Tu Tau e tu te Akamaata ra i te Au

Mei teaa te meitaki i te ao e naringa te katoatoa i akaari i te tu tau. Ka meangiti mai te maro anga a te au tangata tataki tai, ka meangiti mai te tu tarotaro a te au mema pamiri, ka meangiti mai te taemoemo anga a te au akaaerenga, e ka meangiti mai te tu marokiakia a te pa enua. Ka inangaro ainei koe i te noo ki roto i taua au ngai ra?

TE AKAPAPA nei te au tavini mou o te Atua ko Iehova no tana ao ou taputouia, i roto i te reira te manako maataia ra te tu tau i te ao katoa, kare ei tu paruparu, mari ra ei tu maroiroi e e tu meitaki. (2 Petero 3:13) Ko te tika, te akatupu nei ratou i te tu tau i teianei. No teaa ra? No te mea te umuumu maira a Iehova i teia mei ia ratou. Kua tata tana peroveta ko Mika e: “Kua akakite mai aia kia koe, e te tangata na, i te mea meitaki: e eaa ta Iehova inangaro ia koe ra, mari ra ko te rave i te tuatua-tau, e kia inangaro i te aroa, e te aerenga akamako tikai i to Atua ra?”​—Mika 6:8.

E maata te aite anga o te tu tau, mei te kore te manako iaia uaorai, me kare manako puapinga kore, e te emiemi ra i te akapaapaa i to tetai tu karape, au rauka anga, e te au apinga. Kia tau ki tetai tataanga, te aite anga i te tu tau “te akonoanga i roto rai i te au kotinga.” Ka noo ua tetai tangata tau i roto i te au kotinga o te tu meitaki. Kua kite katoa aia e te vaira te au arai anga i tana ka rave e te ka rauka i te rave. Kua kite aia e te vaira tetai au mea kare i tikaia kiaia. Papu e ka vaitata atu tatou ki tetai au tangata e tu tau to ratou. “Kare atu e apinga meitaki roa i te tu tau tikai,” i tata ei te tangata atu pee Engarani ko Joseph Addison.

Kare te tu tau i te tu natura no te au tangata apa ua. Ka tau tatou kia tauta pakari no te akatupu i teia tu. Ei akamaroiroi anga ia tatou, te akataka maira te Tuatua a te Atua i tetai au tupu anga e manganui te akatutu maira i te tu tau i to te reira au tu tuke tuke.

E Rua Nga Ariki Tau

Ko tetai o te au tavini tiratiratu o Iehova koia oki ko Davida, e mapu tane aia i te akatainu angaia e ko te ariki a te tuatau ki mua o Iseraela. I muri maira, kua tuku te Ariki ko Saula te tutara ra i taua taime i te taomi anga maata ki runga ia Davida na te tautaanga i te tamate iaia e na te maroanga iaia kia noo ei tangata oro ke.​—1 Samuela 16:​1, 11-13; 19:​9, 10; 26:​2, 3.

Noatu i raro i taua au turanga, kua kite a Davida e au arai anga tetai no tana ka rave i te paruruanga i tona oraanga. I tetai atianga i roto i te metepara, kua patoi a Davida i te akatika ia Abisai kia takino i te Ariki ko Saula e moe ra, i te na ko anga: “Kia tāpu mai oki a Iehova iaku, kia kore au e tāki i toku rima ki runga e rave i te tangata o Iehova i akatainuia ra.” (1 Samuela 26:​8-11) Kua kite a Davida e kare ona tika anga kia akaatea ia Saula mei tona turanga ei ariki. No reira kua akaari a Davida i te tu tau i teia atianga na te nooanga i roto rai i te au kotinga o te tu meitaki. Pera katoa, kua kite te au tavini o te Atua i teia tuatau e “tāpu mai oki a Iehova,” te vaira te au mea kare e rauka ia ratou i te rave, noatu me te o maira te oraanga tangata ki roto.​—Angaanga 15:​28, 29; 21:25.

