Ko Tatou te Aronga e Akarongo Tetai
Akatupuanga i te Akarongo na te Apii Pipiria i Initia
MEI te au maunga Himalaya akaieie, tapokiia i te kiona i te tua tokerau ki te taatai veravera o te Moana Initia i te tua apatonga, e enua tuketuke tikai a Initia, i te tu o te enua e te au akonoanga. I te katoa anga o te iti tangata, i runga ake i te okotai pirioni, e vaitata ki te 83 patene e au Hindu, e 11 patene e au Muslim, e ko te toenga e au Kerititiano, e au Sikh, e au Buddha, e te au Jain. Te rekareka ra te katoatoa i te akamori anga rangatira. “E tuanga maata tikai to te akonoanga i roto i te oraanga o te au Initia,” i tuatuai The World Book Encyclopedia.
Te nooanga tau ma to ratou akarongo Kerititiano te akataka meitaki maira i te Au Kite o Iehova, tei numeroia e maata atu i te 21,200 i Initia. Mei to ratou au taeake pae vaerua i roto i tetai atu au tuanga o te ao, kua manako te Au Kite i Initia e e akameitakianga kia tauturu i to ratou au tangata i te pae mai kia akatupu i tetai akarongo ketaketa i te Tuatua a te Atua, te Pipiria Tapu. (2 Timoteo 3:16, 17) E akamanako ana i akapeea i rauka mai ei i tetai ngutuare tangata i Chennai i te tua tonga o Initia tetai kite o te tuatua mou Pipiria.
I mua ake i to ratou aravei anga i te Au Kite o Iehova, kua o maroiroi teia ngutuare tangata ki roto i te au angaanga oraora Katorika, te karanga anga e kua kitea te au orama, te tuatua anga i te au reo, e te rapakau anga i te maki. E taoonga maata to ratou i roto i te akonoanga e te komiuniti, te akataoonga katoa ra te tangata i tetai au mema o te ngutuare tangata ei “swami,” te aiteanga “e atu.” Inara i tetai ra kua atoro atu tetai Kite i te ngutuare tangata e kua akaari atu kia ratou mei te Pipiria mai e ko Iesu te Tamaiti a te Atua, kare i te Atua Mana Katoatoa, mei tei irinaki matauia. Kua akaari katoa atu te kite kia ratou e ko Iehova to te Atua ra ingoa e ko to Iehova ra akakoroanga no te enua kia maaniia te reira ei parataito manea tikai.—Salamo 83:18; Luka 23:43; Ioane 3:16.
No te mea kua akangateitei ratou i te Tuatua a te Atua e kua rekareka i ta ratou i akarongo, kua ariki teia ngutuare tangata ki tetai apii Pipiria putuputu ma te Au Kite o Iehova. Kua apai mai teia i te aviri anga mei to ratou au oa akonoanga. Inara, kua manako vai tamou te ngutuare tangata kia rave ua atu i ta ratou apii Pipiria. I to ratou kite e tupu atura kua tupu to ratou akarongo, kua akamutu ratou i ta ratou au angaanga akonoanga pikikaa. I teia tuatau nei, e toru mema o teia ngutuare tangata e nga Kite maroiroi papetitoia, e te tavini ra te mama ei painia tauturu i te au tuatau ka rauka.
Te Akarongo kia Autu i te Au Pirikoki
Kua umuumu a Sunder Lal, ko tetai tangata mapu te noo ra i tetai vira i te Punjab, i te akarongo maata e te maroiroi kia akakite atu i te tuatua meitaki o te Patireia o te Atua ma etai atu. (Mataio 24:14) Ko tetai tumu, kua akaruke aia i te au irinakianga i te au atua e manganui o tona ngutuare tangata e te vira kia akamori i te Atua mou, ko Iehova. Ko tetai atu tumu, kare o Sunder Lal nga vaevae.
