“Kua Ora Tika Rai te Atu”

Ka akamanako ana mei teaa te taitaia maata o te au pipi a Iesu i te tamate angaia to ratou Atu. Kua akara anga ora kore to ratou manakonakoanga mei te kopapa rai ta Iosepha no Arimatea i akatakoto ra ki roto i te menema. Kua mate katoa tetai atu au tapapa anga e ka akarangatira a Iesu i te ngati Iuda mei raro ake i te amo a Roma.

NARINGA ko te reira te openga o te au mea, papu rai ka ngaro te au pipi a Iesu mei te aronga rai i aru ra i te au Mesia tutu ua e manganui. Inara te ora ra a Iesu! Kia tau ki te au Tuatua Tapu, kua mama atu aia ki tana au pipi i tetai au atianga kare i roa ana i muri ake i tona matenga. No reira, kua akakeuia tetai ia ratou kia ava e: “Kua ora tika rai te Atu.”​—Luka 24:34.

Kua maroia te au pipi kia paruru i to ratou akarongo i roto ia Iesu e koia te Mesia. I te raveanga i te reira, kua tou meitaki atu ratou ki tona tuakaouanga mei te mate e ko tetai akapapuanga tikai i tona Taoonga Mesia. E tikai, “kua viviki rava atura to te au aposetolo akakite anga atu i te tuakaouanga o te Atu ra o Iesu.”​—Angaanga 4:33.

Me kua rauka i tetai tangata i te akapapu mai e e mea pikikaa teia tuakaouanga​—penei na te akakeuanga i tetai o te au pipi kia akakite e kua pera me kare na te akaarianga e kua vai ua to Iesu kopapa ki roto i te menema​—kua puapinga kore i reira te Akonoanga Kerititiano i te akamataanga. Inara kare i pera ana. Te kiteanga e kua ora mai a Karaiti, kua aere atu te aronga aru ia Iesu ki te au ngai ravarai e kua akakite i tona tuakaouanga, e kua riro mai te manganui ei aronga irinaki ki roto ia Karaiti tei akatuia mai.

Eaa ra ka raukai ia koe i te irinaki i te tuakaouanga o Iesu? Eaa te akapapu anga e e tupu anga tika tikai teia?

Eaa ka Tamanako ei i te Akapapu Anga?

Te ripoti maira te au tataanga Evangeria e a no runga i to Iesu tuakaouanga. (Mataio 28:​1-10; Mareko 16:​1-8; Luka 24:​1-12; Ioane 20:​1-29)a Te akakite papu ra tetai au tuanga o te au Tuatua Tapu Ereni Kerititiano no runga i te tuanga mai o Karaiti mei te matenga.

No reira rai i akakitekiteiai to Iesu tuakaouanga e te aronga i aru iaia! Me kua akatuia mai aia ki te ora e te Atua, ko tetai nuti umere rava te reira i te ao tei akarongoia atu. Tera te aiteanga te vaira te Atua. Pera katoa, ko te aite anga e te ora ra a Iesu i teianei.

Akapeea te reira i te akakeu anga ia tatou? Kua pure a Iesu: “Teia oki te ora mutu kore, kia kite ratou ia koe i te Atua mou ra, e ia Iesu i te Mesia, i taau i tono maira.” (Ioane 17:3) Ae, ka rauka ia tatou te kite te ka oronga mai i te ora o Iesu raua ko tona Metua. Na te taangaangaanga i te reira kite, noatu me ka mate tatou, ka rauka katoa tatou kia akatuia mai, mei ia Iesu rai. (Ioane 5:​28, 29) Ka rauka ia tatou te manakonakoanga o te ora mutu kore i te enua parataito i raro ake i te Patireia i te rangi ra o te Atua i roto i nga rima o tana Tamaiti akakakaia, ko Iesu Karaiti, te Ariki o te au ariki ra.​—Isaia 9:​5, 6; Luka 23:43; Apokalupo 17:14.

No reira, te ui anga me kua akatuia mai a Iesu mei te mate ra e mea puapinga ia. Te akakeu ra i to tatou oraanga i teianei e to tatou au manakonakoanga no te tuatau ki mua. No reira oki matou e pati atu nei ia koe kia akara meitaki i nga akapapu anga e a e kua mate a Iesu e kua akatuia mai.

Kua Mate Tikai a Iesu ki Runga i te Rakau Tamamae Anga

Kua tuatua tetai aronga ekoko e, noatu kua patiaia, kare a Iesu i mate tikai ki runga i te rakau tamamae. Te karanga ra ratou e kua vaitata aia i te mate e kua akaoraia mai aia e te anuanu o te menema. Inara, te akapapu maira te au puka ka rauka e ko te kopapa ora kore o Iesu tei tukunaia ki roto i te menema.

