E Au Kopapa Meangiti, E Au Ngakau Maatamaata

MEI teaa rai te tu i te tuatua atu ki tetai tangata ke i te Patireia o te Atua e 76 teni mita te roa ia koe? Ka rauka ia Laura i te akakite atu kia koe. I te 33 mataiti, ko te roa te reira iaia, e 76 teni mita. E noo ana raua ko tona teina ko María, e 24 mataiti e 86 teni mita te roa, i Quito, Ecuador. Ka akatika mai ia raua kia akamarama i te au manamanata te aro atura raua i roto i ta raua angaanga orometua Kerititiano.

“E tae ei ki ta maua ngai tutuanga e ki te au uipaanga Kerititiano, ka aaere maua e apa te kiro mita no te tiaki i te pati. Mei te ngai ka eke mai maua, ka aaere akaou atu maua no etai apa kiro mita e raukai i te kake ki runga i te rua o te pati. Ma te manuia kore, i te pae i teia ara te noo ra te au puakaoa ae e rima. E mataku ana maua i te puakaoa no te mea kua akaraanga maatamaata atu mei te au oroenua rai. Kia tueru i te reira me ka anoanoia, ka apai maua i tetai rakau, ta maua ka uuna i tetai ngai i mua ake ka kake ei ki runga i te pati e raukai te reira me oki maua ki te kainga.

“Te kake anga ki runga i te pati e aka takai anga kia maua. Ka tu maua ki runga i tetai puku one i te ngai tiaki pati e raukai i te kake ki runga. E tapu mai ana etai aronga akaoro i te pae tikai i te puku one, inara kare tetai. I te reira atianga, ka tauturu mai tei teitei ia maua i tei poto ra ki runga. Te kake anga i te rua o te pati ka umuumuia maua kia tikoti i te mataara piti​—e tauta anga ngata no to maua nga vaevae meangiti. No to maua tu meangiti, ka riro katoa te pute puka ei akaaoanga. Kia akamama i te pute, ka taangaanga maua i te Pipiria ka o ki roto i te pute pereue e pera katoa ka akameangiti i ta maua puka ka apai aere.

“Mei te meangiti anga mai, kua manako maua ia maua uaorai. Kua kite to maua au tangata i te pae mai e ko te tuatua anga ki te tangata ke ka riro ei kite tamataku anga kia maua. No reira kua poitirere ratou e kua umere tikai i te kite anga mai ia maua i te topapaanga i to ratou au ngutupa, e tei matauia ka akarongo mai ratou kia maua. Inara i te ngai kare maua i kite meitakiia, e putuputu te taime kua kite mai te tangata ia maua ei nga tangata peneneke; no reira, kare ratou e akarongo mai ana ma te manako pakari i ta maua tuatua. Noatu rai, te kiteanga i to Iehova inangaro te oronga maira kia maua i te anoano kia tamou marie i te angaanga evangeria. Te akamanako anga ia Maseli 3:5, 6 te oronga katoa maira i te tu mataku kore kia maua.”

Mei ta Laura raua ko María i akatutu mai, te akakoromaki ua anga noatu te taii anga i te pae kopapa ka rauka i te akapaapaa i te Atua. Kua pure te apotetoro ko Paulo e ko tona ‘tara i roto i te kopapa,’ penei paa e mamae anga i te pae kopapa, kia akaateaia mei iaia. Inara kua akakite atu te Atua kiaia: “Toku nei aroa ua, oti ra ua ïa taau: ei te apikepike e taka meitaki ravaʼi toku maroiroi.” Ae, kare e anoanoia e kia akaateaia te tu apikepike i te pae kopapa e raukai ia tatou i te tavini i te Atua. Te irinaki pu anga ki runga i te Atua ka tauturu ia tatou kia akariro kia meitaki to tatou au turanga. No te mea kua manako a Paulo i tona ‘tara i roto i te kopapa’ na teia tu, kua rauka iaia i te tuatua: “Kia paruparu oki au ra, te maroiroi ra au i reira.” (2 Korinetia 12:7, 9, 10) I etai mataiti i muri maira kua tata a Paulo: “E tika iaku te au mea ravarai nei i te Mesia, ko tei akamaroiroi mai iaku nei.”​—Philipi 4:13.

I teia tuatau, te akatupu ra te Atua i tetai angaanga maata na roto i te au tane, au vaine, e te au tamariki tei akono tikai iaia. E maata ia ratou kua kinokino i te pae kopapa. Noatu te manakonako ra te maata anga ia ratou i te rapakau anga tu-Atua i raro ake i te Patireia o te Atua, kare ratou e tiaki e kia akamaru mai te Atua ia ratou no to ratou au manamanata i mua ake ka rave ei i tetai apinga i roto i tana angaanga.

Te mamae ra ainei koe mei tetai tu apikepike i te pae kopapa? Kia tamou marie! Na roto i toou akarongo ka riro e ko koe tetai mei ia Paulo, Laura, e María. No ratou ka rauka i te tuatua ia, mei te au tane e te au vaine akarongo rai i te tuatau taito: “Kua akamaroiroiia [ratou] i te paruparu anga ra.”​—Ebera 11:34.

[Tutu i te kapi 8]

María

Laura

[Tutu i te kapi 9]

Tauturu a María ia Laura kia kake ki runga i te pati

[Au Tutu i te kapi 9]

“E mataku ana maua i te puakaoa no te mea kua akaraanga maatamaata atu mei te au oroenua rai”

I raro ake: Laura raua ko María e te aronga tei apii i te Pipiria ma raua