Eaa Oki te Parataito i te Pae Vaerua?

KUA utuutuia mai a Gustavo i roto i tetai oire meangiti i Brazil.a Mei te tamariki anga mai kua apiiia aia e ka aere te au tangata meitaki ki te rangi me mate ratou. Kare aia i kite ana i ta te Atua akakoroanga e ka rekareka te au tangata tiratiratu a tetai ra i te oraanga apa kore i te enua parataito. (Apokalupo 21:​3, 4) E te vaira tetai atu apinga kare aia i kite ana. Kare aia i kite e i teianei, ka rauka e koia tetai i roto i tetai parataito i te pae vaerua.

Kua rongo ana ainei koe no taua parataito ra i te pae vaerua? Kua kite ainei koe e eaa te reira e eaa te umuumuia maira kia riro e ko tetai i reira? Ko tetai ua atu te inangaro ra e kia mataora tikai te anoanoia ra kia kite i te reira parataito.

Te Kimianga i Taua Parataito i te Pae Vaerua

Kia tuatua e i teia tuatau ka rauka rai i tetai tangata i te noo ki roto i tetai parataito e tangi anga tika kore tikai. Kare teia ao i te parataito tikai. Te vaira te tangata e manganui te kite ra i tei akatakaia e tetai ariki Epera taito: “E i na, te roi-mata o te aronga i takinga-kinoia ra, kare ra o ratou e akapumaana: e te mana oki tei te pae takinga-kino ra; kare ra o ratou e akapumaana.” (Koheleta 4:1) E au anere ua atu mirioni te mamae ra i raro ake i te akatereanga poritiki kino, te akonoanga, e te pae moni, e kare o ratou akaora anga, kare e “akapumaana.” E manganui tetai atu te putoto ra i te tutaki i ta ratou au pira, te utuutu ra i ta ratou tamariki, e te rave anga i te au apinga e manganui te anoanoia ra e ora atu ei. Ka turou atu teia aronga i tetai te ka akapumaana, kia akamaru mai i te mamae anga. No ratou katoatoa, kare te oraanga e mei tei akatutuia i roto i te parataito ra.

Teiea i reira, te parataito i te pae vaerua? Te piri atura te tuatua Papaa “parataito” ki te au tuatua Ereni, Peresia, e te Epera te akono ra i te manako o tetai paka me kare te aua kainga, tetai ngai akaangaroi anga, e te poniaau. Te taputou maira te Pipiria e a tetai ra ka akariroia te enua ei parataito tika tikai, tetai aua kainga no te au iti tangata ara kore. (Salamo 37:​10, 11) Te akamanako anga i teia, te kite ra tatou e ko tetai parataito i te pae vaerua e reva ia te taurekareka ra ki te nga mata e te akamaru ra i te au uaua, te akatika anga i tetai kia rekareka i te au ma to tetai taeake e te Atua. I teia tuatau, mei tei kiteia e Gustavo, te vaira taua parataito ra, e te kapiti maira i tetai au tangata e maata te numero.

I te 12 mataiti, kua iki a Gustavo kia riro mai ei orometua Katorika Roma. Ma te akatika anga a tona nga metua, kua rave atu aia i te apiipii anga akonoanga. I reira kua o atu aia ki roto i te akatangi anga imene, te akatutu anga, e te au poritiki, tei akamaataia e te ekaretia kia akakeu i te au mapu. Kua kite aia e kia akanoo tetai orometua iaia uaorai no te tangata e kare e rauka iaia kia akaipoipo. Inara, te rave ra tetai o te au orometua e te aronga ako ta Gustavo i kite i te au raveanga tau kore. I roto i te reira reva, kua akamata a Gustavo i te inu maata. Te taka meitaki ra, kare i kitea e ia te parataito i te pae vaerua.

