E Akapumaana i Roto i te Maroiroi o Iehova

“I rotopu i toku nei manako mirimiri-ngata i roto iaku nei, na to akapumaana e akarekareka mai i toku vaerua.”​—SALAMO 94:19.

KI TE katoatoa te anoano ra i te akamaru anga, e au tuatua akapumaana ta te Pipiria. No reira rai The World Book Encyclopedia i tuatuai e e “manganui te au tangata tei uri ki te Pipiria no te akapumaana, te manakonakoanga, e te arataki anga i te au tuatau manamanata e te papu kore.” No teaa ra?

No te mea kua akauruia te Pipiria e Tei Anga aroa mai ia tatou, “te Atua nona anake te pumaana,” ko Tei ‘akapumaana mai ia tatou i to tatou au mate katoa nei.’ (2 Korinetia 1:​3, 4) Koia te ‘akaarite mai te Atua nona te pumaana.’ (Roma 15:5) Kua akanoo a Iehova i te akaraanga no te oronga anga mai i tetai au ravenga akapumaana no tatou katoatoa. Kua tuku mai aia i tana Tamaiti anau tai, ko Iesu Karaiti, ki te enua kia oronga mai kia tatou i te manakonakoanga e te akapumaana. Kua apii a Iesu: “I aroa mai te Atua i to te ao nei, kua tae rava ki te oronga anga mai i tana Tamaiti anau tai, kia kore e mate te akarongo iaia, kia rauka ra te ora mutu kore.” (Ioane 3:16) Te akataka ra te Pipiria ia Iehova e ko Tei “akateiaa ia matou i te meitaki, ko te Atua ïa to matou nei ora.” (Salamo 68:19) Ka rauka i te au tangata mataku i te Atua i te tuatua papu e: “Kua tuku au ia Iehova ei mua ua rai iaku; tei toku rima katau aia kare au e ngaueue.”​—Salamo 16:8.

Te akaari maira te reira au irava Pipiria i te aroa oonu o te Atua ko Iehova no tatou no te tangata nei. Te taka meitaki ra e e ngakau tae tona​—e pera katoa ka rauka iaia​—i te oronga mai i te pumaana maata e kia akamaru mai i to tatou mamae i te au tuatau taitaia. “Te oronga nei aia i te maroiroi no tei paruparu; e te akamaata nei aia i te maroiroi no tei apikepike.” (Isaia 40:29) Akapeea, i reira, e raukai ia tatou te akapumaana i roto i te maroiroi o Iehova?

Te Tupu Anga Maru o te Akono Anga a Iehova

Kua tata te tata taramo e: “E tuku koe i taau apainga kia Iehova ra, e nana koe e tauturu mai; kare rava aia e vaoo ua atu i te tangata tuatua-tika kia akangaueueia ra.” (Salamo 55:22) Ae, te manako maira te Atua ko Iehova i te pamiri tangata. Kua akapapu te apotetoro ko Petero i te au Kerititiano i te anere mataiti mua: “Koia [te Atua] oki te tiaki mai ia kotou.” (1 Petero 5:7) Kua tuatua maata a Iesu Karaiti i te puapinga ta te Atua i tuku ki runga i te au tangata na te tuatua anga: “Kare aina taki rima manu rikiriki i okoia i nga asario e rua nei? e kare rai tetai i ngaro i te Atua. E kua ope oki te rauru o to kotou mimiti na i te tatauia. Auraka mari kotou e mataku: e maata to kotou meitaki i to te au manu rikiriki e manganui.” (Luka 12:​6, 7) E puapinga tikai tatou ki te Atua e te manako maira aia i te mea meangiti roa no runga ia tatou. Kua kite aia i te au mea kare tatou uaorai i kite no te mea te manako oonu maira aia ia tatou tataki tai.

Te kiteanga e te manako maira a Iehova kua riro ei akapumaana anga kia Svetlana, te mapu akaturi tei taikuia i roto i te atikara i mua ana. Te vaitata ra aia i te tamate iaia uaorai i te aravei anga aia i te Au Kite o Iehova. I reira kua ariki aia i tetai apii Pipiria, tei tauturu iaia kia matau mai ia Iehova ei peretana tika tikai e te manako maira iaia. Kua akakeu teia i tona ngakau, i te oparaanga iaia kia taui i tona tu oraanga e kia akatapu iaia uaorai ki te Atua. Kua oronga katoa te reira kia Svetlana i te akangateitei uaorai tana i anoano kia tamou marie noatu tona au manamanata e kia manako papu no runga i te oraanga. “Te papu nei iaku,” i tuatuai aia i teianei, “e kare rava a Iehova e akaruke mai iaku. Kua kitea e au e ko tei tataia i roto ia 1 Petero 5:7 e mea tika tikai. Te tuatua ra: ‘E uri i to kotou tumatetenga katoa ki runga [ia Iehova]; koia oki te tiaki mai ia kotou.’”