Kua akaari katoa te tamaiti a te Ariki ko Davida ko Solomona i te tu tau ei mapu tane, noatu e tei roto i tetai tu tuke roa. I te akaterono angaia a Solomona, kua manako aia e kare e tau iaia i te akono i te apainga teiaa ei ariki. Kua pure aia: “E teianei, e taku Atua, e Iehova, kua akariro mai koe i to tavini nei ei ariki ei kauono ake i toku metua ia Davida; e tamaiti ua oki au: kare au i kite i te aere ki vao, e i te oki mai ki roto.” Te taka meitaki ra, e kua kite a Solomona e kua kore ona tu karape e te kite anga. Kua akaari aia i te tu tau, kare i manako iaia uaorai, me kare i manako puapinga kore. Kua pati a Solomona kia Iehova i te kite karape, e kua arikiia mai tana pati anga.​—1 Ariki 3:​4-12.

Te Mesia e Tei Aere Atu na Mua Iaia

E tere atu i te 1,000 mataiti i muri mai i to Solomona tuatau, kua rave a Ioane Papetito i tetai angaanga no te akapapaanga i te mataara no te Mesia. E ko tei aere atu na mua i Tei Akatainuia, te akatupu ra a Ioane i te totou Pipiria. Ka rauka ua iaia i te akapaapaa i tana akameitaki anga. Ka rauka katoa ia Ioane i te apai mai i te akangateitei anga ki runga iaia uaorai no te mea e kopu tangata oki aia no te Mesia. Inara kua akakite a Ioane ki tetai atu e kare aia i tau tikai kia tatara i to Iesu tamaka. I te tu mai anga a Iesu e kia papetitoia i roto i te Kauvai Ioridana, kua tuatua a Ioane: “Ko au oki taau e bapetizo e tikaʼi, e e aere mai oki koe kiaku nei?” Te akakite maira teia e kare a Ioane i te tangata akapaapaa ua. E tangata tau ua aia.​—Mataio 3:14; Malaki 4:​5, 6; Luka 1:​13-17; Ioane 1:​26, 27.

I muri ake i te papetito angaia a Iesu, kua akamata aia i tana angaanga orometua tamou, te tutuanga i te tuatua meitaki o te Patireia o te Atua. Noatu e tangata apa kore a Iesu, kua tuatua aia: “Kare ua e mea e tika iaku anake ra kia rave . . . kare au i kimi i toku uaorai anoano, ko te anoano ra o te Metua ko tei tono mai iaku nei.” Pera katoa, kare a Iesu i kimi ana e kia akangateitei ia mai e te tangata, inara kua oronga aia i te kaka kia Iehova no te au mea tana i rave. (Ioane 5:​30, 41-44) Mei teaa atura te tu tau!

Te taka meitaki ra, i reira, kua akaari te au tavini tiratiratu o Iehova​—mei ia Davida, Solomona, Ioane Papetito, e pera katoa te tangata apa kore ko Iesu Karaiti​—i te tu tau. Kare ratou i akapaapaa ana, kare i manako puapinga kore, me kare i manako iaia uaorai, e kua akono i roto rai i te au kotinga. E au tumu meitaki ua ta ratou akara anga no te au tavini i teia tuatau o Iehova kia akatupu e kia akaari i te tu tau. Inara, te vaira tetai atu au tumu no te rave anga i te reira.

I roto i teia tuatau kino i te tuatua enua o te tangata ravarai, e puapinga maata te tu tau ki te au Kerititiano mou. Te akariro ra te reira i tetai kia au ma te Atua ko Iehova, ma te au taeake, e ma ia uaorai.

Au ma te Atua ko Iehova

Ka rauka te au ma Iehova me noo ua tatou i roto i te au kotinga tana i akanoo no te akamori anga mou. Kare to tatou nga metua mua, ko Adamu raua ko Eva, i noo ana ki roto i te au kotinga tei akanooia e te Atua, e kua riro mai raua e ko nga tangata mua tei inga ki roto i te tu tau kore. Kua kopae raua i to raua turanga meitaki ma Iehova, e pera katoa to raua kainga, to raua tuatau ki mua, e to raua au oraanga. (Genese 3:​1-5, 16-19) Mei teaa te maata o te oko ta raua i tutaki ra!

