Au Uianga a te Aronga Tatau

Eaa to te au Kerititiano mou manako no te raveanga matau a tetai au tangata e oronga ra ki tetai atu i te au kopi o te au porokaramu software okooko no te au komopiuta?

Penei ka tauta tarevake tetai i te akakore i teia raveanga na te taikuanga i ta Iesu au tuatua: “E mea o mai ua to kotou, e oronga ua atu oki kotou.” Ae, kare a Iesu e te taiku ra no runga i te oronga ua i te au kopi o te au puka tikaia te kopi anga me kare te au porokaramu komopiuta (software), te taangaanga i to roto i te reira te akamanaia ra e te ture. Te taiku ra aia i te oronga anga i te pae o te angaanga orometua. Kua akakite a Iesu ki te au apotetoro e aere ra ki te au oire e te au vira tuke tuke ta ratou ka akakite ko te Patireia, rapakau i tei maki ra, e te tueru anga i te au temoni. Koi kore ei e tutaki i teia, kia “oronga ua atu” te au apotetoro.​—Mataio 10:​7, 8.

No te maata tikai i te au komopiuta naau uaorai e na te pitiniti, e manganui te tangata te anoano ra i te software. Kia oko uaia teia tei matauia. E tika, te akapapa ra tetai au tangata i te au porokaramu e te oronga ra ratou ma te kore e tutaki e te akakite ra ratou ka rauka kia kopiia e kia orongaia ki tetai atu. Inara te okoia ra te maata anga o te au software komopiuta. Me na ratou ua kia taangaanga i te kainga me kare no te pitiniti, te umuumuia ra te aronga taangaanga i te software kia oko i te reira, me kare kia tutaki i te reira. Me rave tetai me kare kua kopi i tetai akapapa anga software ma te kore e tutaki, te tureia ra te reira, mei tetai ngai oko anga e kopi ra i te au puka, noatu me te oronga ua ra i te reira.

Kua raitini ia te maata anga o te au porokaramu komopiuta (kapiti mai te au tarekareka anga i roto), e te umuumuia ra te ona e te tangata taangaanga kia akono i to te reira au umuumu anga akatakaia e te au kotinga. E manganui i taua au raitini te akakite ra e tai ua tangata ka tuku e ka taangaanga i te porokaramu​—tei matauia te tukuanga i te reira ki runga i te komopiuta okotai, me e komopiuta i te kainga me kare i tetai i te ngai pitiniti me kare apii. Te akakite ra tetai au raitini e kia rauka te kopi akanooia na te tangata nana te reira, inara kare aia e maani i te au kopi na tetai au tangata ke. Me ka inangaro te ona i te oronga i te katoa anga o te porokaramu (kapiti mai te raitini e te pepa akanooanga), kia pera aia. Inara, te taopenga ra aia i tona tika anga no te taangaanga i te reira. E tuke tuke te raitini, no reira ko tetai tangata te oko ra i tetai porokaramu me kare te orongaia ra tetai ka tau kia akara e eaa ta taua raitini e akanoonoo ra.

E manganui te au enua e pupu no tetai au koreromotu tikaia te paruru ra i te “apinga kite” mei te au porokaramu komopiuta, e te maro ra ratou i te au tika anga tureia. Ei akatauanga, kua ripoti The New York Times o Tianuare 14, 2000, e “kua opu te au opita akava o Tiamani e to Danish i te au mema ta ratou i akataka e e pupu araiia te oko software ra” te kopi ra e te tua aere ra i te au porokaramu komopiuta e te au tarekareka anga, te oko anga i tetai ki runga i te Internet.

Eaa to te putuputuanga Kerititiano turanga no teia? Te karanga ra a Iesu: “Ka apai mari i ta Kaisara ra kia Kaisara; e ta te Atua ra, e apai ïa ki te Atua.” (Mareko 12:17) Te umuumu maira te reira i te au Kerititiano kia akarongo i te au ture o te enua tei kore i patoi i ta te Atua ture. No te au kavamani, te tata ra te apotetoro ko Paulo: “Kia kauraro marie te tangata katoatoa i te aronga mana taoonga ra . . . ko tei māro atu ki te taoonga ra, kua māro aia i tei akonoia e te Atua ra: e te aronga i māro ra, ka rauka ïa te akaapa ia ratou uaorai.”​—Roma 13:​1, 2.

Kare i te apainga na te aronga pakari i roto i te putuputuanga Kerititiano kia akara atu i ta tetai au komopiuta, mei te mea ra e kua akamanaia i te tuatua e kia maro i te au tika anga tureia. Inara te irinaki ra ratou e te apii ra e kia kopae te au Kerititiano i te rave anga i tetai apinga kare na ratou e ka tauta i te akono i ta te ture. Te paruru ra teia i te au Kerititiano e kia akautungaia ei aronga aati i te ture, e te akariro ra kia rauka ia ratou te akava ngakau meitaki ki mua i te Atua. Kua tata a Paulo: “No reira i tikaʼi e kia kauraro kotou; kare ra oki no te mate anake ra; no te akava-ngakau katoa oki.” (Roma 13:5) Ma te aiteite, kua akakite a Paulo i te anoano o te au Kerititiano mou, ma teia au tuatua: “Kia kite tikai oki matou e, te tika nei to matou akava-ngakau i te akakoro anga e, ei akono meitaki ta matou i te au mea katoa nei.”​—Ebera 13:18.

[Pia i te kapi 29]

Te oko ra tetai au pitiniti e te au apii i te au raitini tika anga maata te aronga taangaanga te akakite ra i te numero tau no te aronga taangaanga akatikaia kia taangaanga i te porokaramu. I te 1995, kua uriuri te au putuputuanga o te Au Kite o Iehova i tetai atikara te kapiti maira i teia ako anga:

“Te arai ra te maata anga o te au kamupani te akapapa ra e te oko ra i te au porokaramu komopiuta i teia, e te oronga maira ratou i tetai raitini i te akatakaanga e akapeea te au porokaramu i te taangaangaia i te pae o te ture. Tei matauia te akakite ra te raitini e kare e rauka i te ona te oronga atu ki tetai i te au kopi o te porokaramu; te tika anga, te akariro ra te arai anga pa enua i te reira e te aati ra i te ture me pera. . . . Te oko ra tetai kamupani maatamaata i te au komopiuta kua akanooia te au raitini o te porokaramu ki roto. Inara, kare tetai au are toa komopiuta e oronga ana i te au raitini no te mea ko te au porokaramu ta ratou i akanoo ki roto e au kopi tureia te reira, te aiteanga te aati ra tei oko i te ture i te taangaanga anga i te au porokaramu. Kapiti atu ki teia, kia kopae katoa te au Kerititiano te tukuanga ki roto, me kare te taui anga mei, te au papaanga akakite uira tei tikaia (mei te au puka a te Taiate) e te kopiia ra ma te kore te tika anga tureia mei te au ona.”