I te mea kua tamateia a Iesu i te ngai tangata, te vaira te aronga kite i te tika e kua mate tikai aia ki runga i te rakau tamamae. Kua akapapuia tona matenga e tetai opita akaaere o te tamate anga. E tangata kite taua opita vaeau i tana angaanga te kapiti anga mai i te akapapuanga e kua mate tikai. Pera katoa, i muri mai i te akapapu anga e kua mate a Iesu i tuku ei te Kavana Roma ko Ponotio Pilato i te kopapa o Iesu kia Iosepha no Arimatea kia oreiia.​—Mareko 15:​39-46.

Kua Kiteaia te Vaarua e Kare e Kopapa i Roto

Kua akaari te menema kare e kopapa i roto i te akapapu anga mua ki te au pipi o to Iesu tuakaouanga, e te vai nei teia kiteanga e kare e rauka i te maroia. Kua tanumia a Iesu ki roto i tetai menema ou, tetai tei kore i taangaangaia ana. Kua vaitata te reira ki te ngai tamamae anga e i taua taime ka ngoie ua te reira i te kimiia. (Ioane 19:​41, 42) Kua akatika pouroa te au tataanga Evangeria e i te tae anga to Iesu au oa ki te menema i te rua o te popongi i muri ake i tona matenga, kare tona kopapa i reira.​—Mataio 28:​1-7; Mareko 16:​1-7; Luka 24:​1-3; Ioane 20:​1-10.

Kua riro te menema kare e kopapa ei mea umere anga ki te au enemi o Iesu, e pera katoa ki tona au oa. Kua roa ana e kua anoano tona au enemi i te kite iaia kia mate e kia tanuia. I te akatupuanga i ta ratou akakoroanga, kua umuumu ratou e kia tukunaia tetai tangata tiaki e kia araiia te menema. Noatu rai, i te popongi o te ra mua o te epetoma, kare e kopapa i roto i reira.

Kua rave ainei te au oa o Iesu i te kopapa mei te menema? Kare roa, i te mea e te akaari maira te au Evangeria e kua taitaia maata tikai ratou i muri ake i tona tamate angaia. Pera katoa, kare tana au pipi i aere ua atu e kia takinokinoia e kia mate no tetai apinga kua kite ratou kare i tika.

Naai i akaatea i te kopapa i roto i te menema? Kare e tau e na te au enemi o Iesu i apai i te kopapa. Noatu me kua pera ratou, papu ka tuku mai ratou i te reira kia patoi i te au umuumu anga a te au pipi e kua akatuia mai a Iesu e te ora ra. Inara kare e apinga mei tei reira rai i tupu ana, na te Atua oki i rave i te reira.

I te au epetoma i muri mai, kare te au enemi o Iesu i pau mai na te maro anga i te akakite anga a Petero: “E te au tangata o Iseraela nei, e akarongo mai kotou i teianei tuatua, ia Iesu no Nazareta, ko te tangata no ko mai i te Atua i akakiteia mai kia kotou nei i te au angaanga mana, e te mea umere, e te au akairo, ta te Atua i rave iaia i rotopu ia kotou nei, kua kite katoa oki kotou uaorai. Koia ra i tukuia mai ia kotou i te akakoro mou, e te akono mamao anga a te Atua, i raukaʼi ia kotou, akasatauro iora, e tamate takiri atura i te rima o te akono kore ra: Koia oki ta te Atua i akatu mai nei, kua matara oki iaia te tapeka o te mate, no te mea kare rava oki aia e mou i te reira. Te na ko maira oki a Davida iaia, ‘Kua tuku au ia Iehova ei mua ua rai iaku, . . . ka moe katoa oki toku kopapa nei ma te tiaki: Kare oki koe e vaoo i toku vaerua i ade; kare oki koe e tuku i to Mea Tapu ra, kia kite i te pe.’”​—Angaanga 2:​22-27.

E Manganui tei Kite Atu ia Iesu tei Akatuia Mai

I roto i te puka o Angaanga, kua akakite te tata Evangeria ko Luka e: “Ko tana [au apotetoro] katoa ïa i akakite [ia Iesu] i te ora anga, i muri ake i tona mate anga, ma te akairo ara kore e manganui; e a ngauru anga ona po i te akara angaia e ratou, e te tuatua anga atu i te tuatua no te basileia o te Atua.” (Angaanga 1:​2, 3) Kua kite atu tetai au pipi ia Iesu tei akatuia mai i tetai au atianga​—i roto i te aua kainga, ki runga i te mataara, i te tuatau kaikai anga, i te pae Tai i Tiberia.​—Mataio 28:​8-10; Luka 24:​13-43; Ioane 21:​1-23.

Kua uiui te aronga kimi apa i te tika tikai o te mama anga mai. Te karanga ra ratou e kua maani ua te aronga tata i te au tataanga, me kare kua taiku ratou i te au tarevake i roto i te reira. Te tika anga, te akapapu ra te au tuke anga iti ua i roto i te au tataanga Evangeria e kare i o mai ana te akatika anga muna. Ka akamaataia to tatou kite anga ia Iesu me oronga mai tetai tangata tata i te au akakite anga te tauturu ra i tetai au tataanga o te au tupu anga papu tikai i roto i te oraanga o Karaiti i te enua nei.

