Kimianga ia Iehova ma te Ngakau Akonokonoia

E TANGATA meitaki te taunga Iseraela ko Ezera i te kimikimi, e tangata kite, e tangata kopi, e e puapii no te Ture. No te au Kerititiano i teia tuatau e akaraanga meitaki katoa aia no te angaanga meta katoa. Akapeea? I te mea kua tamou aia i te tu akono i te Atua noatu e te noo ra aia i Babulonia, e oire tei ki i te au atua pikikaa e te akamori anga temoni.

Kare to Ezera tu akono i te Atua i tupu ua mai. Kua angaanga pakari aia no te reira. E tikai, te akakite maira aia kia tatou ‘kua akonokono ua oki [aia] i tona ngakau e kimi, e e rave, i te ture a Iehova.’​—Ezera 7:10.

Mei ia Ezera rai, te inangaro nei te iti tangata o Iehova i teia tuatau i te rave pouroa i ta Iehova e pati maira ia ratou koi noo ei i roto i tetai ao kino ki te akamori anga mou. No reira ka akara ana tatou i te au tu na roto i te reira ka rauka ia tatou i te akonokono i to tatou ngakau, te peretana i roto ra​—kapiti mai i to tatou au manako, au tu, au anoano, e te au akakeu anga​—kia “kimi, e e rave, i te ture a Iehova.”

Akonokonoanga i to Tatou Ngakau

“Kia akonokono” te aite anga “kia akapapa i mua ake no tetai akakoroanga: kia tuku ki roto i tetai turanga kia taangaangaia, kia raveia, me kare te tu.” E tika, me kua kite mai koe i te kite tika tikai o te Tuatua a te Atua e kua akatapu i toou oraanga kia Iehova, kua papu i reira toou ngakau e tei roto i te turanga akonokonoia e ka rauka kia akaaiteia ki “te ngai one meitaki” ta Iesu i tuatua i roto i tana parapore o te tangata ruru.​—Mataio 13:​18-23.

Noatu rai, ka anoano to tatou ngakau i te akaraanga tamou e te akatikatika anga. No teaa ra? No nga tumu e rua. Te mea mua, no te au tu akakino, mei te au teita rai i roto i te aua, ka aka ua, koia tikai i roto i teia “tuatau openga” i te mea te ki ra “te reva” o te akatereanga a Satani ma te au uua kikino o te manako anga kopapa. (2 Timoteo 3:​1-5; Ephesia 2:2) Te rua o te tumu no runga te reira i te one. Me akarukeia ma te kore e akaraia, kare e roa ka maro te one, ka ketaketa, e kare e uua. Me kare ka aaere ua te au tangata e manganui i roto i te aua e ka takatakai i te one e kua ketaketa. Te aiteite katoa ra te one akatutu ra o to tatou ngakau ki te reira. Penei kare te reira e uua me kopaeia me kare me takatakaiia e te au tangata kare ratou e inangaro ana i to tatou tu i te pae vaerua.

Mei teaa i reira te puapinga no tatou katoatoa kia taangaanga i te ako anga a te Pipiria: “I te au mea katoa taau ka tapapa ra, kia maata taau tapapa anga i to ngakau; ko te tumu oki te reira o te ora.”​—Maseli 4:23.

Te Au Tumu te ka Akapuapinga i te “One” o to Tatou Ngakau

Ka akara ana tatou i etai au tumu, me kare au tu, te ka akapuapinga i te “one” o to tatou ngakau e ka reka te reira i te tupu anga maroiroi. E tika, e manganui te au mea e vaira te ka akameitaki i to tatou ngakau, inara i konei ka akara tatou e ono: te kite anga i to tatou umuumu anga i te pae vaerua, te tu akaaka, te tu tika, te mataku i te Atua, te akarongo, e te aroa.