Akapumaana te Manakonakoanga Akanooia ki Runga i te Pipiria

Ko tetai mataara te oronga maira te Atua i te akapumaana koia oki na roto i tana Tuatua tataia, tei roto i reira te manakonakoanga umere no te tuatau ki mua. Kua tata te apotetoro ko Paulo: “Te au tuatua ravarai oki i tataia i muatangana, i tataia ïa kia kite tatou; kia rauka to tatou tatari anga, i te akakoromaki e te pumaana o te tuatua i tataia ra.” (Roma 15:4) Kua tuatua taka meitaki a Paulo i te pau anga i rotopu i te manakonakoanga mou e te pumaana i te tataanga aia: ‘E teianei, . . . na to tatou Atua, ko to tatou Metua ra, ko tei aroa mai ia tatou nei, e kua oronga mai oki i te rekareka mutu kore, e te irinakianga meitaki i tona aroa ua, e akapumaana mai i to kotou ngakau, e e akatinamou oki ia kotou i te au angaanga e te au tuatua memeitaki katoa ra.’ (2 Tesalonia 2:​16, 17) Te kapiti maira ki teia “irinakianga meitaki” te manakonakoanga o tetai oraanga tiama, mataora e te ope kore ki runga i te enua parataito.​—2 Petero 3:13.

Kua akamaroiroi taua manakonakoanga kaka e te papu ia Laimonis, te tangata ngoru kona kava tei taikuia i roto i te atikara i mua ana. I te tatauanga i te au puka akanooia ki runga i te Pipiria a te Au Kite o Iehova, kua rekareka tikai aia i te apii anga no runga i tetai ao ou i raro ake i te Patireia o te Atua, i reira ka akameitaki akaouia tona oraanga kopapa. I roto i te Pipiria, kua tatau aia i te taputou kaka ka aru mai no runga i te rapakauanga temeio: “Ei reira e akapueraiaʼi te mata o te matapo ra, e e akapu tataiaʼi te taringa o te turi ra. Ei reira te pirikoki e rererere aere ei mei te aili, e imene mai oki te vaa o te murare.” (Isaia 35:​5, 6) E tau ei i te oraanga i roto i taua Parataito, kua rave a Laimonis i te au taui anga maata. Kua akaruke aia i te inu kava, e kua kiteia mai tona taui anga e tona au tangata i te pae mai e te au taeake. Te rave nei aia i teianei i tetai au apii Pipiria, te tuaanga ki tetai ke i te akapumaana ka rauka i te manakonakoanga tei akanooia ki runga i te Pipiria i te oronga mai.

Te Angaanga a te Pure

Me mamae to tatou ngakau no tetai tumu, ka rauka ia tatou te akapumaana na te pureanga kia Iehova. Ka rauka i te reira i te akaatea ke i te apainga. Ia tatou e pati akaaka ra, penei ka akapumaanaia tatou na roto i te akamaaraanga i te au mea tei tuatua ia i roto i te Tuatua a te Atua. Mei tetai pure manea rai te taramo roaroa i roto i te Pipiria. Kua imene tei atu i te reira e: “Te manako nei au i taau ra au tuatua-tau taito, e Iehova, e kua akapumaana au iaku uaorai.” (Salamo 119:52) I roto i te au turanga ngata tikai, koia tikai tera te o maira te tumatetenga i te pae oraanga, e putuputu te taime kare okotai pau anga. I roto i to tatou uaorai maroiroi, penei kare tatou i kite tikai e ka uri kiea. E manganui tei kite i te mea e kua raveia tei rauka, i te urianga ki te Atua na roto i te pure kua tupu mai te akapumaana maata, i tetai au taime, i roto i te au angaanga kare i kiteia ana.​—1 Korinetia 10:13.

Kua kite a Pat, tei apaina vivikiia ki te pia tumatetenga o te are maki, i teia tupuanga akapumaana o te pure. I muri mai i te meitaki anga mai aia, kua tuatua aia: “Kua pure au kia Iehova e kua kite tikai e kia akaruke au i toku oraanga ki roto i tona nga rima, i te irinakianga iaia kia rave i tana i anoano. I teia tuatau katoa, kua maru mai au; kua kite au i te au ma te Atua tei taikuia ia Philipi 4:​6, 7.” Mei teaa ra te akapumaana anga i teia au irava kia tatou katoatoa! I reira te ako maira a Paulo ia tatou: “Auraka rava kotou e apiapi i te au mea katoa nei; e akakite ua ra ki te Atua i to kotou anoano i te au mea katoa ra i te pure, e te pati anga atu ma te akameitaki. E na te au o te Atua, ko tei maata ua atu i te kite tangata, e akamaroiroi mai i to kotou ngakau e to kotou manako i te Mesia nei ia Iesu.”

