Au Uianga a te Aronga Tatau

Akapeea te Au Kite o Iehova i te manako anga i te votianga?

Te vaira te au kaveinga taka meitaki tei akanooia i roto i te Pipiria te akariro ra i te au tavini o te Atua kia akono i te manako tau no runga i teia. Inara, te kiteaia maira e kare e kaveinga patoi no te rave anga i te voti. Ei akaraanga, kare e tumu e kia kore tetai pupu akaaere e voti e raukai te au iki anga te o atura ta ratou akaaerenga. E maata te taime kua akono te au putuputuanga a te Au Kite o Iehova i te au iki anga no runga i te ora o te uipaanga e no te akapou anga i te au moni tauturu a te putuputuanga na te votianga ma te taaki anga i te rima.

Inara, akapeea, te votianga i roto i te au iki anga poritiki? E tikai, i roto i etai au enua temokaratiki, e maata atu i te 50 patene i te katoa anga o te tangata kare e voti ana i te ra o te iki anga. E no te Au Kite o Iehova, kare ratou e tamanamanata ana i te tika anga a tetai atu kia voti; e kare katoa ratou e rave ana i te oroanga kia patoi i te au iki anga poritiki. Te akangateitei ra e te taokotai ra ratou i te au mana akaaere tei ikiia i roto i taua au iki anga. (Roma 13:1-7) E me ka voti ua ratou i tetai tangata kia ikiia, ka tuku tataki tai tetai o te Au Kite o Iehova i tana iki anga tei akatumuia ki runga i tona akava ngakau tereniia e te Pipiria e te marama ra i tana apainga ki te Atua e ki te Au-Enua. (Mataio 22:21; 1 Petero 3:16) I te tuku anga i teia iki anga nana uaorai, te akamanako ra te Au Kite i etai au tumu.

Te mea mua, kua tuatua a Iesu Karaiti no tana pipi: “Kare ratou no teianei ao, mei iaku nei rai oki kare i to teianei ao.” (Ioane 17:14) Te manako pakari ra te Au Kite o Iehova i teia kaveinga. I te mea e ‘kare no teianei ao,’ e tu neutara to ratou i roto i te au angaanga poritiki o te ao.​—Ioane 18:36.

Te rua, kua tuatua te apotetoro ko Paulo iaia uaorai ei “komono” te mono ra ia Karaiti ki te tangata i tona tuatau. (Ephesia 6:20, NW; 2 Korinetia 5:20, NW) Te irinaki ra te Au Kite o Iehova e ko Iesu Karaiti te Ariki akateronoia o te Patireia o te Atua i te rangi ra i teianei, e ko ratou, mei te aronga komono ra, ka tau kia akakite i teia ki te tangata ravarai. (Mataio 24:14; Apokalupo 11:15) Kua tapapaia te aronga komono e kia vai neutara, e kia kore e o atu ki roto i te au angaanga o te au enua tei tonoia atu ratou. Ei aronga mono i te Patireia i te rangi ra o te Atua, te kite ra te Au Kite o Iehova i tetai apainga aiteite kia kore e o atu ki roto i te au poritiki o te au enua i te ngai te noo ra ratou.

Te toru o te tumu ka tau kia akamanakoia koia oki e ko te aronga e tuanga ta ratou no te votianga i tetai tangata ki roto i te opati penei ka apa no tana i rave. (Akaaite ia 1 Timoteo 5:22, The New English Bible.) Ka tau te au Kerititiano kia akamanako meitaki me te inangaro ra ratou i te rave i taua apainga.

Te a, te akaperepere maata ra te Au Kite o Iehova i to ratou tu taokotai anga Kerititiano. (Kolosa 3:14) Me o atu te au akonoanga ki roto i te au poritiki, tei tupu mai koia oki ko te takake anga i rotopu i to ratou au mema. I te aru anga ia Iesu Karaiti, kua kopae te Au Kite o Iehova i te piri atu ki roto i te au angaanga poritiki e no reira te akono ra i te taokotai anga Kerititiano.​—Mataio 12:25; Ioane 6:15; 18:36, 37.

