Au Akameitakianga o te Patireia Ka Rauka ia Koe

KUA kite meitaki tikai te apotetoro Kerititiano ko Paulo i tetai au reo kiteia o tona tuatau. Kua rauka iaia tetai turanga kite aiteite ki tetai apii teitei i teia tautau. Kua rekareka aia i te au turanga meitaki e te au tikaanga ei tangata enua Roma. (Angaanga 21:​37-40; 22:​3, 28) Ka rauka ua i teia au taoonga meitaki i te akariro iaia kia apinganui e te rongonui. Inara, te karanga ra aia: “Ko taua au mea apinga naku ra, ko taku ïa i akariro akenei ei mea puapinga kore i te Mesia nei . . . e kua riro ïa ei teita iaku, kia rauka iaku te Mesia.” (Philipi 3:​7, 8) Eaa ra a Paulo i tuatua akapera ei?

Kua kiteia i mua ana e ko Saula o Tareso e ko tei takinokino i te aronga “i mou i taua tuatua ra,” kua riro mai a Paulo ei tangata irinaki i muri ake i te rauka anga te orama o Iesu tei akatuia mai e tei akakakaia. (Angaanga 9:​1-19) Kia Paulo, kua riro teia kiteanga tei tupu ki runga i te mataara ki Damaseko ei akapapu anga tikai e ko Iesu te Mesia tei taputouia, me kare te Karaiti, te tutara a te tuatau ki mua o te Patireia tei taputouia. Kua akatupu katoa te reira i tetai taui anga maata tikai i roto i te oraanga o Paulo, mei tei taikuia mai e tana tuatua ririnui tei akakiteia i runga akenei. Tera te aiteanga, na roto i te tu ngakau tae e te tika, kua tataraara a Paulo.​—Galatia 1:​13-16.

I roto i te Pipiria, te verepa kia “tataraara” te uri putuputuia ra mei tetai tuatua Ereni te aiteanga tikai “kiteanga i muri mai,” e kare e ko te “kiteanga i mua ana.” No reira, te o maira ki roto i te tataraara anga te taui anga i to tetai manako, tu, me kare akakoroanga, te kopae anga i to tetai tu oraanga i mua ana kare ei mea merengo anga. (Angaanga 3:19; Apokalupo 2:5) I roto i to Paulo turanga, kare aia i tuku ua i taua tupu anga puapinga i runga i te mataara ki Damaseko e kia vai ei mea akakeu i te ngakau me kare tetai kiteanga i te pae vaerua. Kiaia e akaaraanga te reira ki te tika anga e e mea puapinga kore tona tu oraanga i mua ana, te kopae anga ia Karaiti. Kua kite katoa aia, e raukai te puapinga mei tona kite ou ia Karaiti, kia rave aia i tetai apinga e raukai i te akatikatika i tona oraanga.​—Roma 2:4; Ephesia 4:24.

Tetai Taui Anga tei Apai Mai i te Au Akameitakianga

I mua atu ana, kua rauka maata mai to Paulo kite anga i te Atua mei te pupu Pharisea, o te reira e mema aia. Kua kapiti mai ki roto i ta ratou au irinaki anga te manako e te peu a te tangata. No te tu papaki tai i te pae akonoanga, kua arataki keia to Paulo tu maroiroi e te aruaru anga. Noatu te manako ra aia e te tavini ra aia i te Atua, te tamaki tika atura aia iaia.​—Philipi 3:​5, 6.

I muri mai i te rauka anga te kite tika tikai no runga ia Karaiti e tana tuanga angaanga i roto i ta te Atua akakoroanga, kua kite atu a Paulo e te aro atura aia i tetai iki anga: Kia vai ua aia ei Pharisea e kia rekareka tamou ua atu i taua turanga e te tu ngateitei, me kare kia taui ainei aia i tona tu oraanga e kia akamata i te rave i tei anoanoia e raukai to te Atua mareka anga? Ma te mataora, kua rave a Paulo i te iki anga tau, no te mea kua tuatua aia: “Kare ua au i akama i te evangelia a te Mesia ra: no te mea, ko te mana ïa o te Atua, kia ora te tangata ravarai e akarongo ra; ko te ngati Iuda ana, e te Eleni katoa oki.” (Roma 1:16) Kua riro mai a Paulo ei tangata tutu maroiroi i te tuatua meitaki no runga ia Karaiti e te Patireia.

E manganui te au mataiti i topa atu, kua akakite a Paulo ki tona au taeake Kerititiano: “Kare au i manako iaku uaorai nei e kua rauka: okotai aku mea e rave nei; i te akangaro anga i te au mea i muri ra, e te uapou anga atu i tei mua ra, Te aruaru atu nei au na te akairo, kia rauka iaku te tutaki i ta te Atua ra kapiki anga no runga maira i te Mesia nei ia Iesu.” (Philipi 3:​13, 14) Kua puapinga mai a Paulo i te tuatua meitaki no te mea kua puareinga ua aia no te akaruke i te mea tei akauri ke iaia mei te Atua e kua aruaru aia ma te ngakau katoa i te au akakoroanga te tau ra ki ta te Atua akakoroanga.

Eaa Taau ka Rave?