Te Vaerua Tapu ei Akapumaana

I te po i mua ake i tona matenga, kua akakite meitaki a Iesu ki tana au apotetoro e kare e roa atu ka akaruke aia ia ratou. Kua akamanamanata teia e kua akataitaia ia ratou. (Ioane 13:​33, 36; 14:​27-31) Te kiteanga e te anoano ra ratou i te pumaana, kua taputou a Iesu: “Naku oki e pati atu i te Metua ra, e nana e oronga mai i tetai Akapumaana ia kotou, kia noo tikai ki o kotou nei e tuatau ua atu.” (Ioane 14:16) Te taiku nei a Iesu i konei i te vaerua tapu o te Atua. I tetai atu au mea, kua akapumaana te vaerua o te Atua i te au apotetoro i to ratou tuatau timataanga e kua akaketaketaia ratou kia rave tamou ua atu i te anoano o te Atua.​—Angaanga 4:31.

Kua rauka ia Angie, vaitata rai mei mate tana tane i te u anga kino tikai, i te autu manuia tikai ma te au taitaia katoatoa e te mamae o tona turanga. Na teaa i tauturu iaia? Kua tuatua aia: “Ma te kore te tauturu a te vaerua tapu o Iehova, kare e rauka ia maua te autu i ta maua i kite e kia vai ketaketa ua. E tikai kua kiteia te maroiroi o Iehova i roto i to maua au tu paruparu, e kua riro aia ei punanga i roto i to maua tuatau taitaia.”

Tetai Akataeake Anga Akapumaana Tikai

Noatu e eaa te turanga o tetai tangata i te oraanga, noatu e eaa te au turanga mamae te ka tupu mai, ka tau aia kia kite i te akapumaana i roto i te akataeake anga te vai nei i roto i te putuputuanga a Iehova. Te oronga mai nei teia akataeake anga i te turuanga pae vaerua e te tauturu i te aronga tei piri mai ki te reira. I roto i reira, ka kitea e tetai tetai pupu aroa, te manako ua maira, e au oa akapumaana, te papa ra e te puareinga ra i te tauturu e te akapumaana i tetai atu i roto i te au tuatau taitaia.​—2 Korinetia 7:​5-7.

Kua apiiia te au mema o te putuputuanga Kerititiano kia “takinga-meitaki tatou i te tangata ravarai, kia maata atura ki to te ngutuare o te akarongo ra.” (Galatia 6:10) Te akakeu ra te apii anga akanooia ki runga i te Pipiria ia ratou kia akaari i te tu aroa taeake e te aroa maru ki tetai e tetai. (Roma 12:10; 1 Petero 3:8) Te akakeuia ra te au taeake tungane e te au tuaine i te pae vaerua i roto i te putuputuanga kia takinga meitaki, kia akapumaana, e kia tangi aroa.​—Ephesia 4:32.

Kua kite a Joe raua ko Rebecca, tei ngere ma te tumatetenga i ta raua tamaiti i roto i te mate, i te reira tauturuanga akapumaana mei te au mema o te putuputuanga Kerititiano. Kua tuatua raua: “Kua tauturu mai a Iehova e tana putuputuanga aroa ua ia maua i roto i to maua tuatau tumatetenga. Kua rauka mai e anere ua atu te au kati, te au reta, e te ringianga mai na roto i te terepaoni. Te akariro nei teia ia maua kia ariki e mei teaa tikai te meitaki i to tatou akataeake anga. Koi vai poitirere ei maua mei te tumatetenga, e manganui te au putuputuanga i reira tei aere mai i te tauturu ia maua, te orongaanga mai i te au kai e te tamaanga i te kainga.”

E Akamaroiroi!

Me akamata te au matangi kino i te aangi, e kua topa aroa kore ua mai te ua e te ua kiona o te taitaia, te papa ra te Atua i te oronga mai i te paruru anga akapumaana. Kua akapera tetai o te au taramo i te akataka anga iaia e te oronga maira i te paruru anga akapumaana: “Ka tapoki aia ia koe i tona ra uruuru, e ka ora koe i raro ake i ona puke peau.” (Salamo 91:4) Te akatutuanga i konei penei e mei te aeto rai. E tutuia no tetai manu te kite ra i te tumatetenga e oti ka oora i tona nga peau ei paruru i tana punua. I roto i tetai tu maata atu, te riro ra a Iehova ei Paruru mou no te katoatoa te kitea ra te punanga i roto iaia.​—Salamo 7:1.

Me te inangaro ra koe i te apii maata atu no runga i te Atua, i tona tu peretana, tana au akakoroanga, e tona turanga ka rauka i te oronga i te pumaana, te patiia atu nei koe kia apii i tana Tuatua. Ka mataora te Au Kite o Iehova i te tauturu atu ia koe i roto i teia tauta anga. Ae, ka rauka ia koe te akapumaana i roto i te maroiroi o Iehova!

[Au Tutu i te kapi 7]

Ka rauka i te manakonakoanga tei akanooia ki runga i te Pipiria no te tuatau ki mua i te oronga mai i te akapumaana