Kua Puapingaia Tetai Kimi Anga Roa

“KO Iehova? Koai a Iehova?” Kua kite a Silvia e varu ona mataiti i te ingoa i roto i tetai Pipiria Armenia, ko tetai apinga oko maata a te pamiri tei akaariia kiaia e tetai tamaine meangiti. Kua ui aia ki te katoatoa, inara kare i rauka i te tangata i Yerevan, Armenia, te ngai i noo ana aia i te akakite atu kiaia e koai a Iehova​—kare tona nga metua, kare tona puapii, kare katoa oki te au orometua o te are pure o te reira ngai.

Kua pakari mai a Silvia, kua akaruke i te apii, e kua rauka mai tetai angaanga, inara kare rai aia i kite e koai a Iehova. Ei mapu ou, kua oro ke atu aia ki Armenia, e i muri mai kua tae aia ki Porani, te noo anga aia ki roto i tetai pia meangiti ma tetai atu aronga oro-kimiora. Ko tetai taeake ona e atoro putuputu ia mai ana e te au tangata atoro. “Koai taau au manuiri?” i ui atu ei a Silvia. “Ko ratou tetai Au Kite o Iehova, te apii maira iaku i te Pipiria,” i pau mai ei aia.

Kua rererere to Silvia ngakau i te akarongo anga aia i te ingoa Iehova. I teianei, ka rauka iaia i te akamata i te apii e koai a Iehova e mei teaa te aroa o teia Atua. Inara, kare i roa ana, kua tau aia i te akaruke ia Porani. Kua kimi aia i te rangatira poritiki i Denmark, i tetai tua i te Tai Baltic. Kua rave ua aia i tetai au apinga iti ua, inara i roto i te reira ko tana au puka Pipiria tei neneiia e te Au Kite o Iehova. I te kapi openga o tetai puka, kua kiteia e Silvia te au ngai nooanga o te au opati manga o te Taiate Punanga Tiaki. Ko tera tetai apinga puapinga roa atu o tana au apinga​—tona piri anga ora kia Iehova!

I Denmark, kua apainaia Silvia ki tetai puakapa no te aronga oro-kimora, e kua akamata vave aia i te kimi i te Au Kite o Iehova. Mei tana papa o te ngai nooanga, kua kite aia e tei te oire ko Holbæk te opati manga o te Taiate Punanga Tiaki i Denmark. Inara teiea te reira? Kua tauiia atu a Silvia na te rerue ki tetai atu puakapa, e i tona aereanga ki reira, kua pati te rerue na roto ia Holbæk! Kua rererere akaou tona ngakau ma te rekareka.

I tetai ra i muri poto ua ake, kua oki a Silvia na runga i te rerue ki Holbæk e kua aaere aia mei te rerue ki te opati manga. Kua maara iaia: “I te tomo anga au ki roto i te aua tiare, kua noo au ki runga i te nooanga e kua karanga au kiaku uaorai, ‘E parataito teia!’” Kua turou maanaia aia i te manga e kua rauka mai iaia tana uaorai apii Pipiria.

Inara kua aru mai etai au tauianga. Mei te au ngai no te aronga oro-kimiora tei aru maira, kua kimi akaou a Silvia i te Au Kite o Iehova e kua akamata akaou i tana apii mei te akamata anga mai. Inara, i muri ake i te rua mataiti, kua rava tana apiianga kia akatapu i tona oraanga kia Iehova. Kua papetitoia aia e kare i roa ana kua akamata aia i te angaanga orometua tamou. I te 1998 kua oronga te kavamani Denmark kiaia i te tikaanga kia noo ki reira.

E 26 o Silvia mataiti i teianei e kua tavini i roto i te ngai tei akamaaraia aia i te parataito, te opati manga o te Au Kite o Iehova i Denmark. “Eaa tikai taku ka tuatua?” i nana ei. “I kimi ana au ia Iehova mei te meangiti anga mai. I teianei kua kiteaia aia e au. E moemoea ana au i te orongaanga i toku ora i roto i tana angaanga, e teia au i te Betela. Te pure nei au e kia riro mai teia ei kainga noku no te au mataiti e aere maira!”