Eaa ra ka Akaatinga-Uaorai ia Koe?

E tangata pamiri a Bill i tona 50 mataiti anga e e puapii no te ravenga kite i te patuanga. I te au mataiti ravarai, tei tutakiia e ia, kua akapou aia e manganui te au epetoma i te tauturu anga no te parani e te patu i te au Are Uipaanga Patireia no te au putuputuanga o te Au Kite o Iehova. E vaine apii meitakiia e te tau meitaki a Emma e 22 mataiti e kare i akaipoipo ake. Kare i aruaru i tona uaorai au akakoroanga e te au tarekareka anga, e akapou ana aia e 70 ora i te marama taki tai ei orometua, te tauturu anga i te au tangata kia marama i te Pipiria. E nga tokorua akaangaroi a Maurice raua ko Betty. Koi kore ei i aere marie i teianei, kua neke atu raua ki tetai enua i te tauturu i te au tangata i reira kia apii i ta te Atua akakoro anga no te enua.

KARE teia au tangata tataki tai e manako ana ia ratou uaorai e kua takake roa me kare kua tuke roa. E au tangata ua ratou te rave ra i ta ratou i manako e ko te mea tika kia rave. Eaa ra ratou i akapou ei i to ratou taime, maroiroi, au tu kite, e te au apinga no te inangaro o tetai ke? Ko tei akakeu ia ratou koia oki ko te inangaro oonu i te Atua e to ratou tangata tupu. Kua akakeu teia inangaro i roto ia ratou tataki tai i te tu akaatinga-uaorai ia koe ma te ngakau tae.

Eaa te aite anga o te tu akaatinga-uaorai ia koe? Kia akaatinga-uaorai ia koe kare te reira e umuumu ana i te akonoanga i tetai tu oraanga tau ua me kore tu ora anga pakari. Kare e o mai te patoi ia koe uaorai te keia ra i te rekareka me kore te merengo anga mei ia tatou. Mei tei akakiteia e The Shorter Oxford English Dictionary, te aite anga o te akaatinga-uaorai ia koe, “te tuku anga i to tetai au inangaro, mataora, e te au anoano, no te rave anga i te angaanga me kore no tetai atu.”

Iesu Karaiti​—Te Akaraanga Maata

Ko te Tamaiti ua a te Atua, ko Iesu Karaiti, te akaraanga maata no tetai ma te tu akaatinga-uaorai ia koe. I tona vai anga i mua ana ei tangata, penei e oraanga oraora e te merengo anga teitei roa tona. Kua rauka iaia te taokotai anga vaitata ma tona Metua e te au mea vaerua. Pera katoa, kua taangaanga te Tamaiti a te Atua i tona au tu kite na roto i te au angaanga akaaoanga e te oraora ei “pu rave angaanga.” (Maseli 8:​30, 31, NW) Kua ora ana aia i rotopu i te au turanga teitei atu ki tetai apinga tei rauka i tetai tangata apinganui i te enua nei kia rekareka. I te pae mai i te Atua ko Iehova, tei iaia tetai taoonga teitei tikai e te akameitakiia i te rangi ra.

Inara, “kua tuku ke atura ra aia [te Tamaiti a te Atua] i tona uaorai tu, e kua rave i to te tavini, i te riro anga mai mei te tangata nei te tu.” (Philipi 2:7) Kua puareinga ua aia i te akaruke pouroa i tana au akameitaki anga na te riro anga mai ei tangata e te oronga anga i tona oraanga ei oko e raukai i te akamatara i te kino tei akatupuia e Satani. (Genese 3:​1-7; Mareko 10:45) Tera te aite anga kia aere mai e kia noo i rotopu i te au tangata ara ua i roto i tetai ao tei raro ake i te mana o Satani te Tiaporo. (1 Ioane 5:19) Tera katoa te aite anga e kia akakoromaki i te tu mareka kore uaorai e kare e tau ana. Inara, noatu e eaa te tutaki kiaia, kua tauta a Iesu Karaiti i te rave i te anoano o tona Metua. (Mataio 26:39; Ioane 5:30; 6:38) Kua timata teia i to Iesu inangaro e te tu tiratiratu e tae ua atu ki te ope. Mei teaa te mamao i tana ka rave? “Kua taakaaka iaia uaorai,” i na te apotetoro ko Paulo ei, “i te akonoanga e tae ua atu ki te mate, ki te mate satauro ra.”​—Philipi 2:8.

