E Mana to te Manakonako Anga Tuakaouanga
“I akaruke ei au i te au mea katoa ra, . . . kia kite oki au [ia Iesu Karaiti], e te marōrō o tona tuakaouanga.”—PHILIPI 3:8-10.
1, 2. (a) I te au mataiti roa kua topa, akapeea te akataka anga a tetai orometua i te tuakaouanga? (e) Ka akapeea ra te tupu anga o te tuakaouanga?
I TE tuanga mua o te 1890 ra, kua ripoti mai te nutipepa no tetai akoanga taka ke tei orongaia mai e tetai orometua i Brooklyn, New York, U.S.A. Kua karanga aia e ko te tuakaouanga ka raveia na te akaputu akaouanga e te akaoraanga i te au ivi katoatoa e te kiko katoa no te kopapa o te tangata ra, me i akapouia i te ai me kare na te tumatetenga, me na tetai manu taae e kai me kare i riro ua ei maniua. Kua akakite taua vaa tuatua ra e a tetai ra akatakaia e 24 ora, ka riro kia kerekere te reva i te au rima, e runga ake oki, te au vaevae, te au mangamanga rima, te au ivi, au uaua, e te pakiri no te au pirioni ua atu au tangata mate ra. Ka kimi teianei au tuanga i etai atu ngai no tona kopapa uaorai. Ei reira ka aere mai ei te au meta mei te rangi mai e mei era mai oki kia noo ki roto i teianei au kopapa akatutuia maira.
2 Kare e tau te tuakaouanga na roto i tetai akapapa akaouanga o te au atomu taito o te kopapa mua ra, e kare katoa oki e meta mate kore o te au tangata ra. (Koheleta 9:5, 10; Ezekiela 18:4) Kare a Iehova, koia ra te Atua no te tuakaouanga e umuumu kia akaputu akaouia mai te au atomu no te kopapa mua mai o tetai tangata ra. Ka rauka iaia i te maani i te au kopapa ou no te aronga akatuakaouia maira. Kua oronga a Iehova i te mana ki tana Tamaiti, kia Iesu Karaiti kia akatu mai i te mate ra, ma te tika no te ora mutu kore. (Ioane 5:26) No reira kua tuatua Iesu: “Ko au te tuakaouanga, e te ora; ko te akarongo mai iaku ra, mate ua atu rai, ka ora ra ïa.” (Ioane 11:25, 26) Mei teaa ra tetai taputou akapumaana ngakau! Te akamaroiroi maira ia tatou kia akakoromaki i te au timataanga e kia aro atu oki i te mate ei Au Kite tiratiratu no Iehova.
3. Eaa ra i tau ei a Paulo kia paruru i te tuakaouanga ra?
3 Kare te tuakaouanga e rotai atu ma te apiianga e e meta mate kore to te au tangata—ko tetai manako no Plato e tangata apii Ereni ra. No reira, eaa tei tupu i ta te apotetoro ko Paulo akakitekite anga ki te au Ereni i runga i te Areopagus i Atene ra, i te tuatua anga no Iesu, e na te Atua i akatuakaou mai iaia? Te tuatua ra te tataanga: “Kite akera ra ratou i te tuatua i te tuakaouanga i tei mate ra, kua taitoito maira tetai pae.” (Angaanga 17:29-34) E manganui tei akara ra ia Iesu Karaiti tei akatuakaouia ra te ora ra i reira, noatu rai te taitoito anga ra, kua tuatua akakite ra ratou e kua akatuia mai aia mei te mate maira. Inara ko te aronga apii pikikaa tei piri atura ma te putuputuanga i Korinetia kua akakore i te tuakaouanga ra. No reira kua rave a Paulo i tetai paruru anga ririnui no teianei apii anga Kerititiano ia 1 Korinetia pene 15 ra. Na te apii matakite i tana au taumaro anga te akapapu ekoko kore maira i te tika e te mana oki o te manakonako anga tuakaouanga.
