Au Mema Ou o te Pupu Akaaere

I TE Maanakai, Okotopa 2, 1999, kua taopengaia te Uipaanga Mataiti a te Taiate Punanga Tiaki Pipiria e te Pepa o Pennsylvania ma tetai akakiteanga poitirere. Kua rekareka tikai te 10,594 tei tae mai me kare tei akapauia na roto i te raini terepaoni i te akarongo e kua kapitiia atu te au mema ou e a ki te Pupu Akaaere o te Au Kite o Iehova. Te au mema ou, pouroa e au Kerititiano akatainuia, ko Samuel F. Herd; M. Stephen Lett; Guy H. Pierce; e David H. Splane.

• Kua akamata a Samuel Herd i te painia i te 1958, e mei te 1965 ki te 1997, kua angaanga aia ki roto i te angaanga kotinga e te tapere. I muri maira, kua riro raua ko tana vaine ko Gloria, e ko tetai o te pamiri Betela i Marike, te ngai te angaanga ra te Taeake ko Herd i roto i te Tipatimani Tavini Anga. Te tavini katoa ra aia ei tangata tauturu i te Kumiti Tavini Anga.

• Kua akamata a Stephen Lett i te painia ia Titema 1966, e mei te 1967 ki te 1971, kua tavini ana aia i te Betela i Marike. Ia Okotopa 1971, kua akaipoipo aia i tana vaine ko Susan, e kua rave atu i te angaanga painia takake. Mei te 1979 ki te 1998, kua tavini aia ei akaaere kotinga. Mei ia Aperira 1998 mai, kua riro raua ko Susan e ko tetai o te pamiri Betela i Marike. I reira kua angaanga ana aia i roto i te Tipatimani Tavini Anga e e tangata tauturu i te Kumiti Apiianga.

• Kua utuutu mai a Guy Pierce i tetai pamiri e oti ma tana vaine kua akamata i te painia ia Aperira 1982. Kua tavini ana aia ei kotinga akaaere mei te 1986 e tae ua atu ki te 1997, i te riro anga mai raua ko tana vaine, ko Penny, e ko tetai o te pamiri Betela i Marike. Kua tavini ana te Taeake ko Pierce ei tangata tauturu ki te Kumiti Tangata.

• Kua akamata a David Splane i te painia ia Tepetema 1963. E karatuati o te pupu 42 o Gileada, kua tavini ana aia ei mitinari i Senegal, Aperika, e oti e 19 mataiti i roto i te angaanga kotinga i Kanata. Kua riro raua ko tana vaine, ko Linda, e ko tetai i te Betela i Marike mei te 1990 mai, te ngai te angaanga ra te Taeake ko Splane i roto i nga tipatimani Tavini Anga e te Tataanga. Mei te 1998 mai, kua tauturu ana aia i te Kumiti Tataanga.

I te pae mai i te au mema ou e a, ko tei roto i te Pupu Akaaere i teianei ko C. W. Barber, J. E. Barr, M. G. Henschel, G. Lösch, T. Jaracz, K. F. Klein, A. D. Schroeder, L. A. Swingle, e D. Sydlik. E pure ia na te katoatoa e ka tamou ua atu a Iehova i te akameitaki e te akaketaketa i te Pupu Akaaere, i teianei kua akamaataia, i te reira e akaaere tamou ra i te au angaanga a te iti tangata o te Atua takapini i te ao e kia akono i to ratou au anoano i te pae vaerua.