“Kia Okotai rai o Kotou Tu Ngakau”

Te akamaroiroiia ra tatou kia aru i to Iesu akaraanga. “Kia okotai rai o kotou tu ngakau e to te Mesia ra to Iesu,” i raurau ei te apotetoro ko Paulo. (Philipi 2:5) Akapeea tatou i te rave anga i teia? Tetai mataara koia oki “auraka te tangata e akono i tona anake uaorai au mea, e akono katoa ra i to etai ke ra au mea.” (Philipi 2:4) “Kare [te aroa tika tikai] e kimi i te meitaki nona uaorai.”​—1 Korinetia 13:5.

E putuputu te taime kua akaari te au tangata akono ua i te akatapu anga noinoi kore i roto i te angaanga no tetai atu. Inara, i teia tuatau, e manganui te tangata te manako ra ia ratou uaorai. E tu ko au na mua to te ao. Ka anoanoia tatou kia paruruia mei te tu o te ao no te mea me autu te reira i te akatikatika anga i to tatou manako e te tu, papu e ka akariro tatou i to tatou uaorai anoano ei mea maata atu. I reira te au mea ta tatou ka rave​—akapeea tatou me akapou i to tatou taime, to tatou maroiroi, e ta tatou au apinga​—ka tutara ia e te au manako uaorai. Ka anoanoia tatou e kia tamaki pakari i teia akakeu anga.

Pera katoa te au ako anga akakoro meitakiia i tetai taime ka rauka i te akaparuparu i to tatou tu akaatinga-uaorai ia tatou. Te kiteanga e te arataki ra to Iesu aerenga akaatinga-uaorai iaia kiea, kua tuatua te apotetoro ko Petero: “Auraka takiri ïa, e te Atu.” (Mataio 16:22) Kua ngata iaia i te ariki i to Iesu tu puareinga te rave anga e tae ua atu ki te mate no te mana ngateitei o tona Metua e te ora no te tangata ravarai. No reira kua tauta aia i te akauri ke ia Iesu mei te aruaru anga i taua aerenga.

‘E Akaruke ia Koe Uaorai’

Akapeea a Iesu i te pau anga atu? Te akakite ra te tataanga: “Kua ariu maira aia, e kua akara maira i tana au pipi, kua akamura maira ia Petero, na ko maira, Ka aere ke atu koe, e Satani, ki muri iaku: kare koe i tau i ta te Atua ra, ko ta te tangata ra taau i tau.” Kua karanga atura Iesu ki te tangata tini ma tana au pipi e kua tuatua e: “Ko tei inangaro i te aru mai iaku ra, e akaruke aia iaia uaorai, e rave i tana satauro, ka aru mai ei iaku.”​—Mareko 8:​33, 34.

No etai 30 mataiti i muri ake i te taiku anga aia i teia tuatua kia Iesu, kua akaari a Petero e tae mai ki taua taime kua marama aia i te aite anga o te tu akaatinga-uaorai ia koe. Kare aia i akamaroiroi ana i te au taeake irinaki kia aere marie e kia takinga meitaki ia ratou uaorai. Mari ra, kua raurau a Petero ia ratou kia tatua taukupu i to ratou au manako no te angaanga auraka e akaarite kia tau ki to ratou au anoano o te ao i mua ana. Noatu te au timata anga, kia tuku ratou i te raveanga i to te Atua anoano ki mua ake i to ratou au oraanga.​—1 Petero 1:​6, 13, 14; 4:​1, 2.

Ko tetai aerenga puapinga ka rauka i etai ia tatou kia aruaru koia oki kia tuku e ko Iehova te pu ki ta tatou uaorai au mea, te aru tiratiratu anga ia Iesu Karaiti e te tuku anga i te Atua kia akaaere i ta tatou au angaanga. Na teia tu, kua akanoo a Paulo i te akaraanga meitaki. Tona manako rapurapu e te ariki meitaki ia Iehova kua akakeu iaia kia tuku ke i te au anoano o te ao me kore au manakonako anga te ka akataipa iaia mei te raveanga i te anoano o te Atua. “E kua tika rava iaku,” i nana ei, “i te akaope i toku nei ririnui e kia ope rava” i te tavinianga i te au inangaro o tetai ke. (2 Korinetia 12:15) Kua taangaanga a Paulo i tona tu kite kia akamaata i te au anoano tu-Atua, kare i tona.​—Angaanga 20:24; Philipi 3:8.