Akapapu Ketaketa Anga i to Iesu Tuakaouanga
4. Eaa te akapapu akara anga mata ta Paulo i oronga no to Iesu ra tuakaouanga?
4 E akamanako i akapeea ta Paulo akatuera anga i tana paruru anga. (1 Korinetia 15:1-11) Me kare ra to Korinetia i riro puapinga kore ua mai ei aronga akarongo, ka mou ra ratou i te tuatua mou no te ora. Kua mate a Karaiti no ta tatou au ara, kua tanumia, e kua akatuia mai. Ko te tika, kua akatuakaouia maira Iesu kua mama atu kia Kepha [Petero], “e i te ngauru ma rua i muri ake.” (Ioane 20:19-23) Kua kitea aia e te au taeake e 500 katoa, penei i tana akauenga: ‘Ka aere e akariro i to te pa enua ei pipi.’ (Mataio 28:19, 20) Kua akara a Iakobo iaia, pera katoa te au apotetoro tiratiratu ra. (Angaanga 1:6-11) I vaitata ua ia Damaseko, kua mama atura Iesu kia Saula “mei te mea e e maemo au”—mei te mea ra e kua akatuia aia ki te oraanga vaerua. (Angaanga 9:1-9) Kua riro to Korinetia ra ei aronga akarongo no te mea kua tutu atura Paulo kia ratou, e kua ariki oki ratou i te tuatua meitaki ra.
5. Eaa te papa anga no ta Paulo manakoanga tei tataia ia 1 Korinetia 15:12-19?
5 E akara i ta Paulo papa anga manako. (1 Korinetia 15:12-19) I te mea e kua tutu te aronga tei akara mata e kua akatuakaouia a Karaiti, akapeea e raukai kia tuatuaia e kare e tuakaouanga? Naringa kare a Iesu i akatuia mei te mate mai, e puapinga kore ta tatou tutuanga e to tatou akarongo oki, e kua riro tatou ei pikikaa tei akakite ke ra i ta te Atua na te tuatuaanga e kua akatuakaou aia ia Karaiti. Me kare tei mate ra i akatuia ake, ‘te vai ua na tatou i roto i to tatou ara,’ e ko te aronga tei mate atu i roto ia Karaiti kua pou takiri atu. Pera katoa oki, me “tei teianei ao anake ra ta tatou e tiaki i te Mesia nei, e kino maata to tatou i to te tangata ravarai nei.”
6. (a) Eaa ta Paulo tuatua i te akapapu anga i to Iesu tuakaouanga? (e) Eaa “te enemi openga,” e akapeea te takore anga i te reira?
6 Kua akapapu maira Paulo i to Iesu tuakaouanga. (1 Korinetia 15:20-28) I te mea ko Karaiti “te momua” o te aronga i topa i te moe ra, ka akatuakaou katoaia mai etai atu ra. I te mea i tupu mai te mate i te akarongo kore o Adamu ra, ko te tuakaouanga na roto mai i tetai tangata—ko Iesu. Ko te aronga nona ra ka akatuia mai i te tuatau o tona parutia ra. “Kia ope rava te aronga au, e te mana, e te maroiroi,” i te akakoreia e Karaiti, tei patoi ra i to te Atua tu ngateitei e ka tutara aia e Ariki tae roa kia tukua e Iehova te au enemi ravarai ki raro i ona vaevae. Noatu rai ko “te enemi openga”—ko te mate tei akatuangaia maira ia Adamu—ka akakoreia na roto i te tutaki tau o te atinga o Iesu ra. Ei reira a Karaiti e oronga ei i te Patireia ki tona Atua e te Metua oki, ma te kauraroanga iaia uaorai “i raro ake iaia ra; kia riro ko te Atua i rungao i te au mea katoa i te au ngai ravarai.”
Papetitoia no Tei Mate Ra?
7. Koai ma tei “bapetizoiaʼi ei tuā i te aronga i mate ra,” e eaa te aite anga o te reira no ratou ra?
7 Kua uiia ki te aronga patoi i te tuakaouanga ra: “Eaa iora tetai aronga i bapetizoiaʼi ei tuā i te aronga i mate ra”? (1 Korinetia 15:29) Kare te aiteanga o ta Paulo tuatua e ko te aronga ora ra ka papetitoia no te aronga kua mate ra, no te mea ka tika ta Iesu au pipi uaorai kia apii, kia irinaki, e kia papetitoia. (Mataio 28:19, 20; Angaanga 2:41) Te au Kerititiano akatainuia te “bapetizoiaʼi ei tuā i te aronga i mate ra” na te taruku anga ki roto i tetai aerenga oraanga te ka taki atu ki te matenga e te tuakaouanga. Ko teianei tu papetitoanga te akamataia ra i te akakeu anga te vaerua o te Atua ra i te manakonakoanga no te rangi ki roto ia ratou e ka akaopeia me ka akatuia mai ratou mei te mate maira ki te oraanga vaerua mate kore i te rangi ra.—Roma 6:3-5; 8:16, 17; 1 Korinetia 6:14.