“E mataora to te aronga tei manako i to ratou anoano i te pae vaerua,” i na Iesu ei. (Mataio 5:3, NW.) Mei te matepongi i te pae kopapa te akamaara maira ia tatou i to tatou anoano kia kaikai, te kite anga i to tatou anoano i te pae vaerua te akatupu ra ia tatou kia matepongi i te kai vaerua. I te pae natura, e kaki anga to te au tangata no taua kai no te mea te oronga maira te reira i te aite anga e te akakoroanga i te oraanga. Te au taomi anga mei to Satani akatereanga o te au mea me kare te ngoru ra me tae mai ki te tuatau apii anga penei ka akamarie i to tatou akava ngakau no teia anoano. Noatu rai, kua tuatua a Iesu: “Kare o te kai anake ra te mea e oraʼi te tangata nei, ko te au mea katoa ra no roto mai i te vaa o te Atua ra.”​—Mataio 4:4.

Na tetai tu tikai, te akamaata ra te putuputu, te aiteite, e te meitaki o te au kai i te maroiroi i te pae kopapa, e te akakeu katoa ra ratou i te kopapa kia akatupu i te kaki anga no te kai ka aru mai me tae te tuatau. Te tika katoa ra te reira i te pae vaerua. Penei kare koe e manako ana ia koe uaorai ei tangata apii tikai, inara me akariro koe ei mea matau anga noou kia tatau i te Tuatua a te Atua i te au ra e te apii putuputu ra koe i te au puka akanooia ki runga i te Pipiria, ka kite koe e ka akamaataia toou kaki anga. Ko te tika, ka akara inangaro ua atu koe ki toou tuatau apii anga i te Pipiria. No reira auraka e tuku ua i te au; e angaanga pakari no te akatupu meitaki i te kaki anga i te pae vaerua.

Akaparuparu te Tu Akaaka i te Ngakau

E tumu puapinga te tu akaaka e raukai te ngakau akonokonoia no te mea te akariro ra te reira ia tatou ei aronga apii ua e te tauturu ra ia tatou kia ariki ua i te ako anga aroa ua e te akatikatika anga. Ka akamanako ana i te akara anga meitaki o te Ariki ko Iosia. I tona tuatau tutara anga kua kiteaia tetai tataanga no runga i te Ture a te Atua tei orongaia kia Mose. I te akarongo anga a Iosia i te au tuatua o te Ture e kua kite e mei teaa te mamao i tona ui tupuna i te akatakake anga mei te akamori anga ma, kua aae aia i tona kakau e kua aue ki mua ia Iehova. Eaa ra ta te Atua Tuatua i akakeu oonu ei i te ngakau o te ariki? Te akakite maira te tataanga e kua “maru” tona ngakau, e kua taakaaka aia iaia uaorai i te akarongoanga i ta Iehova au tuatua. Kua kite atu a Iehova i to Iosia ngakau ariu e te akaaka, e kua akameitaki iaia ma te tau ra.​—2 Ariki 22:​11, 18-20.

Kua akatupu te tu akaaka i ta Iesu au pipi ‘apii koreia e te kite kore oki’ kia opu e kia taangaanga i te au tuatua mou i te pae vaerua tei kore i opuia e te “aronga pakari e te kite” inara “i te akonoanga i te kopapa” ua. (Angaanga 4:13; Luka 10:21; 1 Korinetia 1:26) Kare te mea openga ra i akonokono no te ariki i ta Iehova au tuatua no te mea kua akaketaketaia to ratou au ngakau e te ngakau parau. No reira rai a Iehova i rikarika ei i te ngakau parau?​—Maseli 8:13; Daniela 5:20.

