Eaa ra Ka Apii ei i te Pipiria?

E MAPU ua a Bill, ma te maroiroi, kite meitaki, e te puapinga i te pae moni. Inara, kare aia i merengo ua. Kare ona akakoroanga i te oraanga, e kua akataitaia oonu te reira iaia. Te tautaanga no te kimi i te akakoroanga i te oraanga, kua akara atu aia i te au akonoanga tukeke, inara kare i kitea e ia tana e kimi ra. I te 1991 kua aravei atu aia i tetai o te Au Kite o Iehova tei akaruke mai kiaia i tetai puka te uriuri ra no runga i ta te Pipiria e akakite ra no runga i te puapinga o te oraanga. Kua akapapaia tetai apii anga Pipiria e raukai ia Bill i te akara atu i teia tumu manako e pera katoa i tetai atu.

Kua maara ia Bill: “Kua raveia ta maua apii mua, e no te mea kua akara putuputu maua ki roto i te Pipiria, kua kite au e ko teia taku i kimi ana. E oraora tikai te au pauanga i roto i te Pipiria. I muri mai i taua apii, kua akaoro atu au ki runga i te au maunga, kua eke ki vao i toku toroka, e kua aue tikai ma te rekareka. Kua mataora au e te apii nei au i te openga ra i te au pauanga ki taku au ui anga.”

E tika, kare te katoatoa tei kite i te tuatua mou Pipiria e aue maata ma te rekareka. Inara, te apiianga i te au pauanga ki te au ui anga puapinga o te oraanga e kite anga rekareka tikai no te manganui. To ratou manako mei te tangata rai i roto i ta Iesu parapore tei kite atu i tetai apinganui tei uunaia i roto i te enua. Kua tuatua a Iesu e: “No te rekareka i te reira, kua oko aere aia i te apinga tini ravarai nana ra, e kua oko atura i taua kainga ra.”​—Mataio 13:44.

Te Taviri ki Tetai Oraanga Puapinga

Kua manakonako ana a Bill no runga i tetai ui anga puapinga, Eaa te akakoroanga o te oraanga? Kua tauta pakari te aronga kimi kite, te aronga apiipii akonoanga, e te au taineti no te pau i taua ui anga no etai au mareniamu. Kua tataia te au voriumu e manganui e te au tangata tataki tai tei tauta i te pau i te reira. Kua puapinga kore ta ratou tauta anga, e kua taopenga te manganui e kare taua uianga e pauia. Noatu rai, te vaira tetai pauanga. Noatu e mea oonu, kare i te mea ngata. Te akamaramaia ra te reira i roto i te Pipiria. Te taviri ki tetai oraanga mataora e te puapinga ko teia: Kia rauka ia tatou tetai pirianga tau ma Iehova, ko Tei Anga mai ia tatou e ko to tatou Metua i te rangi ra. Akapeea e raukai ia tatou te reira?

Te vaira e rua nga turanga akaraanga tuke no te akavaitataanga ki te Atua. Ko te aronga te akapera ra te mataku ra iaia e te aroa ra iaia. Ka akamanako ana tatou e rua nga irava te turu ra i taua tuatua. I te tuatau roa i topa, kua apii meitaki te ariki pakari ko Solomona no runga i te tangata ravarai e kua rekoti i tana au kimikimi anga i roto i te puka Pipiria o Koheleta. Te taopenga anga i tana i kite mai, kua tata aia: “E akarongo ana tatou i te akaotianga o taua au tuatua katoa nei; Ko te Atua te mataku atu, e akono oki i tana au akauenga: ko ta te tangata katoa ïa e pini ua ake.” (Koheleta 12:13) I te au anere mataiti i muri mai, i te ui angaia e eaa te akauenga maata roa atu i roto i te Ture tei orongaia kia Mose, kua pau atu a Iesu: “E anoano atu koe i to Atua ia Iehova ma to ngakau katoa, e ma to vaerua katoa, e ma to manako katoa.” (Mataio 22:37) Kua akaraanga tuke ainei kia koe kia mataku tatou i te Atua e kia aroa katoa iaia? Ka akara ana tatou i te puapinga o te mataku e te aroa e akapeea raua i te angaanga kapipiti anga no te akatupu i tetai pirianga merengo ua ma te Atua.

Eaa te Aiteanga no te Mataku i te Atua

E mea puapinga te mataku akangateitei ua me ka akamori ariki ua tatou i te Atua. Te karanga ra te Pipiria: “Ko te akamataanga o te pakari ra, koia te mataku ia Iehova ra.” (Salamo 111:10) Kua tata te apotetoro ko Paulo: “E tāpu marie rai tatou i taua aroa ua ra, kia akamori tatou i te Atua ma te kiteaia mai, ma te akaaka e te mataku.” (Ebera 12:28) Ma te aiteite, ko tetai angera e rere ra na roto i te mareva tei kitea i roto i tetai orama e te apotetoro ko Ioane kua akamata i tana akakite anga i te tuatua meitaki ma teia au tuatua: “Ka mataku i te Atua, e akakakā iaia.”​—Apokalupo 14:​6, 7.