8. Eaa ta te au Kerititiano ka papu noatu rai me ka tamate a Satani e tona au tavini ra ia ratou?
8 Mei ta te au tuatua a Paulo i akakite maira, na te manakonako anga tuakaouanga e raukai i te au Kerititiano kia tu atu ki roto i te tu kino i te au ora ravarai e kia aro atu ki te mate i te au ra katoa oki no te raveanga i te angaanga tutuanga Patireia. (1 Korinetia 15:30, 31) Kua kite ratou e ka rauka ia Iehova te akatuakaou mai ia ratou me ka tuku aia ia Satani e tona au tavini kia tamate ia ratou. Na te Atua anake e raukai kia takore atu i to ratou meta, me kare oraanga, i Gehena, tei akatutu maira i te akapou anga mutu kore.—Luka 12:5.
Te Umuumu Anga kia Matakite
9. Me kia rauka te mana tamou marieanga i to tatou oraanga no te manakonako anga tuakaouanga, eaa ta tatou ka tika kia kopae ke?
9 Na te manakonako anga tuakaouanga i turu ia Paulo. Iaia i Ephesia, penei kua uriia atu aia e tona au enemi ki roto i te ngai tamaki anga i te au puaka taae ra. (1 Korinetia 15:32) Me tupu ake te reira ka akaoraia aia, mei ia Daniela rai i akaoraia maira i te au riona ra. (Daniela 6:16-22; Ebera 11:32, 33) I te mea i manakonako aia i te tuakaouanga, kare ia Paulo te tu manako apoteiti Iuda i te tuatau ia Isaia ra. Kua karanga ratou: “E kai tatou, e e inu oki; apopo oki tatou e mate ei!” (Isaia 22:13) Me e mana turu anga to te manakonako anga tuakaouanga i to tatou oraanga mei to Paulo rai, ka tika tatou kia kopae ke i taua aronga e vaerua tau kore ra to ratou. “Auraka e vavare,” ta Paulo i akamatakite. “E kino te tuatua meitaki i te kapiti anga kikino ra.” (1 Korinetia 15:33) Inara ko teianei kaveinga te piri atura ki te au tu tuke tuke o te oraanga.
10. Akapeea ka orai to tatou manakonako anga tuakaouanga?
10 Ki te aronga tei ekoko ra i te tuakaouanga, kua tuatua a Paulo: “Kia ara e tikaʼi, auraka e rave i te ara; kare oki tetai papaki i kite i te Atua: kia akama kotou i pera atu ei au.” (1 Korinetia 15:34) I teianei “tuatau openga,” ka tau tatou kia rave rotai ma te kite tika i te Atua e Karaiti. (Daniela 12:4; Ioane 17:3) Na teia e tamou marie kia ora to tatou manakonako anga tuakaouanga.
Akatuakaouia ma Teea Kopapa?
11. Akapeea ta Paulo akatutu anga i te tuakaouanga o te au Kerititiano akatainuia ra?
11 Kua akono mai a Paulo i muri akera i etai au uianga. (1 Korinetia 15:35-41) Penei ei tauta anga kia akatupu te ekokoanga ki runga i te tuakaouanga, kua ui tetai e: “E akapeea kia akatu i tei mate ra? Ae, e eaa te tu o to ratou kopapa kia tu mai?” Mei ta Paulo i akaari maira, ko tetai ua tei ruruia ki roto i te one ra ka mate ia i tona taui anga me tupu mai ei rakau. Mei te reira kotoa, ka tika tetai tangata tei anauia i te vaerua ra kia mate. Mei tetai rakau tei tupu maira no tetai ua ra ei kopapa ou, no reira ko te kopapa akatuakaouia maira no te Kerititiano akatainuia ra e tuke ia mei te kopapa tangata ra. Noatu rai e aiteite tona tu akara anga oraanga mei tona i mua ake i te matenga ra, ka akatuia mai aia ei mea ora ou ma tetai kopapa vaerua te ka rauka kia ora ki te rangi ra. No reira rai, ko te aronga te ka akatuakaouia ki runga i te enua nei ka akatuia mai ei au kopapa tangata nei rai.