I tetai ra, kua tatau a Gustavo i tetai aenga Pipiria tei akakite no runga i tetai enua parataito. Kua akariro te reira iaia kia manako maata no runga i te akakoroanga o te oraanga. Te tuatua ra aia: “Kua akamata au i te tatau putuputu i te Pipiria, inara kare au i marama ana i te reira. Kare rava au i kite ana e e ingoa to te Atua.” Kua akaruke aia i te ngai apiipii anga e kua aravei atu i tetai o te Au Kite o Iehova, te kimianga i te tauturu e raukai te marama i te Pipiria. Mei reira mai, kua tere viviki atu aia e kare i roaia kua akatapu i tona oraanga ki te Atua. Te apii ra a Gustavo no runga i te parataito i te pae vaerua.

Tetai Iti Tangata no te Ingoa o te Atua

Kua apii mai a Gustavo e ko to te Atua ingoa, a Iehova, kare i te akakite anga ua no te aronga apiipii Pipiria. (Exodo 6:3) E tuanga puapinga ia o te akamori anga mou. Kua apii a Iesu i tana au pipi kia pure: “E to matou Metua i te ao ra, Kia tapu toou ingoa.” (Mataio 6:9) Te tuatuaanga no runga i te aronga Kenitara tei riro mai ei au Kerititiano, kua tuatua te pipi ko Iakobo e: “Kua akara aroa mai te Atua i te etene i muatangana, e rave i tetai papaki tangata i roto ia ratou ra no tona ingoa.” (Angaanga 15:14) I te anere mataiti mua, ko ‘tetai papaki tangata no tona ingoa’ ko te putuputuanga Kerititiano ia. Te vaira ainei tetai iti tangata no te ingoa o te Atua i teia tuatau? Ae, kua kite mai a Gustavo e ko te Au Kite o Iehova taua iti tangata ra.

Te maroiroi nei te Au Kite o Iehova i roto i te 235 enua e te au ngai. To ratou numero te tere atura i te ono mirioni orometua, e tetai varu mirioni aronga inangaro ra te aere atura ki ta ratou au uipaanga. Tei kiteia no ta ratou angaanga orometua papuriki, te akatupu ra ratou i te au tuatua a Iesu: “E tutu aereia te evangelia o te basileia nei, e kako rava ake te ao katoa nei; ei kite no te pa enua ravarai; ko te openga iora ïa i reira ra.” (Mataio 24:14) Eaa ra, a Gustavo i manako ei e kua kitea e ia te parataito i te pae vaerua i roto i te taokotaianga ma te Au Kite o Iehova? Te akakite maira aia: “Kua akaaite au i taku i kite ana i roto i te ao i roto tikai i te apiipii anga ki tei kiteia e au i roto i te Au Kite o Iehova. Te tuke anga maata koia oki ko te aroa i roto tikai i te Au Kite.”

Kua tuatua akapera rai tetai no runga i te Au Kite o Iehova. Kua akakite a Miriam, e mapu vaine Brazil, e: “Kare au i kite e akapeea me mataora tikai, kare katoa i roto i toku pamiri. Te taime mua i kite atu ei au i te aroa e taangaangaia ra koia oki i roto i te Au Kite o Iehova.” Kua tuatua tetai tangata ko Christian tona ingoa e: “I tetai atianga e rave ana au i te angaanga purepure, inara kare te akonoanga i puapinga kiaku. Kua akaperepere maata au i toku turanga e taku angaanga ei enitinia. Noatu rai, i te akamata anga taku vaine i te apii i te Pipiria ma te Au Kite o Iehova, kua kite atu au i te tuke anga i roto iaia. Kua umere katoa au i te rekareka e te maroiroi o te vaine Kerititiano tei atoro atu iaia.” Eaa ra te tangata i tuatua ei i taua au mea no runga i te Au Kite o Iehova?

Eaa Oki te Parataito i te Pae Vaerua?