Tu Tika e te Mataku i te Atua

Kua tata te peroveta ko Ieremia e “pikikaa maata to te ngakau i te au mea katoa nei, e kua kino takiri: koai te kite?” (Ieremia 17:9) Te akatutu ra teia pikikaa iaia uaorai na roto i te au tu tukeke, i te mea tikai me kimi tatou i te au kotoe anga no tatou uaorai me rave tatou i te tarevake. Ka kitea katoaia te reira me tuatua ua tatou i te au ngai tarevake o te tu tangata. Inara, ka tauturu te tu tika, ia tatou kia autu i te ngakau pikikaa na te tauturu mai anga ia tatou kia akatika i te tuatua mou no runga ia tatou uaorai e raukai ia tatou i te akamako mai. Kua akaari te tata taramo i taua tu tika i te pure anga aia: “E unuunumou mai koe iaku, e timata mai, e Iehova; e akamakitoro marie mai koe i toku manako e toku ngakau.” Te taka meitaki ra, e kua akonokono te tata taramo i tona ngakau kia ariki i te akatikatikaanga e te timataanga no ko mai ia Iehova, noatu rai e ko te aite anga i te reira e kia akakiteia te vai anga o te au tu mei tetai apinga e raukai teia i te autuia.​—Salamo 17:3; 26:2.

Te mataku i te Atua, te kapiti maira i ‘te rikarika i te kino,’ e tauturu anga ririnui ia i roto i teia ravenga akamako anga. (Maseli 8:13) Koi ariki ei i to Iehova aroa takinga meitaki e te meitaki tikai, ko tetai tangata te mataku ra ia Iehova te kite ua ra e tei ia Iehova te mana kia akatupu i te utunga, e i te mate, ki runga i te aronga kare e akarongo ana iaia. Kua akaari a Iehova e ko te aronga te ka mataku iaia ka akarongo katoa iaia i te tuatua anga aia no runga ia Iseraela: “Naringa e, ko te tu ïa o to ratou ngakau i roto ia ratou, kia mataku mai ratou iaku, e kia akono tikai i taku au akauenga katoa, auraka e tukumoe, kia meitaki ratou, e ta ratou au tamariki e tuatau ua atu!”​—Deuteronomi 5:29.

Te taka meitaki ra, e ko te akakoroanga o te mataku i te Atua koia oki, kare e kia akono ia tatou i roto i te tu kauraro mataku ua, mari ra kia akakeu ia tatou kia akarongo i to tatou Metua aroa, ta tatou i kite e te manako meitaki maira ia tatou. Ko te tika, e teitei taua tu mataku i te Atua e te akauruanga rekareka, tei akaari maataia e Iesu Karaiti.​—Isaia 11:3; Luka 12:5.

E Puapinga te Ngakau Akonokonoia i te Akarongo

Te kite ra te ngakau pakari i roto i te akarongo e noatu e eaa ta Iehova ka pati mai me kare ka akaaere mai na roto i tana Tuatua te tika ua ra e te meitaki ra no tatou. (Isaia 48:​17, 18) Ko tetai tangata ma taua ngakau ka rauka te merengo oonu e te mareka ua ra mei te taangaangaanga i te ako ia Maseli 3:​5, 6, te na ko ra: “E irinaki kia Iehova ma to ngakau katoa ra; auraka ra e irinaki ki toou uaorai kite. Auraka e akangaropoina iaia i toou katoa ra au aerenga; e nana e akakite kia koe i toou ra au arataa.” Inara, ko tetai ngakau te ngere ra i te akarongo, kare ia e irinaki ia Iehova, koia tikai te raveanga i te reira te o maira te au atinga, mei te akamamaanga i to tetai oraanga e raukai i te akara tika atu i te au anoano o te Patireia. (Mataio 6:33) No te au tumu meitaki, te akara ra a Iehova i te ngakau akarongo kore ei mea “kino.”​—Ebera 3:12.