12. Eaa te aite anga o te tuatua anga te “au kopapa rangi” e te “au kopapa enua” ra?
12 Mei ta Paulo i tuatua ra, e tuke ra te kiko tangata i to te au puaka. Noatu rai ko te kiko puaka e tuke to tetai tu puaka mei to tetai ke ra. (Genese 1:20-25) Te “au kopapa rangi” o te au me ora vaerua e tuke te kaka mei te au “kopapa enua” no te kiko ra. Te vai katoa ra te au tuke anga i te kaka o te ra, te marama, e te au etu. Inara ko te aronga akatainuia akatuakaouia ra e maata atu to ratou kaka.
13. Kia tau ki ta 1 Korinetia 15:42-44, eaa te ruruia ra e eaa te ka akatuia ake?
13 I te otianga te taiku anga i te au tuke anga, kua kapiti maira Paulo: “Koia katoa te tuakaouanga o tei mate ra.” (1 Korinetia 15:42-44) Kua tuatua aia: “I ruruia ei mea pe ua, i akatuia ei mea pe kore.” I konei penei te tuatua ra Paulo no tei akatainuia ra ei pupu. Tei ruruia ra e pe ua i te matenga, e akatuia ei mea pe kore, ma te ara kore oki. Noatu rai i akangateitei koreia e te ao nei, kua akatuia mai ki te oraanga i te rangi e kua akakiteia mai ma Karaiti i roto i te kaka. (Angaanga 5:41; Kolosa 3:4) I te matenga kua ruruia ei “kopapa tangata” e kua akatuia mai ei “kopapa vaerua.” I te mea ka rauka teianei i te tu o te au Kerititiano anauia i te vaerua ra, ka papa ia tatou e ka rauka etai ke ra kia akatuia mai kia ora ki runga i te enua nei.
14. Akapeea ta Paulo akatuke anga ia Karaiti raua ko Adamu?
14 I muri akera kua akatuke atu a Paulo ia Karaiti ma Adamu ra. (1 Korinetia 15:45-49) A Adamu, koia te tangata mua ra ‘kua riro akera ei tangata ora.’ (Genese 2:7) “Te Adamu openga”—koia Iesu—“e vaerua oronga ora ia.” Kua oronga aia i tona oraanga ei atinga oko, te aronga mua ko tana au pipi akatainuia ra. (Mareko 10:45) Ei au tangata, ‘kua rave ratou i te tutu o tei angaia ra i te one-pueu,’ inara kia akatuakaouia kua riro ratou mei te Adamu openga ra. Tera ra, ka puapingaia te au tangata akarongo ravarai, kapiti katoa te aronga akatuakaouia ra ki runga i te enua i to Iesu atinga ra.—1 Ioane 2:1, 2.
15. Eaa ra te au Kerititiano akatainuia kare i akatu kopapa kiko ia, e akapeea ratou me akatuia i to Iesu parutia?
15 Me mate te au Kerititiano akatainuia ra, kare ratou e akatuia mai i te kopapa kiko nei. (1 Korinetia 15:50-53) Kare e rauka kia akatuangaia tetai kopapa pe ua nei e kiko e te toto i te pe kore e te Patireia o te rangi ra. Kare tetai papaki o te aronga akatainuia ra e kite i tetai tuatau roa i te matenga. I te akaotianga i ta ratou angaanga i te enua nei ma te tiratiratu i te tuatau o to Iesu ra parutia, ka akatu keia ratou, kare e mamia, “mei te kamo anga mata nei.” Ka akatu vivikiia ratou ki te oraanga vaerua ma te pe kore e te kaka. I te openga ra, ka tae te numero o te “vaine akaipoipo ou” a Karaiti ra ki te 144,000.—Apokalupo 14:1; 19:7-9; 21:9; 1 Tesalonia 4:15-17.
Autu ki Rungao i te Mate!
