E Tavini i te Atua ma te Tu Puareinga

“E KUA tika rava iaku i te akaope i toku nei ririnui e kia ope rava no to kotou vaerua,” i tata ei te apotetoro ko Paulo. (2 Korinetia 12:15) Eaa ta teia au tuatua e akakite ra kia koe no runga i te manako e te tu ka tika te au tavini o Iehova kia tauta i te tatanu? Kia tau ki tetai tangata kite Pipiria, i te tataanga a Paulo i taua au tuatua ki te au Kerititiano i Korinetia, te tuatua ra aia: “Te puareinga nei au i te akapou i toku maroiroi, e te taime, e te oraanga, e pouroa tei rauka iaku no to kotou turanga, mei tetai metua e rave akapera ra ma te rekareka ki tana tamariki.” Kua papa a Paulo kia “ope rava,” me kore kia “kinokino e te roiroi,” me ko te reira te umuumuia ra e raukai i te akatupu i tana angaanga orometua Kerititiano.

Pera katoa, kua rave pouroa a Paulo i teia ma te “tika rava.” Te “puareinga tikai ra” aia i te rave akapera, i na The Jerusalem Bible ei. Akapeea koe? Te puareinga ra ainei koe i te akapou i toou taime, maroiroi, te au tu kite, e te au apinga no te tavinianga i te Atua ko Iehova e te au inangaro o tetai atu, noatu i te rave anga i te reira ka tupu te “kinokino e te roiroi” i tetai au taime? E ka rave ainei koe i teia ma te “tika rava”?

Kua Patoi Ratou i te Tavini Atu

Kare e te emiemi ua ra te maata anga o te tangata tataki tai i te tavini i te Atua mari ra te patoi tika ra i te rave akapera. E tu ariki kore to ratou, te noinoi ra i to tetai uaorai tu takake, e te meameaau anga. Kua akavare a Satani ia Adamu raua ko Eva kia manako akapera. Kua tuatua tarevake aia e ka ‘riro raua mei te Atua ra te tu, i te kite i te meitaki e te kino’​—te rauka anga i te iki no raua uaorai i te mea tika e te mea tarevake. (Genese 3:​1-5) Ko te aronga e tu aiteite to ratou mei te reira rai i teia tuatau te manako ra e kia akarangatira puia kia rave tikai i ta ratou e anoano ra ma te kore etai apainga ki te Atua me kore tamanata anga mei iaia. (Salamo 81:​11, 12) Te inangaro ra ratou i te taangaanga i tei rauka tikai ia ratou i te aruaru anga i to ratou uaorai au anoano.​—Maseli 18:1.

Penei kare koe e manako pakari ana mei teia rai. Papu rai te ariki ngakau tae ra koe i te apinga aroa o te oraanga taau e rekareka ra i teianei e pera te manakonakoanga meitaki no te oraanga e tuatau ua atu ki runga i tetai enua parataito. (Salamo 37:​10, 11; Apokalupo 21:​1-4) Penei te ariki oonu ra koe ia Iehova no tona tu meitaki kia koe. Inara ka anoano pouroaia tatou kia matakite i te kino e ka rauka ia Satani i te akakino i ta tatou e manako ra na roto i tetai tu e penei kare e arikiia mai ta tatou angaanga e te Atua. (2 Korinetia 11:3) Akapeea teia me tupu mai?

Umuumuia te Angaanga Puareinga

Te inangaro ra a Iehova i te angaanga puareinga e te ngakau katoa. Kare rava aia e maro ana ia tatou kia rave i tona anoano. Ko Satani te ka kore e tapu no te taomi me kare akavare i te tangata kia rave i tona anoano. Kapiti mai i te tavini anga i te Atua, te tuatua ra te Pipiria no runga i te apainga, te au akauenga, e te au umuumu anga, e te vai atura. (Koheleta 12:13; Luka 1:6) Inara, ko to tatou akakoroanga maata no te tavini anga i te Atua koia oki te inangaro ra tatou iaia.​—Exodo 35:21; Deuteronomi 11:1.

Noatu mei teaa te maata o ta Paulo i akapou iaia uaorai i roto i te angaanga a te Atua, kua kite aia e ka puapinga kore teia me ‘kare ona aroa.’ (1 Korinetia 13:​1-3) Me taiku te aronga tata Pipiria i te au Kerititiano ei au tavini o te Atua, kare ratou e te taiku ra ki tetai turanga tavini ma te tau kore tei akanooia ki runga i te maro anga. (Roma 12:11; Kolosa 3:24) Ko te aite anga ko te kauraro puareinga tei akanooia ki runga i te aroa ngakau tae oonu no te Atua e tana Tamaiti, ko Iesu Karaiti.​—Mataio 22:37; 2 Korinetia 5:14; 1 Ioane 4:​10, 11.