E tae ua atu ki te 1992, kua tau ua te oraanga o Sunder Lal. Kua angaanga aia ei tauturu taote e kua piri atu aia ki tona uaorai ngutuare tangata i te akamori anga i te au atua tuketuke i raro ake i te arataki anga o to ratou puapii akonoanga ikiia. Inara i tetai po, kua inga aia i te tikotianga i te ara rerue. Kua oro tetai rerue na runga ake iaia e kua motu tona nga vaevae e tae ki te ua. Noatu e kua ora aia, kua pueu tona ao. Ma te marama, kua taitaia tikai a Sunder Lal e kua manako katoa aia i te tamate iaia uaorai. Kua turu tona ngutuare tangata iaia, inara kare ona manakonakoanga no te tuatau ki mua.
I reira kua atoro atu tetai o te Au Kite o Iehova ia Sunder Lal e kua akaari atu kiaia mei te Pipiria maira e kua taputou te Atua i te rave i te enua ei parataito ruperupe tikai e ka oronga i te ora anga apa kore ki te aronga katoatoa te aroa ra e te mataku ra iaia. Kua ariki a Sunder Lal i te apii Pipiria, e kua apii maroiroi aia no tetai mataiti okotai. Kua patiia aia ki te au uipaanga Kerititiano e i te openga ra kua aere aia na muri i te patikara o tetai taeake. Noatu e kua mamae te akaoro anga, kua maata tikai te akameitaki anga. Kua marama aia i te au mea tana i apii mai i roto i tana apii Pipiria i te araveianga aia i tetai atu tei irinaki tikai i te au taputou o te Tuatua a te Atua e kua noo rotai ma te au apiianga Pipiria.
Kua akamata Sunder Lal i te akakitekite atu i te au tuatua meitaki ma tona au tangata i te pae mai, e i te 1995 kua papetitoia aia. I te akamataanga, kua aere atu aia i roto i te angaanga orometua na te uutianga iaia mei tetai ngutupa ki tetai ngutupa i roto i tona vira, ko tona aerenga matauia te reira. Inara i teianei kua rauka mai iaia tetai apinga aroa mei tona au taeake pae vaerua—ko tetai patikara e toru uira takake tei “takatakaia” e te rima. No tona patikara e toru uira, te maata nei tona initipeniteni e ka rauka iaia uaorai i te aere e 12 kiro mita ki te au uipaanga putuputuanga. I tetai taime kua takatakaia aia na roto i te ua pakari tikai; i tetai atu taime tei runga ake te vera i te 43 tekiri Celcius.
E kapiti atu ki te aerenga ki te au uipaanga, kua rave a Sunder Lal i te au apii Pipiria e manganui ma tetai atu te inangaro ra i te tauturu kia akatupu i te akarongo ketaketa i te Atua mou, ko Iehova. Ko te tika, e itu o tana au apii Pipiria kua papetitoia i teianei, e pera katoa i tetai atu nga tangata e toru tana i aravei, inara kua apiiia i te Pipiria e tetai atu au taeake Kite.
Kia tau ki ta te Pipiria, “kare oki i ope katoatoa te tangata i te akarongo.” (2 Tesalonia 3:2) Inara no “te aronga i akonoia no te ora mutu kore ra,” ka rauka i tetai apii putuputu i te Tuatua a te Atua i te patu i te akarongo ketaketa. (Angaanga 13:48) Ka rauka katoa i taua apii ra i te akakaka i te mata ma te manakonako anga o tetai tuatau manea tikai ki mua—ko tetai apinga te maata atura te au tangata i Initia i te tuku i to ratou akarongo.
[Mapu i te kapi 30]
(No teia i runga, akara i te puka)
AFGHANISTAN
PAKISTAN
NEPAL
BHUTAN
CHINA
BANGLADESH
MYANMAR
LAOS
THAILAND
VIETNAM
CAMBODIA
SRI LANKA
INDIA
[Akameitakianga]
Mountain High Maps® Copyright © 1997 Digital Wisdom, Inc.