Akapeea Me Autu i te Au Manako Papu Kore

● Kua koumuumu a Asapha: “E tamā anga puapinga kore tikai toku e toku nei ngakau, e te orei anga oki i toku rima i te apa kore: Kua tairoia ra au e po ua atu te rā, e kua pāpāia kare e popongi e vata.”​—Salamo 73:​13, 14.

● Kua taitaia a Baruka: “E ae oki au nei e! kua kapiti katoa mai a Iehova i te mii ki toku mamae nei; kua roiroi au i toku ngengeti ua anga, e kare oku e akaeaanga i kitea.”​—Ieremia 45:3.

● Kua aue a Naomi: “E tumatetenga maata oki ta te Mana katoatoa i tuku mai iaku nei. I aere oki au ma te ki, e kua akaoki akaou mai a Iehova iaku ma te ngere: eaa oki kotou i karanga mai ei iaku ia Naomi, tei akaapa mai a Iehova iaku, e kua tuku mai te Mana katoatoa i te tumatetenga iaku nei?”​—Ruta 1:​20, 21.

KUA ki te Pipiria i te au akaraanga e manganui o te aronga akamori tiratiratu ia Iehova i tetai taime kua taitaiaia ma te ngakau akamaroiroi kore. Ko te tika oki ei au tangata apa ua kua kite pouroa ana tatou i taua manako mei tetai taime ki tetai taime. Penei ka ngoie ua tetai ia tatou kia akamaroiroi koreia​—penei ma te tu tangi uaorai​—e i tetai atu tei noo ki roto i te au kite anga kino tikai.

Inara, me kare e akaraia, ka rauka i teia au manako ngakau i te akakino i toou pirianga ma tetai atu e ma te Atua ko Iehova. Kua akakite tetai vaine tei ngoie ua i te manako tangi-uaorai e: “Kua patoi au i te au pati anga e manganui no te au angaanga oaoa no te mea kua manako au e kare au i te taeake tau no tetai atu i roto i te putuputuanga.” Mei teaa te kino o te au tupu anga o taua manako ra ki runga i to tetai oraanga! Eaa taau ka rave no te patoi atu i te reira?

E Akavaitata kia Iehova

I roto ia Salamo 73, kua tata tika atu a Asapha no runga i tona tu oripu ua. Me akaaite atu i tona turanga ki te oraanga puapinga o te aronga kino ra, kua vareae tikai aia. Kua kite atu aia e e aronga nengonengo e te ta ua te au tangata akono kore i te Atua, e te manuia ra ratou i teia. Kua akakite i reira a Asapha i te manako ekoko anga no runga i te puapinga o tona aruaruanga i tetai oraanga tuatua tika.​—Salamo 73:​3-9, 13, 14.

Kua kite ana ainei koe, mei ia Asapha rai, i te tu manuia o te aronga kino te akaari ra i to ratou tu tarevake? Akapeea a Asapha i te autu anga i tona manako papu kore? Te na ko maira aia: “Iaku ra i kimi kia kite au i taua mea nei, e mea pikipiki ïa iaku: Kia aere ra au ki roto i te ngai-tapu a te Atua ra, kite akera au i to ratou openga.” (Salamo 73:​16, 17) Kua rave a Asapha i te au takainga papu na te urianga kia Iehova na roto i te pure. Kia taiku i te reo tei tuatuaia i muri mai e te apotetoro ko Paulo, kua taomi a Asapha i te “tangata e akono i ta te kopapa” na te akaaraanga i “ta te Vaerua ra” i roto iaia uaorai. Ma te orama pae vaerua tei akaouia, kua marama aia e te rikarika ra a Iehova i te kino e kare e roaia ka akautungaia te aronga kino.​—1 Korinetia 2:​14, 15.

Mei teaa ra te puapinga kia tuku koe i te Pipiria kia tauturu ia koe kia akara tika atu ki runga i te oraanga tika tikai! Te akamaara maira a Iehova kia tatou e kare aia i matapo ki ta te tangata kino e rave ra. Te ako ra te Pipiria: “Auraka e vavare; kare ua te Atua e vare: ko ta te tangata e ruru ra, ko tana ra ïa e kokoti . . . Auraka tatou e roiroi i te takinga-meitaki.” (Galatia 6:​7-9) Ka tuku a Iehova i te aronga kino “ki te ngai pateka”; ka akariro aia ia ratou “kia mate rava atu.” (Salamo 73:18) Ka autu ua atu te tika tu-Atua i te openga ra.

Ka tauturu tetai porokaramu tamou no te kai anga i te kai vaerua i to Iehova kaingakai e te taokotai meitaki anga ma te iti tangata o te Atua ia koe kia akaketaketa i toou akarongo e kia autu i te akamaroiroi kore me kare tetai atu au manako papu kore. (Ebera 10:25) Mei ia Asapha rai, na te noo vaitata anga ki te Atua, ka kite koe i tona tauturu anga aroa ua. Te karanga ra Asapha: “Ei ia koe rai au; na to rima katau i mou mai iaku. Ka riro rai koe i te arataki iaku i taau ra tuatua, e te openga iora ka apai ei koe iaku ki te ao.” (Salamo 73:​23, 24) Kua apii tetai Kerititiano tei takinga kinoia mei te tamariki anga i te pakari o teia au tuatua. “Te kapiti vaitata anga ma te putuputuanga,” i nana ei, “kua akaari mai kiaku i tetai tua tuke o te oraanga. Kua kite atu au e e inangaro tikai to te aronga pakari Kerititiano, e kare ratou i te au akava mari ra e aronga tiaki.” Ae, te rave ra te aronga pakari Kerititiano e te tangi aroa i tetai tuanga puapinga no te akakore anga i te au manako ngakau mamae.​—Isaia 32:​1, 2; 1 Tesalonia 2:​7, 8.