Kia akaata katoa ta tatou tavini anga i te Atua i te aroa oonu i te tangata. “I maru ua ra matou i rotopu ia kotou: mei te metua i matuapuru i tana tamariki,” i tata ei a Paulo ki te putuputuanga i Tesalonia. (1 Tesalonia 2:7) I te au enua e manganui i teia tuatau, e apainga i te pae ture ta te au metua vaine no te akono i ta ratou tamariki. Inara papu e kare te maata anga o te au metua vaine i rave i teia ei akarongo i te ture, te pera ra ainei ratou? Kare. Te rave ra ratou i te reira no te mea te akaperepere ra ratou i ta ratou tamariki. Eaa ra, ka rave ei tetai metua vaine i te au atinga maata no ta ratou tamariki! No te tu “aroa” o Paulo no te aronga tana e tavini ra, kua “tika” aia (“puareinga,” King James Version; “rekareka,” New International Version) no te taangaanga tikai i tona oraanga i te tauturuanga ia ratou. (1 Tesalonia 2:8) Te akakeu ra te aroa ia tatou kia aru i to Paulo akaraanga.​—Mataio 22:39.

Akapeea te Angaanga Emiemi?

E tika, auraka tatou e tuku i te aroa uaorai e kia maata atu i te aroa i te Atua e te tangata. Me kare ra, ka vai te matakite anga e ka tuku ua tatou i te angaanga apa ngakau e te emiemi. Penei ka akamata tatou i te akatupu i te tu mareka kore, te riri anga e kare e rauka ia tatou i te akono i to tatou oraanga kia tau ki to tatou uaorai au anoano. Kua tupu teia ki etai au Iseraela tei ngaro to ratou inangaro i te Atua inara te oronga ra i te angaanga kiaia no te rave ua anga. Eaa tei tupu? Kua riro te tavini anga i te Atua ei “mea roiroi” kia ratou.​—Malaki 1:13.

Ka tika etai au atinga orongaia ki te Atua e kia “kino kore,” ma te kore te maki, te mea “memeitaki,” te rauka ra. (Levitiku 22:​17-20; Exodo 23:19) Inara, koi kore ei i oronga i te mea memeitaki tikai o ta ratou au animara kia Iehova kua akamata te au tangata i to Malaki tuatau i te oronga i tei kore i inangaroia e ratou uaorai. Eaa to Iehova manako? Kua akakite aia ki te kau taunga: “E kia apai kotou i te matapo ei atinga [ka tuatua kotou], kare ainei i te mea kino? e kia apai kotou i te pirikoki e tei makiia, kare ainei i te mea kino? e tenana ka apai atu na to tutara; e mareka ainei aia ia koe? e kiteia mai ainei koe? . . . E kua apai mai kotou i tei aeaeia ra, e tei pirikoki, e tei makiia ra; e kua apai mai oki kotou i te atinga: e āriki atu ainei au i te reira i to kotou na rima?”​—Malaki 1:​8, 13.

Akapeea teia me tupu ki etai ia tatou? Ka riro mai ta tatou au atinga ei “mea roiroi” kia tatou me ngere tatou i te ngakau puareinga tikai e te tu. (Exodo 35:​5, 21, 22; Levitiku 1:3; Salamo 54:6; Ebera 13:​15, 16) Ei akaraanga, tei ia Iehova ainei te toenga o to tatou taime?

Ka rauka ainei i tetai i te manako pakari e ka arikiia e te Atua me ka maro tetai mema o te pamiri manako meitaki me kare tetai Levi maroiroi i tetai Iseraela kare i puareinga kia iki i tana animara meitaki tikai ei atinga i te mea tikai kare aia i inangaro i te oronga i te reira? (Isaia 29:13; Mataio 15:​7, 8) Kua patoi a Iehova i te ariki i taua au atinga e te aronga katoa tei oronga i te reira.​—Hosea 4:6; Mataio 21:43.

Rekareka i te Rave i to te Atua Anoano

Kia oronga ki te Atua i te angaanga tana ka ariki, ka tika tatou kia aru i te akaraanga o Iesu Karaiti. “Kare au i kimi i toku uaorai anoano,” i nana ei, “ko te anoano ra o te Metua ko tei tono mai iaku nei.” (Ioane 5:30) Kua kitea e Iesu te mataora maata i te tavini puareinga anga i te Atua. Kua akatupu a Iesu i ta Davida au tuatua totou: “E mea tau naku te rave i toou anoano, e taku Atua.”​—Salamo 40:8.

Noatu rai kua rekareka a Iesu i te rave i to Iehova anoano, kare teia i ngoie ua. Ka akamanako ana no runga i tei tupu i mua ake ka opuia ei aia, ka timataiai, e ka tamateiai. I roto rai i te kainga i Getesema, kua “mamae mate maata” a Iesu e kua “mamae aue.” No te pakari roa i te taomianga i te pae ngakau, e iaia e pure ra, “mei te toto kurukuruatu ra tona ou i te topa anga ki raro i te one.”​—Mataio 26:38; Luka 22:44.