Okotai apinga te akariro i te Au Kite o Iehova kia tuke koia oki ko to ratou tu ariki anga i te kite Pipiria. Te irinaki ra ratou e e tikai te Pipiria e e Tuatua te reira na te Atua. No reira, kare ratou i merengo ua kia kite i te mea mama ua o ta ratou akonoanga. E porokaramu aere ua atu ta ratou no te apii uaorai e te tatauanga i te Pipiria. Te roa atu i tetai tangata i te taokotai anga ki te Au Kite o Iehova, ko te maata atu ia i tana e apii ra no runga i te Atua e Tona anoano mei tei akaariia i roto i te Pipiria.

Te akarangatira ra taua kite i te Au Kite o Iehova mei te au apinga te keia ra i te mataora mei te tangata, mei te purepure e te au manako kino. Kua akakite a Iesu: “Na te tuatua-mou kotou e akarangatira,” e te kite ra te Au Kite o Iehova e te tika ra te reira. (Ioane 8:32) Te karanga ra a Fernando, tei rave i te angaanga purepure i tetai taime e: “Te apiianga no runga i te oraanga mutu kore e akamaru anga maata ia. Kua mataku au e ka mate toku nga metua me kare ko au.” Kua akarangatira te tuatua mou ia Fernando mei tona mataku anga i te ao vaerua e te oraanga i muri ake i te matenga tei tamanakoia.

I roto i te Pipiria, te piri vaitata ra te kite anga i te Atua ki te parataito. Te tuatua ra te peroveta ko Isaia: “Kare ratou e kanga, kare oki e mea e mate ei, i toku katoa nei maunga tapu: no te mea, ka ki te enua i te kite ia Iehova, mei te vairanga tai e ki i te tai ra.”​—Isaia 11:9.

E tikai, kare e rava ua te kite kia akatupu i te au tei totouia e Isaia. Kia rave angaanga tetai tangata no runga i tana e apii ra. Kua tuatua a Fernando e: “Me tatanu tetai tangata i te au ua o te vaerua, te rave ra aia i tetai tuanga puapinga ki te parataito pae vaerua.” Te taiku ra a Fernando ki te au tuatua a te apotetoro ko Paulo, tei tuatua i te au tu meitaki ta tetai Kerititiano ka tau kia tatanu “ta te Vaerua e akatupu.” Kua akapapa aia i te reira e ko “te inangaro ïa, te rekareka, te au, te akakoromaki, te takinga-meitaki, te meitaki, te pikikaa kore, te maru, te akono meitaki.”​—Galatia 5:​22, 23.

Te kite ra ainei koe e eaa ra te taokotai anga ma tetai pupu tangata te tauta ra i te tatanu i te reira au tu ka riro ei mei tei roto i te parataito ra? Te parataito pae vaerua tei totouia e te peroveta ko Zephania ka vai i roto i taua iti tangata ra. Kua tuatua aia: “Kare oki ratou e tuatua i te tuatua pikikaa; kare oki e arero pikikaa e kitea i roto i to ratou vaa; ka kaikai oki ratou, e ka akavai ki raro, e kare ua tetai e akamataku mai.”​—Zephania 3:13.

Te Tuanga Puapinga o te Inangaro

Penei kua kite atu koe e ko te au ua mua o te vaerua tei taikuia e Paulo ko te inangaro. E tu teia te tuatua maata ra te Pipiria. Te karanga ra a Iesu: “Ko te mea teia e kite ei te tangata katoa e e pipi kotou naku, kia aroa kotou ia kotou uaorai.” (Ioane 13:35) E tika, kare te Au Kite o Iehova i apa kore. Te tupu ra te manamanata uaorai i rotopu ia ratou i tetai taime mei tei tupu rai ki ta Iesu pipi. Inara te inangaro tikai ratou i tetai e tetai, e te pure ra ratou i te turuanga a te vaerua tapu ia ratou e tatanu ra i teia tu.

