Tutu ua Ainei?

I te mea kua tataia te maata anga o te puka Pipiria o Apokalupo i roto i te reo tutu ua, te tu maira tetai uianga. Akapeea te Tutara Anga Tauatini Mataiti o Karaiti tei taikuia i roto ia Apokalupo? E mea tika tikai me kare e tuatau tutu ua ainei?

Te vaira te au akakite anga e mea tika tikai te tuatau tauatini mataiti. Akamanako ana: Kua taiku te apotetoro ko Paulo ki te Tutara Anga Tauatini Mataiti o Karaiti, a te reira tuatau ka akavaia te tangata ravarai, ei ra. (Angaanga 17:31; Apokalupo 20:4) Kua tata te apotetoro ko Petero e tai ra (e 24 ora) kia Iehova mei te mea e tai tauatini mataiti. (2 Petero 3:8) Ka maro te reira i teia “ra” akavaanga e tai tauatini mataiti roa tikai. Pera katoa, ia Apokalupo 20:3, 5-7 (NW), ka tatau tatou e a taime tuke, kare i “tetai tausani mataiti,” inara o “nga mataiti okotai tausani.” Te akakite maira teia i tetai tuatau papu e ka roa.