Ko teia mataku i te Atua, e mea puapinga tikai ki tetai oraanga puapinga, kare i aiteite ki te mataku vinivini. Penei ka mataku tikai tatou me kua tamatakuia tatou e tetai tangata ta ua e te kino roa. Inara te mataku i te Atua​—me kare te mataku akono atua​—e mea umere e te ngateitei oonu roa no Tei Anga ra. Te kapiti maira i te mataku tau no te akamareka kore i te Atua no te mea koia te Akava Teitei e te Mana Katoatoa, tei iaia te mana e te mana akaaere no te akautunga i te aronga tei akarongo kore.

Angaanga Kapipiti te Mataku e te Aroa

Noatu rai, kare a Iehova e inangaro i te tangata kia tavini iaia no te mea te mataku ra ratou iaia. E Atua aroa meitaki tikai a Iehova. Kua akakeuia te apotetoro ko Ioane kia tata: “Ko te Atua oki te aroa.” (1 Ioane 4:8) Kua akono aroa ua te Atua ko Iehova i te tangata ravarai, e te inangaro ra aia i te au tangata kia ariu mai na te aroa anga iaia. Akapeea ra taua aroa i te rotai anga ma te mataku akono atua? Te piri vaitata ra nga mea e rua. Kua tata te tata taramo: “Te tuatua-muna a Iehova ra, tei te aronga ïa i mataku iaia ra.”​—Salamo 25:14.

Ka akamanako ana no runga i te tu ngateitei e te umere tei rauka i tetai tamaiti no tetai papa matutu e te pakari. I taua taime rai, ka ariu atu taua tamaiti ki te tu aroa o tona papa. Ka irinaki taua tamaiti i te papa e ka akara atu kiaia no te arataki anga, te papu anga e ka apai mai teia arataki anga i te au puapinga. Ma te aiteite, me aroa tatou e te mataku ia Iehova, ka akarongo tatou i tana arataki anga, e ka akapuapinga teia ia tatou. Ka akara i ta Iehova i tuatua no runga i to Iseraela: “Naringa e, ko te tu ïa o to ratou ngakau i roto ia ratou, kia mataku mai ratou iaku, e kia akono tikai i taku au akauenga katoa, auraka e tukumoe, kia meitaki ratou, e ta ratou au tamariki e tuatau ua atu!”​—Deuteronomi 5:29.

Ae, te taki atura te mataku akono atua kare ki te tuikaa mari ra ki te tu rangatira, kare ki te maromaroa mari ra ki te rekareka. Kua totou a Isaia no runga ia Iesu: “E maata oki tona kite i te mataku ia Iehova.” (Isaia 11:3) E kua tata te tata taramo: “E ao to te tangata i mataku ia Iehova, tei rekareka maata i tana ra au akauenga.”​—Salamo 112:1.

E tikai, kare e rauka ia tatou te mataku i te Atua e te aroa iaia me kare tatou i kite tikai iaia. No reira oki i puapingai tetai apii anga i te Pipiria. Te tauturu maira taua apii anga ia tatou kia marama i to te Atua tu peretana e kia ariki meitaki i te tu pakari no te aruanga i tana arataki anga. Ia tatou e akavaitata atura ki te Atua, ka inangaro tatou i te rave i tona anoano e te akakeuia ra tatou kia akono i tana au akauenga, te kiteanga e ka akapuapinga te reira ia tatou.​—1 Ioane 5:3.

E rekareka anga i te kite e tei runga tetai i te mataara tau te taki ra ki te ora. Kua tika teia kia Bill, tei taikuia i te akamata anga. Kua tuatua mai aia i ou akenei: “I roto i te iva mataiti tei topa ra mei taku apii mua anga i te Pipiria, kua tupu toku pirianga ma Iehova. Te rekareka mua i te akamata anga tei kiteia e au kua tupu atu ki roto i tetai tu oraanga rekareka tikai. E akaraanga papu tamou tikai toku i te oraanga. Kua ki toku au ra i te au angaanga puapinga tikai, kare ma tetai kimi anga kare e akakoro anga no te rekareka. Kua riro mai a Iehova ei peretana tika tikai kiaku, e te kite nei au e te manako maira aia iaku.”

I roto i te atikara ka aru mai, ka akara mamao atu tatou e akapeea te kite anga ia Iehova i te apaianga mai i te rekareka e te au puapinga ki te aronga te taangaanga ra i te reira i roto i to ratou au oraanga.

[Tataanga i te kapi 5]

Te akavaitataanga ki te Atua ko te aiteanga te aroa ra tatou iaia e te mataku ra iaia

[Tutu i te kapi 6]

Kua rekareka a Iesu i te mataku anga ia Iehova