E tamanako ua anga ainei te au mama anga i muri ake i te tuakaouanga o Iesu? Ko tetai ua atu au maro anga akapera kare ia e tau, i te mea kua kiteaia aia e te manganui. I roto ia ratou ko te au tangata tautai, te au vaine, tetai tavini angaanga, e pera tei ekoko ra ko Toma, tei papu ua i te kite anga aia i te akapapu anga kare e patoiia e kua akatuia mai a Iesu mei te matenga. (Ioane 20:​24-29) I tetai au atianga, kare te au pipi a Iesu i te akamata anga i kite atu i te Atu tei akatuia mai. I tetai atianga okotai, e tere atu i te 500 tangata tei kite atu iaia, te maata anga ia ratou te ora ra rai i te taangaangaanga te apotetoro ko Paulo i taua tupu anga ei akapapu anga i tona paruru anga i te tuakaouanga.​—1 Korinetia 15:6.

A Iesu tei Ora ra te Akakeu ra i te Tangata

Te tuakaouanga o Iesu kare ua i te tumu manako tarotokaka anga me kare kia maroia. Te tika e te ora ra aia kua akakeu i te au tangata i te ngai ravarai na roto i tetai mataara papu tikai. Mei te anere mataiti mua, e manganui te au tangata tei ariu mai mei te inangaro kore me kare te patoi anga i te Akonoanga Kerititiano e kia papu tikai e ko te akonoanga mou ia. Eaa tei akataui ia ratou? Kua akapapu te apiianga i te au Tuatua Tapu kia ratou e kua akatu te Atua ia Iesu kia ora ei vaerua ora kaka i te rangi ra. (Philipi 2:​8-11) Kua akono ratou i te akarongo ki roto ia Iesu e ki roto i ta te Atua ko Iehova apinga e orai na roto i te atinga oko o Karaiti. (Roma 5:8) Kua kitea e te reira au tangata tataki tai te mataora tikai na te raveanga i to te Atua anoano e te akono rotaianga ma te au apiianga a Iesu.

Ka akamanako ana no runga i te aite anga e kia riro ei Kerititiano i te anere mataiti mua. Kare te tu ngateitei, te mana, me kare apinganui. Ei tuke anga, e manganui te au Kerititiano mua ‘kua āriki ua i te noni anga i to ratou apinga ma te rekareka’ no to ratou akarongo. (Ebera 10:34) Kua umuumu te Akonoanga Kerititiano i te oraanga akaatinga e te takinokino anga e i roto i te au turanga e manganui kua tupu te tamate anga.

I mua ake ka riro mai ei ei aronga aru ia Karaiti, kua rauka i tetai te au manakonakoanga meitaki no runga i te tu teitei e te apinganui. Kua apii a Saula o Tareso i raro ake i te puapii Ture rongonui ko Gamaliela e te akamata ra i te akarongonui iaia uaorai i roto i nga mata o te ngati Iuda. (Angaanga 9:​1, 2; 22:3; Galatia 1:14) Inara, kua riro mai a Saula e ko te apotetoro ko Paulo. Kua kopae aia e tetai atu e manganui i te turanga teitei e te mana te oronga maira teia ao. No teaa ra? E raukai i te akatotoa i te manakonakoanga mou tei akanooia ki runga i te au taputou a te Atua e no runga i te tika anga e kua akatuia mai a Iesu Karaiti mei te matenga. (Kolosa 1:28) Te puareinga ra ratou i te mamae no tetai tumu anga kua kite ratou e e mea tika tikai.

Te tika katoa ra te reira ki te au mirioni o teia tuatau. Ka kite koe ia ratou i roto i te au putuputuanga o te Au Kite o Iehova i te ao katoa. Te pati maana atu nei te Au Kite o Iehova ia koe kia akono i te ra akamaara anga i te matenga o Karaiti, te ka raveia i muri ake i te opunga ra a te Tapati, Aperira 8, 2001. Ka mataora ratou me tae atu koe no taua atianga ra e i ta ratou au uipaanga pouroa no tetai apii Pipiria te ka raveia i to ratou au Are Uipaanga Patireia.

Eaa i kore ei e apii maata atu, kare no runga ua i te matenga e te tuakaouanga o Iesu pera katoa no runga i tona oraanga e te au apiianga? Te pati mai nei aia ia tatou kia aere atu kiaia. (Mataio 11:​28-30) E rave angaanga i teianei e raukai te kite mou no runga i te Atua ko Iehova e Iesu Karaiti. Te raveanga i te reira ko tona aiteanga ko tetai oraanga mutu kore i raro ake i te Patireia o te Atua i roto i nga rima o tana Tamaiti akaperepere ra.

[Tataanga Rikiriki i Raro]

[Au Tutu i te kapi 7]

Te kite ra te au mirioni i te mataora mou ei aronga aru ia Iesu Karaiti

[Akameitakianga no te Tataanga i te kapi 6]

From the Self-Pronouncing Edition of the Holy Bible, containing the King James and the Revised versions