16. Kia tau ki ta Paulo e te au peroveta mua ra, eaa te ka tupu ki te mate akatuangaia maira e to Adamu ara?
16 Kua akakite autu maira Paulo e ka apukuia te mate e tuatau ua atu. (1 Korinetia 15:54-57) Kia riro anake teianei kopapa pe ua ei kopapa pe kore e te mate kore, ka tupu teianei au tuatua: “Kua apukuia te mate.” “E te mate e, teiea toou tara? E ade e, teiea toou re?” (Isaia 25:8; Hosea 13:14) To te mate nei tara, ko te ara ia, e to te ara nei ririnui, ko te ture ia, tei akaapa ra i te aronga ara kia mate. Inara no te atinga o Iesu e te tuakaouanga, ko te mate tei akatuangaia maira ia Adamu ara ra kare ia e re akaou.—Roma 5:12; 6:23.
17. Akapeea te aite anga o te au tuatua ia 1 Korinetia 15:58 ra i teia tuatau nei?
17 “E teianei, e aku au taeake akaperepere e,” ta Paulo i tuatua, “kia maroiroi kotou, auraka e ngaueue, kia maata nei te rave anga i te angaanga a te Atu, auraka e tivata, kua kite oki kotou e, kare te mea puapinga kore te angaanga a te Atu, ta kotou e rave na.” (1 Korinetia 15:58) Ko taua au tuatua te piri atura ki te toenga o tei akatainuia i teia tuatau e ki te “mamoe ke atu” a Iesu noatu me ka mate ratou i teianei tuatau openga nei. (Ioane 10:16) Kare ta ratou au angaanga ei aronga akakitekite Patireia i te mea puapinga kore, no te mea te tatari maira te tuakaouanga ia ratou. Ei au tavini no Iehova, i reira, kia rave tatou i te angaanga a te Atu ia tatou e tatari ra i te tuatau e raukai ia tatou kia kapiki rekareka: “E ade e, teiea toou re?”
Akatupu Anga i te Manakonako Anga Tuakaouanga!
18. Mei teaa te maroiroi o to Paulo manakonako anga i te tuakaouanga?
18 Ta Paulo au tuatua tei tataia ia 1 Korinetia pene 15 te akariro ra kia papu e e mana to te manakonako anga tuakaouanga i tona oraanga ra. Kua papu takiri iaia e i akatuia mai a Iesu mei te mate maira e ko etai ke atura ka akamatara katoaia mai mei te tanumanga o te au tangata nei. Tei ia koe ainei taua irinaki anga maroiroi ra? Kua akamanako a Paulo i te au puapinga noinoi ra “ei teita iaku” e ‘i akaruke ei aia i te au mea katoa ra,’ kia raukai iaia te ‘kite ia Karaiti e te mana o tona ra tuakaouanga.’ Kua mareka ua te apotetoro ra kia kauraro ua i tetai matenga mei to Karaiti rai i te manakonako anga kia rauka “te tuakaouanga mua ra.” Tei karanga katoaia ra ko “te tuakaouanga mua” ra, ka tupu ia ki te au pipi a Iesu e 144,000 ra. Ae, ka akatuia ratou ki te oraanga vaerua i te rangi, inara ‘te toenga atu o tei mate ra’ ka akatuia ki runga i te enua nei.—Philipi 3:8-11, NW; Apokalupo 7:4; 20:5, 6.
19, 20. (a) Koai ma te aronga tataki tai tei tataia ra i te Pipiria ka akatuia mai kia ora ki te enua nei? (e) Ki to ai ma tuakaouanga taau e tapapa atura?
19 Kua riro te manakonakoanga tuakaouanga ei mea tika kaka tikai no te aronga akatainuia tei vai tiratiratu ra tae roa ki te matenga. (Roma 8:18; 1 Tesalonia 4:15-18; Apokalupo 2:10) Te aronga ka ora atu i “te mate maata” ka kite i te tupu anga o te manakonako anga tuakaouanga ki runga i te enua nei i te ‘tuku mai anga te tai, te vaarua e Ade oki i te aronga i mate i roto i reira ra.’ (Apokalupo 7:9, 13, 14; 20:13) I roto i te aronga te ka akatuia mai kia ora ki runga i te enua nei ko Iobu, tei mamae ra i te taka ke anga tana nga tamaroa e itu e nga tamaine e toru ra. E tamanako ana i te rekareka o te turouanga i to ratou okianga mai—e mei teaa ra to ratou mareka anga kia kite e e itu ke atu o ratou au tungane e e toru ke atu oki nga tuaine manea ra!—Iobu 1:1, 2, 18, 19; 42:12-15.