Te akaataia ra to tatou irinaki i roto ia Iehova i te au ngai e manganui, kapiti mai i te au mea ta tatou e rave ra i to tatou uaorai kainga. Ei akaraanga, ka akamanako ana i te kaveinga ia Galatia 6:7: “Auraka e vavare; kare ua te Atua e vare: ko ta te tangata e ruru ra, ko tana ra ïa e kokoti.” Ka akaataia to tatou akarongo i roto i teia kaveinga i roto i te au mea mei te au teata ta tatou e akara ra, te au puka ta tatou e tatau ra, te maata o te apii Pipiria ta tatou e rave ra, e i roto i ta tatou au pure. Ae, ko tetai akarongo te akakeu ra ia tatou kia ruru “i ta te vaerua” ko tetai tumu maata ia e raukai te ngakau akonokonoia kia ariki i ta Iehova au Tuatua e kia akarongo i te reira.​—Galatia 6:8.

Aroa​—Te Tu Maata Roa Atu

Tei maata rava atu i tetai au tu, te akariro ra te aroa i te one o to tatou ngakau kia ariu ua ki ta Iehova Tuatua. No reira, me akaaiteia atu te reira ki te akarongo e te manakonakoanga, kua akataka te apotetoro ko Paulo i te aroa e “ko tei maata ra i taua” au tu. (1 Korinetia 13:13) Ka rauka i te ngakau ki i te aroa no te Atua te merengo anga pakari e te rekareka mei te akarongo anga iaia; kare te reira e akakino i ta te Atua au umuumu anga. Kua tuatua te apotetoro ko Ioane: “Teia oki te inangaro i te Atua, ko te akono i te tana au akauenga; kare oki tana au akauenga i te mea teiaa.” (1 Ioane 5:3) I taua manako rai, kua tuatua a Iesu: “Kia anoano mai te tangata iaku ra, ka akono ïa i taku tuatua: e ka akaperepere mai oki taku Metua iaia.” (Ioane 14:23) Kia kite e ka rauka taua tu aroa i te orongaia. Ae, te inangaro oonu ra a Iehova i te aronga tei akavaitata maira kiaia na roto i te aroa.

Kua kite a Iehova e aronga apa ua tatou e te ara putuputu ra iaia. Noatu rai, kare aia e akamamao iaia mei ia tatou. Ko ta Iehova e akara ra i roto i tana au tavini koia oki ko “te ngakau tiratiratu,” tetai te akakeu ra ia tatou kia tavini puareinga iaia ma “te manako tika roa.” (1 Paraleipomeno 28:9) E tika, kua kite a Iehova e te anoanoia ra te taime e te tauta anga no tatou kia tatanu i te au tu meitaki i roto i to tatou ngakau e kia akatupu i te ua o te vaerua. (Galatia 5:​22, 23) No reira, te akakoromaki marie maira aia ia tatou, “kua kite oki aia i to tatou tu; te manako ra aia e, e one tatou nei.” (Salamo 103:14) I te akaataanga i taua tu, kare a Iesu i akavaavaa pakari ana i tana au pipi no to ratou au tu apa ua mari ra kua tauturu marie e kua akamaroiroi ia ratou. Kare ainei e te akakeu ra taua aroa, tangi aroa, e te akakoromaki marie ia Iehova e Iesu ia koe kia inangaro ia raua?​—Luka 7:47; 2 Petero 3:9.

Me te kite ra koe i tetai taime e mea ngata i te uuti i te au tu mei te teita rai tei aka oonuia, me kare kia akangaangaa i te au tu mei te karaea rai, auraka e taitaia me kare e akamaroiroi koreia. Mari ra, kia angaanga ua e kia akamako ia koe e “tamou marie tikai i te pure,” kapiti atu te pure putuputu anga kia Iehova no tona vaerua. (Roma 12:12) Ma tana tauturu puareinga, ka manuia koe, mei ia Ezera rai, i te akonokono anga i te ngakau e kia “kimi, e e rave, i te ture a Iehova.”

[Tutu i te kapi 31]

Kua tamou a Ezera i tana akono anga i te Atua noatu i Babulonia

[Akameitakianga no te Tataanga i te kapi 29]

Garo Nalbandian