Ka apii ana tatou mei te autu kore o Adamu raua ko Eva, no te mea te akanoo ra te akamori anga mou i te au kotinga e akapeea tatou me rave angaanga. Ei akatauanga, te akakite ra te Pipiria e “kare te kanga, e te akamori idolo, e te akaturi, e te akavaine, e te aronga sodoma, e te keia, e te noinoi apinga, e te konā kava, e te akakino, e te āru, kare anake ïa e noo i te basileia o te Atua.” (1 Korinetia 6:​9, 10) Te akanoo ra a Iehova ma te pakari i teia au kotinga no to tatou meitaki, e ka akaari tatou i te pakari na te nooanga i roto rai i taua au arai anga. (Isaia 48:​17, 18) Te akakite maira a Maseli 11:2 kia tatou: “Tei te aronga akaaka ra te pakari.”

Akapeea me ka akakite mai tetai akaaerenga akonoanga kia tatou e ka rauka ia tatou i te kopae i teia au kotinga e kia rekareka rai i te au ma te Atua? Te tauta ra te reira akaaerenga i te akavare ia tatou. I tetai tua, te tauturu ra te tu tau ia tatou kia tatanu i tetai piri anga vaitata ma te Atua ko Iehova.

Au ma te Au Taeake Tangata

Te akamaata katoa ra te tu tau i te au pirianga au tikai ma tetai. Ei akatauanga, me akanoo te au metua i te akaraanga e kia merengo ua i tei rauka ia ratou e kia tuku i te ngai mua i te au mea pae vaerua, ka akono rai ta ratou tamariki i taua tu. Ka ngoie ua i reira i te aronga ou kia merengo ua, noatu penei kare e tau ana ki ta ratou i inangaro. Ka tauturu teia ia ratou kia akono i te oraanga tau, e ka au te oraanga pamiri.

Ka anoanoia te aronga akaaere kia akono i te tu tau e auraka kia akakino i to ratou mana. Ei akaraanga, kua akoia te au Kerititiano: “Auraka kia rai to kotou manako i te tangata nei i tei tataia ra.” (1 Korinetia 4:6) Kua kite te aronga pakari o te putuputuanga e auraka ratou e tauta i te maro atu ki runga i tetai i ta ratou i manako ra. Mari ra, te taangaanga ra ratou i te Tuatua a te Atua ei tumu anga no te akamaroiroianga i te aerenga tau i te tu meitaki, te kakau, te akamaneaanga, me kare te tarekareka anga. (2 Timoteo 3:​14-17) Me kite atu te au mema o te putuputuanga e te akono ra te aronga pakari i roto rai i te au kotinga Tuatua Tapu, ka akamaata teia i te ngateitei no teia au tangata e te akatupu ra i te tu maana, te inangaro, e te tu au i roto i te putuputuanga.

Au ma ia Koe Uaorai

Ko te aronga te akono ra i te tu tau te tutakiia ra ma te au i roto ua. Kare tetai tangata tau e anoano maata i te turanga. Kare teia e te tuatua ra e kare ana au akakoroanga. Ei akaraanga, penei te anoano ra aia i te au akameitaki anga no te tavini anga, inara te tiaki ra aia i te Atua, e ko tetai ua atu akameitaki anga Kerititiano tana ka rauka mai no ko mai te reira ia Iehova. Kare te reira e manakoia ei au rauka anga iaia uaorai. Te akavaitata ra teia i te tangata tau kia Iehova, “te Atua au ra.”​—Philipi 4:9.

Ka akamanako ana i tetai au taime e kua akangaropoinaia mai tatou e tetai tangata. Kare ainei e mea meitaki kia akangaropoinaia no te mea e tu tau to tatou e kia arataki i te akaraanga kare e tau ana kia tatou uaorai? Kare te aronga tau e anoano ana e kia maata te turanga. No reira, te au ra ratou ma ratou uaorai, e mea puapinga no te tu i te pae ngakau e te kopapa.