Tei tupu mai, e taokotai anga takake to ratou. Kare e manako anga kopu me kare te pa enua akatakake i rotopu ia ratou. Te tika, e manganui te Au Kite tei kite ia ratou uaorai i rotopu i te tamate akakoroanga i tetai eteniki e te kiri tangata i te tuatau vaitata ki te openga o te 20 anere mataiti kua paruru i tetai e tetai noatu e ka tupu te matenga ki to ratou uaorai oraanga. Noatu e no roto mai i te “pa enua ravarai, e te au kopu ravarai, e te au iti-tangata ravarai, e te au reo katoa oki,” te rekareka ra ratou i tetai taokotai anga te ngata ra kia maramaia kia kite rava koe i te reira.​—Apokalupo 7:9.

Parataito i Rotopu i te Aronga te Rave ra i to te Atua Anoano

Kare e ngai i roto i te parataito pae vaerua no te noinoi, te akono tau kore, e te manako i tetai uaorai. Te akakiteia ra te au Kerititiano: “E eiaa e akatau atu i teianei ao: ei tu ke ra to kotou i te akaou anga o to kotou ngakau, kia taka tikai ia kotou i to te Atua ra anoano, tei meitaki, e te tau, e te apa kore oki.” (Roma 12:2) Me akono tatou i te au oraanga ma e te akono tau e te rave ra i to te Atua anoano i tetai atu au mataara, te tauturu ra tatou i te patu i tetai parataito pae vaerua e te rave angaanga ra tatou no te akatupu i te mataora. Kua kitea e Carla e kua tika tikai teia. Te akakite ra aia: “Kua apii mai toku papa iaku kia angaanga pakari e kia riro mai e naku e akono iaku i te pae moni. Noatu kua akatupu taku apiianga i te apii teitei i te tu tinamou, kua mii au i te taokotai anga a te pamiri e te tinamou ka rauka ua i te kite mei te Tuatua a te Atua i te oronga mai kia tatou.”

Ae, te rekarekaanga i te parataito pae vaerua kare e akaatea tikai i te au manamanata o te oraanga. Te maki ra rai te au Kerititiano. Te enua ta ratou e noo ra i runga te o atura ki roto i te tauetono anga tangata. E manganui te akakoromaki ra i te putaua. Noatu rai, te akono anga i tetai pirianga vaitata ma te Atua ko Iehova​—e tuanga puapinga ia o te parataito pae vaerua​—te aite anga ka akara atu tatou kiaia no te tauturu anga. Ae, te pati maira aia ia tatou kia ‘tuku tatou i ta tatou apainga kia Iehova ra,’ e ka rauka i te manganui i te akapapu mai i te mataara meitaki tana i turu atu ia ratou i roto i te au turanga ngata tikai. (Salamo 55:22; 86:​16, 17) Te taputou maira te Atua e tei reira aia ma tona aronga akamori i roto atu i te “o ra o te maru-mate.” (Salamo 23:4) Te papu anga i to te Atua tu papa ua kia turu ia tatou te tauturu ra ia tatou kia tamou marie i to tatou “au o te Atua, ko tei maata ua atu i te kite tangata,” e taviri ia ki te parataito pae vaerua.​—Philipi 4:7.

Tauturuanga i te Parataito Pae Vaerua

E reka ana te maata anga o te tangata i te atoro atu i tetai paka me kare tetai aua kainga. Te reka ra ratou i te aaere na roto i te reira me kare penei te noo anga ki runga i te nooanga e te rekareka ra i te ngai takapini anga. Na roto i tetai tu aiteite, e manganui te reka ra i te kapiti atu ki te Au Kite o Iehova. Te kite ra ratou i te akataeake anga ei akaangaroianga, e poniaau, e te akamatutu anga. Inara, ka anoanoia tetai aua kainga manea kia akonokonoia me ka vai ua atu ei parataito. Ma te aiteite, te parataito pae vaerua te vai nei i roto i teia ao kare mei te parataito rai no te mea te tatanu ra te Au Kite o Iehova i te reira, e te akameitaki ra te Atua i ta ratou au angaanga. Akapeea, i reira, e raukai i tetai te oronga atu i tetai raveanga tau tikai ki taua parataito ra?