Akapeea tatou me akara meitaki ia tatou uaorai te akara anga me e tu akaraanga to tatou mei to te apotetoro ko Paulo ra? Penei ka ui tatou kia tatou uaorai i te au uianga mei teia: Akapeea au i te taangaanga anga i toku taime, toku maroiroi, toku au tu kite, e taku au apinga? Te taangaanga ra ainei au i teia e tetai atu au apinga aroa kia akamaata ua i toku uaorai inangaro, me kore te taangaanga ra ainei au ia ratou kia tauturu i etai atu? Kua manako ainei au i te rave maata i roto i te angaanga akaora te akakite anga i te tuatua meitaki, penei ei tangata akakite tamou i te Patireia? Ka rauka ainei iaku kia rave maata atu i roto i te au angaanga patu anga me kore akonoanga i te au Are Uipaanga Patireia? Te opu ra ainei au i te au tuatau no te tauturu i te aronga te inangaro maira? Te oronga ra ainei au i toku meitaki kia Iehova?​—Maseli 3:9.

“E mea Meitaki i te Oronga Atu”

Inara, e pakari ainei i te akaatinga-uaorai ia koe? Ae tikai! Kua kite a Paulo mei tana uaorai i kite e te apai maira taua tu ra i te au tutaki anga puapinga. Kua apai mai te reira i te mataora maata e te merengo anga maata kiaia uaorai. Kua akamarama aia i teia ki te aronga pakari mei Ephesia mai i te aravei anga aia ia ratou i Mileto. I na Paulo ei: “Kare e mea toe iaku i te akakite atu kia kotou na, kia pera katoa kotou i te rave i te angaanga [na roto i tetai tu akaatinga-uaorai], e e turu atu oki kotou i te aronga apikepike, e tikaʼi, e kia maara oki i te tuatua a te Atua ra a Iesu, ko tana oki i tuatua maira e, ‘E mea meitaki i te oronga atu i te rave mai.’” (Angaanga 20:35) E mirioni te au tangata kua kite e na te akaari anga i teia tu te apai maira i te mataora maata i teianei. Ka apai katoa mai te reira i te rekareka a te tuatau ki mua me tutaki a Iehova i te aronga te tuku ra i tona au inangaro e to tetai atu i mua ake i to ratou uaorai.​—1 Timoteo 4:​8-10.

I te ui angaia e eaa ra aia i aruaru ei iaia uaorai i te tauturu anga i tetai kia patu i te au Are Uipaanga Patireia, kua tuatua a Bill: “Te tauturuanga i tetai au putuputuanga meangiti na teia mataara te oronga maira i te merengo anga maata kiaku uaorai. E reka ana au i te taangaanga i toku au tu karape e te kite tikai kia akapuapingaia tetai atu.” Eaa ra a Emma i iki ei i te akono i tona au maroiroi e te au tu kite kia tauturu i tetai atu kia kite i te tuatua mou Tuatua Tapu? “Kare e rauka iaku te manako atu no te rave i tetai apinga ke. Koi vai mapu ei e te rauka ra kia pera, te inangaro nei au i te rave ma te maata i tei rauka iaku kia akamareka ia Iehova e tetai atu. Te akaatinga anga i te au apinga materia puapinga e tuanga iti ua i tei rauka iaku. Te rave ua nei au i tei rauka iaku i te rave te manako anga no runga i ta Iehova i rave ke noku.”

Kare a Maurice raua ko Betty i tataraara ana e kare raua i akono i te oraanga aere marie, te aru mai anga i te au mataiti angaanga pakari i te utuutuanga e te oronga anga no to raua pamiri. I teianei kua akaangaroi raua, te inangaro ra raua i te rave i tetai apinga puapinga e te tau ua i to raua oraanga. “Kare maua e inangaro ana i te noo ua e te akaangaroi i teianei,” i na raua ei. “Te tauturu anga i tetai kia kite ia Iehova i tetai enua ke te oronga maira kia maua i te au tuatau kia rave ua atu i tetai apinga puapinga.”

Te aruaru ra ainei koe e kia akaatinga-uaorai ia koe? Kare teia e ngoie. Te vaira te tamaki tamou i rotopu i to tatou au anoano ara ua ei tangata e to tatou anoano kia akamareka i te Atua. (Roma 7:​21-23) Inara e tamaki anga te reira ka autuia me akatika tatou ia Iehova kia arataki i to tatou au oraanga. (Galatia 5:​16, 17) Papu e ka maara mai aia i ta tatou angaanga akaatinga-uaorai ia tatou i roto i tana angaanga e ka akameitaki apinganui mai ia tatou. E tikai, ka “riringi atu ei [te Atua ko Iehova] i te apinga maata ua atu, kare e ngai e o ei, ei meitaki.”​—Malaki 3:10; Ebera 6:10.

[Tutu i te kapi 23]

E tu akaatinga-uaorai to Iesu. E koe ainei?

[Au Tutu i te kapi 24]

Kua tuku te apotetoro ko Paulo i tona au tu maroiroi ki roto i te angaanga tutuanga Patireia