Penei koi rongo ua akenei koe i te tuatua meitaki o te Patireia. Te reka ra ainei koe i te manakonakoanga no te noo anga ki roto i tetai parataito apa kore? Ka tau te reira, no te mea kua rauka pouroa ia tatou tetai anoano i roto roa kia ora e kia rekareka i te oraanga ma te au e te tinamou. Te akakite ra te Pipiria e kua tuku te Atua “i te manako i to teianei ao” ki roto i to tatou ngakau. (Koheleta 3:11) No reira e mea natura ua no tatou kia manakonako i tetai tuatau e raukai i te tangata te noo e tuatau ua atu ma te au e te mataora. E ko te reira ta te tuatua meitaki o te Patireia e oronga maira.

Inara, kia akariro i taua manakonakoanga ei mea tika tikai, ka anoanoia koe kia kimikimi e kia akara tikai no runga i te tuatua meitaki. Te ako maira te apotetoro ko Paulo: “Kia taka tikai ia kotou i to te Atua ra anoano, tei meitaki, e te tau, e te apa kore oki.” (Roma 12:2) No reira, mei ia Paulo rai, i muri ake i te raukaanga mai te kite e te marama, kia iki koe.

I tetai tua, penei e au irinaki anga toou no runga i te tuatau ki mua. Kia akamaara e kua rauka katoa ia Saula te au manako no runga i to te Atua anoano i mua ake ka riro mai ei aia e ko te apotetoro ko Paulo. Inara koi kore ei i tapapa atu i tetai akakite anga temeio mei te Atua, eaa i kore ei e akara atu i taua manako ra? E ui kia koe uaorai: ‘Kua kite ainei au i to te Atua anoano no te tangata ravarai e te enua? Eaa taku akapapu anga ka oronga kia akatinamou i toku au irinaki anga? Ka vai tau ainei taku akapapu anga i raro ake i te akara matatio anga i te Tuatua a te Atua, te Pipiria?’ Kare aau apinga e ngere mei te akara matatio anga i taau au irinaki anga akonoanga na teia tu. Te tika, ka inangaro koe i te rave akapera no te mea te raurau maira te Pipiria ia tatou: “E akara matariki marie i te au mea katoa ra; e te meitaki ra e tāpu marie.” (1 Tesalonia 5:21) I te mea e, kare ainei e ko ta te Atua tu mareka anga tei manako maataia?​—Ioane 17:3; 1 Timoteo 2:​3, 4.

Penei ka taputou mai te au arataki akonoanga i tetai tuatau mutu kore kia tatou. Inara me kare taua taputou i akanooia ki runga i te au apiianga a te Pipiria, kare te reira e tauturu mai ia tatou kia rauka te au akameitakianga o te Patireia o te Atua. I roto i tana Ako i te Maunga, kua akamatakite tikai a Iesu: “Kare te aronga e tuatua mai iaku e, E te Atu, e te Atu, e ope katoatoa i te tae ki te basileia ra ki te ao; ko tei akono ra i te anoano o taku Metua i te ao ra.”​—Mataio 7:21.

Ka akara ana i ta Iesu tuatua pakari no te raveanga i te anoano o tona Metua e ko te turanga e raukai te au akameitakianga o te Patireia o te Atua. Tera te aite anga, ko tei manakoia e e tu Atua kare i ariki uaia e te Atua. Te tika, kua karanga atu a Iesu: “E manganui te ka tuatua mai kiaku i taua rā ra, E te Atu, e te Atu, kare aina kua apii matou ma toou ingoa; e kua tuaru i te au demoni i toou ingoa; e kua rave i te au akairo e manganui ma toou ingoa? Ko taku ïa e karanga atu, Kare takiri au i kite ia kotou: ka aere ke atu kotou, te aronga rave tuatua kino.” (Mataio 7:​22, 23) Te taka meitaki ra, e ko te apinga puapinga koia oki e kia papu tatou e te marama tika ra tatou e eaa tikai te tuatua meitaki o te Patireia e oti kia rave rotai ma te reira.​—Mataio 7:​24, 25.

Ka Rauka te Tauturu

E maata atu i te 100 mataiti, kua tutu aere ana te Au Kite o Iehova i te tuatua meitaki o te Patireia o te Atua. Na roto i te kapi neneiia e te tuatuaanga, te tauturu ra ratou i te au tangata takapini i te ao kia rauka te kite tika tikai no runga i te Patireia, e eaa ta te reira au akameitakianga ka apai mai, e eaa ta tetai ka rave e raukai te au akameitakianga.

Te akamaroiroi atu nei matou ia koe kia ariu mai ki te au tuatua te tutuia ra e te Au Kite o Iehova. Na te arikianga e te raveanga i te tuatua meitaki, ka rauka ia koe te au akameitakianga mekameka kare ua i teianei pera katoa a te tuatau ki mua me tutara te Patireia o te Atua i te enua katoa.​—1 Timoteo 4:8.

E rave angaanga i teianei, te vaitata maira oki te au akameitakianga o te Patireia o te Atua!

[Au Tutu i te kapi 7]

Na roto i te kapi neneiia e te tuatuaanga, te tutu ra te Au Kite o Iehova i te tuatua meitaki o te Patireia o te Atua