Te mea mua, ka anoanoia koe kia kapiti atu ki te putuputuanga o te Au Kite o Iehova, e apii i te Pipiria ma ratou, e e apii i te kite Pipiria ko te reira oki te tumu anga o te parataito pae vaerua. Te karanga ra a Carla: “Kare e parataito pae vaerua me kare e kai vaerua.” Te kapiti maira teia i te tatau putuputuanga i te Tuatua a te Atua e te manako anga no runga i taau e tatau ra. Te kite tei rauka mai ka akavaitata ia koe ki te Atua ko Iehova, e ka inangaro koe iaia. Ka apii katoa koe i te tuatua atu kiaia na roto i te pure e ka pati i tona arataki anga e tana vaerua kia tauturu ia koe ia koe e rave ra i tona anoano. Kua akakite mai a Iesu kia tatou kia tamou marie i te pure anga. (Luka 11:​9-13) Te tuatua ra te apotetoro ko Paulo: “Auraka e tukutuku i te pure.” (1 Tesalonia 5:17) Te akameitaki anga no te tuatua atu ki te Atua na roto i te pure ma te irinaki papu e te akarongo maira aia ia koe e tuanga puapinga ia o te parataito pae vaerua.

I te tuatau e topa ra, ka tauiia toou oraanga kia meitaki atu na roto i taau e apii ra, i te openga ra ka inangaro koe i te akakite atu ki tetai no runga i te reira. I reira ka raukai ia koe te akarongo i ta Iesu akauenga: “Kia kakā ïa ki mua i te aroaro o te tangata nei, kia akara ratou i ta kotou angaanga meitaki, e kia akameitaki ratou i to kotou Metua i te ao ra.” (Mataio 5:16) Te akakiteanga ki tetai atu i te kite o te Atua ko Iehova e Iesu Karaiti e te akateitei anga i te aroa maata ta raua i akaari mai ki te tangata ravarai te akatupu ra i te mataora.

Te vaitata maira te tuatau e riro ei te enua katoa ei parataito tikai​—e ngai mei te aua kainga rai kare e akataero anga e e kainga tau no te tangata tiratiratu. Te vai anga o tetai parataito i te pae vaerua i roto i teia tuatau “ka tupu te kino maata” e akapapu anga ia i te mana ririnui o te Atua e e tamata anga no runga i tana ka akatupu a te tuatua ki mua.​—2 Timoteo 3:1.

I teianei, te aronga e rekareka ra i te parataito i te pae vaerua te kite ra i te tupu anga i te pae vaerua a Isaia 49:10: “Kare ratou e pongi, kare oki e kaki vai; kare oki ratou e taia i te veravera, e te rā: na tei aroa ia ratou ratou e arataki, e nana e taki aere ia ratou ki te au punavai pupui ua ra.” Kua akapapu atu a José i te tika anga o te reira. Kua moemoea aia e kia riro mai ei tangata atu imene rongonui, inara kua kite atu aia i te merengo anga maata i te tavinianga i te Atua ma te putuputuanga Kerititiano. Te karanga ra aia: “I teianei te rekareka nei au i tetai oraanga puapinga tikai. Te tinamou nei au i roto i te akataeakeanga Kerititiano, e te kite nei au ia Iehova ei Metua aroa ua taku ka irinaki.” Te mataora o José​—e to te au mirioni ua atu mei iaia rai​—te akataka meitakiia ra ia Salamo 64:10: “Ka rekareka te aronga tuatua-tika ra ia Iehova, e ka irinaki iaia.” Mei teaa atura tetai akataka anga meitaki i te parataito i te pae vaerua!

[Tataanga Rikiriki i Raro]

[Tutu i te kapi 10]

Koi rekareka ei i te parataito i te pae vaerua, e tauturu i te akatotoa atu i te reira!