Te rima e te mea openga ra, i te kore i o atu ki roto i te au poritiki te oronga ra i te tu rangatira kia tuatua ua te Au Kite o Iehova ki te au tangata ravarai ma te akakeu anga poritiki i te tuatua meitaki o te Patireia.​—Ebera 10:35.

Te manako anga i te au kaveinga Tuatua Tapu tei akatakaia mai i runga ake nei, i te au enua e manganui kua tuku te Au Kite o Iehova i te iki anga auraka e voti i roto i te au iki anga poritiki ra, e te turuia ra to ratou tu rangatira kia iki i te reira e te ture o te enua. Inara, akapeea, me te umuumu ra te ture i te au tangata kia voti? I taua tu ra, tei runga i te Kite tataki tai kia tuku i te iki anga akava ngakau, tei akatumuia ki runga i te Pipiria e akapeea me akono i taua turanga. Me ka iki tetai tangata i te aere atu ki te pia tareanga, nana te reira iki anga. Ko tana ka rave i roto i te pia tareanga tei rotopu iaia e tei Anga iaia.

Te na ko ra te itiu o The Watchtower Noema 15, 1950, i te kapi 445 e te 446, e: “I te ngai te anoano ra a Kaisara e kia voti te tangata . . . ka rauka i te [Au Kite] i te aere atu ki te pia tareanga e kia tomo ki roto i te pia votianga. I konei te anoanoia ra ratou kia akairo i te pepa me kare kia tata e koai ta ratou e tu ra. Ka rave te aronga voti i tei rauka ia ratou ma ta ratou au pepa. No reira i konei i mua i te aroaro o te Atua te ngai ka rave ei tona au kite kia rotai ma tana au akauenga e kia tau ki to ratou akarongo. Kare tei ia matou te apainga no te apii ia ratou e eaa te ka raveia ki ta ratou pepa.”

Akapeea me ka maro atu te tane akarongo kore a tetai vaine Kerititiano kia tuku aia i tana voti? Ina, tei raro ake aia i tana tane, mei te au Kerititiano i raro ake i te au mana akaaere. (Ephesia 5:22; 1 Petero 2:13-17) Me ka akarongo aia i tana tane e ka aere aia ki te pia tare anga, nana ia iki anga. Auraka tetai e akaapa atu iaia.​—Akaaite ia Roma 14:4.

Akapeea ra i te enua kare i tureia te votianga inara te vaira te au manako ngakau patoi i te aronga kare e aere e voti​—penei ka takinokinoia ratou? Me kare akapeea te aronga, koi kore ei i anoanoia i te pae ture kia voti, kua akautunga pakariia na roto i etai tu me kare ratou e aere atu ki te pia tareanga? I roto i teia tu e te au turanga aiteite, ka tau tetai Kerititiano kia tuku i tana uaorai iki anga. “Ei runga iaia uaorai ta te tangata ravarai apainga.”​—Galatia 6:5.

Penei ka akaturoriia tetai tangata me kite atu ratou e i te tuatau o te iki anga i to ratou enua, e kua aere atu tetai o te Au Kite no Iehova ki te pia tareanga e kare tetai. Penei ka tuatua ratou, ‘Kare te Au Kite o Iehova e rotai ana.’ Inara, kia kite te tangata e i roto i te au tumu o te akava ngakau o tetai mei teia ra, ka tau te Kerititiano tataki tai kia tuku i tana uaorai iki anga ki mua i te Atua ko Iehova.​—Roma 14:12.

Noatu e eaa te au iki anga nana uaorai ka rave te Au Kite o Iehova i roto i te au turanga tukeke, ka manako meitaki ratou no te akono i to ratou tu neutara Kerititiano e te tu rangatira no te tuatua ua. I te au apinga pouroa, te irinaki ra ratou i te Atua ko Iehova kia akaketaketa ia ratou, kia oronga i te pakari kia ratou, e kia tauturu ia ratou kia kopae i te tuku anga i te au no to ratou akarongo na tetai tu. No reira te akaari ra ratou i te irinaki papu i te au tuatua a te tata taramo: “E mato oki koe noku, e akapuanga oki koe noku: e no toou ra ingoa, e arataki mai koe, e e akakite mai kiaku.”​—Salamo 31:3.