E Ariki i ta Iehova Ako Anga

Kua aue tikai a Baruka, te tekeretere o te peroveta ko Ieremia, no te taitaia maata o tana angaanga. Inara, kua tou takinga meitaki atu a Iehova i to Baruka manako ki runga i te mea tika tikai. “Te kimi ra ainei koe i te meitaki maata noou uaorai? Auraka e kimiia: i na oki, te apai mai nei au i te kino ki runga i te tangata katoa ra, te tuatua mairā Iehova: e oronga atura au i te ora noou ei apinga, i te au ngai katoa taau e aere na.”​—Ieremia 45:​2-5.

Ma te tuatua tika kua akamarama atu a Iehova e kua riro to Baruka anoano anga noinoi uaorai e ko te tumu o tona taitaia. Kare i kitea e Baruka te rekareka i roto i tana angaanga orongaia mai e te Atua koi kimi ei i taua taime rai i te au apinga maata nona uaorai. Penei ka kitea e koe e ko tetai takainga papu no te autuanga i te akamaroiroi kore koia oki kia kopae ke i te au tamanamanata e kia takave i te au o te manako no ko mai i te merengo anga tu Atua.​—Philipi 4:​6, 7.

Kare te vaine takaua ko Naomi i tuku ana i te taitaia kia akaatea iaia i Moabi i te takake anga tana tane e te nga tamaroa e rua tei mate ra. Inara, te vaira te akakite anga no tetai tuatau kua manako kino aia no runga iaia e tana nga unonga. I te tuaruanga ia raua kia aere, kua karanga atu a Naomi: “E tumatetenga maata ra toku i to korua, i te rima o Iehova i rave mai iaku nei.” I te tae anga aia ki Betelehema, kua maro atu aia: “Auraka au kia tuatuaia ia Naomi [“Rekareka”], kia tuatuaia ra au ia Mara [“Mamae”]; e tumatetenga maata oki ta te Mana katoatoa i tuku mai iaku nei.”​—Ruta 1:​13, 20.

Inara, kare a Naomi i akaatea iaia uaorai i roto i te au puakapa mii anga​—te mamao anga mai mei ia Iehova e tona iti tangata. I Moabi kua rongo ana aia e “kua kite mai a Iehova i tona au tangata, kua oronga mai i te kai na ratou.” (Ruta 1:6) Kua marama aia e ko te ngai meitaki nona koia oki ma te iti tangata o Iehova ra. Kapipiti ma tana tamaine ongai ko Ruta, kua oki atura a Naomi ki Iuda e kua arataki karape ia Ruta e akapeea aia me rave angaanga ki to ratou kopu tangata ko Boaza, tei oko iaia ra.

Ma te aiteite i teia tuatau, ko te aronga tiratiratu tei ngere i to ratou oa i roto i te mate te autu manuia ra ma te mamae ngakau na te rave maroiroi anga i roto i te putuputuanga Kerititiano. Mei ia Naomi rai, te taangaanga ra ratou i te au mea pae vaerua, te tatauanga i te au ra i te Tuatua a te Atua.

Au Puapinga mei te Taangaangaanga i te Pakari Tu Atua

Te oronga maira teia au tataanga Pipiria i te kite oonu e akapeea tetai me autu i te au tupu anga o te manako papu kore. Kua kimi a Asapha i te tauturu i to Iehova ngai akamori e kua tatari marie ki runga ia Iehova. Kua ariki atu a Baruka i te ako anga e kua kopae ke i te au manamanata i te pae apinga. Kua rave maroiroi a Naomi i roto i te iti tangata o Iehova, te akapapaanga i te vaine mapu ko Ruta no tana au akameitakianga i roto i te akamori anga i te Atua mou.​—1 Korinetia 4:7; Galatia 5:26; 6:4.

Ka rauka ia koe te autu i te akamaroiroi kore e tetai atu au manako papu kore na te manakonakoanga i te au autu anga tu-Atua ta Iehova i oronga ki tona iti tangata, ma te tataki tai me kare ei pupu. No te reira, e akamaaraara no runga i te angaanga teitei a Iehova o te aroa i te oronga anga mai i te oko noou. E ariki i te aroa ngakau tika o te taeake Kerititiano. E manakonako atu ki runga i toou oraanga i roto ta te Atua ao ou i mua ua atu. E kia ariu mai koe mei ia Asapha rai: “E mea meitaki ra iaku kia akavaitata atu ki te Atua: kua irinaki au i te Atu ra, ia Iehova, kia akakite rai au i taau katoa ra au angaanga.”​—Salamo 73:28.