20 Mei teaa ra tetai akameitakianga te reira me akatuia mai a Aberahama raua ko Sara, a Isaaka raua ko Rebeka—ae e etai atu e manganui, kapiti maira “te au peroveta katoatoa”—ka akatuia mai ki runga i te enua nei! (Luka 13:28) Tetai o taua au peroveta ra ko Daniela, tei taputouia ra tetai tuakaouanga nona i raro ake i te tutaraanga a te Mesia ra. No etai 2,500 mataiti, kua akaangaroi a Daniela ki roto i te vaarua, inara na te mana o te tuakaouanga, kare e roaia ‘ka tu mai aia no tona tuanga’ e ko tetai o te “akaariki i te pa enua katoa ra.” (Daniela 12:13; Salamo 45:16) Mei teaa ra tetai mareka anga o te reira kare e kia turou anake i te aronga tiratiratu i taito ra mari katoa ra i toou uaorai metua tane, metua vaine, te tamaiti, te tamaine, me kare etai atu au akaperepere tei apai keia atura mei ia koe na te enemi koia te mate ra!
21. Eaa tatou ka tau ei kia kore e taroaroa i te raveanga te au mea meitaki no etai ke ra?
21 Penei ko etai o tatou oa e te au akaperepere kua tavini i te Atua no etai rau ngauru mataiti e kua ruaine oki. No te ruaine penei ka ngata no ratou kia akono i te au akaaoanga o te oraanga. Mei teaa ra te aroa kia oronga kia ratou i tetai ua atu tauturu te ka rauka ia tatou i teianei tikai! Ei reira kare o tatou mii no te kore e tauturu ia ratou i tetai tu me ka rokoia ratou e te mate. (Koheleta 9:11; 12:1-7; 1 Timoteo 5:3, 8) Kua papu ia tatou e kare a Iehova e akangaropoina i te au mea meitaki ta tatou i rave no etai ke ra, noatu eaa to ratou pakari me kare au turanga. “E kia rauka ta tatou ravenga,” ta Paulo i tata, “e takinga meitaki tatou i te tangata ravarai, kia maata atura ki to te ngutuare o te akarongo ra.”—Galatia 6:10; Ebera 6:10.
22. Tae roa ki te tupu anga te manakonako anga tuakaouanga, eaa ta tatou ka tau kia rave?
22 Ko Iehova ‘te Metua o te aroa e te Atua nona anake te pumaana.’ (2 Korinetia 1:3, 4) Te akapumaana ra tana tuatua ia tatou e te tauturu ra ia tatou kia akapumaana atu ia etai ke ra ma te manakonako anga tuakaouanga ririnui ra. Tae roa kia kite tatou i te tupu anga o taua manakonako anga ra na te akatuanga i tei mate kia ora ki runga i te enua nei, kia aite tatou kia Paulo ra, tei akarongo i te tuakaouanga ra. Kia aru oki tatou ia Iesu, tei kite ra i te mana o te Atua kia akatuakaou iaia no tona manakonako anga. Kare e roaia te aronga i roto i te au menema akamaara anga ka akarongo atu i te reo o Karaiti e ka aere mai ki vao. Kia apai mai teia i te pumaana e te rekareka kia tatou. Tei maata rava, kia akameitaki tatou ia Iehova, tei akariro ra kia rauka te re ki rungao i te mate na roto i to tatou Atu ia Iesu Karaiti ra!
Eaa Taau Pauanga?
• Eaa te akapapuanga akara mata no to Iesu ra tuakaouanga ta Paulo i oronga?
• Eaa “te enemi openga ra,” e akapeea te takoreanga i te reira ra?
• I te tu o te au Kerititiano akatainuia ra, eaa tei ruruia e eaa tei akatuia maira?
• Ko teea aronga tataki tai o te tataanga Pipiria taau ka inangaro kia aravei me ka akatuia mai ratou ki te oraanga i runga i te enua nei?
[Tutu i te kapi 16]
Kua akono te apotetoro ko Paulo i tetai paruru anga ririnui i te tuakaouanga
[Au Tutu i te kapi 20]
Te tuakaouanga o Iobu, tona pamiri, e etai atu e manganui ka riro ei tumu no te rekareka maata!