Eaa ra a Iesu i kite ei i taua mamae aue? Papu kare e no tona inangaro uaorai me kore kua emiemi i te rave i to Iehova anoano. Kua papa aia i te mate, te patoi anga i te au tuatua a Petero: “Auraka takiri ïa, e te Atu: eiaa koe e peraia mai.” (Mataio 16:​21-23) Ko tei tamanamanata ia Iesu koia oki akapeea tona tu mate anga ei tangata rave kino i te akakino anga ia Iehova e Tona ingoa tapu. Kua kite a Iesu e ka mamae maata tona Metua i te akara atu i tana Tamaiti akaperepere i te akono angaia na roto i taua tu kino tikai.

Kua marama katoa a Iesu e te vaitata ra aia ki tetai tuatau puapinga maata i roto i te akatupu anga i to Iehova akakoroanga. Te akono tiratiratu anga i te au ture a te Atua ka akatutu e kare e ekoko anga e ka rauka rai ia Adamu i te rave i taua iki anga. Kua akamaeu to Iesu vai tiratiratu anga ei akakite anga pikikaa no runga i ta Satani i taiku e kare te au tangata na roto i te timata anga e tavini puareinga e te tiratiratu i te Atua. Na roto ia Iesu, ka akapueu pu tikai a Iehova ia Satani e ka akaatea i te au tupu anga o tana meameaau anga.​—Genese 3:15.

Mei teaa atura te apainga maata tikai tei iri ki runga ia Iesu! Te ingoa o tona Metua, te au i te ao katoa e pini ua ake, e te ora no te pamiri tangata pouroa te iri ra ki runga i to Iesu vai tiratiratu anga. Te kiteanga i teia, kua pure aia: “E taku Metua, kia tika, kia apai keia teianei kapu iaku nei: kia tupu ra toou anoano; auraka toku.” (Mataio 26:39) Noatu i raro ake i te manamanata kino roa, kare rava a Iesu i inga ana i tona puareinga anga i te akono i te anoano o tona Metua.

‘Kua Tika i te Vaerua, te Parukaua nei ra te Kopapa’

Noatu kua mamae maata a Iesu i te pae ngakau iaia e tavini ra ia Iehova, ka rauka ia tatou i te tapapa ia Satani kia akamaata i te taomi anga ki runga ia tatou ei au tavini no te Atua. (Ioane 15:20; 1 Petero 5:8) Pera katoa e aronga apa ua tatou. Noatu me ka puareinga ua tatou i te tavini atu i te Atua, kare te reira e ngoie ua no tatou i te rave. Kua kite atu a Iesu e akapeea tana au apotetoro i te putoto anga i te rave pouroa i tana i pati ia ratou kia rave. No reira oki aia i tuatua ei: “Kua tika oki i te vaerua, te parukaua nei ra te kopapa.” (Mataio 26:41) Kare e apinga paruparu i roto i tona kopapa tangata apa kore. Inara, kua manako aia i te tu paruparu kopapa o tana au pipi, te tu apa ua tei akatuangaia kia ratou mei ia Adamu apa ua. Kua kite a Iesu e no te apa ua tei akatuangaia e te tupuanga mai o te au kotinga tangata, ka tupu te putoto anga kia ratou no te rave anga i tei rauka ia ratou i roto i te angaanga a Iehova.

No reira, penei ka manako tatou mei te apotetoro ko Paulo, tei taitaia oonu tikai i te tamanata anga te tu apa ua i tona kite karape i te tavini pu tikai i te Atua. “Ko te anoano ra, te vaitata ua nei ïa kiaku,” i tata ei a Paulo, “kareka te rave i te mea meitaki ra, kare ïa i kitea iaku.” (Roma 7:18) Ka kite katoa tatou e kare e rauka ia tatou i te rave pu tikai i te au mea meitaki ta tatou e anoano ra i te rave. (Roma 7:19) Kare teia e no te tu emiemi i to tatou tuanga. No te tu paruparu o te kopapa te tamanata ra i ta tatou au tauta anga meitaki.

Auraka tatou e taitaia. Me e tu papa ngakau tae to tatou i te rave pouroa i te ka rauka ia tatou, papu rai ka ariki te Atua i ta tatou angaanga. (2 Korinetia 8:12) Kia ‘akamaroiroi kia vai meitaki rai tatou’ te aru i to Karaiti tu kauraro ki tikai te rave anga i to te Atua anoano. (2 Timoteo 2:15; Philipi 2:​5-7; 1 Petero 4:​1, 2) Ka tutaki e ka turu a Iehova i taua tu puareinga. Ka oronga mai aia i ‘te mana maata meitaki’ kia tatou no to tatou tu paruparu. (2 Korinetia 4:​7-10) Ma ta Iehova tauturu, mei ia Paulo rai, ‘ka tika rava ia tatou i te akaope i te ririnui e kia ope rava no to tatou vaerua’ i roto i Tana angaanga akaperepereia.

[Tutu i te kapi 21]

Kua tavini puareinga ua a Paulo i te Atua i tei rauka meitaki iaia

[Tutu i te kapi 23]

Noatu i raro ake i te manamanata kino roa, kua rave a Iesu i te anoano o tona Metua