Akatupuanga e te Tamouanga i te Tu Tau

Kua tuku ua a Adamu raua ko Eva ki te tu tau kore​—e tu kua tuku mai raua ki ta raua uanga. Na teaa e tauturu ia tatou kia kopae i te rave anga i taua tarevake mei to tatou nga metua i mua ana? Akapeea e raukai ia tatou i te akatupu i te tu meitaki o te tu tau?

Ei akamata anga, te marama meitaki anga i to tatou turanga ma Iehova, Tei Anga i te ao katoa e pini ua ake, ka tauturu ia tatou. Eaa te au rauka anga ka tuatua tatou kia akaaiteia ki te au rauka anga a te Atua? Kua ui a Iehova ki tona tavini tiratiratu ko Iobu: “Iea koe iaku i te akatumu i te enua nei? ka akakite mai na, peneiake te kite na koe.” (Iobu 38:4) Kare i rauka ia Iobu i te pau atu. Mei te reira katoa kare ainei e kua kotingaia to tatou tu kite, tu karape, e te kite anga? Kare ainei e mea meitaki no tatou kia akakite i to tatou au kotinga?

Pera katoa, te akakite maira te Pipiria kia tatou e: “No Iehova te enua, e tona ki katoa ra; te ao nei, e tei noo i reira.” Te kapiti maira teia i “te au puaka i runga i te au maunga ra e tausani ua atu.” Ka tika ia Iehova kia tuatua: “Naku te ario, e naku rai te auro.” (Salamo 24:1; 50:10; Hagai 2:8) Eaa te au apinga ka rauka ia tatou i te akaari e kia akaaite atu ki ta Iehova? Eaa ra, kare a te tangata apinganui tumu no te akapaapaa i tei rauka iaia! No reira, e mea pakari kia aru i ta te apotetoro ko Paulo ako anga akauruia ki te au Kerititiano i Roma: “Teia taku tuatua kia kotou katoatoa e ope rava ake, i te meitaki i orongaia mai kiaku nei, eiaa e maata te manako iaia uaorai.”​—Roma 12:3.

Ei au tavini no te Atua te anoano ra i te tatanu i te tu tau, kia pure tatou no te ua o te vaerua​—te inangaro, te rekareka, te au, te akakoromaki, te takinga-meitaki, te meitaki, te akarongo, te maru, te akono meitaki. (Luka 11:13; Galatia 5:​22, 23) No teaa ra? No te mea ka akariro teia au tu tataki tai e kia mama ua no tatou kia tau ua. Ei akatauanga, te inangaro i te au tangata ka tauturu ia tatou kia tamaki i te tu akapaapaa ua me kare manako iaia uaorai. Ka akariro te akono meitaki ia tatou kia tapu e kia manako i mua ake ka rave ei i te tau kore.

Kia matakite tatou! Ka anoano putuputuia tatou e kia matakite no te au tu tau kore. E rua o te au ariki tei taikuia mai i mua ake kare i akono ana i te tu tau i tetai au atinga. Kua angaanga rave kino te Ariki ko Davida na te tare anga i to Iseraela, e angaanga patoi i te anoano o Iehova. Kua rave tau kore te Ariki ko Solomona e tae ua atu e kua piri ki roto i te akamori anga pikikaa. ​—2 Samuela 24:​1-10; 1 Ariki 11:​1-13.

I teia akatereanga atua kore e vai nei, ka anoanoia te matakite tamou e raukai te tu tau. Inara, e puapinga te aruaru anga. I ta te Atua ao ou, ka vai ki roto i te taiate tangata te aronga tau ua. Ka manako ratou i te tu tau ei tu maroiroi, kare i te tu paruparu. Mei teaa atura te meitaki i reira me akameitakiia te au tangata tataki tai e te au pamiri ma te au e te tu tau!

[Tutu i te kapi 23]

Kua oronga tau ua a Iesu i te meitaki kia Iehova no te au mea tana i rave